شهوات الليل .... إلي أسامة معاوية الطيب وين ما كان ... اليد باليد

[خضر حسين خليل]

ها نحن
مرة أخري إثنينينا (كثيران الله في برسيمه) نعاين وننظر ونمشي ـ نمشي في الدروب . تتناقلنا الخطاوي خطوة إثر أخري ـ وأخري إثر أخري وها نحن نمشي .

قالت جارة لنا :

العجيبة السنة دي ما فرحنا بنجاح الوليدات ـ من وين بس نجيب الرسوم ـ كل ما نجحوا الوليدات همومنا بتزيد ـ قبيل بنديهم سندوتشات الفطور في ايدهم هسي عايزين حق الفطور وحق المواصلات . (هكذا تحدثت جارتنا)

تمضي الخطاوي حاملةً منا الترنحات ونحن نمضي عادي يعني نمضي ....!
قال الناس :
تعبنا ـ وليس بعد التعب شكوي ـ قالت الأسعار كلاماً آخر ـ قالت الأسواق كلامات وكلامات ـ حرروا منا الأسعار وبقينا علي ذات القيود والخيل تجقلب والشكر لصانعي الفقر والأزمات .

ما بين ليلة وضحاها إرتفعت الأسعار ـ شككت أنا في بتاع الدكان إذ كيف له أن يتنبأ بسعر السكر قبيل أن يعلن وزير مالية البلاد سياساته التقشفية ؟ شككت أنا حتي خيل لي أنه مخبر يرتدي جلباب تاجر لا أكثر ولا أقل ـ والجزار مخبر وبتاع الغاز مخبر والكمساري مخبر وبتاع البتاع مخبر ووو أنا لا زلت (في البعد أنادي يا بلادي يا بلادي يا بلادي يااااااااااااابلادي) .

تظاهرت الشوارع ـ خرجت البلاد من أجواء مشاريع خراتيمهما الحضارية خرجت هكذا عنوة (كدة وإقتدار) من أجواء الإستنكاح ـ خرجت الشوارع بحثاً عن بلاد آمنة ـ بلاد مطمئنة ـ بلاد بينها وبين شعبها لا تسع مفردات الأرض شرحها ـ خرجت يازول الشوارع من طرف ـ أمبدة ـ زقلونا ـ الحاج يوسف ـ الثورة ـ الديم ـ التعايشة ـ العباسية ـ الطلاب ـ الجامعات ـ البمبان ـ رجال الشرطة ـ ها زول جاطت الشغلة وأنا ..... (لا زلت في البعد أنادي يابلادي يا بلادي ياااااااااااااا بلادي) .

تغير كل شئ في لمح البصر ـ كل شئ تبدل ـ أنا نفسي لم أعد أنا ـ غضبي كذلك لم يعد هو ـ المسائل كلها تلخبطت حتي ـ حتي بلغ ومن شدة هواننا أيها الناس : أن صار ربطة الجرجير بتلاتالاف . أي والله جرجير الله والرسول بتلاتالاف ونحن نعاين أما الطماطم فبلا شك لا يسع الباندويث لذكره . والمغني يغني (هييي مقدرة راجل المرا حلو حلاة ) .

والعلة يا سادتي ليست في السياسات التقشفية (فنحن شعب متقشف) بطبعنا والحمد لله . متقشف للدرجة التي ماعرفنا فيها للتقشف رأساً من كراع ـ متقشفين بالنية يعني ـ متقشفين لله والرسول ـ متقشفين جنس تقشف أسكت خلوه ساي .
غير أنو الشغلة ما تقشف ـ الموضوع في كون أننا ناس ساي ـ ناس تحاصرهم الأوجاع والأزمات والأوهام ثم ...ثم يطالبوننا بالتقشف فتأمل ...!؟ .

مطالبنا وغاية أماني الأمنيات منا متقشفة ـ كأن نحلم مثلاً بالخبز والسلام والحرية وتلك مطالب قامت لأجلها الثورات منذ عصور خلت لو كنتم تعلمون .

وأنا خجلٌ خجلٌ كوني أردد الآن شعارات الثورة الفرنسية في عهودها الغابرة خجلٌ كوني أبحث عن مأوي في (هذي الساعة من شهوات الليل ) في بلد كان من شأنه أن يسع أجسادنا قبيل أمانينا وأحلامنا .


