يا ناس سودانيات العفو لله والرسول

[فخري الزين]

مشكورا الاخ عبدالعزيز عبدالله فتح بوست ترحيب بشخصي الضعيف بسلطنة عمان وتداخل كل من الاخوان الاعزاء طارق كانديك والاخ العزيز جدا محمد مصطفي والاخ الكبير بابكر مخير فقط لاغير مما جعلني اسال نفسي كثيرا جدا .....
هل انا سئ لهذه الدرجه ولا استحق من هؤلاء العظام حتي كلمة وفقك الله ؟؟؟؟؟؟؟؟؟
هل انا مقصر في حق هؤلاء الافاضل لدرجة تهميشي لهذه الدرجه ؟؟؟؟؟؟؟؟؟؟؟
هل انا كنت غير موفق في تقييم شكل العلاقه بيني وبين نفر كريم هنا ؟؟؟؟؟؟؟
هل انا ......................و.............. و.......
عموما انا اقدم اعتزاري الشديد جدا لاي شخص في هذا المنبر قد اكون ضايقته من غير قصد وعن قصد هذه مستبعده خالص خالص
ولكم الود خالص
والسلام

[النور يوسف محمد]

بسم الله الرحمن الرحيم

يشهد الله لك معزة خاصة .. لكن اللوم بجى بالغفلات ..
عن نفسى لن اقول غير ( غلطان بعتذر )

فخرى عليك الله دى فوتا لينا ... والمسامح كريم يا ود القبائل ..

[الرشيد اسماعيل محمود]

أنا غايتو قلتها في سرّي..بالتوفيق يا زين..بالتوفيق..
شفت البوست والله.. بس مرّات التوقيت بيخصم من المشاركات..غضّ النظر عن محتوي البوست.. ربّما تزامُن البوست مع ظروف المنبر المتشح سواداً علي رحيل الزميل ثابت.. وربما أسباب أخري..
وبعدين يا زين إنت زول حسّاس ساي..
ياخي ما في سبب يبدو لي يخلي الناس تكون شايلة منّك أو ما شابه..
المهم:
عافي ليك لو في حاجة لا قدّر الله.. بس إنت قول بسم الله..
تحيّاتي.

[nezam aldeen]

إحتفال القمرة بي فيزيا المغارب ماكضب ....
وإحتقار ضو النهار للعتمة ،
ماصاح في قوانين البصر ....
إبتسامتك في ملامح الناس ،،
بيديك معنى تصبح من وهج ،،،
وإبتسامتك في وشي التانين اجر ...

ماتسمي طير فرحك ضهب ..
مابنسى لون مويتو البحر ..
مابنسى لون عينيك وشيك ...
وماببني باكر
إلا زول .... شايل الكلمة سيف ...
إياك تبكي وفيك ذرة بتقاوم انهزامك ...
وإياك تنطفي
وفيك من باقي ... شيتا بنحرق ..

[نبيل عبد الرحيم]

الأخ فخر الدين
أرحب بك ووجودك يسعدنا وأقدر شعورك لأن للأسف أصبحنا مقفولين لشلة معينة
وهذا ماحذرت منه فى بوست سابق .
لك المودة أخى فخرى الزين

[الرشيد اسماعيل محمود]

المشاركة الأصلية كتبت بواسطة نبيل عبد الرحيم

الأخ فخر الدين
أرحب بك ووجودك يسعدنا وأقدر شعورك لأن للأسف أصبحنا مقفولين لشلة معينة
وهذا ماحذرت منه فى بوست سابق .
لك المودة أخى فخرى الزين

إنتو منو..؟؟
أنا غايتو ما شايف زي شوفك ده..

[النور يوسف محمد]

المشاركة الأصلية كتبت بواسطة نبيل عبد الرحيم

الأخ فخر الدين
أرحب بك ووجودك يسعدنا وأقدر شعورك لأن للأسف أصبحنا مقفولين لشلة معينة
وهذا ماحذرت منه فى بوست سابق .
لك المودة أخى فخرى الزين

بسم الله الرحمن الرحيم

يا نبيل إزيك وكيفنك ..
بالله سؤال بدون حساسية وبكل إحترام ..
لماذا لم تشارك فى البوست المعنى وأنت تدعو لعدم الشللية ؟؟
البوست مازال موجود بمنتدى الحوار ..
لماذا تحذر الناس من فعل وتمارسه ؟؟ بعدين ترحب بيهو وين ؟؟
الترحيب ده يا الحبيب مو هنا ..
فخرى ده ـ عشان أوقع ليك القصة ـ إنتقل مترقياً للعمل فى سلطنة عمان ..
وعبد العزيز من هناك يرحب به ..
ثم ياأخى الكريم فخرى ذاتو بلوم فى الناس البعتبرهم ( شلتو )
اللهم لا اعتراض فى حكمك ...

