سودانيات منتدي حبكانات ... كلامي انا ما كلام صاحب عابد عقيد

[عباس الشريف]

جميل نحب واجمل نتواصل سودانيات للحب والتواصل يمكن ان تتخلل المواضيع بعض عبارات المحبه الحكاية ذادت شوية فلان وينو وفلانه وينه مثل بيت الطهور او كاذاعة دولة شاد وللذي لم يحظي باستماع اذعة شاد عند زيارتي لها اول مره عن طريق الحدود عبورا بمدينة الجنينه وادري التقط راديو السيارة البث الاذاعي برنامج ما يطلبه المستمعون ..... ام كلتوم تسلم علي فطومة وتقول ليها طهرت الوليدات انتي ليه ما جيتينا وتهدي ليها اغنية حنان بلوبلو ... حاج ابكر اسلم علي ناس الفريق ويوجه السلام للمرا القديمه اقول ليها التيس والغنمايتين راحو كان جوهم في الفريق ارجعوهم ويهدي ليها اغنية محمد وردي.
ابوداؤد سألو من التجيد الغنائي الحصل في تلك الفترة وابراهيم عوض شق شعرو تاني قال ليهم نعمل شنو مع الكوامر الاتعمرت دي ...... حب اللواري الاتعمرت كرهنا في المنتدي.
استبشرنا خيرا بالرشيد ومبر في الاشراف لمزيد من الانضباط اصبح علينا حكاية يا ابزيد لا رحت ولا غذيت ما مكن يا جماعه في بوستات مفروض تمشي هناك محل الاعضاء برضو ما حا تكون مناسبة وقت الاسكايب والتلفونات ما شالت الناس دي اعملو قسم للمحبين اي زول عايز اتناجي اكب الحب هناك وطريقة تداول الحب علي صفحات المنتدي شينه ابتذال للحب وعدم احترام لدور المنتدي.
كرهتونا ..........
في بوستات جميله كلنا بنرتاح فيها مثل بوستات ود عثمان ممكن الناس تخش فيها تحت ستار المغني وتتناجي مقبولة شوية حكاية بوستات منفصله بطريقة غنا الافلام الهندية والترقد في النجيله وشيلني واشيلك في ضهري بالله فكونا منها.

[يحي عثمان عيسي]

كلام الحب كلو قلتوهو
بس كلامي أنا الما عرفتوه

حكمة اليوم
بُره ابت اللبن

[عباس الشريف]

المشاركة الأصلية كتبت بواسطة يحي عثمان عيسي

كلام الحب كلو قلتوهو
بس كلامي أنا الما عرفتوه

حكمة اليوم
بُره ابت اللبن

ابو الياء كيفنك واخبار جدة غير
ايام المراهقه الولد عايز اعمل فيها راجل شايف الناس المعاهو كل واحد عندو حبيبه قلت افتش لي واحده قنصت جمب المدرسة المتوسطه بنات كم يوم اتبسم واتكشم البتصر لي وشها والبتقول لي بشتكيك الشرك خالص ما قبض في النهاية في واحده في الفريق ما بتقراء قلت خلاس ارجع اشوف الزوله دي المشكله الوحيده عندها ثلاثة اخوان جزارين.
اتوكلت علي الله وكتبته ليها جواب حب ورسمت فوق سهم جوه قلب انقط دم عملت ظرف من الورق دخلت فيهو زهرة صباح الخير كانت اكثر زهرة متوفره تلقاها في المدرسه في حيطة الجيران انتظرتها قريب ال3 ساعات طلعت من البيت رميت ليها الخطاب تحت كرعينا وجريت نظام جس نبط.
مشت سلمت الخطاب لي اخوها الجزار الراجل مطاردني اسبوع عشان الم فيني ما قدر ما خليت حيطه ما تلبتها وقت خلاس زهج مني كتب لي خطاب رد علي خطابي لي اختو اداهو لي زول صاحبي اسلمني ليهو اتذكر بداية الخطاب.
من الاسد الضرغام فلان الي الحمل الجبان عباس..................
المنتدي ده يا رسول الله مافيهو جزار

[تماضر حمزة]

[عباس الشريف]

