من نوادر أصحاب شوقي بدري (أولاد أمدرمان)

[فتحي مسعد حنفي]

بدأت علاقتي بشلة الأخ شوقي بعد سفر شوقي الي تشيكوسلوفاكيا وكنت وقتها طالبا في جامعة القاهرة الفنن كما كنا نسميها..
كانت الدراسة في الجامعة مسائية تنتهي في التاسعة مساءا كنت بعدها أتوجه بسيارتي الي أمدرمان بمعية أخونا التجاني محمد التجاني سلوم وصديقي زاهر عبدالله خوجلي وابراهيم العقيلي (كركور) وهو من أبناء بانت..
رغم اني كنت من سكان الخرطوم بحري والكبري كان واحد وقتها وذلك قبل كبري شمبات الا اني كنت أذهب يوميا الي أمدرمان لمدة سنة كاملة دون انقطاع حتي أصبت باليرقان قبل سفري الي تشيكوسلوفاكيا بشهرين وسافرت بعد العلاج الطبي والكي لدي ود مختارالي تشيكوسلوفاكيا0.
في تلك الفترة تعرفت علي رواد بيت طه امام(شقيق القاضي عبد المجيد امام) الذي أعلن العصيان المدني العام في بداية ثورة أكتوبر.. وأصبحت عضوا في الشلة التي كانت تضم كل ألوان الطيف من شباب أمدرمان فمنهم الطالب ومنهم الموظف ومنهم العامل ومنهم المخنجي(بائع البنقو)ومنهم أولاد كبريات عوائل أمدرمان من بيت المهدي وبيت بابكر بدري وبيت زروق وغيرهها.
كان لكل فرد من تلك الشلة مواصفات خاصة وجميعهم يتشاركون في صفات الرجولة والظرف وسرعة البديهة..يعني باختصار شلة يندر تجميعها من انحاء أم در في مكان واحد..لكل واحد منهم نوادر تملأ كتب..
دعونا نبدأ بعثمان عبد المجيد(كوارع أو جيمس كما كان البعض يطلق عليه)الذي سافر فيما بعد الي الاتحاد السوفييتي للدراسة..الراجل الذي طار ورك في راس الدولاب..كلام عجيب مش كدالا أعلم ان كانت السمسمية في ذاك اليوم شديدة فقد جاء بها الفخ شخصيا. والفخ راجل تخين عندما يتحدث كان صوته يأتي وكأنه من أعماق بئر..
المهم الجماعة كانوا قاعدين وكلهم حلفوا انو عثمان كان قاعد في السرير ووراهو دولاب وفجأة عثمان طار من السرير ورك فوق راس الدولاب والجميع غير مصدقين لما رأوه..الطريف ان شقيقي مجدي حتي اليوم عندما أقول له عثمان جيمس يرد علي: عثمان الطار ورك في الدولاب.
هذه القصة أوردتها لالقاء الضوء علي هذه الشخصية التي لا تستبعد منها القيام بأي شيئ غريب..
كان لعثمان غراب أمسك به صغيرا بعد أن وقع من العش.احتفظ به وصار يطعمه وأسماه ويكو ولما كبر كان يحط علي عامود كهرباء بجوار البيت وفي وقت أكله كان عثمان يطلق له صفيرا خاصا فيأتي الغراب طائرا فاردا جناحيه ويحط علي ركبة عثمان الذي يكون قد حضر له اللحم مقطعا الي قطع صغيرة ويطعمه بنفسه في فمه...وعندما يأتي شخص جديد لزيارة عثمان ويريد أن يتخلص منه كان يعطيه السمسمية وبعد أن يسري مفعولها في الضيف يصفر عثمان ويأتي الغراب ويدخل الي الغرفة فاردا جناحيه فيخاف الضيف ويلبد ويغطي رأسه بيديه ويطلق الصيحات والبسملة.. ولعثمان حكايات كثيرة منها حبه للكلاب وتربيتها وسوف أكتفي هذه المرة وسأعود بحكايات أخري عنه وعن باقي الشلة..

[عثمان]

عم فتحي عليك الله ما تكون بخيل أنا قاعد منتظرك بعدين الشغل البقطارة دا بيشحتف

تحياتي/ عثمان الطيب

[معتصم الطاهر]

أولا
التحية والشوق

جئنا لنرحب بمقدمك و نقول ليك طولت الغيبة

بعدين نرجع ليك بعدما تكمل

حركات حلب ..

