وتفرق دينه على القبائل

[imported_Dr. Mohammed Hassan]

هذه حكاية خيالية الا محمد حسن فده زول عديل بي شحمه ولحمه لكن الاحداث والشخوص فهن من بنات ابليس افكاري ، فما في زول يقول لي انت قاصد شنو

اخونا محمد حسن بعد اطلاقه لفكرة انو عايز يبقى بزبزمان قرر انزال هذه الفكرة مظليا الى ارض الواقع ( الواقع هو جمهورية القشران)في قارة اطلانتيكا المغمورة
وجا يستشير صاحبه ( ابوشنب ) قال ليه

( يا اخ بصراحة الغربة دي ما لقينا منها حاجة ، اي نعم الرياض بلد نضيفة وشوارعها جميلة والخدمات متوفرة والحمدله على اعلى مستوى ، لكن بصراحة انا عايز ارجع (للواقع)
رد عليه الحكيم ابوشنب :
( ما فهمتك ، بعني عايز تعمل شنو؟)

(عايز امشي القشران)

نظر اليه ابوشنب نظرة امتزجت فيها الحيرة والدهشة والرثاء

فقال ليه

( اسمع انت شوية القريشات العندك دي امشي بيها دبي وافتح ليك مكتب هناك وان شاء الله تتوفق ، لانك ما شاء الله عندك النو هاو والخبرة الكبيرة ، وانسى القشران)
محمد حسن عاين لابوشنب عين قوييية
( دبي ؟!اقول ليك القشران، بلدي الحبوب ، انت ما قاعد تشوف الفضائية بتقول شنو ، يا اخ ده بقى اخطر من الخليج
الاستثمار فيه مضمون
وبعدين لا كفيل
لا ك اسد
بلدي وتحتضني وانا ماشي ماشي
وانت خليك في معارضتك للحكومة دي )
( يا محمد حسن انا ما معارض الحكومة انا معارض الغلط الزايد كل يوم
وانت على كيفك)
محمد حسن شال الدولارات والريالات ورجع ( للواقع )
فتح مكتب على الطراز الخليجي، وكعادت يمشي المكتب من الصباح مطقم وانيق ومنضبط ويحلم.
دخل اول عطاء من عطاءات الحكومة الشبعانة ولعب احد معارفه من الحزب الحاكم في تزكية شركته وانه مستثمر قادم لخدمة البلد فتمت ترسية العطاءعلى محمد حسن وبكل همة ونشاط وفرح عمل على توريد بنود المنافسة وباعلى جودة للدولة وذهب لاستلام حقه من المصلحة المعنية
( السلام عليكم ورحمة الله، معاك محمد حسن صاحب شركة ( ارفع الواقع الوطنية)

نظر اليه الموظف من فوق لي تحت :
(طيب وانا اعمل ليك شنو صاحب الشركة والا وزير التجارة زاتو )
رد عليه محمد حسن بكل تهذيب
( اقصد اقول انا قمت بتسليم المواد المطلوبة مني في المنافسة رقم 1/20/3115/07 وقبل الموعد وباعلى المواصفات وحسب الاتفاق عايز استلم الشيك بتاعي )
( طيب ما تقول كدة ، في داعي لمقدمة الاخبار الطويلة دي، امشي لي محاسن في المكتب التاني)
وذهب محمد الى المكتب التاني ووجد عدد من الموظفات فسالهم
( عايز الاخت محاسن لو سمحتم)

ردت عليه احداهن ( والله الليلة محاسن ماجات، عندهم سماية بت خالتهم وما خدة اذن)

في اليوم التالي جا محمد حسن للمصلحة

دخل المكتب المعني بحثا عن محاسن
وجد الموظفات يستمعن باهتمام لاحدي زميلاتهن وهي تحكي

