شكر خاص لطاقم مستشفى الزيتونه

[حافظ حسين]

المشاركة الأصلية كتبت بواسطة طيبان

لكن أي تلميح لتقصير قام به الإخوة الأطباء تجاه خالد .. ح أجي أرازي صاحب التلميح ..حتي يثبته ونمشي لخطوة تانية .. أو يبلع كلامـو ..

__

وشكراً ..

العزيز طيبان سلام تاني .... طيب تلميح في أطباء تانين ما عندهم علاقة بالزيتونة و لا مرض خالد ممكن نلمح عادي و تدينا الأمان؟
لأنو أنا اصلي مفكر افتح بوست كبير عريض عن health information system in Sudan و من هسي تكون عارف انا في النظم الصحية الكادر البشري حيكون حاضر جداً لانه المكون الأول للنظام .... يعني الأطباء ما حأخليهم ما حأخليهم

[ناصر يوسف]

المشاركة الأصلية كتبت بواسطة طيبان

ياعم فتحي..
انا كتبت راي سمّيتو غير رسمي .. فبالله اتعامل معهو بوصفو الأنا ختّيتو ليهو ..وماتقراهو قراية تانية ..كتبتو لغرض محدّد .. لا يتجاوزه ..

ياناصر :
الرد علي سؤالك مضمّن في مداخلتي الأولي بالبوست بتاعك .. وكنت قد دعوت كما دعا آخرون للتركيز علي ما ينفع خالد .. والتزمت بذلك .
ثم تواصل إنتقاد آخرين ليست لهم عضوية بمنتدي سودانيات بناءاً علي معلومات نقلاً عن طبيب عضو بسودانيات ..لم يتم تأكيدها أو نفيها من جانبه حتّي هذه اللحظة ..

يا ناصر يا أخوي ..
لسنا ناكرو جميل ..وأنا شخصيّا لن أسكت عن توجيه تهم لمن وقفوا إلي جانب خالد في محنته .. وهذه (فنجرة ) مني ساكت ..لا علاقة لي بمستشفي الزيتونة تقع وللا تقوم ..كما لا أعشم في شهادة تقديرية منها ..

إذا إنتو شايفين إنّو الموضوع دا يتقفل علي كدة .. أوكي ..
لكن أي تلميح لتقصير قام به الإخوة الأطباء تجاه خالد .. ح أجي أرازي صاحب التلميح ..حتي يثبته ونمشي لخطوة تانية .. أو يبلع كلامـو ..

__

وشكراً ..

طيبان يا زول يا طيب

أريتها مني بخير يا رب


http://albrkal.com/vb/showthread.php?t=12296

وإلي هنا نصلُ إلي نهاية المطاف لطي هذا الملف

هذا إن قبلنا جميعنا

إننننننننننن قبلنا

[ناصر يوسف]

المشاركة الأصلية كتبت بواسطة حافظ حسين

العزيز طيبان سلام تاني .... طيب تلميح في أطباء تانين ما عندهم علاقة بالزيتونة و لا مرض خالد ممكن نلمح عادي و تدينا الأمان؟
لأنو أنا اصلي مفكر افتح بوست كبير عريض عن health information system in Sudan و من هسي تكون عارف انا في النظم الصحية الكادر البشري حيكون حاضر جداً لانه المكون الأول للنظام .... يعني الأطباء ما حأخليهم ما حأخليهم

حافظ حسين يا صديقي النبيل أيها الإنسان الإنسان

وأنت تعلم كم من الغبن في حلقي من الطب البشري في السودان ...

وكنت ولولاك وبغضبي ذلك وأنا مُغيبٌ عن بعض المعلومات ..

