حـــاج مــســنـــوح

[imported_hamza]

حاج مسنوح دي شخصية حقيقية ليها مواقف طريفة جدا ..
وهو رجل فالت اللسان والقول ...
طيب المعشر ... مبتسم المحيا دوما .. رجل بسيط في كل تفاصيل حياته ..
عندما تقابله في الطريق وان كنت في غاية الغضب او الدبرسة فانك لا بد ان تضحك لانه يجبرك علي ذلك ...
رجل من زمن اخر ... تذكرته هذه اللحظة تحديدا لاني احتجت الي ان اراه امامي الان .. لاني حقا احتاج الي الضحك ..
حاج مسنوح هذا اسمه الحقيقي محمد حسين ...سمي بحاج مسنوح لانه ذهب الي الحج وعندما عاد من الحج اذكر انه كانت هناك مباراة بين الهلال والمريخ وكسبها المريخ .. وهو مع الغالب لا يشجع فريق بعينه لانك لو سألته عن تشكيلة الفريق لا يعرفها فقط يحفظ اسم من سجل الهدف ... فبعد صلاة الظهر في اليوم التالي للمباراة ونحن خروجا من المسجد والناس يتناقشون عن مباراة الامس والمريخاب يشمتون في الهلالاب بقوون دحدوح الشهير .... خرج ادم سليمان من المسجد وهنا تحول المشهد تماما من نقاش في الكرة الي امر اخر ... لان عم ادم سليمان رجل صاحب مزاج عالي (بتاع سجارات) ولكنه خجول جدا ... فاستغرب حاج مسنوح من وجود هذا الرجل بالمسجد فقال له : يا ادم اخوي الحكومة رازتك لمن غلبك تشرب البنقو في بيتك قلت احسن اجي اشربو في الجامع ؟؟
ضحك عمي ادم وقال ليه : يا حاج انتو لو الزول الله هداهو ما تريحوهو ؟ فغير حاج مسنوح الموضوع بدبلوماسية سريعة جدا وقال له: يا ادوم اخوي انت لونك فتح كده مالك اوعك تقول لي ده من العيا ؟؟ مع العلم ان عمي ادم كان مريضا فترة طويلة والمرض طبعا بيخلي الزول لونو فاتح للوهن والضعف ...
فرد عليه عم ادم بقوله : اي والله يا حاج ...
فرد عليه حاج مسنوح وهو يشيح بظهره مغادرا المكان :
يا اخوي عارفنك بتشرب الدخان بس هسي انت ما عاوز تقول لينا انك بقيت تتدخن كمان ....ان شاء الله ينفعك.....
وجعل الجميع يضج بالضحك وهو قد غادر المكان ... وكل يعلق : الله يجازي محنك يا حاج .....فعلق عم ادم بقوله عليكم الله دي حالة زول جاي من الحج والمفروض الناس تقول ليهو يا حاج ؟؟ ياخي ده حاج مسنوح ساااااااااااي ..
فمن يومها سار عليه لقب حاج مسنوح بدل اسمه محمد حسين ...
حاج مسنوح رجل ببساطة ارض بلادي .. مقدام في الملمات ... راجل واجبات ... لكن تفلت لسانه هو عيبه الوحيد ..
لانو عادي ممكن يدرعا ليك قدام الناس ولا يهمو .... فكان الكل يفضل ان يقابله لوحده ... له قصص كثيرة سأعود اليها مرة اخري ان شاء الله .. فقط وودت ان يكون هذا القول كافتتاح للبوست ....
الا رعي الله تلك الايام ورعاك يا حاج مسنوح...

مثل هذا الرجل كثر في بلادي نجدهم في كل احياء السودان وحواريه وقراه وفرقانه وحللاله ومدنه واريافه ...
فلنوثق لحاج مسنوح في كل بقعة من بقاع بلادي .. فلنكتب عن كل مسنوح ...

تحياتي اخوتي

[imported_hamza]

المسانيح وين ؟

الاسناح والمسنحة ... كلمة مسنوح مؤكد انها كلمة سودانية بحتة ...

المهم هسي مسانيح البورد ديل بيكونوا ناييمين بعد تناول الحليب ومستلزماته

وأولهم طارق الحسن وناصر يوسف ..

تعالوا اتسانحو هنا ده ....

حافظ حسين قالوا مشي يتسانح في السعودية شكيتو علي ابو فاطمة ...

وعمر صديق كبيرهم الذي علمهم المسنحة ...

وعمي فتحي وينك يا جميل ياخ انا عارف انو ذكريات المسانيح دي عندك حلوة جدا والله ما قررت اكتب البوست ده الا لما قطعت الشك باليقين بحكاويك الجميلة
عن المسانيح خصوصا ناس التشيك الشكاشيك ديلك ..

اها ابقو تعالوا واثروا الحكي بالاسناح والمسانيح ...
يا مسانيح انتو

[imported_nezam aldeen]

هماميزو ازيك وليلك ياخ ؟

وانت ماشي للمسانيح البعااااااااااااااد ليه ؟
انت بس قول داير مسنوح يجوك بالصفوف صفوف

هسة انا القدامك دا أكبر مسنوح

ماتستغرب يازول انا مقتنع اني مسنوح

ياخ انا شجعت المريخ حلق قلت مااااامشكلة برشلونة تعوض لي وتعال شوف انضربت ضرب السنين
قلت ماااااااااااامشكلة أشجع جون سينا .. ردمو ليك ردم الجن
قلت مااااااااااااااامشكلة اشجع فيدرر لما ليك فيو نادال مرق لي لسانو

وتقول لي مسنوح ؟؟