يا لرهافة وجمال هذا الشاعر
نفس الغيمة الدقت بابي
و هشت و رشت كل أحبابي
أنا ح اتوسل نفس الغيمة
تنزل ليك قبال ما تشابي..
شان تديك إحساس الشجرة
لم تصب في عيونا المطرة
و تفرح و تطرح أجمل ثمرة
زاهي كيانه سماوي ترابي
يا محشودة و ماليه عروقي
يا حبري و كراسة شوقي
شيلي الريد جواك و روقي
و أدي دواخلك لون عنابي
في عينيك مساحة اليفة
رافعة الدفا في وش الزيفة
و أنا فاجأتك و شفتك قيفة
و زي النيل لمن تنسابي
إنتي عميقة و نادرة و أكتر
لا ببقاك لا شبهك منظر
و طعم السكر زي السكر
و إنتي الأحلى و رغم عذابي
مدي الكاس يا نور عينيا
و الإحساس خليو بالنية
و زيدي عصير الرأفة شوية
انا بليت الريق يا دابي
لو قدرتي و كنتي كريمة
أبقي معاي جوايا و ديمة
و أنا بتوسل ليك الغيمة
تنزل ليك قبال ما تشابي
نفس الغيمة الدقت بابي
و هشت ورشت كل أحبابي
عزيز عثمان
|