المشاركة الأصلية كتبت بواسطة تماضر حمزة

تماضر سلامات
ضحكتك افرحتني وسرت بالي انشاءالله طوالي مبسوطه

[بله محمد الفاضل]

صباحك زين زيك يا صاحب


ما قيمة الحياة يا رجل
من غير حب
أدعموووووووووووووووووووووواااااااااااااااااااا الحب
يرحمكم الله

وما أجمل أن نرى الحب يسير بيننا
ونرعاه

[ام التيمان]

و اللهى العظيم
يا ركس
الحلة دى بدونك عدم
يا خى انت الذ و اجمل زول شفتو
اها ما ناوى تدبل؟؟

[عبدالمنعم الطيب حسن]

المشاركة الأصلية كتبت بواسطة عباس الشريف

ايام المراهقه الولد عايز اعمل فيها راجل شايف الناس المعاهو كل واحد عندو حبيبه قلت افتش لي واحده قنصت جمب المدرسة المتوسطه بنات كم يوم اتبسم واتكشم البتصر لي وشها والبتقول لي بشتكيك الشرك خالص ما قبض في النهاية في واحده في الفريق ما بتقراء قلت خلاس ارجع اشوف الزوله دي المشكله الوحيده عندها ثلاثة اخوان جزارين.
اتوكلت علي الله وكتبته ليها جواب حب ورسمت فوق سهم جوه قلب انقط دم عملت ظرف من الورق دخلت فيهو زهرة صباح الخير كانت اكثر زهرة متوفره تلقاها في المدرسه في حيطة الجيران انتظرتها قريب ال3 ساعات طلعت من البيت رميت ليها الخطاب تحت كرعينا وجريت نظام جس نبط.
مشت سلمت الخطاب لي اخوها الجزار الراجل مطاردني اسبوع عشان الم فيني ما قدر ما خليت حيطه ما تلبتها وقت خلاس زهج مني كتب لي خطاب رد علي خطابي لي اختو اداهو لي زول صاحبي اسلمني ليهو اتذكر بداية الخطاب.
من الاسد الضرغام فلان الي الحمل الجبان عباس..................
المنتدي ده يا رسول الله مافيهو جزار

يعني يا ركس
في مدني دي كلها ما لقيت لك بت تحبها غير البت المسلحة بي تلاتة اخوان جزارين
دي غايتو الحب اعمي
اظرف ما في الامر ان هذا الجزار برضو مثقف وبتاع حوار
لكن نفسو حار شوية
قلت لي من الاسد الضرغام الي الحمل الوديع عباس
بعد الزرة دي مفروض تحول نباتي طوالي
اضحكتنا
اضحك
الله
ايامك

[سماح محمد]

عباس والجميع
سلامات
..

بعد ما رتبت أفكاري بخصوص الموضوع ده فوجئت بالرشيد يرسم الصورة واضحة ومتكاملة بما يزيد عن ما أردت إيضاحه حول كامل قبولي لحرية الإخوة الأعضاء ورغباتهم في تناول خصوصياتهم وبالصورة التي يحبون ما لم تتعارض واللائحة ..
إلا أن ما أستغربه وما لا أتفق معه هو عدم تخير معظمهم للمكان المناسب لتلك البوستات..
وأنا مع مقترحك ده يالرشيد
أن يتم قصر بوستات المواجبة علي منتدي خاص بالأعضاء مثل بوستات:
التهاني، الرحلات، العزاء، أعياد الميلاد، في صياغة شاملة يصوّت عليها الجميع

[wadosman]