( والله امس السماية ... كانت حكاية ، الفليبينيات لافين بالعصير والحلاة للضيوف تقول شغالين بي طاقة الليثيوم .. وتعالي شوفي الطباخين والشفرجية والبوفيه المفتوح غدا وعشا.... شي شي ما بتوصف
والا النفسا .. اريتك فنستك الليلة يا شادية ( شادية ترد بسرعة : انشااااااااااااااااالله يا محاسن ) وتواصل محاسن الدهب المعنكشة بيه بت خالتي حاميها القومة
والا القميص الراقدة بيه وووووووووووووب علي قالوا طلبوه ليها مخصوص من لندن جابتو ليها مرة اخوه لما مشت اجازة اسبوع.. والا الخبايز والفطاير الجايبنها من سوريا اها بعد العشا
جات الغناية اسمها اسمهان العمدة لانه بيقولوا كانت ساكنة في حي العمدة، طبعا هي جديدة لكن ماخطيرة
والله هججت ليك السماية منو الما نزل ولا رقص
حتيييييييييييييييييييينا حت
تسال وادة من الزميلات ( هو راجل بت خالتك ده رجل اعمال؟)
رجل اعمال شنو ، وحات الله موظف عادي اظنو في السابعة كان ما اخاف الكضب، لكن مخه نضيف وململح
بيشتغل بي التسهيلات والله محبوب جدا في شغله لانه البسهلوا عليه هو كمان بسهل على الناس الفي المكتب المعاه ، وصحي يا ختي الشغل من غير تسهيلات ما بجي ( وهي تنظر الى محمد حسن نظرة ذات معنى قريب جدا) ترد اخرى
آي والله يا محاسن هي الماهية دي قاعدة تفوت البوفيه بتاعنا ده
تنحنح محمد حسن واتجه الى محاسن
الاخت محاسن على ما اعتقد؟
ونواصل بعد الفاصل الاعلاني
ابقوا معنا

[imported_أحمد يوسف حمد النيل]

سلامات يا دكتور يا شاعر يا لذيذ

انت عارف يا دكتور محاسن دي يا تعرسها زي ما عرس جمال حسن سعيد موظفة الضرائب , يا تعزمها في فندق السلام روتانا في الخرطوم , أو الحل الثالث تعصر ليها (الخموس) تحت المخدة.

خارج النص:
من ديك و عيك . ما تسمعنا شعر زي شعر منتدى الصالحية في الرياض في انتظارك

أخوك أحمد يوسف (ابوسارة)

[imported_Dr. Mohammed Hassan]

الاخ الكريم احمد يوسف حمد النيل

السلام روتانا

السلام يا روح البدن
السلام في المجلس الوطني
واصبح السلام فتق لقضاء شهر العسل مع محاسن
مودتي ايها الرقيق

[imported_Dr. Mohammed Hassan]

نظرت اليه باستغراب
ايوة نعم انا محاسن
في الحقيقة انا جيت امس و
قاطعته : هوانت؟! لانهم قالوا لي في زول قيافة جا سال منك امس ، نعم
طبعا لم تحمر وجنتا محمد خجلا نسبة للونه الكوبي الذي ما زالت به رقشة حليب المراعي كامل الدسم، ولكنه نظر الى الارض خجلا
وزاص حديثه

في الحقيقة انا محمد حسن صاحب شركة ارفع الواقع الوطنية وكان وردنا ليكم مواد خاصة بالمناقصة الاخيرة وجاي عشان استلم الشيك