كنت سأحطم الأمر تماااااماً

ربنا يتمم الشفاء علي أخونا خالد الحاج

وسيكون لهذا البوست بعداً آخر وهاماً للغاية

فقط سيأتي في حينه دونما أيُ إنفعالات

بل بالنقد الموضوعي

[طيبان]

المشاركة الأصلية كتبت بواسطة حافظ حسين

العزيز طيبان سلام تاني .... طيب تلميح في أطباء تانين ما عندهم علاقة بالزيتونة و لا مرض خالد ممكن نلمح عادي و تدينا الأمان؟
لأنو أنا اصلي مفكر افتح بوست كبير عريض عن health information system in Sudan و من هسي تكون عارف انا في النظم الصحية الكادر البشري حيكون حاضر جداً لانه المكون الأول للنظام .... يعني الأطباء ما حأخليهم ما حأخليهم

ياحافظ بطّل شغل الخم بتاعك دا بالله ..
البوست الكبير وعريض دا كنت منتظر فقط (وحي مرض خالد الحاج) ينزل عليك عشان تكتبو؟؟

شنو حكاية كل ما يهبشوا واحد في كلام مافي محلّو يجي يشهر لينا سيف كتابة بوست عن النظام الصحّي في السودان ..؟؟

أنا البكتب باسم طيبان يا حافظ .. لا أعمل بوزارة الصحّة السودانية ولا علاقة لي بمستشفي خاص بالسودان ..والنظام الصحّي الإكتشفت فجأة إنو مختل دا قلنا فيهو راينا زمان ..وكاتلنا بما تيسّر لنا حينها لإصلاح ما يمكن إصلاحه ..ولامن قنعنا من خيراً فيهو قدّمنا استقالتنا كتابةً .. ومرقنا في أرض الله الواسعة ..

فيا سيدي أخد راحتك علي الآخر ..وكان درت ليك داتا من جوّة بنناولك ليها ..

وبما إنو كلامك دا بيعتبر دعوة لحضور البوست الكبير وعريض ..فمن أسّة يا حافظ تعال جاهز للنقاش وجيب أدواتك كلّها .. وعن نفسي ح أتعامل معاهو كبحث علمي ..وبجيهو شايل منقاشي ..
ويا اتعدل حال النظام الصحي بنهاية البوست .. يا كمان البوست لحق النظام الصحّي ..

__

وأهو منتظرين ..

[طيبان]

ناصر سلامات ..

ما تشتغل كتير بردّي علي حافظ ..دي حاجة كدة علي هامش مؤتمر الزيتونة ..

__

تحيّاتي ..

[رأفت ميلاد]

سلامات يا طيبان ومشتاقين

تعرف فى فترة مرض طويلة لـ (نسيبتى) رحمها الله .. تعرفنا على كمية من الممرضين والممرضات ودكاترة الأمتياز .. خاصة فى الحوادث .. وبقى لينا مهام للمساعدة .. خاصة بالليل .. أتوفت الحجة وما قصروا معانا فى العزاء .. ممرضة لطيفة وهى بتنصرف .. قالت لينا (ودعناك الله وما أظن نتلاقى تانى .. البسيب المستشفى تانى ما برجع ليها) .. وقد كان

فعلاً الحاجات دى بتظهر من وحى اللحظة .. ومن مرض ود الحاج شفاه الله .. نبتت هذه الأفكار .. جميل جداً يكون هناك نقد عام .. ولا يكون تراشق بخصوصية مع (الزيتونة) .. بشهادة الجميع لم يتعامل أحد مع خالد بإهمال .. بل يؤكد الكل بأنهم قدموا ما فى وسعهم حتى سلم الطائرة .. والذين يهمسون عن الأموال الطائلة .. فهى ليس لها علاقة بعمل الطاقم الطبى ..

الموضوع هذا مناقشته لا تتم بمنأى النظام العام من البلاد .. والتردى كما فى النظام الصحى .. متردى فى التعليمى والبيئى والأقتصادى الخ ..

والنظام الصحى كلمة واسعة جداً .. لا توفرها المستشفيات بل الدولة .. التدريب والتأهيل الذى يواكب الطب من حولنا .. إمكانيات المعامل والتحليل .. تأهيل قطاع التمريض .. تهيأة الجو الملائم للأطباء .. وأشياء أخرى تعرفها أكثر منى ..

للأسف المستشفيات لدينا تفوقت فقط فى البنيان .. حتى التمريض تم جلب خبرات خارجية .. لغياب التأهيل المحلى .. فأصبحت المستشفى مثل أى (مشفى - rehabilitation) بإمكانيات طبية .. وقدرة محدودة من الجراحة ..

