عرض مشاركة واحدة
قديم 22-12-2006, 11:05 PM   #[9]
شوقي بدري
:: كــاتب نشــط::
الصورة الرمزية شوقي بدري
 
افتراضي

في رثــاء خالـــد الكـــــد


كربل طرين سكن الفــؤاد يا أبروف
مات العلــج المــا بعرف الخــوف
يا أمدر سلام خالد رجــع للبيـت
ماعن رُكب ويبقــي السؤال ككيــف
يا بحر كيف تقـدر تلعب مــوج
ويا شيخ حســن خلي الكلام البــوج
يا شامـــت مافي ليك راحـــه
موت الرجــال ما بخلي ليك ساحــه
الدروه كضبت وما قدرت عليك شالا
دا زمــن المحــن الشال أبو ســاره
كنكيج الحجر الما بـهاب تمســاح
ات راجــل الفريق اللي الدموع مساح
يـوم الطقاش يوم نرفع الرايــات
البـحر بنترسو ونقدل علــي شمبـات
جوزيف قرنق ما قال أنا اتخميــت
وراشد ركز تقول حبل الشنق سوميــت
أخوي هاشـــم في الحاره ماك لويــع
الراي والفهم اجتمعوا ليك يا شفيــع
حمـــد الله الضــرس صافي ماك عكير
وكت الكعه ديك سيد الرجـال بابكير
فاطمـــــه أم أحمد براها توزن ديش
زمان قالوا إنتهينا حرم كسرنا الطيـش
ساعه الحاره ديك فطورنا باشا وعشانا أمير
فتـح عيونك سمح الدور عليك يا بشير

شوقي بدري .....





ـههههههههههههههههههههههههههههههههههههههههـ



كربــل : حربه لضرب فرس البحر لا تخرج بعد شكها مثل البدينقه أو
أم حنيف لضرب التمساح .
السوميت : نوع من الأحجار ألكريمه كجزء من جرتق العريس أو زينته
.................................................. .................................................. ...............

الاخ كمال جعفر حسون وكمال سينه وخالد الكد كانوا زملاء فى مدرسه الاهليه . كمال حسون ( ود موزه ) كان يقول خالد الكد ده اشتراكى فى اى حاجه ما يستمتع الا يخمس السجاره حتى كبايه الشاى لازم يخمسها . لوعندنا سجارتين يصر انو نخمس واحده ونخمس التانيه بعدين .
خير من يكتب عن خالد هو الدكتور محمد محجوب سأحاول ان ادفعه للكتابه او سأكتب ما يمليه على .
التحيه ... شوقى ...





التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس