شوف عمايل الريدة فينا

[imported_عمر عبدالكريم]

في الزياره الأخيره التي قام بيها أوباما لكينيا مر بالسودان برفقة زوجته الجميله والانيقه ميشيل ، وفي شارع الغابه إتقطع سير المكنه بتاع العربيه حقتو ، العبد لله كان ماري بهناك وسايق الكريسيدا حقة الوالد ، بشهامة السودانيين لمن شفت عربية واقفه وقفت وفحصت العربيه وعرفت انها محتاجه سير مكنه ، جري مشيت المنطقه جبت السير وحليت المشكله ، وبعد الإنتهاء من صيانة عربة اوباما شكرني الرجل شكر شديد والحقيقه انا ماكنت منتبه للكلام الكان بقولو لأنو كنت (أختلس) النظرات لميشيل الجميله ولقيت نفسي بدون ماأشعر (بسبل ليها بعيوني) ، وميشيل بدورها فتنت بأناقتي البالغه وعطري الأخاذ المصنع خصيصاً لشخصي الضعيف بواسطة خبير ماهر من عطور البخيت .
إحم إحم
صدرت هذه النحنحات من أوباما قاطعاً سلك كهرباء الحب الذي كان موصولاً بين قلبينا ، تنحنحت أيضاً بدوري بعد أن أحسست بالحرج وبالخجل فليس من عادتي إطلاقاً النظر لأملاك غيري إلا أن ميشيل كانت فاتنة بحق ذاك اليوم خصوصاً بعد أن تدلت خصلة مبللة بالعرق على جبينها وغطت جزءاً من عينها اليسرى .
قبل ذهابهم طلبت من أوباما إنو (يكلم لي ناس اللوتري ويشوف مشكلتهم معاي شنو لأنو من 2003 وانا بقدم ومادايرين يشيلوني) .
في سرة قال الرجل (دايرني اجيبك امريكا عشان تقصني في ميشيل يامفتح) ، وأول ماوصل أمريكا كلم ناس الهجره المسؤولين من اللوتري إنو العبد لله يتحظر من أمريكا نهائي .
وبهذا قضى الرجل على حلم السفر لأمريكا و أيضاً حرم قلوب قصتهم قصيده .
الموضوع ده طبعاً مكتمين عليهو تكتيم شديد وحتى الآن لايعلم أحد سر التكشيره وصرة الوش الذي لاتفارق ميشيل إطلاقاً ، لذا للحقيقه والتاريخ كان لزاماً أن أذكر هذه القصه .
on the first page of our story
the future seemed so bright
دي النغمة بتاعة الموبايل المخصصها لي ميشيل
كل يوم تضرب لي تقوللي : يا أومر انا دايره أتطلق واجيكه في السودان اأرسك واإيش معاك في أمضرمان ، مافي حاجه مكجنها في المره دي غير إنها بتبشتن اسمي ومابتنطق امدرمان صاح ، في سري قلت (نحنا يحلنا الحله بله) ورديت قلت ليها : ياوليه انا مابعرس الا سودانيه حلي من سماي ياخي ورسلت ليها في (الواتس اب) غنية وردي بتاعة (بنحب من بلدنا مابره البلد) ، بعد قنعت من خيراً فيني وكجنتني حرشت اوباما علي السودان كلو ومن ديك ماشفنا خير ، شي حظر إقتصادي وشي عقوبات في مجلس الأمن وعييييييييك .
اعفو لي ياناس السودان
قلبي العنيد سواها فيني وفيكم

[معتصم الطاهر]

يعنى يا عمر

لا فيزا

لا ميشيل

الجايات امكن اوباما يتغير ..

[imported_مرافي]

ماااااك هوين يا ولد
كاتل اوباما وخامي ميشيل...
الا عجبني لي اوباما ...
هو لو فيهو عمار مرتو ما كان طلبت منو الطلاق
لقتو راجل بصباص وبتاع حريم

[imported_عمر عبدالكريم]

والله يامعتصم اللوتري ده قنعنا تب من خيراً فيهو
الناس ديل أبونا بي الله واحد
حسي أوباما ده عرفنا سببو
من زمن كلينتون وانا بجابد ومافي نتيجه

[imported_عمر عبدالكريم]

ميشيل طبعاً طااااقش أضانه عمايل أوباما عشان كده مكجناهو يامرافيء
طبعاً أنا لمن شفتو في شارع الغابه اليوم داك نهائي ماإتوقعتو يكون رئيس امريكا
أصلو القصه دي مالايقه عليو

[imported_جانيت]

غايتو شهامتكم العاملاها فيكم هسي ان قلت ليه يا سير المكنة ياميشيل ماكان اخير
ول بالعدم يا سير المكنة يا اللوتري هسي راح عليك مشوار في عز السخانة وسير مكنة وميشيل يااومر

[ناصر يوسف]

المشاركة الأصلية كتبت بواسطة عمر عبدالكريم

والله يامعتصم اللوتري ده قنعنا تب من خيراً فيهو
الناس ديل أبونا بي الله واحد
حسي أوباما ده عرفنا سببو
من زمن كلينتون وانا بجابد ومافي نتيجه

والله لكن مفاجأة غير ساره يا عمر
قلت لي مرقت بي قد القفة النسه دي برضو
عموماً أنا قدم لي ود مصطفي ولي يوم الليلة ما أفادني
قبلوني ولا لععععععععع


تحت تحت كده:

لكن أوباما ما بااااااالغ ياخ

[imported_عمر عبدالكريم]

النصيحه فرطت ياجانيت

غايتو

لااعتراض على حكم الله