ردت محاسن بصوت اكثر نعومة : اهلا يا محمد ، والله طبعا لاني امسا ماكنت في وهسة يا دوب دخلت وما شفت المكتب الفيه شنو والشغل حقيقة كتير ، فتعال بكرة وبدري ، عليك الله قبل الساعة 9 لانو الساعة 9 الفطور ونحن ما قاعدين نفطر نا لانو الفطور تغيس بنفطر في البوفيه بتاع الضرايب، كويس؟
رد محمد حسن ان شاء الله
وانتظر محمد حسن طلوع الشمس بي طلوع الروح ، فقد استيقظ وصلى الصبح حاضر ولبس ملابسه استعدادا للخروج ، سالته زوجته : انت لابس من بدري كدة ماشي وين
اجاب دون ان يفكر : ماشي احصل محاسن قبل الفطور ، وانتفضت زوجته من السرير كمن لدغته كهربا جات بعد انقطاع
محاسن دي منو يا محمد؟!!
وهنا عاد الى محمد عقله وحاول ان يظهر بمظهر الانسان العاقل
والله محاسن دي الموظفة في المصلحة الوردنا ليهم المواد وهي المسؤولة عن الشيكات وقالت لي تعال قبل الفطور.
والشيكات تكون مسؤولة منها محاسن ليه ؟
ما يكون مسؤول منها راجل
وفشلت كل المحاولات الصباحية لاقناع ام صبا بان المسالة مصالح وموظفين وانتهت بان ركب سيارته واتجه الى محاسن
تمام الساعة السابعة والنصف
وجد الفراش ينظف في المكتب وساله
اسمع يا خونا انت عايز منو؟
انا عايز محاسن
ناس محاسن ديل ما بجو هسة \بجيبهم الترحيل الساعة 8 لانو كبري امدرمان مقفول بيعملوا فيه صيانة للصيانة
طيب انتظرها
واخيرا جات محاسن
وقف على حيله وصبح عليها
ردت ليه التحية بي ذوق شديد
اسمع يا محمد
الشيك بتاعك مفروض كنا نطلعه ليك لكن نايب المدير قال اخرو الشيك ده يومين لحد ما نديكم تعليمات
تعليمات زي شنو
ويومين دي يعني كم
لانو الليلة الاربعاء وبكرة الخميس ، يعني يوم السبت
سبت شنو ، دي لمن تجتمع لجنة الشيكات ويشوفوا الاولويات وكدة
فما تشيل هم
انا حاتابع ليك الموضوع بي نفسي
واقول ليهم انك قريبي ، ونظرت اليه نظرة لم يفهم مغزاها
ياخي شكرا ليك يا محاسن وعليك الله حليهم يستعجلوا لي الموضوع ده
اجيك متين؟
تعال لي يوم الخميس الجاي
وانشاء الله يكون خير
ورجع محمد حسن الى مكتيه وهو يردد الكلمة الاخيرة للسيد نائب المدير ( لحين تعليمات اخرى)
وبدات الهواجس تتسلل الى قلبه
تقريبا كل السيولة نفذ يبها العطاء
الباقي يا دوبك حق رواتب شهرين للموظفين المعاه وحق الكهربا والموية ومصاريف بيته
انتهى الدوام \رجع الى المنزل
ودون ان يشعر
قال لزوجته
بالله اليومين ديل قللوا الصرف شوية لحد ما نلقى طريقة
شنو؟
نقلل الصرف؟
انت اظنك بتوفر عايز تعرسها
اعرس منو؟
تعرس محاسن
دخل غرفته، وطلب منها الا توقظه للغدا، اغلق باب غرفته ونااااااااااااااااااااام
استيقظ قبل المغرب وقرر الرجوع للمكتب
احسن من قعاد البيت مع التوتر الحاص
اخرج الفايلات
بدأ يراجع الرصيد والمنصرفات
الخطط المستقبلية
رفع راسه كانت الساعة تجاوزت التاسعة مساء
