محن سودانية 1

[شوقي بدري]

لا أزال أحسب نفسى أكثر السودانيين فخرا بسودانيتى . التى لا تقتصر على قبيلة أو مكان معين ، بل أحسب كل سودانى وكل مكان فى السودان جزءا منى. ولكن هنالك عجز القادرين على الكمال . ونحن السودانيون ، وأنا منهم ، نأتى بالمحن والعجائب . وأظن لأن حساباتنا مختلة أو لأننا لا نهتم فى أغلب الآوقات .

هذا الصيف ، وفى يوم عيد الفطر، ذهبنا بحافلة فى معية الأستاذة أميرة الجزولى ومحجوب شريف ومجدى وأسرته ومى ، احدى فراشات محجوب شريف الى هولندا بمناسبة حفل رد الجميل . وبينما أنا فى السيارة مع الابن الأخ أحمد مصباح منظم الحفل ، سألت الأخت الفنانة رشا شيخ الدين عن القاعة التى ستغنى فيها . وعندما عرفت أنها نفس القاعة التى غنت فيها أخيرا ، سألت اذا كانوا قد حسنوا الاضاءة أو غيروها . وعندما كان الجواب بالنفى ثارت ثائرتها . وبحساسية الفنان ومشاعر المبدعين أبدت غضبها . وحاولت التدخل وأنتهى الأمر بغضب الأخت رشا وتألم الأبن أحمد . لهما التحية . فذكرت لهم موضوع محن سودانية الذى كتبته من قبل .


قبل سنتين أتت الفنانة الأخت سمية حسن الى السويد وتاخر الحفل عدة ساعات . لأن ( الساوند سستم) عصلج . وبعدها بأيام أقيم حفل فى الدنمارك . وكان من المفروض أن يبدأ الحفل فى السابعة مساء . الا أن الغناء بدأ بعد العاشرة مما جعل بعض الأوربيين يذهبون. خاصة زوجات السودانيين الأوروبيات اللآئى لهن أطفالا صغارا. بالرغم من أن الجميع دفعوا للحفل والعشاء . والسبب كان (الساوند سستم) .

من ألأسطوانات التى لا أمل سماعها هى أغانى الأخ مصطفى السنى وأغانى رشا شيخ الدين . ولكن فى حفل هولندا لم نستمتع بها بالرغم من أنها ، بعد خيبة أملها فى الاضاءة ، وافقت على الغناء ولكن لم تتمكن من أن تؤدى نصف أغنية ، بالرغم من أنها أتت من اسبانيا . فلقد بدأ الحفل متأخرا كعادة السودانيين . وعندما أتى دور غناء رشا كانت المدة المحددة لايجار القاعة قد أنتهت . ووقفنا أمام القاعة لأكثر من ساعة لأنه كانت هنالك مشكلة جديدة . لأن الهندى صاحب ( السساوند سستم) والمعدات الضخمة لم يستطع أخراجها لأن المصعد يتوقف فى الحادية عشر ، والسلم ضيق . والسودانيين كانوا يعرفون كل هذه الأشياء . المسئول الهولندى قد ذهب الى منزله . والهندى كان يرقص رقصة المطر . لأنو عنده اتفاق فى الغد . والمسئول لن يرجع الا بعد نهاية العطلة الأسبوعية . غلطان البدخلو شنو مع السودانيين ! . والغريبة أن الأخ كابو والأخ الدكتور محمد جميل الذى حضر من ألمانيا خصيصا أصروا على أخذى الى مطعم للعشاء ( يا خى الساعة سبعة شنو ؟ ما فى سودانيين بيبدوا فى مواعيدهم) ولقد صدق حدثهم .