وأنا
إستغفر الله العظيم


ويا الخرطوم
إذا نامت عليكي
هموم
عيون الحق
ما بتنوم
________

[خضر حسين خليل]

يا اسامات ياخ دي النسخة المعدلة بعدما ذهبت النسخة الأولي أدراج الباندويث
فياخ لو قريب قول عوك .


كما أتأسف للعزيزة وهاد ذهاب مداخلتها الي نواحي ذات الأدراج


والتحايا للجميع

[وهاد ابراهيم محمد]

يا خضر انا قلت ليك:

ويا خضر..

لو تصدق, كنت أنتظر خروجك, الأصغر او الأكبر لا يهم
فالخوارج ما باتوا كُثر وإن كانوا ملء النظر والشوف.
ولولا أن ظهورك دوماً مؤلم لقلت مرحى مرحى
ويا خضر البلد خجلت من الخجل الخجلان..
فبقت خجلانة بالصريح..
انت قايل الشارع شن بسوي هذه الأيام؟
إنه يقول خجلاااااان انا وتعبت من الخجل بالدس !

وعليك السلام.

وانت قلت لي:

وأنا أحب الخوارج ـ أحبهم تمام حبي للمهاجرين يا وهاد ـ تمام حبي وإحترامي لهم ولك ـ ليت الشوارع أعلنتها يا وهاد ـ ليتها يا صديقة أعلنت خجلها ـ لكنا إسترحنا ـ الثوري لا يغشي قلبه الخجل ـ الثوري لا ييأس ـ الثوري يا صاحبتي لا يضع بيضه كله في سلة واحد وتلك حكمة الشوارع ـ الشوارع أم عين قوية ـ الشوارع التي تعاين وتبتسم كما الحكماء (حينما تمر المواكب) . لن نيأس وسننتصر كان باكر كان بعدوا .

مودتي وهاد

انا حقي ما بخليهو كلو كلو يا خضر

[خضر حسين خليل]

تعجبي يا وهاد


عقبان الحق الكبير يا اخية

[وهاد ابراهيم محمد]

وبجيك تاني... ان شاء الله يكون أسامة جمع.

[خضر حسين خليل]

أسامات شكلو مرقها في كوسوفو يا وهاد غايتو كان لي باكر ما جمع نمشي جبرة ونشيل رقموا .


اها اوعك تطولي الغيبة

[عكــود]

النسخة الأولى:

المشاركة الأصلية كتبت بواسطة الزوول

...
سلامات يا خضرنا

تقصد الموضوع ده؟؟
http://sudanyat.org/vbold/showthread.php?t=24818
لو كان ياهو
يعينك الله
مطلوب منك تجيبو هنا
الكويسة ما فيهو مداخلات كتيرة....

سلام يا خضر وعلى وهاد وأسامة السلام.

[أسامة معاوية الطيب]

المشاركة الأصلية كتبت بواسطة خضر حسين خليل

ها نحن
مرة أخري إثنينينا (كثيران الله في برسيمه) نعاين وننظر ونمشي ـ نمشي في الدروب . تتناقلنا الخطاوي خطوة إثر أخري ـ وأخري إثر أخري وها نحن نمشي .

قالت جارة لنا :

العجيبة السنة دي ما فرحنا بنجاح الوليدات ـ من وين بس نجيب الرسوم ـ كل ما نجحوا الوليدات همومنا بتزيد ـ قبيل بنديهم سندوتشات الفطور في ايدهم هسي عايزين حق الفطور وحق المواصلات . (هكذا تحدثت جارتنا)

تمضي الخطاوي حاملةً منا الترنحات ونحن نمضي عادي يعني نمضي ....!
قال الناس :
تعبنا ـ وليس بعد التعب شكوي ـ قالت الأسعار كلاماً آخر ـ قالت الأسواق كلامات وكلامات ـ حرروا منا الأسعار وبقينا علي ذات القيود والخيل تجقلب والشكر لصانعي الفقر والأزمات .