طبعاً دى خواطر زول جرب هنا وهناك .. وليس معلومات دقيقة ..

الشكر لطاقم (الزيتونة) على كل جهودهم .. وأتمنى من أى أنسان أطلق كلام على عواهنه من منطلق عاطفى أن يسحبه ويعتذر عنه .. فنحن هنا ليس فى (ونسة) خاصة .. بل فى مكان قد يصيب أناس قاموا بواجبهم على أحسن وجه .. فلا يكون هذا جزاء سمنار

[حافظ حسين]

المشاركة الأصلية كتبت بواسطة طيبان

ياحافظ بطّل شغل الخم بتاعك دا بالله ..
البوست الكبير وعريض دا كنت منتظر فقط (وحي مرض خالد الحاج) ينزل عليك عشان تكتبو؟؟
شنو حكاية كل ما يهبشوا واحد في كلام مافي محلّو يجي يشهر لينا سيف كتابة بوست عن النظام الصحّي في السودان ..؟؟
..

العزيز طيبان سلام و محبة ... يا دكتور مالك منفعل كدا أعصابك يا خي... و بعدين وين شغل الخم الهنا .... ووين أنا كتبت كلام و عصرتني بيه عشان أجي أشوف لي مراقة باني حأكتب بوست كبير و يحل مشاكل الصحة في البلد ؟ يا خي نورنا الواحد إحتمال يكون إتعصر و ما جايب خبر....
و بعدين معاك أي بحث بكون في البداية إحساس بمشكلة .... بعدين الناس بتجي تحلل المشكلة هل هي مشكلة حقيقة و لا لا؟ و بعد تحليل المشكلة و التأكد من أنها حقيقة بجي البحث ... هسي في رأي أنا مرض خالد دا كان مشكلة عشان كدا أخذت الحيز دا كله من الجدل لكن أنا شخصياً ما نزل لي وحي معاها و كما تعلم أن نزول الوحي توقف قبل ما يزيد عن 1400سنة ....

[QUOTE= أنا البكتب باسم طيبان يا حافظ .. لا أعمل بوزارة الصحّة السودانية ولا علاقة لي بمستشفي خاص بالسودان ..والنظام الصحّي الإكتشفت فجأة إنو مختل دا قلنا فيهو راينا زمان ..وكاتلنا بما تيسّر لنا حينها لإصلاح ما يمكن إصلاحه ..ولامن قنعنا من خيراً فيهو قدّمنا استقالتنا كتابةً .. ومرقنا في أرض الله الواسعة ..
..[/QUOTE]

و الله يا طيبان عارف بتكتب بإسمك و أصلاً ما جاني شك في لحظة أنك بتكتب بالإنابة عن أي جهة أو شخص رجاء ما تحمل الإمور أكثر مما تحتمل ...

المشاركة الأصلية كتبت بواسطة فيا سيدي أخد راحتك علي الآخر ..وكان درت ليك داتا من جوّة بنناولك ليها ..
..[/QUOTE

و الله دا كلام طيب يا خي لكن و الله أنا طمعان في أكثر من الداتا .... طمعان منك في عمل برين استورم للمشكلة دي بعيد عن المهنة و شرفها الذي في الحفظ الصون ... بالجد طمعان لو شاركتني في الكتابة و انشاء الله تلق زمن و أنا القي زمن ... المهم لو أجابتك كنت يس موضوع الزمن بتلحق ما أصلها الفورة مليون

[QUOTE =وبما إنو كلامك دا بيعتبر دعوة لحضور البوست الكبير وعريض ..فمن أسّة يا حافظ تعال جاهز للنقاش وجيب أدواتك كلّها .. وعن نفسي ح أتعامل معاهو كبحث علمي ..وبجيهو شايل منقاشي ..
ويا اتعدل حال النظام الصحي بنهاية البوست .. يا كمان البوست لحق النظام الصحّي ..
..

