الشوق من حاصف لا قاصف
اتلم يهز ليك يا نوراى
يادرقة وسيف
ياحصنا كيف
من شر الصيف والشتا ضاراى
يا شملة غز بقت جواى
عدت بى ضلام بحرا عاصف
يا بت العرب النوبية
ويا بت النوبة العربية
بى شملة نخوة بجاوية
او شجرة الصحوة الزنجية
دسينى من الزمن الفارغ
من ريح المتعة الوقتية
من شر الساحق والماحق
بين دبش المدن المدعية
والليل إتحكر بيناتنا
كحل بى ديشو عويناتنا
يا شمس الناس المسبية
الجوع .. العطش .. الغد واحد
الفقر الضارب زى سوسة
الخوف والحالة المنحوسة
يا بحر الحاصل لاك ناشف
لا قلمى الفى ايدى عصا موسى
الناس عوجات تحرس ترجى
ترجعبو سلاح وانوار زينة
بنبان تواليت افات وسكى
للناس الدمنا بنزينا
يابت الناس الصالحين
الذمم المشرية الطالحة
شتان بين دينك وبين دينا
يا نورة شليلك مافات
جاييك يتزود من غلبك
القمر الطيب يفضحنى
تنبحنى سجونك وآهاتا
كجنا سجونك لولاك
منعول الزمن الخلاك
سلمت الوطن الهمباتة
على كيفك كيف بتحكم
ياسوس تكنك ما بتعلم
بى حال البتألم وساكت
يا حال الساكت وبتألم
بتفتق جرحك يوم تبرا
تتلم وقيدك يتحطم
وين عادك هارب من بكرة
وخطو التاريخ البتقدم
رغما من عنت الايام
والزمن الجهجاه الفاجع
بى النفس النازل والطالع
ولا واحد من شعبى مضارع
سميت ومشيت وما متراجع
ترتالاها تكوسلها فى الجيه
|