اقتباس:
المشاركة الأصلية كتبت بواسطة منال
الزين فخرى ازيك
عندما تكتب النساء عن الوجع ...نفاخر رجالا و نساء
(شان الحاجات تبقى كويسة)
ما لازم يا بت يا ريسة
نحدوك نشيد ضد الأصفاد
“شان الحاجات تبقى كويسة”
ما لازم يا بت يا ريسة
يا بت.. فنانة وفنك جاد
يا ست الراي
واللون الضاوي
وما بنقاد
يا ستنا.. حطمتي الأوغاد
دكيتي حصون الخوف والعار
يا محصنة من كل الأوزار
يا الهامتك ..روحك عالية وما بتنهار
يا ميرم .. يا كنداكة
ننصب ليك مزار
ما إنت الشرف الباذخ.. ما بتلطخ
وإنتي الماس الما بتشلّخ
وإنتي حجا البنوت.. للعفة
وإنتي حكا الصبيان للفارسة
الفاتت للأغيار
“شان الحاجات تبقى كويسة”
فلتعلمي يا بت يا ريسة
ناصبنك فوق ساحلنا الضلم
متل منارة
شان تكشف إنه بلدنا الطول ذلها
راجية اليوم النغسل عارا
تحلف بكرة
نحطم كل قيود أشرارا
وترفض إنه نشيل أوزارا
ونصمت..
مثل قبور الموتى..
وتفضح فعلا نحن قرفنا
وحسي ضبحنا
ولكن..
تبقى الروح بترفرف
وتبقى الإيد بتقدف
ويمشي المركب
يقطع بحر الزيف والذلة
ويصل الشط القرّب
قسما.. ما بنتدلى
وما بنتخلى
وما بننذل
وكيف تنذل نيزنقا ومندي
مهيرة ورابحة
وبت الفاشر وزولة شندي
شيخة التاماي المقدامة
الما ذلاها الباشا وافندي
“شان الحاجات تبقى كويسة”..
ما لازم يا بت يا ريسة
يا خية النور
يا بنية الحق الدحض الزور
يا الصوتك رقرق بالتصميم
في خفضه مكين
ما توطي الراس العالي دحين
دمعاتك هذي الغالية.. تقول سكين
في صدر الجور
ملعون.. ملعون الليه بدور
الأبدل بطلات السودان
ببنات الحور
الكضب الفاح من بدري
وصار عريان
النتن القيل في السودان
ما إنتي نضافتو من الأدران
ما إنتي العود الليه بخور
باكر من ريشتك تجي ألوان
تغسل آلامنا مع الأحزان
“شان الحاجات تبقى كويسة”..
فلتعرفي يا بت يا ريسة
يا بت يا جنب الحق البان
ما بطعن في شرفك شيطان
لو جرّب يلقى حجاب ألحان:
للبت السمتها صار: ضد الخذلان!
ضد الغربان. ضد الغيلان..
للبت الاسمها صار: بت السودان!
بقلم رباح الصادق
الغاليه منال
تحيه وشوق
شان الحاجات تبقي كويسه لازم نفوسنا تبقي كويسه
والله والله والله البتشطرو علي البنات في المعتقلات ديل لو ما الوضع الهم فيهو والطبنجه الشايلنها وخايفين دي والكارني البحاولوا يطمنو بيه نفسهم انهم شخصيات مهمه والله لو ما السلطه دي البنات ارجل منهم
تحياتي