نشاز اللحن عن النص ,,,, اهداء الى مهند الخطيب

[أسعد]

تحت اطار غلطة الشاطر بعشرة
كان خطأ الاستاذ مصطفي سيد احمد في النص الشعري البديع (عم عبدالرحيم)
اذ نجد الاستاذ قد دغمس هذه الكلمات البديعة دغمسة عجيبة وجوبكها جوبيك بديع
وكأن مصطفى سيد احمد قد قام بتحويل الكلمات الى فيلم سينمائي تم تصويره في ضواحي موسكو
فضاعت شخصية (عم عبدالرحيم) عن النص تماما بهذا اللحن الغريب
وكأن الاغنية تتحدث عن عم تروكاييف ^ـــــ^
http://www.youtube.com/watch?v=i4HMQeV_wu8

اها يا مهند انصف حبيبك حميد من ظلم حبيبك مصطفى سيد احمد
حيث تغول لحن مصطفى علي كلمات حميد تغولا ظالما

[أسعد]

عم عبد الرحيم/حميد/مصطفي سيد احمد

فتّاح يا عليم
رزّاق يا كريم
صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق هم هما
صنقع لى السما
وكان فى الجو فى غيم
وكم نجمات بُعاد
وكان الدنيى صيف
لا قالتلوا كيف
.. كيف أصبحت .. كيف
لا لمسة وداد
لا لمسة حنان
لا رمشة طِريف
من قلباً وفى
زى أيام زمان .. أيام الدِفِى
كانت ماها فِى .. كانت فى المراح
شدَّتلو الحمار .. تحلب الغنم لى شاى الصباح
والطير ما نضم .. ما رسـّل نغم

عم عبدالرحيم
إتوكـّل نزل .. فى المُشرَع لِقَى
زُملان الشقا
الجا من الجريف .. الجا من الجبل
علْ الناس بخير
صبّح هاظرُمْ .. نقْنقْ ناقَرُمْ
غاظوهو .. ونعَل
وعم عبدالرحيم ما بخَبِر زعل
كل الناس هنا ما بتخبِر زعل
تزعل فى شِنو .. وتزعل من منو..
كل الناس هِنا .. كل الناس صِحَابْ .. كل الناس أهَل
والماهُم قُرَاب .. قرّبـُمْ العمل

الطاق اليَطُقْ .. عشتْ .. آ .. أبوالزَمَل
بى الحال العليك .. بى الفال .. بى الأمل
عم عبدالرحيم ..
كُتْ فلاح فى يوم
فى إيدك تنوم .. على كيفك تقوم
لا دفتر حضور .. لا حصة فطور
تزرع بالقمر .. تقرع بى النجوم
لكن الزمن .. دوّار .. آ .. بِدُوم

عم عبدالرحيم ..
ماشى على الشغل
فى البال القديم .. من عار التُكل
تنشايح جِراح
.. كيف الغُسُل
الدِنيِى أم صلاح تبدا من التُكُل
من حِجـّة صباح .. فى حق المُلاح
فى الغُبُن الجديد .. فى القسط القديم
وبيناتِن عشم .. فى الفرج القريب

أمونة الصباح ..
قالتْلُو النـِّعال والطِرقى .. إنَهَرَنْ
ما قالتْلُو جِيب
.. شيلِن يا الحبيب غشّهِن النُقُلْتـِى والترزى القريب
بس يا ام الحسن ..
طقّهِن .. آ .. بِفيد .. طقّهِن .. آ .. بزيد
إنطقّن زمن
وإن طقّ الزمن .. لازمِك توب جديد بى أيـّاً تمَن
غصباً لى الظروف .. والحال الحَرَنْ
شان يا أم الرحوم .. ما تنكسفى يوم
لو جاراتن جَنْ .. مارقات لى صُفاح
أو بيريك نجاح
ده الواجب .. إذن
وأيه الدِنيِى غير .. لمّة ناس فى خير
أو ساعة حُزُن

عبد الرحيم يا حُر
ماكا حُر
يا ريت التمر .. ياريت لو يشيل كلِّ تَلاتْ .. أشـُرْ
ولاّ أيام زمان كانت ما تمُر
كان ماجاك هوان .. ما لاقاكى ضـُر
كان لا ضِيق يضيق
لا أنغرغَرْ صبر
ولا شابيت غريق .. ولا طلوَحْ فقُر
كان ماكان .. وكان أكيسى دُر