قبل ثلاثة سنوات أتت مجموعة من شباب المراقبة الجوية فى السودان . والمجموعة الأولى كانت مكونة من تسعة من الرجال وثلاثة من الفتيات . ثم تبعتهم مجموعة أخرى من اثنا عشر شخصا . وأذكر أننى قابلت الأخ محمد الحسن مدير الطيران المدنى عندما حضر لتوقيع أتفاق من السويديين قبل حضورهم بمدة . وعندما سمعنا بحضور المجموعة الأولى ، هرعنا اليهم فى مسكنهم . وكالعادة يأتى مجدى الجزولى بأخبار طالبى اللجوء الجدد أو أى سودانى جديد . فنهرع اليهم لأنو هذا أقل من يمكن أن نعملو . وهذا حق المواطنة وحقهم علينا . ولا جميلة أى زول .

ودعاهم مجدى لحفلة شاى . وأذكر أننى قلت لهم ( حنجى ناخدكم ، وحنطر نرجع مرتين. ما فى لزوم أقول ليكم تكونى جاهزين. انتو ناس بتنزلوا الطيارات بالثانية . تنتظرونا بره جاهزين . ) وبالرغم من أنو معاهم اتنين من مدرسينهم ، تأخروا كعادة السودانيين . وفى نهاية الحفل قلت لهم ( تجوا تقيّلوا معانا يوم الأحد . لكن يا جماعة ما فى تأخير المرة دى. الساعة واحدى تكونا جاهزين واقفين برا السكن . )

وتصادف فى ذلك اليوم أن زوجتى كانت ستسافر لزيارة شقيقتها بسبب اتفاق قديم ، وكانت ستأخذ معها والدتها . فقلت يا شوقى انت أماتك كان بوضبوا الخروف بليلو للضيوف . وجهزت كل شيىء بنفسى . الكبدة النية بالدكوة ، وشطة خضرة وشطة حمرة ، وشية صاج وشية جمر . وطربزتين وست . وغلاط وخرخرة وكنت أحس بالدموع فى عينيى . وكان من أسعد أيام حياتى . بالرغم من أننى ذهبت فى الساعة الواحدة والجماعة كانوا (فى اللسه بطمطا والما لبس بالرغم من كلامى وتشديدى) .

هنالك شيىء آخر ، فى موقف مثل هذا ، لأن زوجتى لم تكن موجودة ، لم يساعدنى سوى صديقى فريد العراقى ، فالمتوقع أن بعض هؤلاء الشباب أن يشارك ، أن يقدم ، أن يساعد . ولكن السودانيين عادة على عكس الأوروبيين لا يتحركون . ولا يشاركون . هذا الشباب الجميل الذى أتى لزيارتى كان يعتبر من زبدة المجتمع السودانى ، ولكن الحلو ما يكمل.

لاحظت أن هذه المجموعة يشترون للميز من دكاكين صغيرة غالية . وعددهم قد صار أربعة وعشرين . فأقترحت أخذهم الى متاجر تبيع بالجملة حيث يقل السعر أربعين فى المائة . وعندما رجعت بالسيارة الكبيرة ، وكان يساعدنى شخص واحد ، كنت أحمل جوالات الأرز والطحين والسكر بالجوز على أكتافى . وبعض هؤلاء الشباب فى عمر أبنائى، لم يكن يتحركون . وكأنما الأمر لا يهمهم .

أقترحت عليهم أن آخذهم الى أحد الأسواق المفتوحة حيث يمكن شراء الجوالات بثلثى الثمن الذى دفعه بعضهم . كما يمكنهم شراء الجاكيتات وأشياء أخرى بأسعار رخيصة . ولأن لى سيارة تحمل سبعة أشخاص ، فلقد اقترحت أن ينتظرنى ستة منهم . وسبب لى هذا مشكلة لأنو من المفروض ألا أترك ابنتى تذهب الى تمرين كرة السلة بالدراجة بعد الظلام وهى فى الثالثة عشر . وعندما حضرت كان هنالك شخص واحد فى انتظارى . وعندما أحس بغضبى وثورتى قال لى ( يا خى فى ناس نايمة وناس مشغولة وأنا ما مسئول من التانيين . ) فأخذته الى السوق المفتوح وحاولت أن أنسى الموضوع . وحددنا مواعيد أخرى . وفى المرة الثانية لم يحضر انسان . فتوقفت من فرض نفسى عليهم . آخذا بنصيحة الأخ حسين ود الحاوى ( ما تعمل أى حاجة الا الناس تطلب منك . والزول كان ما عرفتو منو ، أهلوا منو بيعمل ليك مشاكل . وليه تتعب نفسك ؟) . وفجاة يتصل بى أحد المبعوثين ونحدد مواعيدا ونتقابل . ويطلب منى أن أتوسط له عند السويديين لأنه لم ينحج فى الامتحان وسعيدونه الى السودان . وأفهمته بأن فى السويد لا توجد وساطات . وحتى اذا وجدت فأنا لا أمتلك العضلات أو الأهمية . ويقترح أن أساعده فى تدبير اقامة . أو لجوء أو أى شيىء والرجل حسب كلامه متزوج وله أطفال كبار .

