[imported_الأغبش]

المشاركة الأصلية كتبت بواسطة Amin Bushari

(5)
نجي لموضوعنا الاســاسي ودعــوني أطرح هذا الأسئلة:

- هل الدراسة هي المعيار لنجاح الشخص في حياته العامه؟
- هل اي واحد فيكم ممكن يعمل زي ابوي ويحرم أولاده احلى سنين عمرهم؟
- هل تفرق لو درست في الخرطوم او اكسفورد او اي جامعة اقليمية زي حقات ابراهيم أحمد عمر بتاعات ثورة التعليم العالي ديل؟
- في ناس يجبرون ابناءهم على ضرورة دخول كليات معينة فهل هذا صحيح؟

جد يا جماعة قناعاتي تزعزعت بما أراه اليوم وعند مقارنة حالي باحوال بعض زملائي
ودي مشكلة شائعة وممتدة ومتكرره في كل بيت وكل اســـرة.
عندي صاحبي بتو عمرها 8 سنوات قال ليها قدامي: يا بت انا أقل من جامعة الخرطوم وطب ما بقبل منك اية حاجة تانية.. محل ابوك قرأ وتخرج!!
غرس فيها الحاجة دي وبقت ماشه معاها
طيب لو ما دخلت الخرطوم العمل شنو؟
ما تنســـوا عند زيارة والدتي والدي في رمضان الماضي قلت له يا ابوي زمان حرمتنا اللعب والدراسة والدراسة أهو درسنا شوف ناس عباس وصلوا وين ونحن وين؟

ابوي قال: يا ولدي دي حالة استثنائية وفي النهاية لا يصح إلا الصحيح
الانقاذ دي لو مشت الامور بتستقيم؟
اها انا اســي اناضل عشان الانقاذ تنقلع (الله يقلعها) عشان الامور تستقيم مش؟
ناس عباس الهبروا ليهم ملايين ديل تعيشهم لي اولاد أولادهم ممكن نتميز عليهم في يوم من الايام؟
يا باشمهندس يا باشمهندس .. الهندسة تطير عيشتها قال ليك!!

الله يقطع الهندسة والدكترة الفقر دي

يلا تعالوا قولوا لي رأيكم شـــنو؟

أمين تحية واحترام ..
سأرد علي مل ظللته بالأحمر أولاً وسآتي للبقية لاحقاً ..
بما أن (راس السوط لحقني هنا) فقد درست بإحدي الجامعات الأقليمية التي تحدثت عنها بإزدراء هنا ..ولو كنت مصراً علي دخول جامعة الخرطوم كعقدة كما يفعل كثيرون لأعدت الامتحان مرة ثانية لكني آثرت المواصلة وتسجيل (اسكور وقتها)بأن أكون أول من يدخل من السنة الأولي مممن أعرف ..ورغم رفض خالي خريج جامعة الخرطوم واصلت .. وتخرجت بتفوق والحمد لله ..
حضرت لمواصلة الماجستير بجامعة الخرطوم وقتها متأخراً بعد التقديم وأذكر أن رئيس القسم قال لنا (أها قبلناكم ان شاء الله تنجحو) ..ولأن نظام دراستنا بكلاريوس عام أربعة سنوات كان لزاما ان ندرس سنة تمهيدية وفيها يدمج طلاب التمهيدي مع طلاب السنة الخامسة ..وبكل الفخر (لأن الموضع كذلك) كنت وزميلتي من نفس الجامعة نشرح لطلاب الخرطوم وغيرها من الجامعات مقررات كاملة لم يسمعوا بها فقد درسنا 66 مقرراً بينما درسوا هم 24 مقرر ..كنا 35 طالاب وعند الامتحان أصبحنا 15 فقط والبقية انسحبت ..وعند النتيجة نجحنا 4 فقط والخامس نجحه المجلس ..وكنت الأول وزميلتي الثانية ..
وفي الماجستير كان نفس السيناريو من نحجوا بدون ملاحق كانوا 8 فقط أنا وزميلتي منهم والبقية منهم من فُصل ومنهم من نجح في الملحق.. وفي البحوث التكميلية كنت أول من ناقش البحث ..وفي مناقشة بحث زميلتي سألها الممتحن الخارجي سؤالاً واحداً فقط (منو استاذك ؟؟)وعندما أجابت بأنه الدكتور المشرف عليها قال له (أقصد أستاذك في البكلاريوس ) ..
رئيس القسم الذي قال مقولته تلك عند بداية تقديمنا كان الممتحن الداخلي لي في الماجستير ..ثم مشرفي في الدكتوراة التي سجلتها بتلك الجامعة (الإقليمية) ..

في ماجستير علوم الحسوب بالنيلين ولأكثر من خمس دفعات متتالية كان الخمسة الأوائل من خريجي كليتنا ..
خريجو الهندسة أيضا تفوقوا علي طلاب الخرطوم في الماجستير في جامعة الخرطوم .أعرف أحدهم وهو الآن في ماليزيا يحضر للدكتوراة ..

خلاصة القول أنني درست بالخرطوم أكثر من دراستي بالجامعة الاقليمية ورغم إعترافي بها كأم للجامعات السودانية لكن تستفزني عنجهية خرييجيها أحياناً ..
كتبت بوست هنا من قبل عن الجامعات السودانية وكنت أتوقع أن يُثار فيه مثل هذا الحديث عن مستويات الجامعات السودانية لكن للأسف لم ترد فيه ولا مشاركة واحدة وتراجع للصفحات الخلفية ..

سأعود لبقية الموضوع لاحقاً...