اقتباس:
المشاركة الأصلية كتبت بواسطة خالد الصائغ
تحياتي استاذنا قرقاش
السؤال الأساسي هنا
هل الحكومة لديها تصور مدروس و مخطط له للاستفادة القصوي من هذا الطريق ؟؟؟
و أنا هنا أقصد الاستفادة التي ستعود علي المواطن و ليست تلك التي ستذهب الي خزائن الحكومة من جبايات و رسوم
كلنا يحب مصر و شعبها عزيزي قرقاش
و لكن هذا الحب لا يمنع إطلاقا أن نقتسم كعكة هذا الطريق سويا
و لسنا كمواطنين بطماعين
لتكن الكعكة علي ثلاث
تِلِتْ للمصريين
و تلت لي مواطني جمهورية السودان
و تلت لي مواطني جمهورية المؤتمر الوطني
|
حبيبنا خالد ...سلامات
والله سؤالك اجابته واضحه زى الشمس ...طبعا لا والف لا..اذا كنت تقصد دراسات بمعنى دراسات يعنى .. ياخى نحنه قاعدين كل سنه نتفاجاء برمضان ونتفاجاء بوقفه العيد ..فيها شنو يعنى لمن نتفاجاء بانه الطريق الشمالى للسودان تم افتتاحه واصبح حقيقه واقعه .. مع انه ولاول مره فى التاريخ سيربط هذا الطريق الخرطوم بالاسكندريه ..
اسكندريه ..؟ اسكندريه مين ياعم ..
اوربا ياباشا ... اوربا ...يعنى من اى حته فى الخرطوم وتانى يوم تكون مع رافت ميلاد فى اسكندنافيا وبعربيتك الهلمان موديل ستين.. وما ادراك ما اسكندنافيا .. عموما ماسمعنا من الحكومه ولا فى بالها غير انه الطريق ده حيقلل فى تكلفه نقل المواشى الى عشرين فى المايه ..غير كده ماسمعنا... ولو سمعنا ح ننكر ليه..؟ .. عموما اؤكد لك ان ناس الجمارك والجبايات والصفافير وناس الايصال انقطع اكيد بكونوا قاعدين يشتروا فى سكاكينهم ..ادعى الله معانا انه يسنوها كويس ..لانه السكينه لمن تكون ميته ... المذبوح بيتعذب وبيجقلب باختصار بدق جرس ...
ثم ياخى الحكومه البتتكلم عنها دى .. مش ياها الحكومه البنصحى كل صباح ننبذ فوقكها ..؟ فياخى سيبك منها عليك الله كدى بس خليهم يكربوا لينا اتفاق الحريات الاربع ونكون متساويين مع المصريين ..يعنى نكون انداد ..اكرر انداد ليهم مش زى كل مره مقصرين رقبتنا .. وان ينظموا دخول وخروج المصريين كما يفعل المصريين معنا والحق مايزعلش ..
انا مازلت اعتقد ان السؤال هو ...الشارع ده الناس ح تستفيد منه كيف ..؟
هل سنستطيع ان نصدره عبره ثروتنا الحيوانيه ومحاصيلنا الزراعيه ..؟ ونجلب ... اكررر نجلب ..وضع تحت كلمه نجلب الف خط ... هل سنستطيع ان نجلب عماله مصريه لزراعه اراضينا ..اقصد انه نحن نجلب المزراعين ليزرعوا لنا .. يعنى المصرى غير الزائر ...اى المصرى الراغب فى الاقامه مده طويله فى السودان وممارسه اى عمل عليه ان يدخل السودان وهو متعاقد مع سودانى .. اما الزوار فالف مرحب بهم فقط فى الدخول نختم على جوازه غير مصرح له بالعمل ..
وهل نحن كسودانيه قادرون على تاسيس شركات او تجمعات او حتى افراد على فعل هذه الامور ..؟ مع العلم اننا كنا نبيع فى مصر التسالى والشاى والحنه والويكه والمعجون وصابون صافى ( الغير اوصافى ) والشطه والشمار .. وهناى التمساح ( احليله ) وكثير من الاشياء التى لها قيمه وتقدير من جانب اخواتنا المصرين ..
فماذا نحن فاعلون .وهاهو الطريق الذى تمنيناه .. والحلم الذى حلمنا به قيد التحقق ...فماذا نحن فاعلون ..؟
وفى المقابل فى الجانب المصرى .. مصر صدرت للسودان .. الف سلعه وسلعه مصنعه فى مصر وبعلامات تجاريه عالميه وبقدره على الانتاج بكميات مهوله ..( ماس برودكشن ).. مصر تصنع تلفزيونات غروندق الالمانيه وتبيعها فى المانيا ست الاسم و صاحبه العلامه التجاريه ..وكثير من الاشياء الاخرى المشابهه .. ولدى مصر اسطول نقل يمكن ان يصل الى اى مكان فى العالم صحيح عربات مجروس المانى قديم ..ولكن عليها سواقين وعمال موهلين ومدربين تدريب تام وزياده على كده مقضين الخدمه العسكريه ..
ان عدد المصريين الذين يهمهم امر طريق فتحى خليل قياسا بعدد السودانين الذين يهمم نفس الامر ...قليل ..ولكن خذ حذرك ينبغى ان تضرب هذا الرقم فى العديد من الامور ..منها .. فى نسبه السكان بين البلدين..ومنها مثلا الناتج القومى للبلدين .. ومنها حجم التجاره بين البلدين ..ومنها حجم العلم والمعرفه فى البلدين.. وحجم المحن والتجارب ..وحجم الحروب و حجم الفهلوه ايضا ...
ياالله ..كن رحيما بنا يالله ... اغلقنا الباب المؤدى لاسواق الجنوب وجعلناه التجاره مع الجنوب جريمه وحددنا لها العقاب بالحبس والدمغ بختم خيانه الوطن ..
وفتحنا الباب الشمالى على البحرى الباب المؤدى الى مصانع الماس برودكشن فى سته اكتوبر والعاشر من رمضان ..
حتما سيصلنا الهواء الشمالى .. الهواء المصرى... و نحنه غلابه ومعدومين العافيه وعلى العلينا لابطانيه ولا لحاف..
تعمل ايه يا موهمد ....تقفلى الشباك . ولاتفتهى الشباك ..؟