[فتحي مسعد حنفي]

المشاركة الأصلية كتبت بواسطة معتصم الطاهر

أولا
التحية والشوق

جئنا لنرحب بمقدمك و نقول ليك طولت الغيبة

بعدين نرجع ليك بعدما تكمل

حركات حلب ..

طلتك ولا القمر ياباش.لكن ياخ عيني وجعتني من الطبزة..انت مالك ومال الحلب..
أنا في الحقيقة ما غبت كتير لكن الظاهر كدا حأغيب جد جد من آخر الشهر..عندي سفرة لي بلاد الخواجات وانشاءالله أقابل شوقي ورأفت مادام السفرة ملح وانا ماشي مرافق لي واحد ماشي يشتري حاجات من هناك.يعني كمان فيها عمولة ممكن تفك العرجة..
وبعد رجوعي ولو الله وفق ناوي اقعد اسبوع في القاهرة ومنها للسودان سيدا آخد لي اسبوعين تلاتة..وكان فضلت حبة قريشات بعد تسديد الديون المتراكمة يمكن آخد لي خفسة لي الدوحة وبعد داك أسلم النمر في انتظار زول تاني كايس مرافق انشالله للحج..

[بابكر مخير]

جيمس
عثمان عبد المجيد علي طه، إبن أم سلمة بابكر بدري،،
القصد من ذكر الأب أولن، مع أنه الحأحكية مربوط بي جهة الأم، بي سبب؟؟؟؟
بابكر عبد المجيد علي طه في يوم تخرجه من الكلية العسكرية وكأن أول الدفعة، إستلم السيف بطريقة قوية جدن (بيقولو عليها كسر السيف)،
الحضور في دار الرياضة أمدرمان صفق كما السونامي في قوة الصوت والناس هللت وكان من بين الحضور العم عبد المجيد علي طه وأمامه رجل يتحدث مع آخر جالس معه،،
وقال الرجل وليته لم ينطقها،،،
دآ ما ود بت بابكر بدري،،،
طفق العم وإنتصب وهو عسكري أشد من إبنه،،
وقال للرجل؛
هو بابكر بدري دآ كان راجل بتو؟؟؟


طيب
قصة عثمان جيمس،،
كان طالب في الأحفاد ولي سبب، طلب منه أن يحضر ولي أمره أو يرفد....
زعل وهاج وماج،،، والسمسمية تغلي في دماغه...
دخل عند العميد يوسف بدري (خاله) وقال للعميد:
أنا ما عايز المدرسة، لكني عايز نصيبي في ورثة جدي بابكر....
وبهدؤ العميد الذي يهدي السونامي (برضو، تاني ما الكلمة عاجباني) قال ليهو:
هآ، أمشي المجلس البلدي وشوف جدك خليكم شنو؟؟؟
عثمان جيمس والفردة التانية ليهو،، محمد مهدي مسعود الحلو (الجاك بالانس)..
ما متذكر بالضبط، ياتو واحد في التلاتة، شنقيطي بدري ولا شوقي أوعثمان جيمس، قال لجاك بالانس:
بس يدوني خمس دقايق جو دماغك، أعرف فيهو شنو ويشيلو عمري...

[فتحي مسعد حنفي]

[


طيب
قصة عثمان جيمس،،
كان طالب في الأحفاد ولي سبب، طلب منه أن يحضر ولي أمره أو يرفد....
زعل وهاج وماج،،، والسمسمية تغلي في دماغه...
دخل عند العميد يوسف بدري (خاله) وقال للعميد:
أنا ما عايز المدرسة، لكني عايز نصيبي في ورثة جدي بابكر....
وبهدؤ العميد الذي يهدي السونامي (برضو، تاني ما الكلمة عاجباني) قال ليهو:
هآ، أمشي المجلس البلدي وشوف جدك خليكم شنو؟؟؟
عثمان جيمس والفردة التانية ليهو،، محمد مهدي مسعود الحلو (الجاك بالانس)..
ما متذكر بالضبط، ياتو واحد في التلاتة، شنقيطي بدري ولا شوقي أوعثمان جيمس، قال لجاك بالانس:
بس يدوني خمس دقايق جو دماغك، أعرف فيهو شنو ويشيلو عمري...[/color][/size][/B][/QUOTE]