وشرحت للأخ أن موضوع اللجوء معقد وطويل ، وأن الاقامة لا يمكن أن تمنح الا بسبب لجوء أو زواج ، أو لأمر خاص كلاعب كرة قدم أو مغنى أو خبير فى منظمة . ونحن فى سيرنا تتصل بى ابنتى نظيفة التى كانت قد حضرت من ميامى – فلوريدا ، حيث تدرس فى المدرسة الثانوية ، للأحتفال بعيد ميلادها الثامن عشر مع والدتها وجدتها . فهى محور حياتهم . وكانوا يعتقدون أن الدراسة السويدية ، بالرغم من أنها جيدة ومجانية ، لن تشبع رغبتها فى التعرف بالعالم . والمدرسة الخاصة فى فلوريدا تشمل نشاطات مختلفة فى التأقلم على الحياة البرية والفروسية والرياضة ، كرياضة الدفاع عن النفس وغيرها . وعرجت على بنتى وقابلتها والرجل معى وحددنا مواعيدا لكى نتقابل قبل رجوعها الى فلوريدا .

وبعد أيام اتصل بى نفس الشخص من منزل مجدى الجزولى وطلب حضورى السريع . وتركت كل شيىء وهرعت اليه . ووجدته مع مجدى الجزولى وزوجته الأخت التومة . وبدون اضاعة أى وقت أقترح على أن أحل مشكلة اقامته بأن أزوجه ابنتى نظيفة لأنها أكملت التمنتاشر سنة . والغريبة أننى لم أغضب ، بل كان هو الغاضب . وعندما قلت له أن ابنتى سترجع لاكمال دراستها فى فلوريدا وأنا لن أحلم فى أن أفرض عليها زواج أى انسان . وان لابنتى أحلامها وطموحاتها . ولا أظن أن والدتها أو جدتها سيوافقون . وكان رده ( ما انت أبوها ، ديل دخلهم شنو ؟ . أنا حأعرسها ليك سنة وأفكها . بعد ما آخد اقامتى تعمل العاوزاهو . وانت لا قينى وين ؟ . انت قايل أنا زول ساهل؟ . )

بعد المصائب لا تغضب لأن الانسان يكون قد دخل فى مرحلة المحنة . ولم أقل له أن والدة ابنتى التى تتمتع بجمال ملفت حتى فى السويد ، وجدتها التى كانت تدير شركة للتصاميم وتبالغ فى أناقتها مثل ابنتها ، يتوقعون الكثير لنظيفة . وهذا الصيف عادت من البرازيل بعد أن قضت سنة كاملة فى دراسة رياضة الدفاع البرازيلية والعيش فى البرية . وأنه رجل متزوج فوق الأربعين وله أطفال .

