ده كان زمن الزمن زين والشعر مغطي الاضنين !!..

[ودالزرق]

[align=center]وحاتك لسه ما بتقدر تقاسم قلبي دقاتو
اقابلك وكلى حنية واخاف من نظرتك ليا
واخاف شوق العمر كلو يفاجأك يوم في عينيا ..
وراء البسمات كتمت دموع وبكيت من غير تحس بيا..

الرائع دوما وابدا اسحق الحلنقي في رائعته بتتعلم من الايام التي تغني بها الاستاذ الفنان محمد الامين .. قامتان من الابداع الشفيف عطرت سماوات النغم السوداني بعميق المفردة واللحن الشجي .. اتذكر في هذه اللحظة في الحوار الذي اجراه استاذنا حسين خوجلي مع الشاعر اسحق الحلنقي في برنامجه الموؤد ( ايام لها ايقاع) .. سال حسين خوجلى اسحق الحلنقي .. يا استاذ : بتتعلم من الايام دي حقتك؟
اجاب الحلنقي: نعم .!!
حسين : بس لانو ما بتشبه قصايدك التانية ..
الحلنقي : انت عارف يا حسين .. بتتعلم من الايام دي لو ما كتبتها انا مافي زول تاني بيكتبها !! - انتهى - .

كنت وقتها في الجامعة .. وصديقي العزيز (مكي حسن مكي) من ابناء سنار كنا عندما نلتقي في النادي الأهلي سنار مساءاً ، وطوال فترة جلوسه معنا في حوار مستمر .. انت يا (ودالزرق) عليك الله الأغنية الفلانية ديك شاعرها منو ؟؟ وهو طبعا كان يتوسم فيا المعرفة بالغناء السوداني شعرا .. وده كان زمن الزمن زين والشعر مغطي الاضنين !!.. وما تشطحوا بخيالكم بعيد انا عمري لازال في الخمسينات !! وكنا عندما نختلف في شاعر اغنية يأخد هاتفه الجوال ويتصل بالفنان صاحب الأغنية !!! الم اقل لكم من قبل يا جماعة سنار دي معقل الثقافة والأدب والفن والشعر ..
وكان دائما يترنم بـ:
بنحبك نحنا وما قادرين ابداً عن حبك نتخلا ..
نتخلا عن الوجه البشبه ضي القمرا الناعس طلا ..
الله يخليك يحرسك من عين الناس الله
لو نحنا بكينا علي الصورة .. سامح دمعتنا المعذورة
ولو نحنا مقامك ماقدرو غلطاتك عندنا مغفورة ..

قبل عده ايام كنت اتحدث مع احد أعضاء منتدانا .. وقلت له : والله تعرف يا فلان : انا ما في شئ اتاسفت عليهو في الغربة دي غير حاجة واحدة بس .. قال لي شنو الحاجة دي ؟ قلت ليهو : كنت زمان بنكتب .. ولدينا القدرة على الكتابة اليومية .. الان اصبحنا لا نستطيع ان نصيغ جملة مفيدة .. !! ملعون ابو دي غربة ياخ الخلتنا ننسى تراثنا وحكاوينا وقصصنا اليومية المستنبطة من واقعنا المعاش .
ونلتقي ..[/align]

[عادل عسوم]

ود اللزرق ياجميل
ما أجمل بداياتك...
هذه أترجّة جميلة اللون والطعم والرائحة...
أما سنار...
فقد درست بها جانبا من الثانوي (العالي)
كان السكن بيتا يواجه نادي السكة الحديد
وكانت سنار كما هي دوما جميلة
بذاتها وناسها
مرحبا بك مثريا لسوح وفضاءات الابداع هنا
في سودانيات المحبة والخير
والتحية لسنار التي أحب
مودتي

[ودالزرق]

المشاركة الأصلية كتبت بواسطة عادل عسوم

ود اللزرق ياجميل
ما أجمل بداياتك...
هذه أترجّة جميلة اللون والطعم والرائحة...

عادل عسوم

كيف حالك يا رائع ..

