[Suad Badri]

العم شوقى، الخال بابكر مخير
شكلنا حنقلبا نادى العايلة
بخصوص مأساة دارفور
انا زرتا غرب دارفور فى 2002 وشفتا بعيونى، ما كان.... طبعا الحاصل هسة أسوأ وأضل
لكن حسب معايشتى للأهالى من خلال المشروع الشاركت فيه، وكان شراكة ما بين جمعية بابكر بدرى، جامعة الأحفاد، واليونسيف، ومعنى بنشر ثقافة السلام من خلال النشاطات المصاحبة للمنهج فى التعليم الأساسى،ملاحظتى انو الناس هناك واعين جدااا.. ومستعدين يتعاونو مع الجهة البتحقق التنمية فى المنطقة، لا أكتر ولا أقل.. وليهم ألف حق... الخير كتير ومدفق... ومدفق بمعنى الكلمة الحقيقى ما اللغوى..
يعنى الخيران فى الخريف بتنتهى فى الصحراء، فى شاد، وكمياه جوفية برضو تتسرب لدول الجوار، بالله مش خسارة؟.. يعنى سد أو سدين ممكن يوقفو الحرابة ليوم الدين.. والبزعل زيادة انو الدراسات موجودة والتمويل متاح، مثلا من بنك التنمية الأسلامى البنبح ليه سنين فى الموضوع ده، بقيادة الدكتور بشير عمر وغيرو كتير من الرجال والنساء الشرفاء، العلماء، المخلصين للوطن.
نرجو اشراك أكبر للمجتمع المدنى السودانى، وخاصة العلمى والأكاديمى فى ايجاد حلول للتنمية المستدامة لقضية دارفور...