أول حاجة يابابكر أنا كنت مستغرب من تأخيرك في المشاركة لأنك أحد أقرباء جيمس وبتعرف معظم الأسماء الجات في البوست...
حكاية الدخول في راس جاك دي حكاها شوقي وفعلا القالا واحد من الاتنين الذكرتهم..وجاك ود الحلو دا براهو حكاية..
تعرف واحنا في كورس اللغة في ماريانسكي لازني مرة اتشاكل مع استاذ اسمو بيتل..بعد الشكلة مشي البار وطشم تمام وجا الساعة اتناشر الداخلية والداخلية بابها بيقفل الساعة 9 مساء لغاية تاني يوم الصباح..ود الحلو جا وضرب الجرس مرة واتنين وجات المدرسة الماسكة وردية ليل فتحت ليهو الباب وهو واقف قداما يطوطح.. وقال ليها (NOW S or S) المدرسة تسالو انت قاصد شنو وهو يكررليها في الجملة وفي الآخر قال ليها..(SENEC or SUDAN) ولمن لا يعلم سنيتس دا اسم كورس لغة في سلوفاكيا.. نسيت أقول ليك سبب الشكلة..الاستاذ كان بيعلم الطلبة نطق حرف رجي بالتشيكي وطبعا لامن تنطفها بتنطق الراء والجيم في بعض وود الحلو كل لما ينطق بيطلع النطق حرفين والاستاذ يقول ليهو: (NO PANE HILO SAY RJE) وود الحلو برضو ينطقها غلط وفي الآخر لامن زهج قال للاستاذهيلو NOT حلو SAY) ودورت الشكلة..
أنا طبعا اتعمدت ما أذكر انو أم عثمان من آل بدري وأفتكر كانت أول واحدة اتعلمت وكانت بتعرف انجليزي..

[فتحي مسعد حنفي]

المشاركة الأصلية كتبت بواسطة عثمان

عم فتحي عليك الله ما تكون بخيل أنا قاعد منتظرك بعدين الشغل البقطارة دا بيشحتف

تحياتي/ عثمان الطيب

يا عثمان المرة دي عشان خاطرك لكن بعد كدا ما حتتكرر عشان ما معقول أكب العندي كلو وبعد داك أقوم أشحت..

عثمان كان عندو كلب وولف وفي تلك الفترة لم يكن كثيرين يملكون وولف فيما عدا الخواجات وقليل من السودانيين هواة تربية الكلاب وعثمان كان منهم..
هذا الكلب كان غريب كصاحبه فقد كان في غاية الذكاء ويفهم الكلام وينفذ كل الأوامر لدرجة انو عثمان دربو زي الكلاب البوليسية البطلع المخدرات وكان عثمان عندما يذهب لشراء السمسمية يأخذ معه الكلب واذا اعتذر المخنجي بأن البضاعة قاطة كان عثمان يطلب من الكلب البحث فيبدأ الكلب في شم أرجاء البيت وان كانت هناك بضاعة مخبوءة فأكيد ركس وهو اسم الكلب كما أعتقد..ركس كان بيطلعها من أي حتة وفي مرة أخرج الكلب السمسمية من بئر كانت مربوطة بداخلها بحبل..
والكلب كان مدرب لقيادة الكلاب الأخري التي كان عثمان يملكها فكان عثمان يخرج العصرية راكبا العجلة والكلب أمامه ووراء الكلب 6 كلاب آخرين يمشوا وراء القائد وعثمان علي العجلة وراءهم يلقي الأوامر : شمال..يمين...ستوب والناس في الشارع كانوا قد اعتادوا علي هذا المنظر..
في مرة الكلب اختفي وكاد عثمان أن يجن وبدأ يبحث عن الكلب وجند أصدقاءه للبحث معه ولكن مرت الأيام ولا أثر للكلب..قرر عثمان أن يلف العاصمة المثلثة مشيا وقسم الأحياء في امدرمان الي أحياء وشوارع وبدأ رحلة البحث وهو يعلم ان الكلب اذا كان في الشارع سوف يشم رائحته أو يسمع ندائه.ولكن انتهي من أمدرمان دون نتيجة وبدأ في البحث في الخرطوم وهذه العملية استغرقت ثلاثة أشهر دون كلل أو ملل الي ان كان يوما في لأحد شوارع السجانة فسمع زمجرة الكلب وهيجانه داخل أحد البيوت فخبط علي الباب وفتحت له امرأة عجوز والكلب زاد هيجانه بعد فتح الباب والمرأة صرخت فيه دا شنو البتسوي فيهو يابوبي. فرد عليها عثمان بوبي يامرا يا لب.. ونادي علي ركس باسمه طالبا منه ان يحضر وركس قام طوالي قطع السلسلة وجا ونط في عثمان والمرا طوالي قفلت الباب وقالت ليهو من ورا الباب:؛ والله ياولدي الكلب دا لقيناهو تايه وجيعان قدام البيت فقمنا دخلناه وأكلناهو مستنيين لغاية ما يجي صاحبو..سوقو ياولدي عشان باين انت سيدو..
هذا هو غثمان جيمس ..هل قابلتم مثله في أي مكان

