أين تسهر هذا المساء

[imported_نهلة عمر الشيخ]

طبعا اكيد انا ما فتحت البوست دا عشان اعرف كيف تشغلون امسياتكم -- انا مالي ومالكم اصلا
او بالاحرى انا مالي ومال حياتكم الخاصة

ولكني فتحتو عشان اعرف في ماذا تفكرون الان
يعني اين تسهر هذا المساء (تساوي) في ماذا تفكرون الان
واقصد تحديدا المواضيع التي تفكرون في كتابتها هنا في المنتدى

فلابد ان الجميع مهموم ويفكر الان في موضوع معين ويرى ان طرحه هنا مفيد للنقاش ولكن هنالك عدة اسباب حائله دون كتابته الان
قد تكون احدى هذه الاسباب انه لا يمتلك رويه شاملة للموضوع او قد تكون انه يفتقر للغة التي تناسب الطرح او قد يكون يفتقر للمعلومة

المهم بغض النظر عن السبب فانا فتحت البوست دا عشان اعرف في ماذا يفكر اعضاء المنتدى الان

[imported_نهلة عمر الشيخ]

صاحبتي اسمها ايناس تكتب في احدى المنتديات
قالت لي راسي بكون مزحوم بمواضيع كتيرة
بس اول ما افتح المنتدى واجي اكتب ما اقدر اكتب الا في موضوع ختان الاناث
وحتى لو جيت اتداخل في اي موضوع انشاء الله موضوع رياضي لابد احشر في مداخلتي شي عندو علاقة بي ختان الاناث

انا صراحة اتحسرت علي حالها ومن اليوم داك سميتها -- ايناس ختان اناث

[imported_نهلة عمر الشيخ]

انا مثلا بفكر الان في عدة مواضيع بس برضو لعدة اسباب ما قادرة اكتب فيهن ولا واحد



من ضمن المواضيع البفكر فيها
موضوع عن الهوس اللاديني وموضوع اخر عن تربية الاطفال في عصر العولمة

[ناصر يوسف]

المشاركة الأصلية كتبت بواسطة نهلة عمر الشيخ

انا مالي ومالكم اصلا
او بالاحرى انا مالي ومال حياتكم الخاصة

ولكني فتحتو عشان اعرف في ماذا تفكرون الان






المهم بغض النظر عن السبب فانا فتحت البوست دا عشان اعرف في ماذا يفكر اعضاء المنتدى الان

طيب لما إنتي يا نهلة يا بت العم وعلي قولك ( إنتي مالك ومالنا ـــــــــــ ومالك ومال حياتنا الخاصة ) جايًه سائلانا مالك ؟؟؟

عموماً الليلة أنا عندي بالمساء غسيل عِدَه وباقي مكوة

[imported_نهلة عمر الشيخ]

المشاركة الأصلية كتبت بواسطة ناصر يوسف

طيب لما إنتي يا نهلة يا بت العم وعلي قولك ( إنتي مالك ومالنا ـــــــــــ ومالك ومال حياتنا الخاصة ) جايًه سائلانا مالك ؟؟؟

عموماً الليلة أنا عندي بالمساء غسيل عِدَه وباقي مكوة

اها دا نوعية الناس البجوا طايرين ساي من غير ما يقروا الكلام كويس
يا اخ ناصر انا ما جيت سالتكم عن حياتكم الخاصة الما بتهمني والمفروض ما تهمك انت زاتك
انا ببساطة ولو قريت كلامي زي الناس حتلقى اني بسال عن حياتكم الفكريه في المنتدى وبس

وبما انك لمن تفتح المنتدى بتكون بتفكر في المكوة وغسيل العدة والامور الخاصة --فاكيد ما حتكتب لينا ما يفيد او يدعو للتفكير

[بابكر عباس]

المشاركة الأصلية كتبت بواسطة نهلة عمر الشيخ

انا صراحة اتحسرت علي حالها ومن اليوم داك سميتها -- ايناس ختان اناث

قوقلت إيناس ختان إناث
ظهرت لي
إيناس الدغيدي و
واحدة إسمها
رومانسية و دائما منسية

أكيد صاحبتك هي:
رومانسية الدغيدي

أنا بفكر أكتب عن:
ضرورة هجرة المدن السودانية و تغيير نمط الحياة

نهلة شنو الحكاية؟ أنا موش رسلت ليك رسالة داخلية فيها أسماء الحساسين بالمنتدى؟
وقلت ليك ديل بالترس الخفيف؟
ناصر دا ما شفتي إسمو في أول اللستة؟

[imported_نهلة عمر الشيخ]

ايناس صاحبتي دي يا بابكر بتكتب باسم مستعار
فكان الاجدى ليك تبحث في القوقل عن ختان الاناث وليس عن اناس



بالمناسبه ناصر لو فعلا اتحسس زي ما بتقول حاتاسف ليهو طوالي

[ناصر يوسف]

المشاركة الأصلية كتبت بواسطة نهلة عمر الشيخ

اها دا نوعية الناس البجوا طايرين ساي من غير ما يقروا الكلام كويسيا اخ ناصر انا ما جيت سالتكم عن حياتكم الخاصة الما بتهمني والمفروض ما تهمك انت زاتك
انا ببساطة ولو قريت كلامي زي الناس حتلقى اني بسال عن حياتكم الفكريه في المنتدى وبس

