سلامات يا كمال
ذهبت يا صديقي قبل سنوات إلي سفارتنا في دانهاق "لاهاي" وكنت أحمل جوازي سفر
أحدهم السوداني وقد جددته مرة واحدة وانتهي مما يتطلب إستخراج جواز جديد.
والثاني جوازي الهولندي.
كنت أريد الذهاب إلي السودان. ناس السفارة والحق يقال ناس في منتهي اللطف.
أعطوني فورم لطلب تأشيرة دخول إلي السودان الشقيق!
أحد الأسئلة في الفورم (جنسيتك) .
وقفت يا كمال كم دقيقة كده والله .. ولما غلبني الحال قلت أستعين بي صديق
سألت القنصل : هنا أكتب شنو؟
قال لي : أكتب هولندي من أصل سوداني.
أبت تتبلع لي والله يا كمال لكن علي قول الأهل (المجبور يملح بالعسل)
إكتشفت أن جوازي السوداني لا يدخلني حتى السودان "إلا بالتلتلة"
توكلت علي الله وكتبتها يا صديقي.
وصلت مطار الخرطوم، وقفت يا كمال في صف الأجانب !
أحد عمال المطار مصر ينبهني :
يا زول إنت واقف غلط !
كان إحساس خليط من الخجل والحيرة .
مرة أخري ينبهني:
إنت يا زول واقف غلط أمش الصف داك .
قلت ليه : يا أخي أنا أحمل جواز أجنبي.
قال لي : كدي جيب جوازك ده ؟
وساعدني في بلطف خفف علي مرارة التجربة.
جواز أجنبي يا كمال لا يعني سوي مرور بدون تعقيد وبدون تأشيرة خروج هذه الخاصية التي نتفرد بها عن جميع دول العالم؟ هو يا أخوانا زول مارق متلتلنوا فوق كم؟
لا زلت أحتفظ بجوازي الذي احلم أن يصير يوما (جواز سفر) من غير أن يكون تهمة لحامله .
|