[معتصم الطاهر]

[frame="5 80"][align=right][align=justify]
* والتعب الذي بذلناه معا لتسليط الضوء على زوايانا المظلمة
* ووضع دستور يحمي علاقتنا
[/align][/align][/frame]
أها يا جماعة بعد اختيار " تاج" - وتاج حيكون رمز لتاج عز أي بنت .. مش "تاج السر" لكن رمز للاختيار .. والقرار .. أها بعد تاجك قعد فى راسك " وفوق راسك برضو " و ممكن يكون محكّر فى القلب ..

أها ولأنو الحكاية ما انتهت بالزواج - اللفظ الفظ البيعنى انتهاء الحب -
الحكاية تكون ابتدت بالزواج و ناس بيقولوا اتوجت بالزواج .. أها لو اتوجت باختيار " تاج" "وتاجة "
يكون يا دار دخلك خير ..و نقول ابتدت بالزواج ..
ومن هنا بيبدأ البنيان لأنو إتأسس على الصاح باختيار التاج .. يعنى تاجنا هنا هو ساسنا ..

و يبدأ

تسليط الضوء على الزوايا المظلمة

... زى ما قالت لنا ..
والزوايا المظلمة شنو ؟؟

انا ما عارف زوايا ناس لنا وتاج لكن زوايا الناس الحولي المظلمة كانت ..
1 - الشعورفى قصر شهر العسل:
وانو ما ممكن يمتد فى احسن احوالو لحدى الحمل للمتفائلين وللمتفائلات سنتيتن .
يا جماعة تجديد العسل كل يوم بحركات بسيطة.
مسك اليد ..
المسح على الخدين ..
فرك الظهر أو لمسه ..
الابتسامة حين الدخول على الطرف الثاني ..
و الهدايا بدون مناسبة ..
دا غير المناسبات

2 - نحن وناس البيت
- اهلك وأهلو - وشعوركم بانكم مرتبطين بالبيت الأول أكثر من البيت دا .. يعنى الراجل داير برضو يكون مسئول عن بيت ابوهو وهي لسه بت أمها .. و ناسين انو ابوهم وامهم فى يوم ما كانو من عائلتين وكونوا عائلة جديدة . و طبعا من أول خميس الغدا عند ناس امي أو ناس أبوى و بتبدأ بالعزومة و تنتهي بالارتباط ببرنامج ثابت .

3- الجنس ..
تخيلوا تجيك واحدة تقول ليك لأول مرة بعد كم شهر أو كم سنة تكون يادوبك وصلت مرحلة النشوى القصوى ( ORGASM ) أو يادوبك قلعت هدومها مع راجلها والنور مولع.. خلينا من باقي التفاصيل الحميمة المطلوبة .. يا جماعة الانفتاح فى الجنس وانارة الزوايا المظلمة الدخلنا فيها المجتمع ما بنمرق منها إلا بالصراحة .. طيب لو ما صارحتا /صارحتى شريك فراشك تصارحي منو ..
ومنو القال ليكم الختان بمنع الوصول للنشوة..
أو واحد يقول ليك مليت .. أو الزولة دى جامدة .. طيب ما تحركها ياخي .. غالبك تعرف مواطن واماكن و مفاتيح الشفرة .. حاجة غريبة ..
ونصيحة .. للجميع.. بالله جدووا الاماكن ..

4- التجمل للنصف الآخر ..
ودا عيب كبير فى الرجال و شوية فى النساء ..
مافى راجل بلبس عشان مرتو أو يتعطّر وهو داخل البيت أو داخل الفراش ..
ما فى راجل بلبس كويس عشان يتغدى مع زوجتو فى البيت ..
الزوجة تتمكيج للخروج .. وعلى كدا أوزن ..
معانا زميلة .. غازلها زوجها فى الشارع و ما عارف انها زوجتو .. طبعا لأنها واعية و فاهمة اعتبرت انو دا قمة الجمال منو .. و هي زولة سمحة و ما عملت من الحاجة دى إلا مثل للعلاقة المتفاهمة والمبنية على الجمال والفهم ..

5- تخيلو انو قلة المال ابدا ما مشكلة .. لكن توزيعه هو المشكلة .. قليل او كثير ..

6-الماضي ..
( ودى نقطة برجع ليها بالتفصيل) .. لكن باختصار اذا كان الطرف الآخر ما بذكر الماضي بتاعو ما فى داعي نذكرو ليهو .. ولو بتذكرو كتير .. دى مهمة الطرف الثاني ..كيف تنسيهو/تنسيها ليهو بدون ما تحكها معاهو ..

و حاجات تانية برجع ليها لكن قبل ما أمشى اقول ليكم الحل فى النقطة الثالثة

وضع دستور ..

يا جماعة دى شراكة شنو البمنع نخت ليها ضوابط واضحة .. و بصراحة مش المسكوت عنه ..
و ممكن نكتبها كمان ..
نحن مش بنكتب عقد الزواج .. طيب ليه ما نخت ليه تفاصيل .