وبما انك لمن تفتح المنتدى بتكون بتفكر في المكوة وغسيل العدة والامور الخاصة --فاكيد ما حتكتب لينا ما يفيد او يدعو للتفكير

الأولي ... سامحتك عليها .... وربنا يسامحنا كلنا يا بت العم

التانية دي مربط فرسي يعلم الله .... المكوة وغسيل العدة والأمور البتقولي عليها أمور خاصة دي منو القال ليك ما مهمة وما عندها مكان للكتابة عنها ؟؟؟؟
الكلام البالأحمر الجاي تحت ده مش كلامك ؟؟

واقصد تحديدا المواضيع التي تفكرون في كتابتها هنا في المنتدى

أهاااا يبقي شنو ؟؟؟ المكوة وغسيل العِدَة وبعض المكوة لراجياني الليلة في البيت .... ده الموضوع الممكن أكتب عنو ...
عيبيه لي كموضوع ممكن أكتب فيه ....

[ناصر يوسف]

المشاركة الأصلية كتبت بواسطة بابكر عباس

نهلة شنو الحكاية؟ أنا موش رسلت ليك رسالة داخلية فيها أسماء الحساسين بالمنتدى؟
وقلت ليك ديل بالترس الخفيف؟
ناصر دا ما شفتي إسمو في أول اللستة؟

وحمَر.... له وشو زيييييييييييييييييين لآمن وشو حَنبَك ظاتو

[ناصر يوسف]

المشاركة الأصلية كتبت بواسطة نهلة عمر الشيخ

ايناس صاحبتي دي يا بابكر بتكتب باسم مستعار
فكان الاجدى ليك تبحث في القوقل عن ختان الاناث وليس عن اناس



بالمناسبه ناصر لو فعلا اتحسس زي ما بتقول حاتاسف ليهو طوالي

يا بت العم مافي أيتها حسس ولا عسس .... أكتبي وفكرتك واصله تماااااااااماً ....
بابكر عباس ده ما تشتغلي بيه لأنو من مدني

[imported_نهلة عمر الشيخ]

المشاركة الأصلية كتبت بواسطة بابكر عباس

أنا بفكر أكتب عن:
ضرورة هجرة المدن السودانية و تغيير نمط الحياة

شي جميل انك تفكر في الموضوع دا
بس الشي الاجمل لو الحكومة برضو فكرت معاك فيهو



انا بنصحك بدل تكتب عن ضرورة هجرة المدن السودانية وتغيير نمط الحياة
تكتب عن لماذا لم تفكر الحكومة في ضرورة هجرة المدن السودانية وتغيير نمط الحياة

[ناصر يوسف]

المشاركة الأصلية كتبت بواسطة نهلة عمر الشيخ

لماذا لم تفكر الحكومة في ضرورة هجرة المدن السودانية وتغيير نمط الحياة

أو لماذا لم تفكر الحكومة في ضرورة إنها تهاجر وتسيب الوطن ده للناس البيقدرو عليه ويقدروا يبسطوا العدل بيناتهم ... مثلاً ... وده موضوع برضو ... ولا شنو ؟؟؟

[imported_علاءالدين عبدالله الاحمر]

طبعا ماهو لازم اول شي اولع حفرة الدخان قبل صلاة المغرب وبعد داك اجيب اللبن وامشي اجيب العشا واغرف بلاعة الحمام دي عيشة تقرف يعني المرة كل يوم تتدخن لازم وتهرج في وسخ الملايات وتذكرني بانها حتمش البلد تختن البت شذي...


من مسج لصديقي علي جمال

[imported_الزوول]

نهلة ازيك
...
انا شخصياً رجلي (كراعي حسب لغوة اباذر عكود وبقية الحاقدين) مكسورة ومجبصة ...
مصاقر المنتدى ده ، والمنتديات الشقيقة والصديقة لغاية ما أنوم
ما في شيء بيحلكم وبيجلهم مني الا زوار (حمد لله على السلامة).
طبعاً ناوي اتداخل مع كل الناس وعلى كل المواضيع وموضوعك ده صادف اول واحد فيهم....
ممكن اتعطل شوية بسبب ردود واجبة لبعض الناس في بوستات سابقة
ولو لقيت فرصة بعد كده ، عندي موضوع من النوع أبو كديس ناوي افتحو *
.....
*اكتشفت انو معظم الناس (وأنا أولهم ) بتخيلوا مواضعيهم البيفتحوها دي هي أجمل وأهم مواضيع في الاسافير وتلقاهم مستغربين ومرات زعلانين عديل كدي من قلة التفاعل معاها.

[imported_نهلة عمر الشيخ]

المشاركة الأصلية كتبت بواسطة ناصر يوسف

أو لماذا لم تفكر الحكومة في ضرورة إنها تهاجر وتسيب الوطن ده للناس البيقدرو عليه ويقدروا يبسطوا العدل بيناتهم ... مثلاً ... وده موضوع برضو ... ولا شنو ؟؟؟

غايتو هو موضوع اخير من غسيل العدة
بس بقترح تعديل العنوان للاتي - ضرورة اجبار الحكومة علي انها تسيب حكم الوطن للناس البقدروا عليه