[عثمان]

المشاركة الأصلية كتبت بواسطة فتحي مسعد حنفي

يا عثمان المرة دي عشان خاطرك لكن بعد كدا ما حتتكرر عشان ما معقول أكب العندي كلو وبعد داك أقوم أشحت..

مشكور يا عم فتحي على شعورك الطيب ، متابعك يا عمك المرة دي سامحتك عشان ما تشحت

تحياتي/ عثمان الطيب

[سارة]

المهم مشينا الثورة ونزلنا الراجل ورجعنا بانت ننزل كركور في بيتم الجنب السينما.ولما وصلنا وقفت العربية مستني كركور ينزل لكن مافي باب اتفتح ولا زول نزل فاتلفت وقلت ليهو ياكركور انت نمت ولا شنو ..ما تنزل ياخ خلينا نمشي..وياللهول..لقيت القاعد الزول بتاع الثورة وكركور مافي.وطبعا عرفتو انو كركور نزل في الثورة وأخونا دا أظنو نام وما انتبه انو وصل.
غايتو سبيت ليهم الاتنين ورجعت الثورة تاني أفتش علي كركور وقلت أكيد يكون السواري قبضو ووداهو النقطة..لكن ربك رب الخير لقيت كركور واقف يتلفت مخلوع في المكان النزل فيهو وأول ما شاف العربية قال ليتا: دا شنو يا عبيد انتو نزلتوني وين؟
المهم نزلنا بتاع الثورة ودورنا تاني لي بانت وطبعا كركور عشان كان كل يوم بينزل أول واحد لامن العربية وقفت افتكر نفسو وصل وفتح باب العربية ونزل بدون ما يعاين هو نازل وين

دى خطيييييييرة يا عمو والله انا على شوية يطردونى من الوردية

يديك الف عافية

[فتحي مسعد حنفي]

المشاركة الأصلية كتبت بواسطة سارة

دى خطيييييييرة يا عمو والله انا على شوية يطردونى من الوردية

يديك الف عافية

قسما عظما القال سارة مرا بي ألف راجل تب ما كضب..هسع في واحدة اتجرأت تخش البوست المشبوه دا غيركعفيت منك وأنا حأخت النرويج في برنامج رحلتي في شهر يونيو عشان مداخلتك دي..بس التلفون بالخاص..وحأجيب ليك 2 كيلو تسالي..

[شوقي بدري]

