المجانيـــن في يقيـــن ....

[nezam aldeen]

في كل الزوايا ،،
الحلة ، السوق ، اطراف الشوارع ، نواصي البيوت ، شوارع الظلط ..
‏
هم خطر الحلة وهمها أحيانا ..
وفكاهتها و ضحكتها أحيانا أخر ..

لكنهـــم بركتها ، رحمتهـــا تنزل لهم فتتفرق على الناس ..
‏
لاتخلو منطقة من مجنون ،
وكأن القدر اوزعهم ان ينتشرو في الأرض ،،
ليريهم من آياته ...
‏
نستوجب الحمد ، ويستوجبون التأمل ..

[nezam aldeen]

اولاد تـــش ،،
‏
اربعـــة وخامسهـــم دربهم ، يسيرون في صف واحد ، حفاة عراة متطاولين في البنيان ،،،
‏
عزوز و كرملة و برينسة و طحنية
‏
يقال انهم كانو من زينة شباب الحي ولكنهم سختو ،
والسخت رواية ..
‏
ورواية اخرى تقول كما يرويها الطيب سيد الكارو :
يازول ها ماتسمع لي كلام زول ، الناس ديل لا (......) بنات جوة قبة الشيخ لاشي ، الناس ديل بارو الود اكرم كرملة دا وجاب ليهم (بنقو) من الغرب ، لفوهو وأظنهم ماكسروهو ، وإنضارو في كشك انصاف ست الفطور وشربوهو وودربهم ..
‏
‏
يخبرني وانا يمينه وإنقرط للحمار :
ياخ الشيخ دا ميت آ زول كيفن يسخت ليهو ناس ؟
‏
لكن ياالطيب ياخ إتا مامقتنع بي الشيخ دا والا شنو ؟
ينفخ بين شفتيه في إستياء :
شياختو طايرة فوق قبتو دي .
‏
وعند الجيلي حارس البيارة :
يازول الناس ديل ساقو بنات من جمب الكمائن وخشو بيهم بعد المغرب قبة الشيخ واول مابدو دخل واحد طويييل وعريييض وشعرو جاري بالواطة وعندو جناحين سغار أظنو حوار القبة ، ولما ليك فيهم تشتيت في يدينهم وكرعينهم وفوق حاجاتهم ،
وقامو كدي جاريين يكوركو تـــش تـــش .
ولي الليلة اسمهم اولاد تـــش .
‏
طيب ياالجيلي انا الطيب قالي ان... يقاطعني :
الطيب دا بارا لي انصار السنة ديل مابينفع آزول تاني .

بس ياالجيلي كلامو منطقي ؟ واردف مداعبا :
بعدين انصار السنة ديل ناس كويسين ياخ
‏
يمص اصبعه الأوسط ويرفعه امامي :
طظ

[nezam aldeen]

او عبد العزيز كما تناديه امه ,,
ذلكـ الأسمر الكناري الذي لا يشيب ،،
من اول مرة اراه فيها وهو يتربع خلف (علــم) ست الشاي ،، يتأمل (القاسمة نصها للمبمر ، شان يرتاح بينات رجلينا) غير آبه بمئات الصارخين في النادي والمتابعين لنهائي كأس العالم (البرازيل وألمانيا) ،، منذ تلك المرة وأنا ارى فيها هذا الكناري اجده كما هو ،، لم يتغير ،، ولا حتى بنطلون الجينز الذي يزعم الجيلي انه دخل به للقبة حين اراد فعل فعلته فيها قبل ان يسخته الشيخ ..

عزوز هادئ جدا ، لا يتحدث مع أي حد ،، كل مايفعله هو السير ورأسه في الأرض ، لا يرفعه الا اذا راى (توب او طرحة) ،، وهذه هي مشكلته الوحيدة ،، ماإن يرى عزوز اي (مرة) الا ويتبعها غير محول بصره عن ظهرها .. وهذا ماسبب له كل هذا الكره في الحلة .

