شلتك عليك.......
شلتك عليك..
لمن دروب الريد بدت تتشابى ليك..
وانا عاارفة دربك وسكتك..
مكتوبة خطواتا بايديك..
والخطوة حرقة روح مشحتفة لي مجيك..
مشتاقة يا ود للحكاوي الفي عينيك..
لي خطوة الولف البدفر في القليب
كيف بي تأني يكون مشيك؟؟؟
وانت دربك ريد مسفلت..
وحتى شوقي رصفتو ليك..
والحنين الفي كلامك..
لي المعايا وصفتو بيك..
وشربت فنجاني ف هواك..
مقلوب علي حافة عشق..
ومكتوب علي نظرات عينيك..
كان المقدر اشتهيك..
وابرا الحروف الليك تجيبني بدون اجيك..
واستنى لحظات انتصار لي لهفتي..
تمرق تشد الرغبة ليك..
وتمارس الحق البيعلن عن مجيك..
قانون حروف..
بتنادي جوانا الحنين..
تبراها روحنا بدون تشوف..
السكة وين..
والمنتهى.. يا دنيا وين؟
نمشيها بي ذات الانين..
ذات الخطاوي الكتمت الاحساس سنين..
وذات الاوان.. الكان متين؟؟
وبرضو جابراني الظروف..
اكتب وجودك..
زي رسايل زول ولوف..
شايلك.. وجنبك.. ومشتهيك..
وظروفو جوابات حكيك..
لمن تغلبك دنيتك..
واعلن انا استسلامي ليك..
او انهزامي امام عينيك..
ما بتنكتم اهات بتشتاق طلتك..
لا بتنقدر زفرة ولف..
مرقت.. ترجع روحي فيك..
|