[نبيل عبد الرحيم]

اقتباس:

اقتباس:

المشاركة الأصلية كتبت بواسطة الرشيد اسماعيل محمود
إنتو منو..؟؟

أنا غايتو ما شايف زي شوفك ده..

الأخ رشيد
أنا نبيل وعضو هنا منذ 2005 وهذا رأى وأنا يا أخ رشيد منذ إنضمامى هنا لا أعرف أنافق أو أجامل ولا أخاف لومة لائم فى قول الحقوعشان كلامى تجدنى بدون شلة
وكما إحترم رأيك يجب عليك إحترام رأى
ولو كلامى صبغته بلغة الجمع هذا إحساسى وسبق كتبت بوست بهذا المعنى
الشئ اللافت للنظر فى الفترة الأخيرة ضيقكم من الرأى الأخر خاصة من يتقلدون مناصب قيادية فى المنتدى ويمنكم أن تلاحظون كلامى
والرجاء من يتقلد منصب قيادى أن يقبل النقد بصدر رحب لكى لاتعطى إحساس بأن هناك ديكتاتورية

[نبيل عبد الرحيم]

اقتباس:

المشاركة الأصلية كتبت بواسطة النور يوسف محمد
بسم الله الرحمن الرحيم

يا نبيل إزيك وكيفنك ..
بالله سؤال بدون حساسية وبكل إحترام ..
لماذا لم تشارك فى البوست المعنى وأنت تدعو لعدم الشللية ؟؟
البوست مازال موجود بمنتدى الحوار ..
لماذا تحذر الناس من فعل وتمارسه ؟؟ بعدين ترحب بيهو وين ؟؟
الترحيب ده يا الحبيب مو هنا ..
فخرى ده ـ عشان أوقع ليك القصة ـ إنتقل مترقياً للعمل فى سلطنة عمان ..
وعبد العزيز من هناك يرحب به ..
ثم ياأخى الكريم فخرى ذاتو بلوم فى الناس البعتبرهم ( شلتو )
اللهم لا اعتراض فى حكمك ...

الأخ النور
سلام
أولا والله لم أجد البوست لبعدى عن المنتدى لفترة وأعتذر لصاحب البوست
يظهر دخلت البوست علط
خلاص ياعم فخرى إعتبرنى فى سلطنة عمان
ومش عيب نغلط بس العيب أن لا نعترف بالخطأ
لك المودة صحيح سودانيات مثلها مثل الدنيا ليست المدينة الفاضلة ولكن دعنا نحاول

[اشرف السر]

الأخ فخري

لك كامل أسفي واعتذاري

مع أني اتغيب عن المنتدى لفترات قد تطول أحيانا.ز
لكني حتى الساعة لم أقرأ بوست الترحيب المعني...

[أبوبكر عباس]

المشاركة الأصلية كتبت بواسطة نبيل عبد الرحيم

الأخ فخر الدين
أرحب بك ووجودك يسعدنا وأقدر شعورك لأن للأسف أصبحنا مقفولين لشلة معينة
وهذا ماحذرت منه فى بوست سابق .
لك المودة أخى فخرى الزين

نبيل و الله حننتني

[أبوبكر عباس]

فخري الزين عليك الله أنا طلعني من اللوم دا.
وريني يوم واحد انت و لّ عبد العزيز عملتوا ليكم بوست بيتحمل غلاط و عكلته، و أنا ما شاركتكم فيهو؟
بوستات شكرا يا حبيب و إزيك يا وريف و بالتوفيق يا أنيق، صحي مرات بشارك فيها، لكنها ما تخصصي
عليك الله طلعني من التعميم بتاعك دا و قول: ناس سودانيات ما عدا بابكر عباس الشفيف.
يا زول عندك بوستات خطيرة جيبها لينا و شوفنا كان نقصّر معاك، لكن تجي تتحرّد عشان ما جيناك في بوست ترحيب بسلطنة عمان، أسمح لي أقول ليك: حركالتك دي ما عندها أي فرق من حركات فتحي مسعد حنفي

هسع البوست دا، من جاب ليهو زول راكب غلط، زي نبيل عبد الرحيم، أنا جيت اديتو واحد "حننتني" بالرغم من إنو ناس كتيرين جاتم في كي بوردهم، لكنهم بهرشوا من نبيل دا!

