[معتصم الطاهر]

المشاركة الأصلية كتبت بواسطة لنا جعفر

انت حسه خلي اضانك ...قاموسك العاطفي ده بتقدر تقطع ليك منو كم ورقة وتديها لي حبيبتك !!! وهي بطبيعة الحال زوجتك ولا ماكدة ياود الطاهر؟ مابقت الامور كلها بالعقل ودو ده وجيبو داك والمصاريف والولاد والجامعة وتامين المستقبل .................وعادية ايامنا .....زي مابقول درويش
عشان كده قلنا اسطوري

أول حاجة مش لأي سبب ..
ولكني أهديت ديواني ألأول لها
وأول قصيدة .. وسأكتبها لك فى نهاية المداخلة ..
يعني زولة بتعب وأجيب ليها القلتيه دا كلو .. ويرضو ما ريد ..؟

زولة تحضنها .. ونفسها و نفسك بتقاسموا الاوكسجين
و حضنكم كل يوم يتحد
و تتقاسموا النبقة .. والشفقة على بعض و السهر على بعض ..
و تتماسكوا فى العربية و تتشاركوا الاسرار و الضحكات ..
انت دايرة الريدة الاسطورية المتغيرة كل يوم ..!!!
ممارسة الحياة بتغيير كل يوم مع زول بترجع ليهو .. و تشتاق ترجع ليهو
ولو اتأخرت عن البيت بتلقى نفسك ناقصاك حاجة .. زولة لو سافرت بتتغطي بي توبها .. وتعلق توب نومها ..
وما تقدر تاكل ووزنك يا زاد .. يا نقص ..
دا هو الريد الحقيقي .. .. المبني على الاستدامة ..
لو دا كلو ما ريدة ..؟
الريدة شنو !!!

[align=center]تراتيــــــــل[/align]
الى زولة وتقبل اللام فيها التأويل الى جيم سقيا ..

قَبِلِك ..
نِسيت الكلام الأباجِد
عِمِيت العيون السَوافِر
مسافِر .. وما لاقى جِيهة
رَميت الأكُف البِتَفرُك ..
صقيع القليب البِكابِِر
ناكر هواه يرتجيها
لِقِيت .. الحدايِق تبادر ..
ترسّل غصونها ..
تَسَائل خُدودِك أزاهر
تنضِّـر وِجيها
لِقِيت الحقائق .. تجاهر
تَنَزّل جَلالِك فى طور الجمال
سماحة البِنَيّة الوجِيهَة .."
.. مُمَغنَطْ أجيها ..
وحِلماً يَصَحِّى غُطُاها ويسُتْرِك
.. ينشَر توابِل رَوايْعِك حضور
أ..... براى النجيهة
وأكُون الوليد البِخَالْف القبيلة
مِشَـنِّـق هوايا
وابارى القمارى
البِتَقْطَع تذاكِر لحفل الخريف
وترقص معايا
أقيفى النشوفك ..
واحَفِّظ ملامْحِك عيون المرايا