قال الراوي ...
قال الراوي :
عقد السيد رئيس الجمهورية اجتماعا مغلقا بقيادات المؤتمر الوطني للتفاكر حول ردة فعل الشارع المتوقعة بعد رفع الدعم عن المواد البترولية و كيفية التصدي الحكيم لها ، و ابتدر الرئيس الحديث قائلا :
طبعاً يا جماعة بعد اجتماعي بالأخ وزير المالية لاكثر من تلاتة ساعات توصلنا لي إنو مافي مناص من إنو نرفع الدعم عن المواد البترولية عشان اقتصادنا يتعافى و المزانية تستعدل و نقدر نمشي بالبلد لي قدام ... و مافي شك يا جماعة إنو المتربصين بالوطن ما حيفوتوا الفرصة دي و حيألبوا الشارع ضدنا و يخرجوا في مظاهرات تخريبية ، لكن برضو نحن مقدرين إنو في ناس ضاقت بيهم المعيشة و حيطلعوا الشارع و يعبروا عن غضبهم من الزيادات دي ، و نحن بقدر الإمكان ما عايزين نكون قمعيين ، عايزين نمتص غضب الشارع بأقل خساير ممكنة ، ما عايزين مواجهات و رصاص
عشان ما تُستغل ضدنا في أجهزة الإعلام الخارجية ، و أنا وجهت جميع قادة الشرطة و الأمن إنو يتعاملوا مع المتظاهرين بصبر و حكمة و ما يستعملوا القوة مع المتظاهرين إلا في حالة الضرورة القصوى .
و بعد إن انتهى الرئيس من كلمته بدأ نقاش ساخن في القاعة بين المجتمعين و الرئيس تارة ، و بين قادة الحزب مع بعضهم البعض تارة أخرى ، و في هذه الأثناء تقدم عضو بارز من أعضاء المؤتمر الوطني نحو منصة الرئيس و ناول الرئيس ورقة صغيرة قرأها الرئيس و رفع حاجبيه دهشة لما ورد فيها ثم أمر برفع الجلسة و ببقاء العضو الذي ناوله الورقة ، و بعد أن انفض المجلس انفرد الرئيس بذلك القيادي و قال له : كدي اشرح لي الكلام دا بالتفصيل ،
ابتسم القيادي و قال : سعادتك أنا بعرف شيخ x من سنين طويلة ، و ما حصل مشيت ليهو في موضوع و ما حلاهو لي ، و قبل يومين مشيت زرتو في بيتم و اتونسنا كتير ، و جبنا سيرة رفع الدعم و الغضب الشعبي المتوقع ، الشيخ قال لي دي مسألة مقدور عليها و أنا أقدر أضمن ليكم إنو مافي زول يفرفر إذا طبقتوا كلامي ،،،، قلت ليهو أنا أضمن ليك تطبيقو ، بس ورينا نعمل شنو ؟
الشيخ قال : تجيني بكرة ، بديك جركانة كبيرة فيها موية ، تشيل الموية دي ، و في كل صهريج من صهاريج ولاية الخرطوم تكب شوية موية (قدر كباية شاي) ، و أي زول يشرب من موية الصهاريج دي تاني ما منو خوف و ما بقدر يفتح خشمو !
قال الرئيس : زولك دا كلامو نجيض ؟!
-- مليون في المية يا ريس !
الرئيس : الليلة دي تمشي للزول دا و تجيب منو الجركانة و تشرف بي نفسك علي تطبيق تعليماتو ،،، و قول ليهو الرئيس بيبلغك تحياتو و قال ليك عايزين لينا تاني عدد محترم من الجركانات عشان نرسلها لي جنوب كردفان و النيل الأزرق و دارفور !!
|
