وين يا شاب
اقتباس:
|
لأنو الشعب السوداني ما ممكن يخلق ليه مسخ من عدم
|
أذا كان الشعب -المجتمع- السوداني لم يخلق هذا المسخ
طيب من الخلق جعفر نميري؟!
ولعلمك يا الرشيد العهد المايوي كان ألعن وألعن من العهد الكيزاني، بس المشكلة زمن نميري لم تكن ميديا مضادة لترصد عمايل نميري...
يا رجل واحد حكم السودان باسلوب البلطجية... والمشكلة أنو المجتمع السوداني بتحسر عليهو ويندم على عهده!!
أها اذا كان ذلك كذلك طيب الح يمنع شنو بعدين المجتمع السوداني دا ما يتحسر على عهد الكيزان دا؟!
حكم الكيزان شمولي؟
الحكم المايوي شمولي/بلطجي
الكيزان فسدوا؟
العهد المايوي كان أفسد
الكيزان قاموا بحرب عرقية؟!
العهد المايوي كان عاوز يحرق الجنوب على بكرة أبيه...
الكيزان نهبوا ثروات البلد؟
العهد المايوي نهب ثروات البلد وفتح دفتر ديون مع البنك الدولي مائة سنة ما بحلنا منه..
الكيزان كذبوا باسم الدين
العهد المايوي كذب باسم الاشتراكية وكذب باسم الدين
سيبك من دي
السودان عمره منذ الاستقلال 59 سنة
الحكومات العسكرية حكمته 48 سنة
الحكومات الديموقراطية 11 سنة!!!!
أها بلد العساكر استحوذوا فيه أكثر من 80% في الحراك السياسي
تفتكر البلد فيهو مجتمع كويس؟!
والعاوز يشوف كواسة البلد، يمشي يشوف سياسته في السوق.
يا الرشيد المجتمع السوداني هو المصنع الحقيقي الذي انتج عبود ونميري والبشير...
لأنه مجتمع سيء لذلك كان انتاجه سيئا...
السوء هنا لم يكن معياره (أخلاق الشجاعة وكرم الضيافة والمأمور على بنوت فريقه)
السوء هنا معياره (الاتساق الداخلي)
لأن المجتمع السوداني (كان) مجتمع كويس لانو متسق مع شروطه (المثالية) التي قام بوضعها... ولكن الاتساق مع الأشياء الخارجية قطع شك يسبب مشاكل في الاتساق مع الاشياء الداخلية... والسلوكيات والتصرفات الناجمة من الانفعالات دائما بكون مصدرها الداخل وليس الخارج... لذلك تجدنا متناقضين ولا نملك (الثبات الانفعالي)...
نحن يا الرشيد شعب غير متسق مع ذاته وكدليل شوف معضلة الهوية السودانية!!
الجعليين والشوايقة قايلين روحهم احفاد العباس!!
المحس والدناقلة والحلفاويين قايلين روحهم احفاد ترهاقا!!
الفور والتامة والهوسا وغيرها من قبائل الغرب شايفين روحهم أسياد البلد دي!!
البجا كذلك شايفين روحهم اسياد البلد دي!!
القبائل الوحيدة والمضطهدة هم النوبة، مع انهم فعليا هم أسياد البلد دي!!
دا غير الاختلافات الدينية والمذهبية والطرائقية
والطبقات المجتمعية
وفوق هذا وذاك
النظام المجتمعي الذي يضطهد الفرد ويهضم حقوقه!
بصراحة مجتمع زي دا كان جدير به أن يفرخ (داعش) من دون أي تدخلات اجنبية وميزانية السي آي أيه للمشروع السايكولوجي المكلف عشان ينتجوا دواعش...