وعندما أخذته الى مسكنه رجعت الى مجدى االذى سألنى مباشرة ( آ ها ، الراجل دقيتو ؟ أنا قلت للتومة شوقى ساقو يدقو) فقلت له ( يا خى الراجل مسكين ما بستاهل الدق .) والغريب أن الرجل أتى لمجدى فى الأول قائلا أنه قد قابل طليقة مجدى السودانية . وعرف أنها تحمل جواز سفر سويدى . فطلب من مجدى أن يزوجها له . فقال له مجدى ( هو وقت أنا طليقتى دى مالى فيها ايدى قدر ده ، مطلقها ليه ؟ ) فقلت ( انت ما دقيتو ليه ؟ ) فقالت الأخت التومة دا زول يمحن . ورد الفعل كان أن قلت لنفسى ( انتى يا شوقى مالك ومال الحمار البرمى سيدو؟ ) الى أن اتصل بى الشخص الوحيد الذى حضر للذهاب الى السوق المفتوح الذى أعتبرته أكثر معقولية من الآخرين . ويبدو أنه كان يفتكر أنه يتكلم مع خدام بدفتر ، أو صبى نجاروهو الأسطى . وهذا قبل يومين من عيد الفطر . ( بكره عاوزنك تجينا عشان تودينا للجزار اللى اشتريت منو الخروف عشان تجهز لينا اللحمة بالطريقة العملتها لينا . وتجهز نفسك عشان يوم العيد تكون معانا كل اليوم ، وتجيب لينا المنقد بتاعك معاك والفحم والحاجات ) وكانت يتكلم عن ( القريل) الذى يمشى على عجلات ويحتاج لشاحنة لنقله .وأنا ما مفروض يكون عندى أى شغلة ولا ضيوف أجونى ، ولا عندى أولاد ، ده كلو ما مهم ، سيادته عاوز شية . ) وأكتفيت بعدم الرد وأخذت معطفى وذهبت .

بعد العيد اتصل بى أربعة من المبعوثيين وقالوا لى أنهم يحسون بأننى قد توقفت عن زيارتهم وسيأتون لزيارتى . وأنهم لا يريدون أن يكلفونى مشقة احضارهم وأنهم يعرفون الطريق وسيأتون . وبعد ساعتين اتصلوا بى وقالوا لى أنهم قد ضاعوا . وسألتهم من تحديد المكان وكان ردهم ( نحن جنب يافطة مكتوب عليها (مالمو آفييشن) ، وهذه شركة طيران أعرفها جيدا ، لأن والدة نظيفة تعمل فى ادارتها ، ولهذا زارت نظيفة ووالدا تها العالم ، من أستراليا الى نيو زيلندة الى أمريكا اللأتينية ، أفريقيا وجزر الكاريبى والصين واليابان ، وهذه هى نظيفة التى يريد الأخ أن يتزوجها ويفكها . ولكن اليافطة كانت اعلان للشركة . وطلبت منهم اعطائى اسم الشارع ، وبعد عدة تلفونات وتعب حددت مكانهم ، وكانوا فى الاتجاه الآخر من المنزل. وأحسست بروعتهم ودفىء العلاقة السودانية وتألمهم الحقيقى لانقطاعى عنهم . فالسودانيون شعب عظيم لا يماثلنا أى شعب فى الحميمية وسهولة وعمق التواصل . وسنهرع ونركض عندما نسمع بأى سودانى فى أى مكان . المشكلة بس نحن شعب بتاع محن . نأتى بتصرفات غير معقولة . وكنت ، ولا أزال أقول للآخرين انتم لستم مثلنا . نحن نعرف كل سودانى بالرغم من أن السودان قارة ، ونعرف أخبار كل السودانيين وأبنائهم ، وليس هنالك سودانى من أى جزء من السودان لا نعرفه ، أو نعرف شخص يعرفه ، أو نعرف أهله وقبليته . بس الله يكفينا شر المحن . ونواصــــل .

[omrashid]

والله يا شوقي محنه
لكن الغريبه انو فعلا الراجلدا انت ما دقيتو

قال شنو --يعرسها ويفكها

فكر ذكوري من ابو كديس

ياللحزن

[معتصم الطاهر]

كمية من المداخلات

راجياني

اها انا جريت كرسى و جيت ..