رغم ان عزوز هو الرجل الوحيد الذي يتبقى في (الحلة) صباحا ، الا انه لم يتعرض لأي من نساء الحلة يوما ،، وغاية مايفعله هو ان (يتدبى) والجزارة زحمة ليقف خلف الحريم في طربيزة الخضار ويمد يده بتلك الورقة البيضاء ل(مهدية) في صمت .. لتزجره بعضهن وتتركه بعضهن حتى يملها ويقف خلف أخرى ..
هذه العادة كادت ان تفقد عزوز عينه بضربة سكين من (حامد الكهربجي) عندما انهال عليه ضربا قبل ان يخرج السكين ويضربه في وجهه وهو يزمجر :
انــــا بكتلك بكتلك الليلة .
يتدخل بعض الحضور :
حامد اقيف صلي على النبي يازول مالك ؟ ويجرونه من فوق عزوز وهو يزبد غضبا ويقول (صيج ليها انا شوفتو) ومابخليهو بكتلو .
بعدها اختفى عزوز قرابة العام ولم يعد الا عند وفاة والده ...

[أميرى]

في انتظار كرملة وبرنسية وطحنية و دربهم همسيلف
أكتب

[أميرى]

نسيت أقول بسم الله بسم الله
خلاص واصل ياخ فالنوم ما داير يجي ولا قادر أمشي ليو والحل؟
ياخ أنا مستمتع بالحكي الطاعم دة حتي تمنيت إنو أكون عزوز صأحب الصاجة ذات نفسو

[سمراء]

اقتباس:
المشاركة الأصلية كتبت بواسطة أميرى
نسيت أقول بسم الله بسم الله
خلاص واصل ياخ فالنوم ما داير يجي ولا قادر أمشي ليو والحل؟
ياخ أنا مستمتع بالحكي الطاعم دة حتي تمنيت إنو أكون عزوز صأحب الصاجة ذات نفسو

والله ياصاحبى الزمان كنت قايلة اسهل شى فى الدنيا ، انك تمثل الجنون !!
بس والله الشغلة ماساهلة كلو كلو ...
عشان كده سحبتة رايى ليك بانك تعمل مجنون !!

ده لو انت ماوصلته المرحلة دى ...لسع

[nezam aldeen]

المشاركة الأصلية كتبت بواسطة أميرى

نسيت أقول بسم الله بسم الله
خلاص واصل ياخ فالنوم ما داير يجي ولا قادر أمشي ليو والحل؟

تلقاك شارب ترمسة جبنة ودايرو يجيك ،
بس الحل بسيط ، اعفص الريموت افتح قناة السودان والله تنوم نوم مع الصيام دا

المشاركة الأصلية كتبت بواسطة أميرى

‏

ياخ أنا مستمتع بالحكي الطاعم دة

ياااأميري يا أميري
شكرا حد سعر السكر وطعمو
وشكرا طن وطنين هوادة ياقريب وخليك قريب ..

‏

المشاركة الأصلية كتبت بواسطة أميرى

حتي تمنيت إنو أكون عزوز صأحب الصاجة ذات نفسو

عزوز ياأميري واليوم جمعة أظن كانت أيام عيد الضحية ، جا الصباح كعادته للجزارة ووقف خلف الحريم ، والوقت داك نحنا قاعديين قدام دكان فوراوي وشايفين المنظر كلو ،
تجي قدامنا (....) مرت (...) المحامي ،
وكعادتها لابسة توب الشفون الخفيييف داك ، ذي طرقة الكسرة بل أشد خفة ، وقميصها الحدو نص الساق ظااااهر ذي ضنب الغنماية وريحتها اسكت ساي نحنا اتلبشنا خليهو عزوز ،
المهم تجي وتقيف في الجزارة ويجي عزوز يقيف وراها ، بعد شوية عزوز يقبض ليك المرة ويدق بيها الواطة وماشاء الله كنكش فيها المرة الكوراك غلبها
والله ياأميري أي زول كان في الحلة ديك حاول يقل عزوز من المرة وهو مكنكش فيها ذي القرادة ،
وبدون اي مبالغة أربعة رجال ال1 فيهم 4في4 إتنين بجرو في عزوز وإتنين بجرو في المرة ، ولااااا حركوها قيد انملة ،
لحدي ماعمك شيخ الصافي سل سكينو بي غضبة جعلية وقال داير يطعنو
الناس بدت تحجز في الصافي والصافي مصر يطعن الزول
في النهاية في واحد من الموجودين اتصل بي ناس الطارة جو وفكو المرة ودوها بيتها وساقو عزوز معاهم .
بس فكوهو كيف دي ، لو قلتها ليك ح ترجع في كلامك صدقني .

