[معتصم الطاهر]

المشاركة الأصلية كتبت بواسطة بسمله

لى الرجل لامن يصدم عاطفيا .. بتشوكش يعنى .. لى طوالى بيفكر فى الزواج ؟ طوالى حتى ما بيدى نفسو مهله استراحه مع الذات ؟

بسملة

دي ملاحظة قوية .. ولكن لا تنفي منك الحنكشة ..
..
و صحيح انو الرجال بعد الشاكوش طوالي بقوموا بياخدوا قرار زى دا..
وبكون رد فعلهم فيهو نخوة رجالة زائفة ..
أنا شخصيا طوالي خطبت .. بعد اسبوع بس ..
لكن حسيت بأني ظلمت الزولة التانية .. وحاولت طوال سنين الخطبة أقنع نفسى بانو قرارى صاح ..
مع انو الزولة ما فيها عيب .. بل كويسة جدا ..

اها لحدي ما مرقن الاتنين من محل الوجع حتى شفت زولتي الصاح ..
..
قرارات متسرعة زى دي ..من اسباب فشل الزواج البجي نتيجة رد فعل ..
ولكن مرات بنجح فى حالة واحدة ..انك تكون مخزّن- فى العقل والفلب - ليك واحدة بالمواصفات الصاح ..

ولاثبات حنكشتك نقول ليك
البت اول ما تتشوكش بتقبل بأول زول يتقدم ليها ..
بس الفرق انها ما بتدخل فى علاقة جديدة بسرعة ..

قَبِلِك ..
نِسيت الكلام الأباجِد
عِمِيت العيون السَوافِر
مسافِر .. وما لاقى جِيهة
رَميت الأكُف البِتَفرُك ..
صقيع القليب البِكابِِر
كايس دفوها ..
لِقِيت .. الحدايِق تبادر ..
ترسّل غصونها ..
تَسَائل خُدودِك أزاهر
تنضِّـر وِجيها
لِقِيت الحقائق .. تجاهر
تَنَزّل جَلالِك فى طور الجمال
سماحة البِنَيّة الوجِيهَة .."
.. مُمَغنَطْ أجيها ..
وحِلماً يَصَحِّى غُطُاها ويسُتْرِك

معتصم الطاهر ..