[ندى]

عديييل كدة ... مش بوستي وحرة فيهو

... لا للحوار ...


بمناسبة الدين الحايم في المنبر اليومين دي:

قال ليك إمام جامع عايز يخطب في مجموعة من المصلين (المساطيل) ... طلع المنبر وقال ليهم:

نساءكم ... نساااءكم يا إخوتي ... مساهرات الليل مع الآي فون والبلاك بيري والواتساب يتكلمن للفجر وإنتو نايمين ... عارفين بيتكلمن مع منو؟ عارفين مساهرات مع منو؟

صمت رهيب ...... مااافي أي زول رد ...

قال الإمام: النسوان مساهرات مع الحبيب ..

المصلين بصوت واحد: صلى الله عليه وسلم ...

هاك الدين دة .......

ههههه هههه ههه هااااااااااااا

النكتة عجبتني لإنها بتحكي المشهد الإحنا عايشنه تماماً وظاااهر في المنتدى ظهوراً شديداً .. ودة لأنها اتناولت أكتر موضوعين ماسكات الجو الأيام دي (الدين + المرأة) ... طبعاً دة حسب فهمي والفهم قسم ... وفهمي وأنا حرة فيهو gap...


بالمناسبة التانية بشكر مقدماًَ كل المشاهدين والمشاهدات والمتداخلات والمتداخلين وبعتذر لعدم تمكني مع سبق الاصرار والترصد على الرد على المداخلات إن وجدت فهذا البوست صااااامت وليس للحوار لأننا بصراحة فشلنا في الحوار ... عايزاهو بوست كدة ما عندو موضوع وما عندو استراتيجية أوخطة مسبقة زي (أعز مكان ...) أيوة زيه بالضبط ... كل ما خطرت لي حاجة بضيفها ليهو وبجرب فيهو والعايز يضيف مرحب بيهو بس بشرط الإضافة ما تكون تعليق أو رد على الإضافات الأخرى ممكن تتفق معاها في الموضوع أو مكملة ليها بس ما رد ولا حوار ...

بالمناسبة قبل الأخيرة أي زول كلف نفسه وخرج عن الصمت وعايز يحاور يلوم نفسوا بس لأنو ما حأشتغل بيهو الشغلة ويمكن أضرب بيهو عرض الحائط ...

بالمناسبة الأخيرة تغيير مااافي ياهو دة النظام العاجبوا عاجبو والما عاجبو ... ينقطنا بسكاته ... إن كان الكلام من فضة فالسكوت من دهب ...

لما نشوف الكولاج دة أو الكوماج دة أو العولاق دة بلغة تانية حيوصلنا وين ...



أعزائي هذه دعوة لثورة صامتة فهل من مجيب ؟؟؟