أنا بعتذر ليك بعدم الترحيب بيك في عمان، لانو عمان دي بلد حبيبة عندي جدا و الشغل فيها يستحق الترحيب

[محمد مصطفي]

اقتباس:
المشاركة الأصلية كتبت بواسطة نبيل عبد الرحيم
الأخ فخر الدين
أرحب بك ووجودك يسعدنا وأقدر شعورك لأن للأسف أصبحنا مقفولين لشلة معينة
وهذا ماحذرت منه فى بوست سابق .
لك المودة أخى فخرى الزين

يا نبيل تحياتي
انا سجلتا هنا بعدك
وحينها ما كان عندي معرفة بي الناس الا القليل منهم ممن اشتركنا سوياً في بعض المنتديات
شايفك كتير عاصر علينا بموضوع الشلليات ده يا صاحب
والله اقولا ليك بصراحة وحقو ما تزعل مني ... دي عقدة منك ساي يا جميل
انت الختيت في راسك فكرة ان المنتدي بتاع شلليات ومشيت تسوق في فكرتك دي
وانت الكاشي من الناس ما عايز تدخل معاهم وبتجي برضو بترمي اللوم عليهم
انا بتعامل هنا مع كل الاعضاء بغض النظر عن انتمائهم السياسي .. بضرب ليك مثل بي نفسي
قبل اكتر من شهر حصل نقاش بيني وبين احد الاعضاء كنت دائم التداخل معه وهو كذلك
لكن لما موضوع منو ما عجبني رديتو ... وبناء علي ردي اتوقفتا شهر من المنتدي ده
لا التوقيف غير مني ولا فقدت تداخلي مع الناس وتداخلهم معي
انا بس بقول ليك كلنا ما بنجامل والغلط بنقول عليهو غلط ... وكلنا دقريين يعني ما اتا براك
عشان كده يا زول اضرب النوايا لون ابيض وخش مع الناس ديل بتلقاهم كلهم شُلة واحدة
كل الود يا جميل

[محمد مصطفي]

فخري الزين .... عارف قولك من عشم
كل الناس حبايب وكل الناس اخوان ...
وعدم التداخل في البوست داك ما دليل طناش
ذكرتني قبل كده بوست مساهر فيهو الليل كلو .. لما اختفي من العيون زول ختا فيهو نقطة مافي
هسع تلقاك قلت النلكد الناس بي بوست كده وامشي انوم
تجي تلقا الناس صبحت متحسسا
كل الود يا صاحب

[عكــود]

سلام يا فخري الزين و أتمنّى لك التوفيق . .

ياخي أعتذر عن التقصير و ماك الزول البيقصّروا معاهو، فأنت تشارك الجميع بكل حرف أنيق و روح طيّبة. عبد العزيز ما قصّر، و البوست شفتو و نويت إتداخل، بس ما حصل. بس غلط عدم التداخل في البوست ما شايفو قدُر غضبتك دي.
إستهدى بالله يا حبيب و أطرا زين الناس.

نحن قُراب منّك هنا، لو إتسهّلت الأمور، أوجّه ليك دعوة زيارة لينا أنت و الأسرة، ولينا الشرف الرفيع. طبعاً ناس السعودية بيعتبروا مسافة 500 كلم دي just next door دحين تعال لينا قبل ما تتأقلم على السلطنة و تستبعد المسافة.

يا فخري أخوي نحن في رِجاك.

المشاركة الأصلية كتبت بواسطة نبيل عبد الرحيم

الأخ رشيد
أنا نبيل وعضو هنا منذ 2005 وهذا رأى وأنا يا أخ رشيد منذ إنضمامى هنا لا أعرف أنافق أو أجامل ولا أخاف لومة لائم فى قول الحقوعشان كلامى تجدنى بدون شلة
وكما إحترم رأيك يجب عليك إحترام رأى
ولو كلامى صبغته بلغة الجمع هذا إحساسى وسبق كتبت بوست بهذا المعنى
الشئ اللافت للنظر فى الفترة الأخيرة ضيقكم من الرأى الأخر خاصة من يتقلدون مناصب قيادية فى المنتدى ويمنكم أن تلاحظون كلامى
والرجاء من يتقلد منصب قيادى أن يقبل النقد بصدر رحب لكى لاتعطى إحساس بأن هناك ديكتاتورية

سلام يا نبيل،

أنا بكل أمانة ما شايف ناس الإدارة بيضيقوا من الرأي الآخر، اللهم إلاّ إذا كان ردّهم على الإتّهامات بيعتبر ضيق. يعني يا يسكتوا على الإتّهامات البتوجّه ليهم ليل نهار، يا إن ردّوا يُعتبروا بيضيقوا من الرأي الآخر؟ كمان إن سكتوا، بيقولوا الإدارة بتطنّشنا!
الله يعينهم علينا.

ليك المودّة.