ما بين ليلة وضحاها إرتفعت الأسعار ـ شككت أنا في بتاع الدكان إذ كيف له أن يتنبأ بسعر السكر قبيل أن يعلن وزير مالية البلاد سياساته التقشفية ؟ شككت أنا حتي خيل لي أنه مخبر يرتدي جلباب تاجر لا أكثر ولا أقل ـ والجزار مخبر وبتاع الغاز مخبر والكمساري مخبر وبتاع البتاع مخبر ووو أنا لا زلت (في البعد أنادي يا بلادي يا بلادي يا بلادي يااااااااااااابلادي) .

تظاهرت الشوارع ـ خرجت البلاد من أجواء مشاريع خراتيمهما الحضارية خرجت هكذا عنوة (كدة وإقتدار) من أجواء الإستنكاح ـ خرجت الشوارع بحثاً عن بلاد آمنة ـ بلاد مطمئنة ـ بلاد بينها وبين شعبها لا تسع مفردات الأرض شرحها ـ خرجت يازول الشوارع من طرف ـ أمبدة ـ زقلونا ـ الحاج يوسف ـ الثورة ـ الديم ـ التعايشة ـ العباسية ـ الطلاب ـ الجامعات ـ البمبان ـ رجال الشرطة ـ ها زول جاطت الشغلة وأنا ..... (لا زلت في البعد أنادي يابلادي يا بلادي ياااااااااااااا بلادي) .

تغير كل شئ في لمح البصر ـ كل شئ تبدل ـ أنا نفسي لم أعد أنا ـ غضبي كذلك لم يعد هو ـ المسائل كلها تلخبطت حتي ـ حتي بلغ ومن شدة هواننا أيها الناس : أن صار ربطة الجرجير بتلاتالاف . أي والله جرجير الله والرسول بتلاتالاف ونحن نعاين أما الطماطم فبلا شك لا يسع الباندويث لذكره . والمغني يغني (هييي مقدرة راجل المرا حلو حلاة ) .

والعلة يا سادتي ليست في السياسات التقشفية (فنحن شعب متقشف) بطبعنا والحمد لله . متقشف للدرجة التي ماعرفنا فيها للتقشف رأساً من كراع ـ متقشفين بالنية يعني ـ متقشفين لله والرسول ـ متقشفين جنس تقشف أسكت خلوه ساي .
غير أنو الشغلة ما تقشف ـ الموضوع في كون أننا ناس ساي ـ ناس تحاصرهم الأوجاع والأزمات والأوهام ثم ...ثم يطالبوننا بالتقشف فتأمل ...!؟ .

مطالبنا وغاية أماني الأمنيات منا متقشفة ـ كأن نحلم مثلاً بالخبز والسلام والحرية وتلك مطالب قامت لأجلها الثورات منذ عصور خلت لو كنتم تعلمون .

وأنا خجلٌ خجلٌ كوني أردد الآن شعارات الثورة الفرنسية في عهودها الغابرة خجلٌ كوني أبحث عن مأوي في (هذي الساعة من شهوات الليل ) في بلد كان من شأنه أن يسع أجسادنا قبيل أمانينا وأحلامنا .


وأنا
إستغفر الله العظيم


ويا الخرطوم
إذا نامت عليكي
هموم
عيون الحق
ما بتنوم
________

حبيبنا خضر
بجيك بي رواقة ... وأبادلك الحرف بالحرف ... والحسرة بالحسرة ... وننزف سويا باهظ احلامنا المجلوة بالعنت ... ونستغفر الله سويا ... ونمضي ... إلى حيث يمضي الناس جميعا ويظلون في مضيهم الحاد
تعرف كلمة الترمسة دي أبدا ما براها !!! فيها مجتمعات وحكايا وجغرافية !! أيي والله فيها الجغرافية الواااحدة دي ... خطوط الكنتور والتضاريس ... ومناطق خضراء تعرف بالسهول أظنها ... ومناطق صفراء ... شوية مختلفة من الصحف الصفراء ... ومناطق حمراء (دي بالضبط الوادي الأخضرالبتسمعبيهو ) ... فيها طقوس ... كطقوس المولد ... والممات ... والنحاس الذي يظل ينقز وينقّز قلبك بصيحاته الحية !!! فيها أي شيء ...
ياخي اقول ليك بجيك راجع
بس قبل اطلع ... وفيما يتعلق بالتقشف ... التقشف دا طبعا أصلو في يا خضر ... بس انا من كلامك دا بديت اتخوف انو ممكن يتضخم شوية ويدخلنا في استخدام بعض المصطلحات ... ودي ما مشكلة كبيرة إذ إنو أخوك مرّ بطيب الذكر ( سلتي ) يوما ما - اعتراضا حا احكي ليك نكتة عن اخونا سلتي دا ... لأنو في أحد خريجي المشروع الحضاري الحي ما مات دا قال داير يغترب يلم ليهو قروش ويرجع السودان يعمل ليهو (سلتي) بتاع كومبيوتر !!! المعنى سلتي دي في اللغة تعني معهد !!!