[جلال محمد جلال]

الأستاذ العزيز/شوقي بدري ...
تحية وسلاماً ...
طبعاً كثير مما أوردته .. صحيح ومتأصل فينا ..
السودانيون هم الشعب الوحيد في العالم الذي لا يجيد إحترام الآخر(لا اتكلم عن النخب بالرغم من أن هذه عليها عدة مآخذ أيضاً ) ..
نحن الشعب الوحيد في العالم الذي يري في عبارات حفظ المقام للآخر ( مثل : يا أستاذ .. يا سيد .. ) حرجاً وتدنياً من المخاطب (بكسر الطاء) وإنسكاراً له أمام المخاطب ( بفتحها) ..
والمسألة في رأي ذات تناسب مع أبعاد الأمم الحضارية ، وإتجاهاتها المدينية .. فنحن شعب في أغلبه مزارعين ورعاة .. وحتي النخب الرفيعة جاءت من تلكم الخلفيات .. وأصول الإتيكيت هذه من التفاصيل المغرقة في الحضرية .. خذ مثلاً عند المصريين ، نسميها نحن دهنسة ودناءة و .... ولكنها في الواقع تفاصيل إتكيت مستولدة من الواقع الحضري رغماً عما فيها من الصفات التي لا تعجبنا ...
وخذ مثلاً حال إبن الريف عندما يدخل المدينة للمرة الأولي ، تراه جلفاً فظاً غليظ القول لا يشابه تفاصيل الإتكيت المديني ولا تناسبه .. والمصريون بالرغم من مكابرتنا ، وحساسيتنا تجاه الأمر هم شعب حضارة عريقة ... ولهم باع طويل في المدينية ، سبقونا بذلك أشواطاً .. شاء من شاء وأبى من أبي ..
وقل مثل ذلك في المجتمعات المتمدنة أكثر منا .. (المجتمع الأمريكي مثلاً - مستر .. سير ... )
الخرطوم بالرغم من تمددها الجغرافي والسكاني لا تعدو أن تكون في ناظري سوى تجمع سكاني في بقعة من الأرض لا هو محسوب علي المدن المتقدمة بزخمها الذي نراه في المدن الكبيرة ولا هو محسوب على الريف ببساطته ورقة حاله ... هي ليست مدنية بالمفهوم المديني للقرن الحادي والعشرين ، وليست قرية بنفس المفهوم .
أما حال ذلك الرجل ..

وبدون اضاعة أى وقت أقترح على أن أحل مشكلة اقامته بأن أزوجه ابنتى نظيفة لأنها أكملت التمنتاشر سنة . والغريبة أننى لم أغضب ، بل كان هو الغاضب . وعندما قلت له أن ابنتى سترجع لاكمال دراستها فى فلوريدا وأنا لن أحلم فى أن أفرض عليها زواج أى انسان . وان لابنتى أحلامها وطموحاتها . ولا أظن أن والدتها أو جدتها سيوافقون . وكان رده ( ما انت أبوها ، ديل دخلهم شنو ؟ . أنا حأعرسها ليك سنة وأفكها . بعد ما آخد اقامتى تعمل العاوزاهو . وانت لا قينى وين ؟ . انت قايل أنا زول ساهل؟ . )

فهو والحق يقال عديم المسؤولية والأخلاق .. وجهله مطبق ..
والله المستعان .

[همس الشوق]

[align=center]سبحان الله

رغم اختلاف المكان والزمان فالسوداني هو السوداني .........

محنو عجيييييييييييبه

ومشكلة التأخير دي عابقة فينا ............[/align]

[فيصل سعد]

عزيزنا و استاذنا الجليل / شوقي بدري :

