ما بنَكْسِر الْقَلَم الْبِقِيفْلَكْ في الْحَلِقْ
“A good pen can also remind us of the happiest moments in our lives, bring noble ideas into our dens, our blood and our souls. It can turn tragedy into hope and victory.”- Nelson Mandela
أكتِبْ أسَامِينا،
وسَمِّينا الْبِشِقُّو عَصا السُّكُوت
سَجِّلْ وقولْ:
ديلْ الْبِمُرْقُو على نوامِيس الْخُضُوع
كانْ جُوَّه ما خْتِينا الثَّبَاتْ
أو بَرَّا في الْمنفى / الرُّجُوع
ما بنَكْسِر الْقَلَم الْبِقِيفْلَكْ في الْحَلِقْ
"والنِّيِلْ مِدَادْ
النِّيِلْ مِدَادْ" هذي الْحُروف
الْما بتَهَادْنَكْ
لو يطُول بينا النِّزالْ
وما بنِنْكَسِرْ
مهما التَّنابْلَة تشِذْ
وتَفْجُرْ في الضَّلالْ
قَدْر الفي إيدينا بنغرِسُو
شَتلَةْ عَزِمْ
نخلَةْ نضالْ
وتَبَلْدِي صامِد زي جِبالْ
عَلِّقْ مشانْقَك
لَيْ قصايدنا الأَبَتْ
تدخٌلْ بيوت الطاعة
أوْ
تِتضارى مِنْ سوطك
ولا
تِتجارى في رَكْبَكْ
أَبَتْ
غير تمسِك الْجَمْرَة
وتقِيدْ
الْفِكْرَة لَيْ بُكْرَة
وتجالِدْ في الْمُحالْ
لامِنْ يِلين لَينا الْحَجَرْ
لامِنْ يِبين لَينا الْفَجُرْ
نَكْتِبْ نَرَتِّبْ حَرْفَنا
راكْزِين نَنظِّمْ صَفَّنا
شَايفِينْ سقُوطَكْ زي رجوع الطَّرْفِ
أوْ
شَايفِينْ مُرُوقْنا على الشَّمِسْ
أولاد حياةْ
وبَنات أمَلْ .......
هِمَّتْنَا أعلى مِن النَّشيد
ومَدَدْنا في كُلّْ يومْ بِزِيد
وبلَدْنا ناهْضَة مِنْ الرَّماد
أجمَل بِلاد
أَهُو دا الْحِلِمْ
البيهو شاهْرِين الْقَلَمْ
نكتِبْ ويِكتِبْنا الصباحْ
نفتح عيونَّا على حَدَايقو،
على بلَدْ
حَدَّادي فارِد كَمْ جَنَاحْ
مَدَّادي لَيْ آخِر بَرَاحْ
أَهُو دا الْقَلَمْ
البيهو شاهْرِين الْحِلِمْ
أَهُو دا الْقَلَمْ
أَهُو دا الْقَلَمْ
أَهُو دا الْقَلَمْ .......
عصام عيسى رجب
الخميس 23 أغسطس 2012 م