الدعوة قايمة يا حبيب و مفتوحة و جيب عدة الشغل و تعال و أنا من هسي ببدأ أكتب في البروبوزل و عشان تكون في الصورة أكتر من قولة تيت عنواب البحث غالباً ما يكون (رضا المواطنون فيما تقدمة المتشفيات الخاصة من خدمة طبية ) و تحديداً مجتمع البحث عن مواطنين قبل كداً تلقوا خدمات صحية في المستشفيات الخاصة دي و المرافقون بتاعنهم ....قصرت معاك؟
لكن أنا زول ما طموح شديد و النطمننك من هسي البوست دا ما حيعدل حال النظام الصحي لكن ممكن يفتح أسئلة أو إحتمال يلحق النظام الصحي لو ما مشي الصرف الصحي عديل

فتك بعافية يا مان و بالله أعصابك

---------------------
التعديل دا عشان أنا أول مرة أجرب إقتباس متعدد و في البداية ما ظبطت معاي... ما تقول عدلت خوفاً من العصرة

[حافظ حسين]

[QUOTE=
شنو حكاية كل ما يهبشوا واحد في كلام مافي محلّو يجي يشهر لينا سيف كتابة بوست عن النظام الصحّي في السودان ..؟؟

..[/QUOTE]

يا سلام و الله القراية بحسن النية دي أصلاً ما كويسة ... يا خي انا قبيل قريت الكلام دا بحسن نية خالص لكن وقت رجعت تاني لقيت النية سودت ..... يا طيبان دا كلام شنو الكاتبه دا؟
يا طيبان أنا حافظ هنا بمثل نفسي و مسئول عن أي حرف بكتبه هنا شنو جامعني يهبشوا (واو الجماعة دي لي أنا و منو الكتبوا كلام ما في محله) أتمني أنك تحاسبني أنا كفرد ما أنا الجماعة و أكتر حاجة بعتز بيها في الدنيا فرديانتي ... فرديانية دي ما جاية من فريد لكن من زول لقي نفسه ما بقدر بعيش في قطيع عارف كيف؟

و تعال كلامي الما في محله دا وينو أنا كحافظ .... أنا كتبت هنا لنبراس كصديقة و زميلة معانا قولت ليها بالواضح ما تشكري بإسمي ناس الزيتونة , وكتبت تساؤولاتي المشروعة جداً في النظام الصحي السوداني.... لا جبت سيرة زيد لا عبيد عشان أقول بعرف و لا ما بعرف .... رجاء راجع مداخلاتي كلها لو لقيت أنا جرحت زول بالإسم قول

[طيبان]

حافظ يا مهدئ الأعصاب ..
حبابك ياخي ..
بعد تعليقك للمرّة التانية عن انفعالي وغضبي فلا بد لي أن أتحسس قلمي ..وأقول ..

يا صديق لا غضب شخصي تجاهك ولا ينبغي له أن يكون .. فدحين لو لقيت نفسي حار .. شيل ليك موية - تفضّلاً منك- ورُش مكان المداخلة ..وبرّدا .. وما بين الخيّرين حساب ..
أها ياحافظ إدعائي لعدم الغضب لن يكون سوي محض تجمّل .. لاغير .. ولكني غضبت لطريقة تجريم الآخرين التي اتبعت من بعض الإخوة وأنت منهم - وهو كلام مكرور كما تري -فإنت يا صديق بنيت مداخلاتك علي فرضية تقصير في علاج خالد ..ومنه انطلقت لرحاب تردي الخدمات الطبيّة الواسع ..ودي يا حافظ ياها لخبتة الكيمان الأنا أبيتا ..
أمّا إن كنت تري - حتي هذه اللحظة وبعد كل البيانات التوضيحية وآراء المرافقين لخالد - إنو ناس الزيتونة قصّروا ولا يستحقون الشكر .. (كما نوّهتَ في رد سابق لك ).. يبقي دا شي تاني ..ورأي يخصّك من حقّك أن تتمسّك به .. لكن لا يمكن الأخذ به .. ما لم تجيب أدوات نقدك وتقول قصّروا في كدة ..وكدة .. ويكون عدّاك العيب ..
خلاف ذلك يا حافظ ببقي البنسوي فيهو دا جدل عقيم ..ومكابرة ليس إلا ..

