[معتصم الطاهر]

المشاركة الأصلية كتبت بواسطة بسمله

و هل صحيح انو الرجل المتزوج على ما تعوده زوجته ؟

اذا كان تعوده .. دى بمعنى تروضه ..
لو كان كدا .. ما عندي اجابة ..

لكن عندى حسن النية و نتكلم عن فكرة اخرى ..
قلنا من أول ..إنو الزواج يبني بعد مراسم العرس ..و يبنى باتنين ..
و بما انو انتو الاتنين
- كنتو عايشين مع ناس تانين
- و بطبايع مختلفة
-وأي زول عندو عادات مختلفة .. طريقة النوم- الاكل - المخاطبة والاستماع - القراءة - المشاهدة - الحمام - اللبس - الكلام - وضع الأحذية والشرابات - القيلولة - زيارة الاهل - التلفزيون - زمن النت - الاصدقاء .. الخ ..
طيب بقيتو روح واحدة فى جسدين و طبايع مختلفة ..
اها لازم يحصل تنازل من بعض العادات البنختلف فيها .. وننمي الحاجات النتفق عليها و فيها
وعادة فى أشياء بتنازل عنها الرجل .. عشان يرضى المرأة البحبها .. دا حب مش حاجة تانية ..
يعنى اتغير عشان زوجتي .. أم عشان زميلتي فى العمل ؟؟؟
فلما اختار زوجتي ..
فهل هذا يعنى انو بقيت دلدول .؟؟. نعمل ليكم شنو ..؟؟
لو غيرنا طبايعنا .. " مرتو ممشياهو على العجين .."
ولو بقينا على حالنا " رجال شرقيين ..راسم ناشف "!!!!!!!!!!!!!!

إتلمِّـى فى صدرى
فارس حوارى الروح
حارس هواك تملّى
تاتيت بسيمتك ضل
والرمضا من رملى
إتلافيت الهجير من لاك
لقيت مرجلك يغلى


معتصم الطاهر