الدوش .. في ذكرى رحيله

[قيس شحاتة]

ما مِن شاعر مثل الراحل عمر الطيّب الدوش، استطاع أن يجعل الشِّعرَ فارس القضية الذي يرمي سهامه فتُصيب، ويستنطق الأحرف والكلمات فتتداعى وتستجيب؛ سهلةً وبليغةً ونافذة، تصوِّر الفجيعة فتُحسن تصويرها، وترسم المأساة فتُجيد رسمها، وتمثّل الواقع؛ مسرح البؤس والشقاء والزيف والنفاق والتناقض، فكأنّما شخوصه ورموزه هي التي نراها بيننا بتفاعلاتها وصراعها اللا نهائي، في صورةٍ ليس للأصل بدونها اكتمال.. تصويراً لمشاهد ومواقف وتفاصيل مألوفة، بمفردات وتعابير غير مألوفة:
وانا جاي راجع منتهي
لاقتني هي
قالت تعال
كبرت كراعي من الفرح
نُص في الأرض
نص في النعال
...
وقد أعطى الحسُّ المسرحي الدافق، روحاً أخرى لقصائد الدوش، ومنحها هذه الحركة التي تضجُّ بها، وجعل في كل قصيدة منها مسرحاً مكتمل الأركان؛ تُلهب الخيالَ صوره، وتحكي تأويلاته ورمزية إشاراته عن عبقرية الإيحاء وعمق الفكرة وقوّة الإلهام.. لتمنح القلب ارتواءً من فيض التأمّل وتشغفه ظمأً بما تبثّه فيه من ألق وافتتان ودهشة وجمال...
تاجوج بتحلب من غيوم كسلا المطر
وتوزِّع القش والشدر
بتفرِّق الهم والكدر
حفيانه تجري ورا السراب
تاجوج بتكتب بالحراب
تاجوج بتكتب بالشمال
بترتِّق التوب والنعال
وتمرق الهم الموكَّر
في قلوب كل الرجال
تاجوج سؤال
تاجوج خيال
...
* فلئِن كانت (تاجوج) عند (المحلَّق) حبيبةً تهبَه من حسنها وحياً للغناء ومن فتنتها سحراً يسلب عقله وقلبه، فهي بـ(ريشة) الدوش، الفكرة العذراء التي تُلهم الناس السلوى واليقين والبهاء وبراءة الأحلام، وتبثُّ في الأفئدة والأرواح والضمائر، سرّ الحياة وقدسية الإلفة ورحابة الحب وقيم الخير، في رمزية بديعة وعبارات وديعة.
* ولأن الدوش كان مسكوناً بمعاني الإنسانية وفضائل الحق وأفكار الثورة والحرية، فقد كانت نبرة القصيد عندهُ ثائرةً في هتافها وصارخةً في بوْحِها، لا تهِن ولا تهدأ ولا تستكين، بل تظلُّ دوماً في تأهُّبٍ وعنادٍ وكبرياء.. تطارد حلمه ببلاده التي يتمناها، فتأتي كلماته أوجاعاً وشكوى وبكاءً على الوطن الحلم، ونقوشاً على جدار محنته المريرة ، وأبوابِ بيوته الفقيرة ، وتقاسيم أحزانه الكبيرة...
واسأل...
عن وطن رايح
وادّيكم خبر جارح
بأنُّو جميع جموع الناس
حيفضلوا لا كراع لا راس
ونشتري في الدكاكين يومي
مسابح من دموع الناس
مساحيق من هموم الناس
زهَج..
يتعبّا في الأكياس
ونعلن في المزاد علناً..
وترغي الجوقه والأجراس
نبيع الطفله والكراس
واصرخ...
يا وطن يا بيتنا..!
ليه ما تبقى لينا الساس؟!!
...
** أيها الدوش..!
إنه زمانٌ ليس للخيول فيه صهيل، وليس للأجنحة فيه تحليق، وليس للغيوم فيه هطول.. فقد أسكت (سوط) الفقر والانكسار، (صوت) الحياة ونداء الحرية وانطلاق الحق، في النفوس والرؤوس..
ومضت الأيام، ترفل في حريرها، غير عابئةٍ بأنّات الحيارى وجراح المُعذَّبين وأوجاع البؤساء.. وقد غرُبَت شمس الحقيقة إيذاناً بقدوم خفافيش الظلام.. وتساوَى في ناظِرَيْنا مشهد الفجر الوضِيء وملمح الليل الحالك.. إذ لم يعُد يصطخب في سكون الدواخل وهدأة المداخل، إلا الزعيق والنعيق والهُراء..!