بالله يا حافظ هل تردي الوضع الصحي في السودان كان يحتاج لأزمة صحيّة كالتي حدثت لخالد حتي تتحرّك بإتجاه البحث ؟؟
ظنّي أنّك تعلم أن التردي بايت ومقيّل في هذه البلاد من قبل أن يفكر صاحب الزيتونة في إنشائها ..بل وأظنك تعلم أن الوضع الصحّي لو كان بعافيته لما تطاول كثيرون علي الدخول في الإستثمار الطبي بالسودان لدرجة أن صاحب أي بناية من طابقين علي إستعداد أن يعلق لافتة مضيئة معلنا عن ميلاد مستشفي ومستوصف ..
وعموما مبارك عليك إلتقاط اللحظة المناسبة لبدء البحث .. فأن تأتي متأخرا - برضو- خيرُ ُ من ألا تأتي ..وعفيتك من حكاية الوحي دي .. لأنو فعلا وقف قبل 1400 سنة ..فشكرا علي التذكير ..
لما حكيت ليك قصة كفاح الطلبة فيما يخص علاقتي بالنظام الصحّي في السودان ..فدا لسبب توجيهك السؤال وإستئذانك مني في شأن البحث المزمع ..فحكاية تحميل الأمور ما لا تحتمل ما معانا ..

عودة لعنوان البحث والذي صار أكثر تخصيصاً ..يمكن أساعد بشكل جدّي في الموضوع دا من واقع تجربة عدّة سنوات في الكواليتي مانجمنت ..خصوصا موضوع البوست رضا المستهلك / متلقي الخدمة ..
أها يا حافظ ..
أعصابي ما راقت بالله ؟؟؟

[طيبان]

حافظ حسين
التعديل دا عشان أنا أول مرة أجرب إقتباس متعدد و في البداية ما ظبطت معاي... ما تقول عدلت خوفاً من العصرة

بطّل حساسية بالله ..


مداخلتك الأخيرة قريتها .. وبرد ليك عليها بعد أطلع وأجي ..وأهي فرصة الواحد أثناء ماهو برّة البيت يفكّر ليهو في طريقة يمرق بيها من عصرتك ليهو دي ( وش معصور) ..
ياحافظ بيّض نيّتك ياخي ..وأي كلام تشوفو ماواضح أسألني وبوضّحو ليك شديد ..بجي بورّيك أنا قاصد شنو بجملتي بتاعة الواحد اليهبشوهوا ..

__

هبشك الما ضرّاك ..

[ناصر يوسف]

طيب يا شباب

أنا طلبت طي هذا الملف لكني شايفو لسه عاوزنا نلف معاه

طيب ....

قبل ساعات إتصل علي الأخ زميل البورد د. زين عبد الله من إيرلندا وتحدث معاي في محادثة طالت لأكثر من ساعتين أو ده حسب ما أعتقد ...

من الساعه خمسه لغاية الساعه سبعه وشوية كنا بنتكلم وبشفافية عالية للغاية

سألتو سؤال مباااااااااشر

يا صديقي وريني الحاصل شنو ؟؟؟

أولاً وكونوا يجي دكتور زين هنا علشان ما يتحدث في أمر غاية في الحساسية

أنا القلت ليهو ما تجي تكتب مطلقاً وده حفاظاً علي شرف المهنة وهو أيضاً قالها لي .. أنا لا أعتقد بأنَّ حديثي في الأمر عبر العام قد يفيد الأمر.

ويا د. حذيفه يا أخوي

د. زين بيستأذنك في إني أمدو برقم هاتفك وبيستأذنك كمان بإنو يتصل عليك ، في حالة إنك زغبت في التحدث معه في ذات الشأن

فهل ممكن ذلك

لأنكم كأناس أصحاب مهنة واحدة وبتفهموا نواصيها أكتر مننا نحن الـــ ( عنقاله ) ساكت ديل ونقاشكم مع بعض حيجاوب ليك إنتَ تحديداً بعض اللبس الحاصل

طيب ...