رجع المنزل ، وفشلت كل المحاولات لاقناع ام صبا بنه ليس هنالك من شئ الى ان اصطر للمصحف
وهنا هدأت قليلا
مر الاسبوع على محمد حسن كانه دهر ، يوم الخميس اتشيك من بدري ، نظرت ايه زوجته نظرو ارتياب،
ماشي وين من بدري كدة
ماشي عندي اجتماع ضروري
وخرج قبل ان تلحقه بسؤال اخر
وصل المصلحة الساعة السابعة والنصف
وانتظر حتى وصول الترحيل
دخلت محاسن وزملاءها
حينما وقعت عينها عليه
ازيك يا محمد
والله وحشتنا
رد محمد التحية وجلس في الكرسي المخصص للضيوف
يخسي عليك تليفون واحد ما تعمله
بس تجي لمصلحتك
لا والله بس تلفون المصلحة ما عندي وانت ما اديتيني رقمك
بالله يا محمد انا ما اديتك رقمي
المهم
ياسيد موضوعك ده والله تعبني تعب شديد خلاص
والمدير رفض نهااااااااائي لحد ما بكيت ليه
لما شاف دموعي قال لي هو الزول ده قريبك قلت ليه اي ده ودخالتي
قال لي خلاص اكتبي الشيك وجيبيه لي
وانا كتبت الشيك وهو هسة عند المدير وقال لما تجي تمشي ليه
شكرها محمد بحرارة ودعا لها بكل الدهوات الصالحاتوسالها المدير في ؟
لا ما بجي هسة بجي بعد الساعة 11
خلاص امشي وارجع ليه
وخرج محمد حسن وهو يلهج بالشكر لمحاسن
رجع الساعة الحادية عشر
وسلم على محاسن سلام كله مودة وساقته ودخلت بيه للمدير
سلمو عليه
اتفضلوا
انت يا محاسن خلاص امشي شوفي شغلك
نظر اليه المدير وابتسامة عريض تكسو وجهه
الظاهر بت خالتك دي بتعزك شديد
ونحن جانا منشور سري للغاية من وزارة المالية انو ما نصدر اي شيكات، لان ما تمت تغذية الحساب بتاع الفصل التاني
ورغم كدة وعشان خاطر محاسنانا تصلت بوكيل وزارة المالية ووفق نعمل ليك شيك على بنك السودان ، وبي كدة نكون نحن عملنا العلينا وانت اتصرف مع ناس بنك السودان ، وناوله الشيك
شكره محمد حسن بحرارة شديدة جدا جدا وهو خارج المدير قال ليه
بالله محاسن دي اتوصى بيها ما قصرت معاك
رد عليه محمد حسن
جدا يا سعادت انا بتوصى بي كل الناس التعبوا معاي واتبادلوا الابتسامات العريضة
خرج محمد حسن من محاسن بعد ان اخد رقم الجوال ووعده مؤكدا الاتصال بها
ذهب الى سوق الصاغة
اشترى سلسل جميل بالشي الفلاني
وغلفه تغليف جميل
اتصل على محاسن
ازيك يا محاسن
محمد حسن معاك
اهلييييييييييين محمد
انا عايزك بكرة ضروري
بس برة المكتب
خلاص تعال لي مواعيد الفطور يعني زي تسعة واديني تلفون وانا بنزل ليك
ذهب الى المكتب
وضع الشيك والهدية في الخزنة
رجع المنزل بمعنويات عالية
شكلك مبسوط الحاصل شنو
قولي لي مبروك استلمت الشيك
خلينا نتغدى بدرى وناخد لينا نومة عشان نمشي نتعشى برة (والعيال يوسعون صدورهم ) ودي قالها بلهجة نجد
تاني يوم قابل محاسن
مشوا فطروا في مطعم راقي وقدم ليها الهدية واخر كلام رقيق ونزلها في المكتب مع وعد انه برضو حيتوصى بي سعادتو بعد ما يقبض الشيك