حيكومات تجى
وحيكومات تغور
بتحكم بى الحِجِى .. بى الدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السقتو ما باقى على التِمور
وأرضك راقدِى بور
لا تيراب وصل .. لا بابور يدور
والماهية أُفْ
عيشة هاك .. وكُف
فى هذا الزمن .. تـُف يادنيا .. تـُف
يا العَبِد الشقى
ما أتعوّدْ شكى
لكن الكفاف فوقك .. منتكى
حالك ما بتسـُر
إِلِّى كمان فى ناس فايتاك بى الصبُر
ساكنين بى الإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر
عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُرُن
الشغلانتو نار
والجو كيف سُخُن
عيشُنْ كمّهو .. وديشُن هان قَدُر
وناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. ولا وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
يا عبد الرحيم إلِّىِ ورا القبُر
ويلكد فى النعال
فتاح يا عليم
وإن كان الفقر يا عبدالرحيم
أشبه بى الكُفُر

ونقرط لى الحمار
نقريط الحمار .. لاتنسى النِعال
الطِرقِى الخدار
اللِّبِس الجديد
تسريح السفر .. لى الماشى الصّعيد
ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم .. لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر
...........
وسال الدم .. مطر
وطارت دمعتين .. وإنشايح وتر
يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر اليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تالا اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق لى التُراب
منشور بى كتاب
روشتّة .. وجواب
مفتاح أب قُراب .. أورنيقين سَهَر
جنب لِبدة حُمار
مقطوعين ضَهر
... عم عبد الرحيم ..يا كمِّين بشر
صحِّى الموت سلام
ما يغشاك شر ..

[قيس شحاتة]

المشاركة الأصلية كتبت بواسطة وجدي الأسعد الأسعد

خطأ الاستاذ مصطفي سيد احمد في النص الشعري البديع (عم عبدالرحيم)
اذ نجد الاستاذ قد دغمس هذه الكلمات البديعة دغمسة عجيبة وجوبكها جوبيك بديع
وكأن مصطفى سيد احمد قد قام بتحويل الكلمات الى فيلم سينمائي تم تصويره في ضواحي موسكو
فضاعت شخصية (عم عبدالرحيم) عن النص تماما بهذا اللحن الغريب

عكس رؤيتك تماماً تجده في هذا المقتبس:

البُعد المسرحي في (عم عبد الرحيم)
• قيس الصديق شحاته
لم يلجأ الفنان الراحل مصطفى سيد أحمد إلى المباشَرَة في الأشعار التي غنّاها، بل اتّخذ من الرمزية سبيلاً سلكه عبر معظم أغنياته، وأجادَ في انتقائه لقصائد عبّرت – أو كادت- عن طبيعة الأفكار التي تعكس اتجاهه الفكري والثقافي، وميوله الغنائية والشّعرية.
وتعتبر أغنية (عم عبد الرحيم) إحدى إشراقات الراحل التي تُعَد أنموذجاً مثالياً لمشروعه الغنائي وفلسفته الفنيّة.. أنموذجاً يختزل بين جزيئاته من حيث المبنى والمعنى، قدْراً غير يسير من الإبداع الذي يشرح بوضوح كم كان الراحل مُغنّياً فذّاً ومُلحّناً مُقتدراً.
يمكن بدءاً تصنيف أغنية (عم عبد الرحيم) في طليعة الإرث الغنائي الثوري الذي يُحاول أن يُلامِس آلام وأحلام قطاع الهامش العريض، حيث اتخذ الراحل (حمّيد) شخصية (عبد الرحيم) نمطاً عبّر من خلال تفاصيل يومه العادية عن حياة البُسطاء ومصائرهم المُحزنة عندما تختار لهم أقدارهم مجاهلَ وعِرة المسالك، ودروباً شائكة الحواجز.
الأغنية عبارة عن ملحمة مُحتشِدة الصُّور والرموز.. وبها مسرح مكتمل الأركان والتفاصيل والمشاهد... وقد استهلها حمّيد بـ (تقرير) مُعبّر عن (صباحات) عبد الرحيم ذات الأبعاد المُوحية والتفاصيل الصغيرة الغنيّة، بينما أوفتْ استجابة مصطفى اللحنيّة هذه المُقدّمة ما تستحق من (التمهّل) حيث تمدّد الصوت الطروب ليرسم بعناية مدروسة عدداً من المشاهد التي حرِص حمّيد على إثراء اللوحة بها:

صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق هم هما
صنقع لى السما
وكان فى الجو فى غيم
وكم نجمات بُعاد
وكان الدنيي صيف
لا قالتلو كيف
كيف أصبحت .. كيف
لا لمسة وداد
لا لمسة حنان
لا رمشة طِريف
من قلباً وفى
زى أيام زمان .. أيام الدِفِى
كانت ماها فِي.. كانت في المراح
شدَّتلو الحمار .. تحلب الغنم لي شاي الصباح
والطير ما نضم .. ما رسّل نغم