[مرافي]

المشاركة الأصلية كتبت بواسطة محي الدين عوض نمر

في كل الزوايا ،،
الحلة ، السوق ، اطراف الشوارع ، نواصي البيوت ، شوارع الظلط ..
‏
هم خطر الحلة وهمها أحيانا ..
وفكاهتها و ضحكتها أحيانا أخر ..

لكنهـــم بركتها ، رحمتهـــا تنزل لهم فتتفرق على الناس ..
‏
لاتخلو منطقة من مجنون ،
وكأن القدر اوزعهم ان ينتشرو في الأرض ،،
ليريهم من آياته ...
‏
نستوجب الحمد ، ويستوجبون التأمل ..

الاخ نمر
بعد الضغوطات العايشا انسان بلادي افتكر الجنون راحة
حسع اي واحد ماشي ويتكلم براهو.. فضل شنو من الجنون..؟؟؟
القفة جابت اللفة ودوار العقول ثم ماذا بعد المجنون دا الايفلع يعني..؟؟؟

[nezam aldeen]

المشاركة الأصلية كتبت بواسطة مرافي

الاخ نمر
بعد الضغوطات العايشا انسان بلادي افتكر الجنون راحة
حسع اي واحد ماشي ويتكلم براهو.. فضل شنو من الجنون..؟؟؟
القفة جابت اللفة ودوار العقول ثم ماذا بعد

‏

مرافي

إتي أكيد لسة مابتكوني مشيتي السوق ؟
انا اقوليك
امشي السوق وشوفي كمية الشحادين في السوق ، وأوعدك ح تجي راجعة بأكتر من خمسين نوع من انواع الشحدة كل نوع له قواعده ،
وكمية الشفع البيبيعو في السوق شي ليمون وشي أكياس وشي فرشتين والتالته هوادة
أمشي عشان تعرفي إنو والاااااااااهي
المجانين في يقين
‏

المشاركة الأصلية كتبت بواسطة مرافي

ا‏ المجنون دا الايفلع يعني..؟؟؟

‏

ككككككك
طبعا طحنية دا مشهور جدا بإنو زول نياش نيش جد ،
حتى في بعض الناس بسموهو فلسطيني ،
والشفع كانو بشاغلوهو (طحنية ود الجنية)
ويقومو جارين
الساعة يامرافي الإرفع ليهو نص طوبة إتأكدي إنو رفعو شافع في الإسعاف
دوووق بختها في عنقرة الشفع .
‏
المهم ولي كلامك شان تشوفي
يوم مدير المدرسة الصباح طلع عامر اخو طحنية السغير وطردو ودقاهو معاهو كم نفر كدة عشان ماجابو الرسوم
ويقوليهم المابجيب ولي امرو مايجي داخل ،
يازولة وطحنية شاف أمو داقة جرس في البيت جاليك جاري للمدرسة
ولسوء الحظ لقى ليك الطلبة في فصحة الفطور ،
والأساتذة والأستاذات قاعدين تحت الشجرة بيفطرو
خشا ليك المدرسة ورفع ليهو كم حصحاصة وعينك ماتشوف إلا النووووور
بعد دقيقتين المدرسة كلها طلبة واساتذة وإستاذات
محشورة في فصل وااااااااااحد
لحدي ماجات امو مرقتو واليوم الدراسي تم .
‏
قلتي لي إلا يفلق
كككككك