د. زين بيقول:

ما قدمه زملائي هناك في مستشفي الزيتونه أمر طبيعي وعادي منهم كأطباء وأنا بعتبرهم قاموا بدورهم علي أكمل وجه ... وأنا بشكر د. أسامه علي ما فعله تجاه مريضو ... أنا شاهدتَ صورة لأخي د. أسامه أثناء نقل الأخ خالد من مركز العناية المكثفة إلي الإسعاف إلي الطاقم الطبي بالطائرة ... وللحق أقول .. بأنَّ ما قام به د. أسامه لا يستطيع أن يقوم به إلا طبيب مختص يعرف مدي خطورة نقل مريض في مثل حالة خالد الحاج من غرفة الإنعاش إلي عربة الإسعاف ومن ثمَّ تسليمه بعناية كاااااملة وبحرص لا يعرفه سوي طبيب مُقتدر إلي الطاقم الطبي الذي جاء بالطائرة الخاصة.

وعليه أنا أري بأنَّ ما قام به زملائي لهو عمل رفيع يستحق الثناء وأقول بأنهم قد أدوا دورهم علي أكمل وجه ..

أما فيما يلي جملةً قد خرجت مني للعزيز فتحي .. أظنه قد فهمها خطأ وله العذر في ذلك لما ظلَّ يعانيه من توتر نفسي تجاه أزمة إنسان قريب بالنسبة ليه وهو بعيد عنه ... الأخ فتحي بالقاعرة وخالد في الخرطوم ...

لقد ذكرت مسألة الإمكانيات الطبية وليس الكوادر ... وهذه مسألة أسمحوا لي بأننا كأطباء قد ناقشناها بمهنية وليس إزدراء من الناس ...

نعم هناك مشاكل طبية بالسودان تتلخص في الإمكانيات وأعني بالإمكانيات الأجهزة المتطورة والتي قد لا توجد في السودان ...

جهاز التنفس الصناعي مثلاً ... أنواع شتي ومختلفة ولكل جهاز مواصفات طبية تختلف من جهاز إلي آخر وبالتالي تختلف الكفاءة الطبية لكل جهاز .. والعالم تطور ووجب علينا أن نتطور وأعني هنا إدارات المستشفيات في كل العالم وليس السودان فحسب.

وأنا سوف لن أخوض في أمرٍ بالغ الحساسية كهذا عبر المنابر العامه ولسنا ندعي الكمال ولسنا من يقول ما يسئ للناس وليس كافة الناس بل زملاء لك في مهنةٍ هي مهنة إنسانية في المقام الأول.
هذا والله وبكل الصدق تلخيص لأهم ما جاء في الحديث بيني وبين الأخ الكريم

د. زين عبد الله

عبر المحادثة الهاتفية التي جرت بيني وبينه عصر هذا اليوم

وقد إستأذنته بأنني سوف أُلخص ما دار بيني وبينه من حديث

أرجو أن يكون اللبس قد أُزيل تماااااااااااماً هُنا ...

ولدكتور حذيفه أقول يا صديقي أنا في إنتظار موافقتك علي إستئذان د. زين منك للتحدث في الأمر إن رغبت في ذلك

شكراً للجميع وأنتم تتناولون الأمر بديمقراطيةٍ حقه

[فتحي مسعد حنفي]

الحمدلله ياناصر الحكاية طلعت خطأ في الفهم وليس خباثة وكذب..أما بخصوص موافقة طيبان فأنا بحكم معرفتي بيهو برد بالنيابة عنو وبقول ليك اديهو رقم التلفون علي ضمانتي وكان داير أنا بديهو ليهو طبعا دا لو ما غير رقمو العندي..سامحونا يادكاترة الزيتونة..

[طيبان]

الأخ حافظ :
تبقي طالبني توضيح ..وإجابة علي مداخلتك الأخيرة .. بنلقي ليها فرقة يوما ما ..ونحن علي اتفاقنا فيما يخص البوست بتاع رضا متلقي الخدمة الطبية ..