[آيات]

بتطلعي أنتي من صوت طفلة وسط اللمة منسية
ومن صحية جروف النيل مع الموجه الصباحية
قيس كيف الحال
ياخ الدوش ده عبقري الشعر الغنائي في زمانه
قراءة عميقة وممتعة

[بله محمد الفاضل]

ويبقى أثر الدوش ذخيرة للأرواح العطشى
بها (تطخ) القبح يا قيس
تسمي الحبيبة وطن...


شكراً لك صاحبي على تذكر البعد الإنساني الجميل
الدوش...


تحياتي واحترامي

[النور يوسف محمد]

بسم الله الرحمن الرحيم

الأخ الفاضل قيس .. كل الود ..

الدوش رهن حياته ومفرداته لقضية آمن بها فشكلت تفاصيلها سيرته بين الناس ..
كان الوطن تعويذته التى يجيد قراءة طلاسمها ورُُقيته الى نافح بها الزمن القاسى ..


سلامٌ عليه فى مبتداه ..
سلامٌ عليه فى منتهاه ..

ــــــــــــــــــــ


بلد رايح

حأسأل عن بلد رايح
وافتش عن بلد سايح
واسأل عن امانينا
اللي ما بتدينا
صوت صايح
وأسأل وين مخابينا
إذا جانا الزمن...
لا فح

واسأل عن بلد مجروح
وعارف الجارحو ليه جارح
وابكى على بلد ممدوح
وعارف المادحو
ما مادح
واحلم بي حلم مسروق
لا هو الليلة
لا امبارح

أعلق في جناح سفري
خطابات لي زمن فجري
وادخل من درب سري
لكل مضاجع الأحزان
واضفِّر من شجر بلدي
بروقاً مارقة من صدري

حأسأل عن بلد غاطس
لحدِّ الليلهْ في الوجعة
أَنط فوق سرجي واتْحزَّم
أقوم من وقعة
لي وقعة
أخُتْ ايدي البتوجِعْني
على السأم البراجِعْني
واسأل..
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكّر لسَّه في شجني؟

حأكتب لي شجر مقطوع
مسادير
يمكن يتحرك
خطابات لي طفل مجدوع
يقوم
يجرى
يقع
يبرُك
رسالة لكل قُمْريّة
إذا دم الشقا اتوزع
على كل البيوت
ما تْرِك

واسأل..
عن وطن رايِح
واديكم خبر جارح:
بأنو جميع جموع الناس
حيفضلوا لا كراع
لا راس
ونشترى في الدكاكين يوم
مسابح من دموع الناس
مساحيق من هموم الناس
زهج
يتْعَبّا في الأكياس
ونعلن في المزاد علنا
وترغي الجوقة والأجراس:
"!نبيع الطفلة والكراس"

واصرَخ
ياوطن يا بيتنا
ليه ما تبقى لينا الساس
قدر ما تجري فيك
أفكار...
يزيدوا الحبس والحراس
قدر ما تجري فيك الخيل
تدوس الهيبة والإحساس

واسأل
يا وطن رايح
اذا كل القبور دخلت
بيوت الناس
بلا اسئذان
بلا صلوات
بلا أكفان
جريمة اسائل الدفَان؟
جريمة طلب تمن قبري
من البايع في أي مكان؟
واقولك يا وطن
رايح
واقولك يا وطن
آمر
سلام النفس ما كافر
ولا كافر
ولا كافر

[هيثم علي الشفيع]

ألا رحم الله الدوش الكريم الأجواد
والذي...


(يعزم كل زول يرتاح
على ضحكة عيون فيها)



قيس يا شحاتة

في منتدى آخر ، كانت لي محاولات -متواضعة- لسبر غور بعض قصائد الدوش العظيمة...
إسمح لي أن أدرجها هنا كنوع من المشاركة والوفاء للراحل العظيم في ذكراه

مودتي

[جعفر بدرى]

شكرا قيس
شكرا جزيلا


و يا عِزة نفس بركت
بتين بتسوى لينا جناح
و اشيلك يا سعاد وامرق
من الزمن الدنى و نبّاح ؟

[طارق صديق كانديك]

يا للدوش ... يا له من شاعر .. !!


وصلْني جوابك التاني

يحيض الغيم على سطوركَ

يقطِّر من سماكْ دمّك

بشوف في جوابك التانى

مُدُن مبنيّةْ متكيّهْ

بتمْرُق من شبابيكا

عيون برموشَهْ مطفيَّهْ

شَرَك لي كُلِّ قُمريَّهْ

وأماني كتيرَهْ مخصيَّهْ

شوارع بالنهار والليل

مدبّسَهْ بالحراميَّهْ

معلّقَهْ في صدور الناس

كلاب اسنانْها

مبريّهْ

(* خطابات في حمى الوطن )

--

شكرا ياقيس ونحن بالجوار نستمتع باستمطارك لغيمات الدوش .. !!