[هيثم علي الشفيع]

محي الدين النمري

رمضان كريم وتصوم وتفطر على خير(كيف مع السكر المافي والموية القاطعة دي...مش؟؟؟)

جابني الدرب وقلت أشوف الناس الحلوين الأنا بحبهم وأمس القرييييييبة دي كنت بشتري في الخضار من الملجة لو في زول شافني وقرّب مني ، كان صنّفني منهم...
(ياخ تتكلم مع روحك وتنهّرا قدام الناس..... دي حاجة سمحة خلاس)

أهاااااا ما أطوّل عليك وأصلي ماني مطوّل لقيتك جايب سيرتي
قلت كان كدي بدل نتفرج ونستمتع ونمرق ساكت لاحس لاخبر


النقول لي الزول دة:

أنا فارقت خرطوم السجم ورجعت الخلا ، وعشان كدي بتلقاني متوفففففر كان الله هون من الليلة ولي غادي

بس إنت تعال واكتب ساي

مودتي التي تعلم

[النور يوسف محمد]

بسم الله الرحمن الرحيم

الله يا محى الدين على هذه المَلَكْه ..
حين يقوم اليقين مقام الشك وتكون بشائر النصر هى عين الهزيمة ..
ماذا نتحسس !!!
وكيف لنا أن نقرأ الأحداث من زوايا رؤيتهم النافرة وجوانب عقلهم المرهق ..

أكتب يا محى الدين ..
عن عموم الفكرة مستنداً على هذه النماذج التى تفضح يقيننا وعقلنا ...

شكراً محى الدين

[مهند الخطيب]

" وآآه ياكوستي ....... نارم حية ........ مرارة وشية .............

الدرب عااااااالي وأرمي المداااااري"

عقيرة مجلجلة ........ وطنبور ناشز منشز ,,,,

ود مجذوب بحوم الطرقات بسوق كريمة ................

- الزول ده من وين ؟
- من كوستي
- ومن كوستي الجابو كريمة شنو ؟
- والله ماعارفين ناس يقولو راد ليهو بت هنا وناس يقولو غير كده
- أها جنّا وركب الظلط ....؟
- أيوة أهلو جو من كوستي بالسيرة والأخبار لقوهو هنا ساقو معاهم ... بعد 6 شهور لقينا بطنبور عندنا هني!!!
- جا كيف راجع ؟!!
- حسي كلامو جا بكرعيهو ...!!!!

ويمر من أمامنا بخطواته الايقاعية الراقصة وطنبوره النشاز وهو يردد:
"آآآه ياكوستي .... نارم حية .......... مرارة وشية ......
الري عاااااااالي .... وأرمي المداري ......... آآآه ياكوستي"

[nezam aldeen]

المشاركة الأصلية كتبت بواسطة النور يوسف محمد

بسم الله الرحمن الرحيم

الله يا محى الدين على هذه المَلَكْه ..
حين يقوم اليقين مقام الشك وتكون بشائر النصر هى عين الهزيمة ..
ماذا نتحسس !!!
وكيف لنا أن نقرأ الأحداث من زوايا رؤيتهم النافرة وجوانب عقلهم المرهق ..

أكتب يا محى الدين ..
عن عموم الفكرة مستنداً على هذه النماذج التى تفضح يقيننا وعقلنا ...