وبدأت رحلة محمد حسن مع بنك السودان

السبت الساعة 9 صباح محمد حسن اخر هندمة وارياح تفحفح داخل بنك السودان

اول موظف في الكاونتر سلم عليه وساله

ياخي انا عندي شيك من مصلحة حكومية
وقبل ان يكمل كلامه
اجابه الموظف اطلع الطابق ال
اسال من مكتب سيد الفحل

طلع محمد حسن

دخل مكتب الفحل
لابس بدلة سفاري
وبعد السلام
اخبره محمد حسن بالشيك
قال ليه

والله نسبة لظروف خاصة بالميزانية المالية موقفة تغذية حسابات المصالح الحكومية لكن شيكك ده حالة استثنائية
بس بعد اسبوع عشرة يوم ان شاء الله

احبط محمد حسن
لكن قال مادام حنصرف بعد اسبوع او عشرة يوم برضو كويس وهانت
رجع الى مكتبه وهو متبلد الشعور
لايدري هل هو مبسوط والا محبط
فجأة رن جرس الهاتف
الرقم ما عريب عليه لكن ما مستحضره
الو
ياتيه من الطرف التاني صوت انثوي

ازيك يا محمد
معاك محاسن
اضطرب قليلا ورد اهلين محاسن
ازي
ان شاء الله كويسة
انا كويسة
وضربت ليك لانو عندي ليك اخبار جميلة
خيير
عندنا عطاء جديد ولسة ما اعلنو عنو ، والسيد المدير وصاني وقال لي اكلمك لانو شغلك تمام والمواد بتاعتك جودتها عالية فقال حيرسي عليك العطاء بغض النظر عن السعر
رد محمد حسن والله شكرا ليك كتير لكن
قاطعته محاسن
ولا لكن ولا حاجة انا اشتريت ليك كراسة المواصفات ، هي قيمتها 500.000 الف ولانو ادوني ليها بشكل خاااااااص فدفعت فيها مليون
بس يا محاسن
ما بس يا محمد ، انا عايزة مصلحتك
طيب شكرا ليك كتير ، بكرة اجيك في المكتب واديك قروشك
مكتب شنو؟ما تجيني في المكتب تعال برة واتصل علي في الموبايل
حاضر
يلا باي
اغلق الجوال
وبعدين
رن الجوال مرة اخرى
رقم غريب
الو
الطرف التاني : ازيك يا بوحميد ، ياخي تعبتني جدا لحد ما لقيت رقمك ازيك واحوالك
والله انا كويس جدا بس ماعرفتك
معاك الهادي ف محمد علي
( الهادي صديق طفولته وصباه ومستقبل ايامه)
لم تسعه الفرحة : ازيك يا هادي
يا خ انت اجمل صوت سمعته في اليومين ديل .واصر عليه ان ياتيه في المكتب وفورا
بعد ساعة زمن دخل الهادي المكتب وسلام واحضان الخ
الهادي يبدو مكتنزا مع لحية خفيفة مهذبة
من خلال الاحاديث اتضح ان الهادي شخصية نافذة وقيادة حزبية في الحزب الحاكم

فاصل اعلاني ونعود
ابقو معنا

[imported_Dr. Mohammed Hassan]

وحكى محمد حسن تجربة غربته وكيف انتهى به المطاف وقصة الشيك
فقال له الهادي
حكاية الشيك دي ما تشيل ليها هم نهائي، اما بالنسبة للعطاء الاخير ده فقدم فيه ما دام مضمون .
بس ما حاقدر افتح اعتمادات للتوريد من برة لانه رصيدي ما بيفطي
ما مشكلة اشتري من السوق المحلي ،
ما عندي سيولة كافية عشان اشتري من المحلي
سيولة شنو يا اخ ، اشتري بي شيكات مؤجلة ، وانت راجل مضمون وسمعتك كويسة ومعروف انو عندك مستحقات على بنك السودانفما تتردد