انت عارف انا قلت المنتدى ده منتدى غير عادي ما بتنفع معاهو البدايات التقليدية المعروفة ..( رحبوا بي يا جماعة .. والف مرحب بيك نورت المنتدى !!)

انا سعيد بانك اول زول يكون معاي ..

وتحية للمشرف العام لقبول عضويتي .

وابشروا .. علي الطلاق الا تابونا انتو بس !!

[فتحي مسعد حنفي]

ود الزرق حبابك رغم اني حلبيمرحب بيك واحنا كل من تعدي الخمسين تبعنا ومننا..
أهلا بيك وبي بدايتك الدسمة ومقعدة

[ودالزرق]

المشاركة الأصلية كتبت بواسطة فتحي مسعد حنفي

ود الزرق حبابك رغم اني حلبيمرحب بيك واحنا كل من تعدي الخمسين تبعنا ومننا..
أهلا بيك وبي بدايتك الدسمة ومقعدة

[align=center]الخمسينات دي عملتها ليك مخصوص لانك بتحب ناس الزمن داك ..


الف شكر ومرحبا..

خلونا نجبد نفسنا شوية ياجماعة ..[/align]

[منال]

المشاركة الأصلية كتبت بواسطة ودالزرق

وابشروا .. علي الطلاق الا تابونا انتو بس !!

شوفتو كمان جاااى بطلاقو و بشيرو

زرقان
ازيرق

اقغد سااااى

الاتنين ما بتلموا

نبشر ليك ونديك الشبال

علا الطلاق ده شخيت واقيف بعيد

تشيلك عافيتك

[النور يوسف محمد]

بسم الله الرحمن الرحيم
ود الزرق
أيها الراقى الأنيق
لك من الود ما تشتهى الأنفس ... وتألفه الخواطر
مرحب بيك فى هذا البيت الدافئ
تتقدمك هذه اللوحة البهية
..
...
شوق العمر ...

[سارة]

هيييييييييييع ازرق

لكيكا

مرتو ما بطلكها

ونسيبتو ما بفاركا

وتيرو مو ساركا


ازرق كحل الشيخات

حرّم حبابك والشاى علينا

[ودالزرق]

[align=center]منال


سارة



النور


والله ياجماعة انا ما مصدق انو الناس دي بترحب بالناس بالطريقة دي ..
وبالطريقة دي بتساهروا بينا .. على قرار (ساهرتو بييييينا )..

والمره لقيناها بالساهل عشان نطلقها؟
واحد قالوا ليهو الجماعة انت وزارة الداخلية بتاعتك مخوفاك ..
قال ليهم والله ياجماعة .. وانتو ما رايدني حليفة ..
لمن تضرب لي تلفون .. اقرص فرملة واجنب بره الشارع .. حتى افتح التلفون . [/align]

[رأفت ميلاد]

يا ود الزرق أنا لاقيتك فى الأسافير دى ..كان ماتشابه أسماء .. بس أنا كنت بإسم حركى (نسيته) وكان أول وآخر مرة أعملا ..

هسة بقدم ليك أوراق إعتمادى عديل ..

وكل سنة وأنت طيب

[فتحي مسعد حنفي]

المشاركة الأصلية كتبت بواسطة ودالزرق

[align=center]منال


سارة



النور


والله ياجماعة انا ما مصدق انو الناس دي بترحب بالناس بالطريقة دي ..
وبالطريقة دي بتساهروا بينا .. على قرار (ساهرتو بييييينا )..

والمره لقيناها بالساهل عشان نطلقها؟
واحد قالوا ليهو الجماعة انت وزارة الداخلية بتاعتك مخوفاك ..
قال ليهم والله ياجماعة .. وانتو ما رايدني حليفة ..
لمن تضرب لي تلفون .. اقرص فرملة واجنب بره الشارع .. حتى افتح التلفون . [/align]

آخر زمن رجال آخر زمن معرسين نسوان آخر زمن...
المداخلة دي قبل قرار التوقف