شكراً محى الدين

استاذ النور
تحيات ،،،،، تملا الساحات ،،،

نعم انهم في يقين ، ويقين متفرد القناعة ، وافر الكمال ..
يقول صاحبي :
درجتهم بعد الأنبياء
أقول كيف :
يقول :
انهم في حالة من السمو الروحي ، أرواحهم تفرغت لشئ في الطبيعة (لا ادري ماهو) ، وأجسادهم مثلت فوضى الأرض ،،
أقطعه :
لكنهم مجانين وليسو دراويش ؟
يقول :
السمؤ الروحي ليس حكرا على حلقات الذكر (الطبيعة أكبر من ذلك ) ،، هناك ارواح تعلو لأشياء أخر ...
يتمتم بالقرب منا أحدهم وكأنه يفهم حديثنا او بالأصح يشاركنا :
يارب بهم وبآلهم دق دق دق ....

[nezam aldeen]

المشاركة الأصلية كتبت بواسطة هيثم علي الشفيع

محي الدين النمري

رمضان كريم وتصوم وتفطر على خير(كيف مع السكر المافي والموية القاطعة دي...مش؟؟؟)

جابني الدرب وقلت أشوف الناس الحلوين الأنا بحبهم وأمس القرييييييبة دي كنت بشتري في الخضار من الملجة لو في زول شافني وقرّب مني ، كان صنّفني منهم...
(ياخ تتكلم مع روحك وتنهّرا قدام الناس..... دي حاجة سمحة خلاس)

أهاااااا ما أطوّل عليك وأصلي ماني مطوّل لقيتك جايب سيرتي
قلت كان كدي بدل نتفرج ونستمتع ونمرق ساكت لاحس لاخبر


النقول لي الزول دة:

أنا فارقت خرطوم السجم ورجعت الخلا ، وعشان كدي بتلقاني متوفففففر كان الله هون من الليلة ولي غادي

بس إنت تعال واكتب ساي

مودتي التي تعلم

اووووو البعاتي نمبر تو
آلشفيع علي الشفيع
رمضان كريم ياصاحب تصوم وتفطر على خير ،، ياخ في خلاكم داك اللحم متوفر بكثرة ومجاني عديل قالو ،، أضرب الشية وأتقي الله .

عارف بمناسبة الشية دي

برينسة دا ماشاء الله طول وعرض سموهو برينسة عشان قالو مرة شارطوهو : إدوهو نص عرقي ويرفع البرينسة عشان يدقرو ليها بي الحجر وصاحبك كان اظنو ماعندو حق القزازة فقالو ( والذمة عند الرواة) انو هب أمسك البرينسة ال86 وهب ارفعا ياعمك من ديك سموهو برينسة ،، طبعا في رواية تانية بتقول برينسة دي جاية من برينسيسة ( ظاهر انو كان مدمن قبال مايجن صاح ؟)
المهم فبرينسة جنو شراط ومن زمان قبال مايجن ويبقى مجنون رسمي كان بيشارط بي اي شي وممكن عشان خمسة جنيه تشارطو يسوي المابيتسوى وماشاء الله شفت اللعيبة بتاعين البلي استيشن المصنعين بكونو عاملين كيف (ناس يايا توري وبوكا وقروسو بتاع ايطاليا داك ) ستة في ستة ، المهم ياعمك مرة الغسال شارطو انو يغسل ليهو الهدوم القاعدة في الغسال كلها وكانت تجيب 6 دست اظنها عمك برينسيسة قعد اتفرجخ ليك في البمبر وشت شت شت شت
الساعة اتنين كانت الحبال كلها مليانة وسرير الغسال زاتو مليان ،،
بس عارف كان مشارطو بي شنو ؟؟؟؟؟

للأسف كان مشارطو بي انو يشبعو بس (يأكلو لمن يشبع ) وللأسف مرة تانية الغسال خسر كل القروش الكسبها في الإسبوع داك ..


بجيك لي قصتو مع الشية تاني .

[scaptionoz]

داير اتجنن امامك داير انصح مانى قادر !!!!

ديل ما مجانين ياااااااااااخ...ديل ناس مسبوقييييييين بكم ركعة كده يااااااخ وكايسين التمامة...لو مغالطنى اربط ليكا فكرة فى جناح حمامة

كل سنة وانتا طيب ياااااااااااخ..يا محى التين عنب تمر