وقد طوّع مصطفى اللّحن "والصوت" بطريقة تجاوبت – تماماً كما ينبغي - مع المتعرِجات والمُنحنيات والمواقف والانفعالات التي تحفل بها القصيدة.. يتضح ذلك في كثير من مقاطع و(كوبليهات) الأغنية:

السكة الحديد يا عمو القطر..
يا عبد الرحيم قدامك قطر..
...
حيث سرعة الايقاع المُوحِي بخطر وشيك، والذي يعتمد على "نقرشة" العود بدقّات "عنيفة" مع ارتفاع صوت المُغنّي حتى يكاد يبلغ حد الصراخ.. وأبلغ ما في هذا المقطع أن المشهد يكتمل وتتضح نهايته الدرامية دون أن يُفصِح الشاعر عن ذلك، بل إنه ترك فراغاً ملأ مساحته الحَرَكية مصطفى عزفاً على العود، ليواصل الشاعر – من بعْد - سرْده مُكمِلاً:
... وسال الدم مطر
...
وفي ذلك براعة في التصوير وحذْق في الأداء الدرامي للأغنية.
ثم تأمل كيف "يهدأ" الايقاع ويجمُد الانفعال ويُبطئ مصطفى من نبرات صوته.. انتقالاً لـ(مشهد) آخر مُنفصل مكاناً عن المشهد الأول، لكنّه مُتصل به في التتابع الزمني والتسلسل الموضوعي للأحداث:
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..

ثم، بعد هذا التصاعد المُرتّب والمُثير.. تسير الأغنية في وتيرة متأرجحة، تتباين فيها مساحات الايقاع بين الرؤى المسرحية التي تصنعها كلماتُها الخلاقة، وبين الأداء الصوتي والنغمي لمصطفى سيد أحمد.. إلى أن يشتد الايقاع "سخونةً" مرة أخرى في المقطع الذي يقول:
عم عبد الرحيم في الشارع عَصَر ..
لي تاله اليسار واتفادى الكجَر
...
وهكذا، "صنع" مصطفى سيد أحمد من الأغنية سِيرة وحكاية ومسرحاً وفصولاً من الايقاعات والألحان والتعابير.. واستطاع بعبقريته، وسعة خياله، ومرونة أفكاره.. أن يصمّم "قالباً" لحنيّاً يتقمّصُ شعورَ حمّيد قبل شِعره، ويترجمُ إحساسه قبل كلماته، ويفسّر رموزه قبل إشاراته.. ليقدم لنا "منتوجاً" غنائياً فريداً، لم يستوعب أكثرنا - بعد - أبعاده، ولم يُدرك معظمنا - بعد - حدوده، ولم يبلغ أغلبُنا - بعد - منتهاه ... ولن نبلغ.

[أسعد]

المشكلة يا قيس انو حميد عمل لوحة مكتملة لعم عبدالرحيم
لوحة مكتملة بجميع اركانها
واي لوحة مكتملة تصبح محاولة اضافة لون او رسم يفسد اللوحة ويذهب معناها
وتصبح بمثابة القشة التي قصمت ظهر البعير
وهنا جاء مصطفى سيد احمد بقشة لحنه ليقصم ظهر نص عم عبدالرحيم كش كرش كدة

يا قيس ياخ اللوحة لمن تكون مكتملة بتكون بس محتاجة واحد يساعد الناس بالتفاسير
تفسير يكون بديعا زي تفسير مصطفى سيد احمد لكلمات القدال في (حليوة)
http://www.youtube.com/watch?v=avGPc...eature=related

[اشرف السر]

وجدي

ازيك

عليك الله.. هي قصيدة عم عبد الرحيم دي بتتلحن...؟؟؟

والله مجازفات ساي من مصطفى غناها
لكنها عصية .. جداً جداً على التلحين.. وليست غنائية على الاطلاق


ولنراهن أنه لا يستطيع ملحن آخر أن يضع لها أي لحن آخر..

[مهند الخطيب]

ياسلام ياوجدي ....

اعطني من الزمان مايقيم قليلا مني وسآتيك بعد قليل ...

فلي هنا كلمات ...

[الجيلى أحمد]

المشاركة الأصلية كتبت بواسطة مهند الخطيب

اعطني من الزمان مايقيم قليلا مني وسآتيك بعد قليل ...