المشاركة الأصلية كتبت بواسطة عباس الشريف

جميل نحب واجمل نتواصل سودانيات للحب والتواصل يمكن ان تتخلل المواضيع بعض عبارات المحبه الحكاية ذادت شوية فلان وينو وفلانه وينه مثل بيت الطهور او كاذاعة دولة شاد وللذي لم يحظي باستماع اذعة شاد عند زيارتي لها اول مره عن طريق الحدود عبورا بمدينة الجنينه وادري التقط راديو السيارة البث الاذاعي برنامج ما يطلبه المستمعون ..... ام كلتوم تسلم علي فطومة وتقول ليها طهرت الوليدات انتي ليه ما جيتينا وتهدي ليها اغنية حنان بلوبلو ... حاج ابكر اسلم علي ناس الفريق ويوجه السلام للمرا القديمه اقول ليها التيس والغنمايتين راحو كان جوهم في الفريق ارجعوهم ويهدي ليها اغنية محمد وردي.
ابوداؤد سألو من التجيد الغنائي الحصل في تلك الفترة وابراهيم عوض شق شعرو تاني قال ليهم نعمل شنو مع الكوامر الاتعمرت دي ...... حب اللواري الاتعمرت كرهنا في المنتدي.
استبشرنا خيرا بالرشيد ومبر في الاشراف لمزيد من الانضباط اصبح علينا حكاية يا ابزيد لا رحت ولا غذيت ما مكن يا جماعه في بوستات مفروض تمشي هناك محل الاعضاء برضو ما حا تكون مناسبة وقت الاسكايب والتلفونات ما شالت الناس دي اعملو قسم للمحبين اي زول عايز اتناجي اكب الحب هناك وطريقة تداول الحب علي صفحات المنتدي شينه ابتذال للحب وعدم احترام لدور المنتدي.
كرهتونا ..........
في بوستات جميله كلنا بنرتاح فيها مثل بوستات ود عثمان ممكن الناس تخش فيها تحت ستار المغني وتتناجي مقبولة شوية حكاية بوستات منفصله بطريقة غنا الافلام الهندية والترقد في النجيله وشيلني واشيلك في ضهري بالله فكونا منها.

شنو يا شاب الليله من الصبااح قايم بنمره 4 كدا....؟؟؟!
بايت القوا ولا شنو..؟؟

خليل اسماعيل سالوهو من الفنانين الجداد قال ليهم:
ياخى ديل زى ملاح البامبىّ لذيذ لكن الناس ما بتدورو...!!

[عبداللطيف النقر]

اصبحنا بى الله يا عبس -- شايف صاحبك شررف

ياخ خلى الناس تحب انتا موجعك وين -؟؟ ماترد عارف ردك اظرت منك --

[جانيت]

صباحك يشبهك
مالك فاير فينامن الصباح وواجعك وين يكون منتدى حبكانات مع انو كلامك بتجمل مضمون المنتدى في الحب وبس مع انو فيهو مايروغ لك ومالايروغ فيه السياسه والادب وقله الادب وفيه الحب والخبث والكوماج كما نطلق
دحين ياتلف يانركبك الساقيه ومانوقفها داير حب في بس ماليك داير سياسه بنمطقك ونقعدك في ركن قصي داير كوماج بنفرمك كفته وندقك كستليته
دحين روق بالك وهدي اعصابك وقول حرقك مالك

[عباس الشريف]

المشاركة الأصلية كتبت بواسطة جانيت

صباحك يشبهك
مالك فاير فينامن الصباح وواجعك وين يكون منتدى حبكانات مع انو كلامك بتجمل مضمون المنتدى في الحب وبس مع انو فيهو مايروغ لك ومالايروغ فيه السياسه والادب وقله الادب وفيه الحب والخبث والكوماج كما نطلق
دحين ياتلف يانركبك الساقيه ومانوقفها داير حب في بس ماليك داير سياسه بنمطقك ونقعدك في ركن قصي داير كوماج بنفرمك كفته وندقك كستليته
دحين روق بالك وهدي اعصابك وقول حرقك مالك

يا ريت صباحي لو زي صباح كل الناس صباحي ورد وفل.
السياسة وقلة الادب اولاد عم ماسمعتي بحكاية ..........
اما الحب علي صفحات المنتديات جديد علينا في اسكايب وفي ماسنجر ده لو كلو ما شال الفيس بوك غير انظمة.
اشهد الله مافي حاجة حارقاني الحب خصوصيه عندما يتناوله العامه بصبح مبتزل ولو دخل الخانه دي بصبح كلام في الهواء للعرض وجوع عاطفي.
وكلامي وجهة نظر الداير احب احب مافي زول رقيب علي زول.