البوست بتاع فتحي مسعد حنفي عن اصحاب شوقي بدري, خلا مرتي تقول لي بعد ما قرتو (يعني صاحبك فتحي ورا انو انتو الاولاد الكان الناس بحذرو اولادهم منهم ياخي دي حاجة ما معقولة. هذا الموضوع ياخذ سنة لكي ينتهي .
نبدا بكوارع او كع كما كنا نناديه اختصارا. في الثمانينات ذهبت لمنزلهم في شارع العرضة. وطبعا رحت داخل تووش. وكانت شقيقته مريم عبدالمجيد علي طه وهي مدرسة تقول لاحد التلاميذ كلم ابوك البليد ده يرسل معاك المصاريف عشان ادرسك يا بليد لو تقدر تنجح. ومريم سيدة طويلة القامة قوية الشخصية تتمتع بجمال واضح. ولقد تزوجت بصديق شقيقها بابكر عبدالمجيد علي طه اول الدفعة العاشرة في الكلية الحربية. وزوجها هو الضابط خليل ولها اثنين من الاولاد يتمتعون بقامات طويلة احدهم قد صار معترف في كرة السلة.
وعندما شاهدتني مريم التفتت نحوي وقالت بحده(وانت ماشي وين طوالي ده بيتكم؟) فواصلت سيري قائلا ايوه ده بيتنا. ولم اكن قد قابلتها منذ زواجها في بداية الستينات. فقالت لي انت يا راجل مجنون ولا قليل ادب؟ فزدت من حيرتها قائلا ده بيتنا والمطبخ الجوه ده ارضيته بلتطها انا. وعندما اقتربت مني متنمرة وخوفا ان اواجه صفعة قلت لها ده بيت ام سلمة بدري وانا شوقي ابراهيم بدري. فظهرت اجمل ابتسامةعلى وجهها وقالت انا كان لازم اعرف من الشياكة دي و الاناقة دي لازم تكون ودخالي ابراهيم.
في الستينات انتقلت العمة امسلمة بدري للسكن مع ابنها بابكر عبدالمجيد علي طه في منازل الجيش وعمر كان معنا في تشيكوسلفاكيا والبنات قد تزوجن ومامون كان في الكلية الحربية. وعثمان حول المنزل الكبير في شارع العرضة الى نادي تمارس فيه كل نشاطات الدنيا. وفي احد الايام حضر عبدالمجيد علي طه المشهور بالهرماس وهو السوداني الوحيد الذي وصل الى رتبة ميجور في الجيش وكان مشهود له بالشجاعة والصرامة . وعندما شاهد ما حدث لمنزله وهو عادة يقيم في العمارة طه. غضب وصار يصرخ في عثما ن ان اضربك رصاص ان املاك دخان...وعثمان كان يقول لنا انا( والله كنت ضارب واولبكة مافي حته مامليانة دخان ابوي ده ما عرف كان حا يدخل الدخان بتاعو وين ..انا كلي كنت دخان ..) وقام بابكر بتأجير المنزل في الاول للسيرك الهندي الذين كانوا في الخرطوم لعدة شهور وكان الناس ياتون بالباصات من خارج العاصمة لمشاهدة العرض. ثم اجر المنزل لمجموعة ضخمة من الطلبة النيجيرين الذين اتوا للدراسة في المعهد العلمي, جامعة امدرمان الاسلامية الان و. وبسبب قرب المنزل من المعهد.
كانوا جميعا مولانات احدهم الاخ سليمان وهو ابن زعيم كبير في نيجيريا وكان له جواز دبلوماسي ولكن هؤلاء الخلفة تخرجوا بشهادة من كوارع.
عثمان كان يسكن معنا في بعض الاحيان. حيث يجد حريته كما كان يسكن مع صديقه ابوالجوج في العرضة واخرين. وفي احد الايام حضر في الصباح ورقد على السرير في منزلنا ووضع صباعه الاوسط في فمه ونظر الى العرش. فقال له شقيقي الشنقيطي (انت يا عب عندك مشكلة) لانه كان يعرفه جيدا ووضح ان والدته قد اعتطته فلوس لكي ياتي ببنا ء لكي يبلط المطبخ . وعثمان ضرب الفلوس في مقيل مدنكل. وعندما سأله الشنقيطي (يا عب كيف تعمل كده) ورده كان (والله لو كنت قابلت الحاجة الانا قابلتها كان عملت زيي). هسي انا اقول شنو لي امي فقال له الشنقيطي قول ليها( لو كنتي قابلتي الحاجة الانا قابلتها كنتي عملتي زيي).
اقترح الشنقيطي ان اقوم ان بتبليط المطبخ لانه عندي طالوش ومحارة. وهذه اهم ادوات التبليط ولكن كان ينقصني الغربال لغربلة الرمل. الا انني كنت اعرف انه في امكاني ان استلف غربال رملة . المشكلة كانت الاسمنت. والمطبخ يحتاج لاثنين شوال اسمنت او مئة كيلوغرام. فاقترح الشنقيطي ان نذهب لمليونير المنزل الطيب سعد الفكي وهو خياط في سوق الشوام. وصار له فيما بعد ابناء يحملون اسماء الشنقيطي وشوقي واسعد ولي ابن يحمل اسم الطيب. ودفع الطيب 150 قرش باريحية. ولكن اكتشفنا اننا نحتاج ل 15 قرش للكارو لم تكن متوفرة. فذهبنا الى عبدالعزيز صاحب المغلق جنوب حائط زريبة العيش. ولانني زبون دائم فلقد اعطانا شوالين اسمنت ب 135 قرش بدلا عن 150 قرش وقمت بتبليط البلاط . وعندما حضرت الحاجة اعجبت بالنتيجة. وطالب عثمان بخمسين قرش زيادة والخمسين قرش تعني وزنتين.
