الضريرة
الأخوة والأخوات
سلام
أسمحوا لى أسأل سؤال: هل نحن كمسلمين ولنا ولائات عربية ممكن نتجرد فى حكمنا على الغربيين؟؟
هل بنقبل انهم ممكن يقدمو المساعدات الأنسانية بدون نوايا خفية، محسنين يعنى (charitable)
المنطق بقول انهم عندهم الخيار بانهم يهتمو بالعالم الفقير أو يطنشو
المنطق بقول انو الخواجة ممكن يصرف قروشو فى الفسحة والسكر والقمار بدل ما يتبرع بيها لأفريقيا
التاريخ القريب بقول انه حتى صعاليكم الغنايين والممثلين جمعوا الملايين للمجاعات فى افريقيا
البجبرم شنو؟؟؟
فى المقابل صلاح الدين وهو بحارب الصليبيين المعتدين، لم يعاديهم شخصيا، وضرب مثل للغرب بيعتزوا بيه للآن اكتر من العرب والمسلمين
العرب المسلمين فى الأندلس ضربو الأمثال لأوروبا والعالم الغربى فى التعايش والتسامح
والشيخ محمد عبده فى زيارته لأوروبا وتعليقو بأنو الأوربيين بيمارسوا الأسلام دون أن يعتنقوه
الشيخ بابكر بدرى بعد هزيمة المهدية على يد (المكسين)، وبعد قراره الخطير فى كررى، والحمدلله على قراره، والا ما كانت الأحفاد، قال: المهدية لازم نضرضرها بحبة تركية
احنا حقو نقيف مع نفسنا شوية
ونسأل انا وانت وده وداك... عملنا شنو لوطننا ومواطنينا
ونتزكر الكبابيشية الغنت لريقان فى مجاعة 88، مخاطبة لزوجها الهارب من مسؤليتو
من يوم ما فزيت ريقان فتح البيت
شوال عيش وصفيحة زيت
عم شوقى، انا واثقة انك أقدر على الدفاع عن رأيك،
معظمنا ما عاش فى اروبا، تحت مظلة الدساتير الديمقراطية وسيادة القانون، ولا عاشر الغربيين ولا جاورهم... نورنا وأنزل لمستوانا بالله
|