[قيقراوي]

المشاركة الأصلية كتبت بواسطة عباس الشريف

يا ريت صباحي لو زي صباح كل الناس صباحي ورد وفل.
السياسة وقلة الادب اولاد عم ماسمعتي بحكاية فاطنة احمد ابراهيم مع محمد احمد المحجوب لما قالت الموضوع ده لا لينا فيهو ناقه ولا جمل و ل ما سمعتي حكاية فاطنة عبدالمحمود لما سألا نميري قالت ليهو كراع في مدني وكراع في الكاملين.
اما الحب علي صفحات المنتديات جديد علينا في اسكايب وفي ماسنجر ده لو كلو ما شال الفيس بوك غير انظمة.
اشهد الله مافي حاجة حارقاني الحب خصوصيه عندما يتناوله العامه بصبح مبتزل ولو دخل الخانه دي بصبح كلام في الهواء للعرض وجوع عاطفي.
وكلامي وجهة نظر الداير احب احب مافي زول رقيب علي زول.

لوووووووول
الحي الله و الكاتل الله
اتوكلت على الحي الدائم و ايدت الشريف
بما يكفي لحق الاغنية :
الشريف مبسوط مني .. اللخ اللخ
لكن ما على المطلق كدي ..
و لا زي الصادق المهدي في تصريحه الزاعق الصاعق بزعمه انو متفق مع المؤتمر الوطني 85%
في زول بتفق مع زول 85% في الدنيا دي!!
انا مع نفسي ما قاعد اتفق 85% دي!!
حولتننننننننننن!!!!

مسالة انو السياسة = قلة الادب دي بالغت فوكا يا الحبيب
اصلو شنو هو؟ .. المحجوب + نميري = السياسة
بعدين المحجوب = كلمة او كلمتين قالن مازح

كلامك دا ما صاح كلو كلو .. اسمع مني انا باقي عالم رياضيات سياسية عليا و دقيقة ؤ كدا فضلة خيرك.
ما تعمم .. التعميم مخل.

و كذا الحال بالنسبة لحبكانات البورض دا ..

بتفق معاك غايتو في قصة الخصوصية .. كانهم لم يسمعوا قول حوته رضي الشعب عنه :
عندي معاك كلام اتنين ما بنقولوا لي تالت ..

و كانما لم يسمعوا قول ستنا شاكيرا عليها السلام و المحبة :
تانغو فور توو نوط فور ثري!

مشكلة البورض دا في تقديري مشكلة رياضيات ما حبكانات و لا سياسة
الناس ما بتعرف تحسب ..
لا الحساب البسيط البفرق بين الـ 2 و الـ 3
و لا بتحسب حساب كلام الناس
و لا حساب لكل قول لديه رقيب و عتيد الموسومة في جبهة حتة الكتابة دي ذاتا ..
بالجد في تغير كبييييييييييير في شكل البورض
انا عضو هنا منذ فجر بعيد كان المؤسس الخال خالد الحاج يملك خاصية الكتابة معانا. و قبل ان يكتفي بالمراقبة بروحه من البعيد.
كل زول يحسبا كوييييس :
اهكذا نريد ان نخلد الخالد في قلوبنا ؟؟

اقول قولي هذا و استغفر الله لي و لكم فاستغفرووووووووووه


-------

يا بلة .. اكان حصل القدر .. اوصيك على العيال و امهم ..
بس اوع تدق الرغم كمان يجلي برضو .. سمح؟

[جيجي]

المشاركة الأصلية كتبت بواسطة عباس الشريف

يا ريت صباحي لو زي صباح كل الناس صباحي ورد وفل.
السياسة وقلة الادب اولاد عم ماسمعتي بحكاية فاطنة احمد ابراهيم مع محمد احمد المحجوب لما قالت الموضوع ده لا لينا فيهو ناقه ولا جمل و ل ما سمعتي حكاية فاطنة عبدالمحمود لما سألا نميري قالت ليهو كراع في مدني وكراع في الكاملين.
اما الحب علي صفحات المنتديات جديد علينا في اسكايب وفي ماسنجر ده لو كلو ما شال الفيس بوك غير انظمة.
اشهد الله مافي حاجة حارقاني الحب خصوصيه عندما يتناوله العامه بصبح مبتزل ولو دخل الخانه دي بصبح كلام في الهواء للعرض وجوع عاطفي.
وكلامي وجهة نظر الداير احب احب مافي زول رقيب علي زول.

غايتوا مبتزل دي صنت لي اضاني
بس ياها عادل امام يعظ الجمهور زاتها