كل عام و انت و اسرتك الكريمة بالف خير و عافية، فعلا زولك دا محنة و قمة الانانية و الانتهازية .
و انا برضو عندي صاحبا لي ضربت اعيد عليه في العيد و بعد السلام و التحايا قال لي " ياخي ما ترسل لي ابني طابق تاني و اشتري لي عربية ناقويرا جديدة و اسافر القاهرة اترطب شوية؟" لاحظ انا و اسرتي مدفونيين في الجليد الكندي و نناضل في اكل العيش و السترة و لا نملك عشة في السودان و زولك الغبيان المطرطش داير يرسلوا ليو يبني و يسوق و يتفسح ، احترت و اتمحنت !! قلت ليه امشي لصلاح ادريس قول ليه فيصل قاليك ادينا من حسابنا المعاك قال لي بمشي ليه بعد العيد بس ما تنسى ترسل ليه فاكس و اديني نسخة في الايميل و خلي يدفع لينا دولار اخضر

[همس الشوق]

المشاركة الأصلية كتبت بواسطة فيصل سعد

عزيزنا و استاذنا الجليل / شوقي بدري :

كل عام و انت و اسرتك الكريمة بالف خير و عافية، فعلا زولك دا محنة و قمة الانانية و الانتهازية .
و انا برضو عندي صاحبا لي ضربت اعيد عليه في العيد و بعد السلام و التحايا قال لي " ياخي ما ترسل لي ابني طابق تاني و اشتري لي عربية ناقويرا جديدة و اسافر القاهرة اترطب شوية؟" لاحظ انا و اسرتي مدفونيين في الجليد الكندي و نناضل في اكل العيش و السترة و لا نملك عشة في السودان و زولك الغبيان المطرطش داير يرسلوا ليو يبني و يسوق و يتفسح ، احترت و اتمحنت !! قلت ليه امشي لصلاح ادريس قول ليه فيصل قاليك ادينا من حسابنا المعاك قال لي بمشي ليه بعد العيد بس ما تنسى ترسل ليه فاكس و اديني نسخة في الايميل و خلي يدفع لينا دولار اخضر

[align=center]ههههههههههههههههههههه

عليك الله صاحبك دا جاااااااااااااااااااااااادي



طيب ما ترسل لينا نحن برضو [/align]

[فيصل سعد]

المشاركة الأصلية كتبت بواسطة حلم الاماسي

[align=center]ههههههههههههههههههههه
عليك الله صاحبك دا جاااااااااااااااااااااااادي
طيب ما ترسل لينا نحن برضو [/align]

و الله يا بت عمك، انا ما برضى احولك وهميا
انا مرسل ليك خوة و مودة صافية Already

[همس الشوق]

المشاركة الأصلية كتبت بواسطة فيصل سعد

و الله يا بت عمك، انا ما برضى احولك وهميا
انا مرسل ليك خوة و مودة صافية Already

[align=center]والله يا ود عمي .......... كفيت ووفيت

وهي دي البتنفعنا طيلة العمر .......... لا بتنسرق .... ولا بتنحرق [/align]


ما عايزه احول مسار البوست ولكن بجد اهلنا الطيبين في السودان بيفتكرو انه المغتربين نائمين على وسادات من القروش وخصوصا انتو يا ناس (ابو صلعة )

فكم التحية والتجلة اينما كنتم .... تتحرقوا الما... ووجدا الى الوطن

[منال]

يا عمو شوقى
ازيك و كفينك طامس فى البرد

طبعا تابعت زوالك الفكر يعرس البنية الحليوة عشان حاجات كثيرة حامينى ..... غير القالو ده

لكن و الله فى طلاقات فى البلد راقدة كوم ... من العريس القال بس يسكن فى بيت العروس و ياكل من حلتهم ....قدر الفى و يقشها من تحت ايديهم ... قريبتى قال ليها عرستك عشان بيتكم كبير ممكن نسكن .. و هو ذاتو من شمبات

رايك شنو نفس الملامح و الشبه ... و ما فى فرق فى الوقت الراهن بين واشنطون و الخرطوم ...