طيب يا خضر ارجع ليك لي موضوع التقشف ... وسبب خوفي منو أنو الجرجير ربطتو بقت تلاتالاف ... طيب الشقي دا معناها صعّب علينا تقشفنا دا ... لأنو عمك عبدالواحد علي سيداحمد (سواق الطاحونة) الوحيد في منطقة مركز مروي ... هو ليس الوحيد بالقطع كسواق طاحونة ولكنه الوحيد المختص في علم الفواكه ... قال لينا إنو اللوبيا (أيي والله بتاعة البليلة زااااتا ) إنها من الفواكه ... طيب اسع الجرجير دا مش حا يبقى فاكهة ... دا احتمال يبقى فاكهة محرمة ... وينزلنا من الارض دي ... المشكلة ينزلنا وين زاتو ؟؟؟
ياخي اقول ليك حاجة خلي ينزلنا ... أنا اصلا زايغ من الكمساري وما دافع
أها
بالله يا خضر يا خوي زول ينزل بالجرجير ؟؟؟ ويقول ليك دو ؟ الحرفا ما بيدو ... هو الجرجير بقى ينزل ... لا بنحرق بنحرق ... بنحرق عدددددديل

[خضر حسين خليل]

يا مراحب يا عكود ونورت المكان والسلام يغشاك

[خضر حسين خليل]

حررم بالجرجير زاتو نزولنا شكلو ما تامي يا اسامة ـ ياخ البلد دي ركبها ساحت ـ الونسة الماشة اليومين ديل الغلاء (الفاشح) كما تقول جارتنا يا سمسم ـ فاشح فشح تقيل ـ الفاحش ده كمرحلة عديناها بجميل الصبر ياصديقي .
أستغرب يا أسامة من حكاية البلد دي ماشة كيف ؟ قالو بالبركة لكن .


ياما انت كريم يا رب

[أسامة معاوية الطيب]

عن الترمسة نحكي يا صاحبي
الترمسة ... مكان ما يختلط فيه الشاي بنبات الأرض !!! هيل وقرفة ونعناع ... فتتسابق خيوط الكيف نحو آفاق جديدة في الرأس !!!
ولأهلك السودانيين رأس لا يتجاسر على ملء شقوقه إلا الشاي الساموطي !!!
اشتغلت الحكومة بدأب شديد جدا على تفتيت مشروع الجزيرة ... ومشروع الرأس السوداني العالي ... بدأت بالسكر ... شي غلاء ... وشي ندرة ... وشي ضياع الباس وورد بتاع المصنع الجديد بسبب امريكا الكافرة !!! والحصار التكنولوجي !!! ويوما ما قال البشير بعد أتم رقصته ... وضحكاته الفارغة مكسورة السن والكرامة ... (حانعمل ليكم مصنع سكر يعمل ليكم السكر من البنجر بدل قصب السكر ... البنجر بتعرفوهو ياخوانا ... ؟ البنجر دا ماياهو البمبي ياخوانا )
وحينها تزاحمت خطوط الدخان على رأس الترمسة فسمع لها شهيقا وهي تفور !!!
الرأس السوداني الذي أفرغوه من كيفه !!! فمضى يطالع خيط دخان ... فما عاد الدخان ... وما ابتلت شقوقه !!!

ولكن الترمسة ذاتها ... هي من سيعيد انتاج الرأس
الحكاية طويلة يا خضر ياخي

بجيك ليها لكن

انت بس حاول تتم النزول ... وإن نزل الشعب السوداني ... سيفتح ... وسيفتح الله عليه

وحتما بجيك راجع

[أميرى]

المشاركة الأصلية كتبت بواسطة وهاد ابراهيم محمد

وبجيك تاني... ان شاء الله يكون أسامة جمع.