الأخوان رأفت وسفيان :
برضو أعتذر عن التعليق علي مداخلتيكما ..البوست بقي علي قفلة بعد تطوّراتو الأخيرة ..

الأخ ناصر/صورة للعم فتحي :
انقلوا لدكتور زين عبدالله عدم رغبتي في الحديث إليه عبر الهاتف ..فليس بيني وبينه موضوع شخصي تتم مناقشته من وراء حجاب ..
بيني وبينه ما كُتب هنا ..وماَلاته التي انتهت بمداخلة ناصر يوسف الأخيرة .. رغم تحفّظي الشديد علي مسألة نقل الحديث عبر طرف ثالث ..وهو موقفي المعلن منذ مداخلتي الأولي في هذا الموضوع ..

يا عم فتحي :
أرجو أن تعفيني من حسن ظنّك فيّ هذه المرّة .. فأنا أري أن الحديث مع الدكتور حول ما حدث لن يكون له جدوي .. وأهو البوست بيتشطّب ..

___

سأختم حديثي برد دكتور أنس البدوي ..المنشور بالبركل حول توضيح ناصر يوسف نقلاً عن د/زين عبدالله ..

[طيبان]

أنس البدوي بابكر

بسمك اللهم الشافي الكافي المعافي اكمل شفاء اخونا خالد الحاج واعده الي اهله سالما معافي يا رب العالمين.....
اخوتي في البركل ...اخوتي في سودانيات ....اخي ناصر يوسف ...لك الشكر يا حبيب علي بوستك الرقيق و هذا ما توقعته منك بعد حديثي معك ...

و كم كنت اتمني ان يتداخل دكتور الزين عبدالله مبكرا قليلا ويكتب بخط يده توضيح كالذي نقلته عنه اليوم يا ناصر حتي كنا لانضطر لكل هذا اللغط الذي خضنا فيه ونحن في غني عنه فكل ما دار في هذه البوستات كان نتيجه نقل حديث عنه بفهم خاطئ.....

ووالله ما كتبت ابحث عن شكر لشخصي فما انا بالذي عالج خالد الحاج ولم اشترك في علاجه ولكن بامانه حرقتني الاساءات لاناس ادوا واجبهم و زياده .....

دعوني اولا اشكر اخي حذيفه الذي تصدي لقول الحق وانا ادري انه لا يخاف فيه لومه لائم وكان له الفضل في اعاده الامور الي نصابها وتوضيح الحقائق ...

وشكرا اهلي في البركل الاثيري فانتم دائما بخير وستظلون بخير شكرا لمن كتب وشكرا لمن اتصل....شكرا اخي ناصر وانت تتبع الحق بعد ان اتضح لك جليا و عفوا وعذرا ان كنت قد اخطات في حق احدكم اثناء الاحساس بالغبن الذي اصابني واعتذار خاص للاخت ساره التي يبدوا ان اسمها ورد بالخطا في احدي مداخلاتي .....شكرا طارق علي صالح ...شكرا اسامه ...شكرا نبراس ...شكرا النور وشكرا لكل من قال كلمه الحق بوعي ولكل من عاد اليها حين وضحت الرؤيه للاعين.....اللهم شفاءك لاخينا خالد الحاج ....اللهم شفاءك لاخينا خالد الحاج....اللهم شفاءك لاخينا خالد الحاج

http://www.albrkal.com/vb/showthread.php?t=12296

[أبوبكر عباس]

المشاركة الأصلية كتبت بواسطة طيبان

بيني وبينه ما كُتب هنا ..وماَلاته التي انتهت بمداخلة ناصر يوسف الأخيرة .. رغم تحفّظي الشديد علي مسألة نقل الحديث عبر طرف ثالث ..وهو موقفي المعلن منذ مداخلتي الأولي في هذا الموضوع ..

تجياتي يا طيبان
ما شايف حقو تتحفظ على نقل الحديث عبر طرف ثالت، الطرف الثالث دائما أساسي في البوست دا
ما دام بنيت الإتهام على حديث منقول عبر طرف ثالث، ببقى من العدل ننفي الإتهام دا لو في طرق ثالث جاب لينا براءة ذمة من غير أي تحفظ