[imported_ندي عبدالمنعم]

عاد جنس مساخة وقباحة

• بس تجى داخلة بعد سنة من غير إحم ولا دستور وطوالى تروحى داخلة فى الموضوع. ما تسلمى على الناس وتقولى والله كنت مشغولة واللا واللا .......

• بالله الناس فاضين للمسألة دى؟
• إنت ما لاحظت إنه أصله مافى زول قال يا جماعة فلانة دى معانا؟
• يا بت الحلال أنا يوم واحد ما قدرت أطبع كلامى كله ولا يوم نزلت لى موضوع كارب فى السياسة ولاعندى مكتبة متل النسوان. لا إن حضرت آنس ولا إن غبت أوحش. بعدين البورد ده كله بعرفونى فيه نفرين واللا ثلاثة لزوم أقول للناس أن جيت وأنا مشيت شنو؟• بصراحة كدة حتى لما تدخلى يوم كدى ما قلت لى زول العزيز واللا الشفيف ,, . أ

• بالمناسبة أنا من زمن اللغة القديمة الشفيف دى يعنى شنو؟

• كدى خلى القباحة دى واستقبلى الناس بترحاب وخاطبى المتداخلين فردا فردا مش "شكرا ليكم جميعا" بعدين حكاية أنا ما بقدر أطبع دى واهية ومسيخة زيك أكتبى كل يوم كلمة إن شا الله تردى بعد شهر.

أها يا أخوانا الزولة دى ما خاتية على عديل كدى؟ فى ذمتكم أنا قاعدة أتثاقل على زول؟ بس مرات فى كلام ما بعجبنى بتماسخ فى الرد عليه بقدر معقول لأنى بخاف من الرفت خوف الشوفنست من الفيمينست.
الزعلان يجى يفش غبينتو فى البوست ده.

العزيزة أسماء ,,

و الله أظنه الكلام دة جاك بالغلط و الزولة دي قاصداني أنا .

أنا مرات بقول "امريكا" دي تكون "نشفتني" و لا شنو ؟؟

لانه لساني يعجز- و كبيوردي أيضا من"القلد" - بفتح القاف و كسر الللام -الفى الشاشة دة ,,و الكلام البنقط عسل .. و الكلام من هذا النوع مش ما بقدر أقوله بس ,, لكن لمن أقراهو بيضرسني عديل كدة ,, و مرات كمان بطيرني من البوست كلو كلو. ,, و انا كمان ما بعرف أحب لي زول و لا اكرهه من وراء الشاشة الغشاشة دي ,, يعني الزول كان ما شفتو بي عيني دي و عاشرته و عرفت البيهو و العليهو .. ما بقدر أكضب عليه و على نفسي و اقول ليهو "شفيف" و لا "لفيف" و بينى و بينك .. البعرفو ما بخطر ببالي أقول ليهو كلام زي دة
و مشكلتى زيك .. الكلام البعتر لي ما بقدر اصم خشمي و أعاين ليهو .. لازم أرد عليهو طوالي و توووش من دون مقدمات .. و مرات دي بتتفهم مساخة .. و هي ما كدة أبدا ..
قبل يومين كنت بفكر أكتب لي بوست عن ما أشعر به عنوانه : Romantically Challenged .. لاني بالجد بقيت ما عارفة العيب فينى و لا فى الزمن العلينا دة .. و لا أنا بقى عندي Fear of Intimacy ... لووول

و حكاية أتنين او تلاتة بعرفوك فى البيت برضو بتنطبق على أختك هنا .. و أنا رااااضية بي نصيبي .. عشان كدة بخش و بمرق بيييي راحتي و دي أنا بسميها keeping low profile و هو ما ترتاح له طبيعتي .. ليس أنزواءا و لا خوفا ,, ولكن هذا ما يتوافق مع نفسي .

يا زولة ما براك .. و إنت لاك مسيخة و لاك قبيحة .. و إنت كدة تمااام التمام .. على الاقل فى نظري ...

ليك العافية ..