وردة و غناوي و إحتمال ...
وردة و غناوي و إحتمال
يا طالة في زمني الشقي ..
ورده و غناوي واحتمال
ما كان بوالف حزني حزنك ..
إلا جرحك كان بينده لي تعال !!
وأنا.. شلت من زمني المعاكس
لون سوادو
وشوق سهادو ....
ولوحة لـ بت من شجن أو من خيال !!
معتاد يوالف حزني جيتك ...
ما نويت اسكن عيونك ....
كنت كايس للمحال!!
لكن وحات ذروة شقاي
شوقك شدهـ شوق الحروف
كبلّني بيك لو تعرفي!!
وأنا اكتشفتك لي براي
لكن وحات شوقي المعاي..
خايف جروح ماضيك تكون جواك في !!!
و لو حتّ فِي ..
أنا مابسافر من سماك لكن بكون جنبك معاك ..
لو مرّه بس... جيت في خيالك .. بكتفي!
و لو تعرفي ..
لو تعرفي.... الداسيهو منك
جوه في آخر الحنايا ومختفي..!!
لو تعرفي...
حتخلّي كل الدنيا
تسكني في وريدي..
تطِلّي من شرفة عيوني...
تشوفي نفسك من خلال شبكية الفرس المعاند
لما يتحوّل عشانك .. زول وفي..
- الجيلي الشيخ الدرديري -
عجبني ولطشتو بي ضبانتو
اقول قولي هذا واستغفر الله لي ................
|