أهو جمع يا ستي بالخطوة الجاية و راجعة بي فكة أباها الكمساري وأصر إنو ياخد من أخونا أسامه حق المشوار كامل وأسامه ربما إكتفي بالإختباء ورا جريدة ماجده الرومي
أو يمكن يعلي الصوت و يقول طالب و طالب الله و خليو يطلا بلا بالله
هو ده وقتو؟
البائع الجوال سيمد له حزمة الجرجير عبر زجاج النافذه
و سيبتسم إسامة صفراء
و يقول والله البي تلاته جنيه دي ترفع راسك و تغز بيرقك في أجعصها تله(والله هي كانت د.... بس قلنا الأدب كويس برضو وجرينا القاموس وجات تله ناطه)
المهم كنا وين؟
أيوااا يا خضر كنا عند البلاد الخجوله والدروب الخجوله والناس و ال وال
طهروا البلد دي ياخ و البنج جاهز
أو أمسك وأقطع ساي عل الله يبدل حمرة حياءنا بحمرة حياتنا
ياخ دايزاين نغيش شوية بي قوة عين ووقاحة
أقلو الواحد يا فرز عيشتو وقلب الأوضة الورانية لي أوضة نوم لعروس قادمة
أو فالنكفن و ندفن فيها في أمانة الله
مش ربنا كريم
و تيب!!

قال حكيم من ضواحي الصالحه يوما يا خضر
لو المطر صبا و السقف قدا إنعل أبو مسامير عروقك أو طق عروقك و...أنزف

وأنا أنزف جيدا يا صاح

[جيجي]

انت يا اميري بدل تنزف جيدا في بيتكم
ياخ ماتمشي تنزف في شارع الجامعة دي
يمكن نزيفك يفك الساجور ويفدى الناس دي
سلام يا صاحب

[أسامة معاوية الطيب]

المشاركة الأصلية كتبت بواسطة أميرى

أهو جمع يا ستي بالخطوة الجاية و راجعة بي فكة أباها الكمساري وأصر إنو ياخد من أخونا أسامه حق المشوار كامل وأسامه ربما إكتفي بالإختباء ورا جريدة ماجده الرومي
أو يمكن يعلي الصوت و يقول طالب و طالب الله و خليو يطلا بلا بالله
هو ده وقتو؟
البائع الجوال سيمد له حزمة الجرجير عبر زجاج النافذه
و سيبتسم إسامة صفراء
و يقول والله البي تلاته جنيه دي ترفع راسك و تغز بيرقك في أجعصها تله(والله هي كانت د.... بس قلنا الأدب كويس برضو وجرينا القاموس وجات تله ناطه)
المهم كنا وين؟
أيوااا يا خضر كنا عند البلاد الخجوله والدروب الخجوله والناس و ال وال
طهروا البلد دي ياخ و البنج جاهز
أو أمسك وأقطع ساي عل الله يبدل حمرة حياءنا بحمرة حياتنا
ياخ دايزاين نغيش شوية بي قوة عين ووقاحة
أقلو الواحد يا فرز عيشتو وقلب الأوضة الورانية لي أوضة نوم لعروس قادمة
أو فالنكفن و ندفن فيها في أمانة الله
مش ربنا كريم
و تيب!!

قال حكيم من ضواحي الصالحه يوما يا خضر
لو المطر صبا و السقف قدا إنعل أبو مسامير عروقك أو طق عروقك و...أنزف

وأنا أنزف جيدا يا صاح

أميري
مازلت قادرا على النزيف جيدا ؟؟؟ قوي في عضمك يا عمك

وبجيك راجع ... انا بقيت قادر على الرجوع بس !!

[أسامة معاوية الطيب]

المشاركة الأصلية كتبت بواسطة جيجي

انت يا اميري بدل تنزف جيدا في بيتكم
ياخ ماتمشي تنزف في شارع الجامعة دي
يمكن نزيفك يفك الساجور ويفدى الناس دي
سلام يا صاحب

جيجي حبابك ... وصل سلامك لأميري ... ما عاوزة تهدي؟

وينك مطولة الغيبة ؟