انا مازووووووووووووووم ...مازووووووووووووووم ...مازووووووووووووووم ... ايها الرجل السودانى

[الفاتح]

أستاذنا .. كل سنه وإنت بألف صحة وعافية..
أثرت قضايا عديده وبالجد تمحًن:
** عدم الإلتزام بالزمن: والعدوى دي بمقدار ما هي منتشره في السودان إلا إنو السودانيين البرًه ما سلموا منها مع سبق الإصرار والترصد.. ودي حاجه بتنعكس علينا سلباً , غير كده نحن مفروض نتعلم إدارة الوقت.. أي نعم إيقاع السودان بمؤسساتو الخدميه ( الإجراء ده تعال ليهو بعد يومين تلاته) أملى علينا إنو يكون زمنا سايب, لكن ده ما بيعني إنو نرتهن للوضعيه دي وممكن نبداها في علاقاتنا الإجتماعيه.. أنا شخصياً لامن أواعد لي زول بديهو ربع ساعه فوق زمنو إذا وصل فبها.. ما وصل خلاص مرًه تانيه.
** الحاله بتاعة عدم النخوه والمبادره اللقيتا من الشباب الماساعدوك دي حالة ما صحيًه.. لا أخلاقياً ولا غيرو بتصب في خانة شباب كسالى إتعودو على الترطيبه.
** ده كلو كوم والزول الداير يعرس بنتك كوم تاني.. ما بتقدر تدقو بإعتبارو أخوك في الغربه.. وما ممكن تثير الموضوع ده مع بنتك.. لكن دي حالة بالجد متأخره.. دي ما تمحًَن, دي تحنًن.

[معتصم الطاهر]

المشاركة الأصلية كتبت بواسطة شليل07

.. ما بتقدر تدقو بإعتبارو أخوك في الغربه.. .

شليل سلامات
عارف ..
ممكن يدقو..
عادي ..فى ناس ما بخجلوا ..

أو .. يعمل العملتو أنا ...
أنا قلت أي زول عاوز بنتى بعد تستلم شهادتها .. يجيني معاها ..

أها أول ما دخلت خامسة ( سنيور) ضرب واحد زميلها ( بالتلفون ) و جاء قابلنى فى المطار وأنا مسافر ..
داير يتعرف .. وقدم نفسو ..
لابس فنيلة نص كم .. معلقة فى طرف القاش ..و بنطلون كلو جيوب .. عزمناهو- نحن- فى الكافتريا .. طبعا انا كنت جايي لعزاء اختى .. - دى اتجاوزتها ليهو -
و طوالي سألتو ..
انت اشتغلت ؟قال لي لا كايس شغل و ابوي فى السعودية
قلت ليه " أنا ممكن أعرسها لأبوك " ..

أها التاني أصغر منها و أبوهو عندو قريشات
دا طوالي ردى كان جاهز ...
طبعا الألفاظ الشينة ممنوعة فى المنبر..

[شوقي بدري]

الاعزاء ام راشد , معتصم الطاهر , جلال , حلم الاماسى , فيصل سعد , منال , شليل
لكم التحيه والموده وشكرا لمداخلتكم . الغريبه هذا الموضوع اثار عاصفه من التعليقات واتتنى عشرات الايملات . يبدو ان كل زول خازن ليه حاجه . والله الحاجات العجيبه الانا عملتها اللى ما ممكن يعملها الا سودانى لو حكيت ليكم جزء بسيط منها تانى سلام الله ما تدونى ليه . المهم اتوقعوا نواصل , وكل زول يتذكر العندو بس اول حاجه انتو ظالمين الرباطاب ساكت حسى كلام معتصم الطاهر ده لود الناس المسكين الجا يعرس بتو وقال ليه شغال شنو قال ليهو ابوى فى السعوديه قال ليه خلاص اعرسها لابوك بلاهى فى رباطابى بقول كلام ذى ده , تتهموا الناس ساكت .
لكم التحيه
شوقى

[Osman Hamad]

المشاركة الأصلية كتبت بواسطة شوقي بدري

( ما انت أبوها ، ديل دخلهم شنو ؟ . أنا حأعرسها ليك سنة وأفكها . بعد ما آخد اقامتى تعمل العاوزاهو .)

والله ياعم شوقى انا ماكنت قايلك بتأجر عجلات