[صديق عيدروس]

المشاركة الأصلية كتبت بواسطة الفاتح

أخواننا الجنوبيين أستهدفوا بشكل ديني وعرقي ومتعمًد لحدي ما إنفصلوا مننا ، وحتى بعد ما إنفصلوا ما سلموا من ترهات العنصرية بوصفهم بحشرات ..
بل ومشوا لأكتر من كده بإنو حاولوا يزيحوا أي ذكرى علقت بيهم بإنو في ليلة وضحاها ، أزاحوا الأبناء الشرعيين للظلم المتمثلين في كم وخمسين شماسي ، لأنو منظرم ما حضاري وبيشوًه العاصمة.
أخواننا الفي الغرب عباره عن مصنع تجارب لكل أشكال الإقصاء من تأليب قبائل على قبائل وتمليكها للسلاح ، من حرق قرى آمنه ، وصولاً لإستعمال أسلحة محظوره.. مش كده وبس.. ياخي حتى على مستوى الرفض.. لمن يطلعوا الشارع ما بيقابلوهم بالبمبان والرصاص المطاطي زي ما بيعملوا مع الشمال.. للذكر مثل حظ الأنثيين.. نصيبهم من الإقصاء كبير ، ما بيشفع ليهم إنو هم طلبه أو خلافو.. بل ناس سود ساي ، مافي فرق بينم وبين حماة الدين بالتقوى ، الفرق بينيم النظرة الدونية للتاني على أساس عرقي.. والحاجه دي ما وليدة اليوم ، من زمن الإنجليز ما إتحلت ، فموظفو الخدمة المدنية غالبيتم من الشمال الجغرافي وقلما شغل زول أسود منصب إداري أو قيادي في أيتها حته.. الزول الأسود مكانو يشيل ليهو علبة ورنيش أو يتعلق في سقالة أو يشتغل في كمينة.. دي الحاجه المما قمنا وشفناها ،
ونفس الوضع ده بينطبق على جبال النوبه..
مافي أية حكومة واعية عملت على إنها تدي كل زي حق حقه ، الشخص المناسب في المكان المناسب.
الحاجه دي أشار ليها د/ محمد سليمان في كتابو : حروب الموارد والهوية إهتم فيها بال political Ecology إتكلم فيها عن منشأ الصراع في المناطق المهمشه ودراسة موقعها الجغرافي والمجموعات الإثنية الفيها والتحولات البيئية وتدهور التنمية
وربطو بدور الحكومات السلبي وغياب التنمية في المناطق المهمشة .
فيا صديق.. لكل فعل ردة فعل إذا الحكومة بتعمل على إنها تقصيك كزول مهمش ، وضع طبيعي إنك تدافع عن حقك في البقاء وتشيل سلاحك ، إللي ما بيصمد قدام الطائرات والأسلحة التقيلة والأسلحة المحرمة ، وتحالفات الدولة ، وإعلام الدولة ، ووو
قبيل ذكرت ليك حقو ندرس الأسباب اللي أوجدت النتايج دي ، ونقيف عليها ونعمل على إنو ما تتكرر.. والحاجه دي ما بتتم إلا بعد سنوات من زوال الحكومة دي ، لأنو الإثار النفسية البتخلفا الحروب ما بتمشي بين يوم وليلة.

اتفق معك يا الفاتح بانو يجب دراسة المشاكل وهي كثيرة ومتشابهة في معظم مناطق البلاد لان مساحة الفقر والتهميش ممتدت جفرافيا وفي جميع انحاء السودان بمعدلات متساوية ولكن لايجب ان يتم ذلك بتعمد الخلط وتكرار الخطاب التحريضي ، وانا نبهت الى هذا المنهج منذ البداية لان اختيار احدهما يكذب الاخر ، وانت الان وقعت في نفس الشي ، حيث تتكلم عن الزول (الاسود ) وكأن المقابل له زول (ابيض ) وفي نفس الوقت تتكلم عن المظالم الواقعة على المناطق المهمشة ، وقد كان السؤال واضحا منذ البداية ، وهو اننا نريد ان نعرف ، هل تتحدث الحركات المسلحة واصدقاؤها ، عن مناطق مهمشة ام عن اثنيات واعراق مهمشة ، وصدقني فان الاجابة على السؤال اعلاه سوف تكشف جهل الكثيرين بالبلاد التي يعيشون فيها (مناطقها قبائلها مشاكلها اقتصادها )
وسوف اعود بعد ان تجيب على السؤال اعلاه