صاحب الاسم الاصلي لكوارع هو شقيقه محمد عبدالمجيد علي طه اكبرهم. ولقد كتب عنه ابن خالته البروفسور الطيب ميرغني شكاك رحمة الله عليه وكان يتمتع بخفة الظل والشيطنة. وعندما جلدوه في الطابور. كان من المفروض ان يحسب بعد كل سوط .3.2.1 الى عشرة كنوع من العقاب. السوط الاول كان قاسيا فقال واحد والسوط التاني كان اصعب فصرخ... تمانية.. فضحك كل الطابور حتى المدرسين. وسمعت منه عندما زرته في منزله بالقرب من سينما العرضة عندما رجع الى امدرمان للاستقرار انه شاهد المدرس وهو يخبط في منزل احد العاهرات فوقف بالقرب منه وقال له محييا ...ازيك يا استاذ...اتحرج الاستاذ وبدأ يصرخ .... يا بتاع الكوارع ... يا بتاع الكوارع ..وانطلق وهو يطارد صاحب كوارع وهمي. وقديما كان بتاع الكوارع يجوب الاحياء حاملا جردلا او جردلين والكوارع الواحد بي تعريفة.
في الصباح اتى المدرس الفصل وهو مدرس جغرافيا فتنحنح محمد بصوت عالي فقام الاستاذ بطرده من الحصة. وقام الاستاذ برسم خرطة افريقيا وبجانبها جزيرة مدقشقر. وسأل الاستاذ دي شنو ودي شنو فصرخ محمد من خلال النافذة .. يا استاذ دي نيفة والجنبها كوارع...كوارع. فناداه الاستاذ وقال لزملائه اخوكم محمد في الحقيقة بحب الكوارع. وبعد الحصة عصر الاستاذ شلن لكوارع الا انها صارت اسمه بقية حياته ثم انتقل الاسم لعثمان فيما بعد.
جدتي الرسالة بت احمد ود ارديس الانصارية كانت تناديه بكبارع بدل كوارع. وصار هذا اسم الاثنين وسط العائلة. ومحمد كانت له مواقع ومشاهد في هذه الدنيا تضائل امامها مصائب عثمان. فعندما وضعت العمة امسلمة بدري ابنها مامون في 1947 . نادت امنا السارة بدري عمر ابراهيم بدري واعطته فلوس وطلبت منه الذهاب الى عمنا التاجر يوسف ميرغني شكاك والذي يلبي طلبات كل قبيلة الرباطاب, لشراء اغراض النفاس من خروف وسمن الى اخره. وعمر كان شديد الادب وهو ابن بنت السلطان فجده سلطان في رمبيك وهو ابن بنت السلطان منقلا عمر مرجان. وطلبوا من عمر ان ياخذ معه محمد للشيل والرفقة وان لا يعطي الفلوس ابدا لمحمد في يده. وما ان خرجا من الدار حتى بدأ محمد في الاستفزازات .. يا قراده يا سخيف يا متحشر قروشك ولا قروش امي.. امسكا انا... وعمر صامد ومتحملا الاساءات واللكيز والاستفزاز. وهم في الفضاء الذي صار جامع فيصل شاهد محمد رجلا محترما كبير السن فقال له يا عم انحنا ماشين نشتري حاجات بتاعت امي والقروش قروش امي ومرسلانا نجيب حاجات من السوق والثقيل ده ماسكا وانا خايفو يروحا وما عاوز يديني ليها. فأفتى الرجل بأن محمد هو الاجدر بمسك الفلوس . فدفع عمر بالفلوس لمحمد الذي ما ان قبض عليها حتى اطلق سيقانه للريح ولم يرجع لايام عديدة. وعندما سئل عمر كيف فرط بالرغم من التحذير كان جوابه ان محمد استفزه واساءه . واشعره بانه متطفل . محمد كوارع الكبير عمل ككاتب في الحصاحيصا. وطبعا كان غير منضبط. ولم يعرف المفتش الانجليزي مع من يتعامل. فقام بتعنيف محمد والصراخ في وجهه ومحمد كان عندو صداع من الصباح كالعادة من قعدة الليل. فاخذ مكنة الكتابة اللتي كانت وقتها ثقيلة ولبسها للخواجة في راسو. محمد صاحب البلد وجده طه الذي سميت عليه العمارة. وحكم عليه بستة شهور سجن بتهمة الاعتداء على موظف اثناء تاديته الواجب بدلا عن الشروع في القتل . ولم يقضي كل المده في السجن.
في الثمانينات صار عثمان المدير المالي في مكتبي في العمارات شارع 1 المجاور لفندق الارز. وبعد سفري كان تصلني تلكسات بالشكوى من المدير المهندس عق عبدالله علي عبدالله ومدير الاتصالات الهندي والمدير العام التجاني محمد التجاني عبداللطيف وآخرين و. وفي اول اجتماع قال لهم كوارع . انتو بطالبو بالمنقة والفواكه والفطور ومناديل الورق والبسكويت والتمر البجيبن شوقي كل يوم في المكتب. الحاجات دي موجودة في السوق العاوز يجيبا يجيبا بي قروشو. وكمان بطالبو بورق توليت العندو ورق تواليت في بيتو منو. وعندما لم يجب احد قال عثمان طيب ما تجننونا ساكت.. وعبدالله علي عبدالله كان غاضبا لان عثمان اعطاه مرتبه امام السكرتيرة فقال له عثمان المرة الجاية حا اقمز ليك تجني بره. شان اديك ماهيتك.. وانفض الاجتماع.
وسنعود للآخرين