كلام زى دا تمشى تقولو فى عكس الريح زى ماقال بابكر
شابكنا
الزمان
وقليلآ
آتيك
وبعد قليل

يااخى حلاقة الشعر شكلا اصلو مانفعت معاك
_
بى مناسبة الحلاقة دى ,
نحنا موش عندنا اتفاق ياشاب؟
غايتو يازول بخليك للبرى بتاع وجدى دا,
لكن الفيك اتعرفت

[عبدالمنعم الطيب حسن]

وجدي سلام وتحية
اللحن دا ياخ لحن عجيب
يا زول مالك علينا نحن شغالين من صباح الرحمن هسع ننوم ولَّ نرد
ياخ اللحن دا صديقنا العازف الراجف فضل المامون الله يطراهو بالخير انما وجد
هذا الفضل ما ان يبدا في عزف عم عبد الرحيم
حتي يتعرق كل جسمو الظاهر لنا على الاقل
ويرجف كله ...
وذكر لي هذا الصديق انه لا يستطيع ابدا عندما يكون لوحده من عزف هذه الاغنية
فضل من قرية ود الماحي ريفي الحوش ...
رايت بعينيَّ الجكس في مصر كان يبكي عديل عندما يصل اللحن
السكة الحديد ياعمو القطر
ياعم عبد الرحيم قدامك قطر
.............
موسكو دا ذكرتني كنت بحفظ في الحروف الموسيقية
صو لا ري مي فا ، بصوت مسموع
واحد زميلي قال لي بتتعلم في اللغة الروسية ولَّ شنو

[زول الله]

اول تبادي وصفك لعلاقة اللحن مع نص عم عبدالرحيم بـ"نشاز" هو اكبر نشاز هنا
ياوجدي ياخ النص دا من الصعوبة بمكان تلحينه فهو من النصوص عصية التلحين جداً
مصطفى كان يلحن حتى "الكلام العادي" ولم ينشز يوماً
شخصياً عندما اسمع عم عبدالرحيم احسها كـ مُهر جامح تم تطويعه
"تطويعه" أو "تطييعه" دي اسأل منها اهل الاختصاص.. بابكرعباس نموذجاً
يازول أي ملحن تاني كان يقعد فيها تلاتة سنين ويغير تركيبة النص عشان"يوالف"
وفي النهاية يا غلبتو أو جابا "نشاز" زي ماقلت




اقول قولي هذا واستغفر الله لي...............

[أسعد]

يا اشرف وزول الله
ياخ عم عبدالرحيم دي اكتر نص يسهل تلحينه
ياخ دا نص لحنه من دقنو وافتلو
كدي حاولوا اقروا النص بعيدا عن سطوة مصطفى سيد احمد
مشكلة لحن مصطفى انو عمل النص صعب التلحين
ياخ دا نص جاهز لحنا وتجسيدا لحركة المشاهد
وفوق لي دا معمول بلغة ابسط من بسيطة
بس مصطفى سيد احمد جوبك النص وجعله عصيا في التلحين

[أسعد]

الجيلي
شكرا لمرورك الكريم^__^

[أسعد]

يا منعم
مشكلة سطوة وسلطة مصطفي سيد احمد عليكم
ازالت عنكم عين السخط وبقيتو شغالين بعين واحدة (عين الرضا)
عشان كدة صعب الواحد يقنعك انك تقرأ النص بعيدا عن حضور مصطفي

[اشرف السر]

المشاركة الأصلية كتبت بواسطة الجيلى أحمد

كلام زى دا تمشى تقولو فى عكس الريح زى ماقال بابكر
شابكنا
الزمان
وقليلآ
آتيك
وبعد قليل

_
بى مناسبة الحلاقة دى ,
نحنا موش عندنا اتفاق ياشاب؟
غايتو يازول بخليك للبرى بتاع وجدى دا,
لكن الفيك اتعرفت

وقفت لي كلمة حقتك يا الجيلي..
وبستأذنك اقولها لمهند هنا





كااااااااااااااااااااااااااااااااااااااااااااااااا ااااااك

يااخى حلاقة الشعر شكلا اصلو مانفعت معاك

مهند..
اسمع كلام الصح
كنت شمشون
وزولك عمل ليك زي دليلة
وخلاص راحت عليك بعد الحلاقة

[الجيلى أحمد]

المشاركة الأصلية كتبت بواسطة وجدي الأسعد الأسعد

الجيلي
شكرا لمرورك الكريم^__^

والله ياوجدى شكرآ لمرورك انت دا..
يلا شيل شبشبك البيجى
واتخارج لينا بالله من البوست دا

[زول الله]

المشاركة الأصلية كتبت بواسطة الجيلى أحمد

يلا شيل شبشبك البيجى
واتخارج لينا بالله من البوست دا

في التنك يابوس
غايتو قرييييبة لـ سب الدين كدا




اقول قولي هذا واستغفر الله لي.............