والله ياالهادي يا خي انا حكاية الشيكات دي بخاف منها
لاتخاف ولا حاجة ، اشتري وبمجرد ما تستلم مستحقاتك ادفع للناس حقها وبكدة حالك ما يقيف
واقتنع محمد حسن براي صاحبه وانحرف الحديث للسؤال عن الاحوال والعيال وطلب محمد حسن من صديقه ان يتغدى معاها واعتذر الهادي على اساس انو الايام بيناتهم
في اليوم الثاني صباح الساعة التاسعة ذهب محمج حسن الى محاسن واتصل بها . جاءت اليه وقد لاحظ محمد ان زينتها زادت حبتين وتظهر في اناقة مستحبة
ازيك يا محمد ، يعني لو ما عندك مصلحة معاي ما بتسال ولا حاجة
العفو يا محاسن ، بس والله المشغوليات لكن دايما في بالي
بالجد؟وقد قالت العبارة الاخيرة بنبرة فيها قدر من الحنية لم يالفه محمد
رد عليها بالجد
اعطته الكراسة وهم في طريقهم الى المطعم ، وفي المطعم في انتظار احضار الافطار اخرج محمد من حقيبته مبلغ مليون وما ئة الف جنيه واعطاهم الى محاسن
بعد ان قامت بعد الاوراق المالية ارجعت له المائة الف
دي 100 الف زايدة
لا ما زايدة دي ليك انت
لا ياى محمد انا ما عايزة منك حاجة انا يكفيني اني اخدمك
اصر عليها محمد ان تاخذ القروش، قبلت على مضض
انا تاني ما حاعمل ليك حاجة لو بتتعامل معاي كدة يا محمد
معليش شليها وتاني ما بعمل كدة
بعد الافطار ارجعها الى المكتب وذهب الى مكتبه وبدأ يتصفح كراسة المواصفات
تمر الايام وقد كسب محمد حسن العطاء وتوزعت شيكاته ما بين اسواق ام درمان والعربي
ويمر اكثر من شهر على شيك بنك السودان
بدأ معين محمد حسن ينضب
يتصل محمد بصديقه الهادي ف ويجتمعا في مكتب الهادي ، يبدأ محمد بالشرح ، يقاطعه الهادي
اسمع يا محمد ان زول صاحبك وعايز مصلحتك
طيب ؟
انت ما شاء الله عليك زول فاهم وما ناقصك شي فليه ما تدخل معانا الحزب؟
يا هادي انت عارف انا ما لي في السياسة ،
انت مليك في السياسة وده اهم شي
كيف يعني ؟
يعني تنضم للحزب ، انا ومعاي واحد تاني حنزكيك ، بعد شوية ندخلك لجنة الحي بتاعكم ، نائب رئيس ، لاتهش ولا تنش ، بعد فترة نصعدك للولاية ، وشويتين ندخلك الامانة عضو وبكدة بتكون في مركز القرار
وده كله ليه ؟
اولا عشان تصرف شيك ده والشيكات الجاية كلها ، وعشان انت بقيت في السوق امورك ما تجوط ، وما عليك الا تحضر الاحتفالات واللقاءات الجماهيرية وتتقيف بالجلاليب وتقلل من الكرفتات والبدليقولوا تهليل تهلل ويقولوا تكبير تكبر
والله يا الهادي القصة دي ما راكبة لي لكن افكر فيها ، هسة انا في الزنقة الحاصلة علي دي احلها كيف وشيكاتي الطايرة زي حمام الوادي دي اككها كيف
يضحك الهادي ويقول ليه بسيطة ، اولا تدخل الحزب الليلة قبل بكرة
لكن
ما في لاكن
اها
انت مش عندك قطعتين ارض اشتريتهم لما كنت في السعودية؟
ايوة
قيمتهم كم ؟