[فتحي مسعد حنفي]

دخان...وعثمان كان يقول لنا انا( والله كنت ضارب واولبكة مافي حته مامليانة دخان ابوي ده ما عرف كان حا يدخل الدخان بتاعو وين ..انا كلي كنت دخان ..) وقام بابكر بتأجير المنزل في الاول للسيرك الهندي الذين كانوا في الخرطوم لعدة شهور وكان الناس ياتون بالباصات من خارج العاصمة لمشاهدة العرض. ثم اجر المنزل لمجموعة ضخمة من الطلبة النيجيرين الذين اتوا للدراسة في المعهد العلمي, جامعة امدرمان الاسلامية الان و. وبسبب قرب المنزل من المعهد.


الله يجازيك ياشوقي شرطني بالضحك لغاية ما المرا جات من جوا قالت ياراجل انت بتضحك براك مالك..المرا قايلاني
جنيت..
تعرف ياشوقي أنا هدفي من فتح البوست دا كان فعلا عشان أجرك للكتابة وأطلع الجواك مدسوس عشان أنا عارف انك لامن تكتب عن ناس وعندك احساس انو في زول عارفك بتتكلم عن شنو ومنو.بتتشجع تكتب وممكن كمان تذكروا بعض وأنا متأكد انو كل شخصية أنا ذكرتها انت عندك عنها حكايات كتيرة عشان الناس ديل ما كانو ناس عاديين والكتابة عن نوادرهم بتحتاج لي كتب.
شكرا علي هذه المساهمة الثرية بس أوعك تنشل مني البوست وبعد ما كنت البطل أبقي صاحب البطل وحتي صاحب البطل أنا موافق المهم ما أكون فوزي صاحب استيف العوير والحمدلله الشباب ديل ما سمعو بي فوزي ولا بي استيف ذاتو.. واصل ياشوقي الله يخليك غلي الأقل تريح صاحبك شوية

[عثمان]

المشاركة الأصلية كتبت بواسطة شوقي بدري

وسنعود للآخرين

العم الرائع .. طابت أيامك ، يا عمك العودة دي متين ما منتظركم ، العزيزة سارة شنو عمك فتحي دا ما دوريهو خليهو يفته لينا شوية كدة قبل ما يجيكم بغادي

تحياتي/ عثمان الطيب