واحدة قيمتها 50 مليون والتانية حوالي 35 مليون
جميل
هو الشنو الجميا اوع تقول لي بيعهم

يا زول استهدى بالله ، بيع شنو
طيب؟
اليوم الاربعاء لحد يوم الجمعة نكون انتهينا من اجراءات انضمامك للحزب ويوم السبت من الصباح نمشي للبنك ال..... نقابل مولانا شيخ ... نسلم عليه ونحاول نلع قرض بي 500 مليون
كم؟ 500 مليون؟
ايوة ونرهن ليه القطعة بتاعة ال35 مليون
طيب والباقي اسدده من وين
وتسدده ليه، في زول قال ليك سدد ؟مش انت حترهن ليه الارض؟
ايوة
خلاص

لحظات مع الاعلان ونعود اليكم في الحلقة الاخيرة

[imported_Dr. Mohammed Hassan]

التقيا يوم السبت ، وحيا الهادي صديقه با بتسامة عريضة ( اهلين بنايب الريس - شوف نحن بعد بكرة انشاء الله حنمشي البنك بخصوص القرض)
والله يالهادي انا عمري ما اتدينت وبكره الدين
ده ما اسمه دين ، ده اسمه تعاملات مالية وتسهيلات مع مؤسسات التمويل
طيب على قولك معاملات ماليه
ايوة
حنمشي ليه - وبالله احلق شنبك ده
شنبي مالو
كبير وشين زي بتاع الشيوعين - حف الشارب يا شيخ
كويس حنحف الشارب
ايوة كدة خليك ( مرن)، شوف لما نمشي للزول ده حيقدم ليك تمر وحينادي ااتي بوي يقول تشرب شنو ، قول ليه موية حيصر عليك ، تقول لي انا بكتفي بالاسودين التمر والماء و( جاخ)
جاخ؟!! دي يعنو شنو
جاخ دي هي الكود بتاع الاسلاميين يعني جزاك الله خير ( خارج النص هذا المصطلح ذكره لي كوز صديق في لحظة تجلي)، اها لما تقول لاليه جاخ حيبتسم وحيقول لي طلباتكم ، انا حاقدمك ليه باعتبارك ( زولنا) ونايب رئيس ومرشح لامانة الحزب وانك دخلتى كم مناقصة حكومية وتمت ترسية عليك وعايز ليك شوية سيولة، المهم بعد كدة تديه اوراقك بتاعة الضمانات حيصدقها ليك ويوجهك لادارة التمويل لتكملة الاجراءات وحياكد ليك انو معاملتك حتخلص اليوم وانت طالع تشكره وتقول ليه ( جزاك الله خير) كاملة حيرد ليك ( واياك وما تنسونا من صالح الدعا) تقول ليه ( سبحان الذي لاينسانا ولا ينساكم والسلام عليكم ورحمة الله
محمد باهتمام شديدواشمعني المرة الاولي اقول جاخ والمرة الاخيرة افصلها
ايوة المرة الاولي دي بتاعت تعارف ، والاخيرة دي بتاعة بزنس ، عشان كدة بيقول ليك ما تنسونا من صالح الدعا والدعا يعني حاجة كدة زي 5% لانه المبلغ صغير
رشوة؟
رشوة شنو انت مجنون ، مولانا يشيل رشوة ، دي هدية وما حتديها ليه ، حتشتري ليك طقم دهب جميل تديه لام الاولاد او عربية لواحد من العيال فهمت؟
اها
هسة انا بمشي واتذكر كلامي كويس وبعد بكرة نتلاقى جنب البنك الساعة 9 بالضبط ، مع السلامة
وفي اليوم المحدد وفي تمام الساعة التاسعة دخل محمد وصديقه الى مولانا وجرت احداث السياريو كما ذكرها له الهادي بتفاصيلها، خرج محمد حسن من البنك ورصيده شحمان ولكنه فقد قطعة الارض التي اشتراها بسنوات الغربة وعرق ضغط الكفيل ، امتلاء رصيده في خلال سويعات ، وتذكر سنوات الاغتراب وكيف كان يكد لتوفير مبلغ نهااااااااااااااية الشهر
ركب السيارة وابتسامة عريضة
سدد الشيكات الطايرة
ذهب للمصلحة الحكومية وجد ان محاسن قد جهزت الشيك
وتم تبادل الهدايا خاصة ومحاسن وسعلدة المدير ,الجميع مبسوط
وتم رهن القطعة الاخرى لبنك اخر ببنفس السيناريو بمبلغ مليار
واشترى محمد حسن عدد من القطع
تم رهنها لعدد من البنوك
وتفرقت شيكات محمد حسن في اسواق الخرطوم وامدرمان وبحري والابيض وبورتسودان وحتى سوق ليبيا
وتفرق اقتراض محمد حسن على كل بنوك الدولة
وآخر نصايح الهادي لصديقه
اها بي كدة انت في السيف سايد كل البنوك مقرضاك ، تقوم تشتغل شوية طواقي
كيف يعني ؟
يعني من قرض البنك ده تدي البنك داك شوية ومن اخر تدي واحد تاني شوية
اها
ايوة عشان توري انك ملتزم
لكن
لا م لكن لما تدفع دفعتين الباقي نعفيه بالاعسار ، بس ما دام هسة الناس كلهم خدموك لازم تعمل مناسبة كبيرة وفاهمة تعزم فيها قيادات الحزب والوزراء ومدراء البنوك
مناسبة؟ لكن ما عندي مناسبة
يا اخي عدد؟
شنو ؟ اعدد يعني كيف ؟
يعني عرس تاني
لالالالا
شنو لالا لا
الاسلام اباح التعدد وبعدين الطيب والنساء كما اوصى المصطفى صلى الله عليه وسلم
وام صبا؟
سجل اشتري ليها عمارة وسجلها ليها
والعروس ؟
دي دايرة درس عصر
كيف يعني
كيف شنو ما محاسن
محاسن؟!


نشكر لكم متابعتكم والى لقاء في مسلسل اخر