عليه السلام

وعليك المودة

[جيجي]

مكن نشاركفي الجمال دا
بناديها
وبعْزِم كُلّ زول يرتاح
على ضحكَة عيون فيهَا
وأحْلم اني في أكوان
بتْرحَل من مراسيها
عصافير
نبّتَت جِنْحات
وطارت
للغيوم بيهَا
مسافرِ من فرح لي شوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيه
بنادِيــــــهَا
ولمّا تغيب عن الميعاد
بفتِّش ليهَا في التاريخ
واسأل عنَّها الاجداد
واسأل عنّها المستقبل
اللسّع سنينو بُعاد
بفتِّش ليها في اللوحات
مَحَل الخاطر الما عاد
في شهقَة لون وتكيَة خط
وفي أحزان عيون الناس
وفي الضُّل الوقَف ما زاد
بناديــــــهَـا
والاقيـــــهَــا
واحِس بالُلقيا زي أحلام
حتصْدِق يوم
والاقيــــــهَــا
واحْلًم في ليالي الصيف
بَسَاهر الليل
واحجِّيـــهَــا
ادوبي ليهَا ماضيهَا
واطنْبِر ليها جاييــهَا
وارسِّل ليها غنوَة شوق
واقيف مرات واْلُوليهَا

[مهند الخطيب]

الدوش .....

الدوش .....

الدوش ......

خطــابات فى حمى الوطن


فتَحتَ جوابك الأوّل

لقيتَك لسَّه يا وطني

بتكتب بالعَمار والدم

ولسَّه بتسْكَر أمدرمان

على الشارع...

وتتْكوّم

وتمْرُق من صَدُر مسلْول

نهودهْا

تَدُوسن العربات

ترضِّع فى الكلاب

مشنوقَهْ من عينيهَا

في الساحات

وتضْحَك في زمن مسموم

ولسَّه بترقُد الخرطوم

تبيع أوراكْها للماشين

تَطِل من فوق عماراتهْا

وتَلِز اطفالهْا في النيلين

وترجع للرُقاد تاني

اشوفك في جواب تاني

مشيتْ اتمشَّى فوق همكََ

وصلْني جوابك التاني

يحيض الغيم على سطوركَ

يقطِّر من سماكْ دمّك

بشوف في جوابك التانى

مُدُن مبنيّةْ متكيّهْ

بتمْرُق من شبابيكا

عيون برموشَهْ مطفيَّهْ

شَرَك لي كُلِّ قُمريَّهْ

وأماني كتيرَهْ مخصيَّهْ

شوارع بالنهار والليل

مدبّسَهْ بالحراميَّهْ

معلّقَهْ في صدور الناس

كلاب اسنانْها

مبريّهْ

على مرِّ السنين تحْسب

شهور أيامها عِبريّهْ

مشيتْ اتمشَّى فوق همّك

وصلْني جوابك

الدمّك

رقدتَ على البحر غنيتْ

مليت احزاني بالأمواج

جرحْتَ الدنيا بالدوبيت

جريت لي ساحَة الشُهداء

لقيتُم لا وطن لا بيت

دخلتَ منازِل الأُمّات

وطلّيتْ لي شقاء الاخوات

مرقتَ كأني زولاً مات

لقيتْ أطفالي في الشارع

بيجروا على أمل واقِع

رقدْتَ على البحر غنّيت

واتذكرت َاهَلَن لي

ساكنين في سجن كوبر

مليتْ أفراحي بالأمواج

وشدّيت الرحال قُمْتَ

لحدِّ الليلَهْ

ما عُدْتَ

شبابيك فتَّحَتْ أبواب

وأبواب فتَّحَت حارات

وكنتَ معاكَ يا وطني

على حُمّى الجواب الفات

صحيتْ ولقيتَك الشارع

وكِتْ تِتْمايل النخلات

ضُلّك

على أيامك الجايات

وفي جوابك الرابع

لقيت الناس على الشارع

وصوتَك من كهفوف طالِع

كَوارِيك للسماء السابع

كواريك للسماء السابع

[قيس شحاتة]

* أهلين حبابك آيات
الدوش – كما قلتي – عبقري .. ليس أقل من ذلك ، وصف

• بله الزول السمح ،،
عندما تقرأ للدوش تدرك أن الشعر مشاعر .. فبداخله إنسان ينفعل فتخرج الأحرف صادقة وموحية وصريحة ونافذة

• النور يا جميل ..
(كان الوطن تعويذته التى يجيد قراءة طلاسمها ورُُقيته الى نافح بها الزمن القاسى ..)
ياخي عبارتك دي اختصرت الكلام كلو والله !

• أخونا هيثم ..
بكل سرور يا صديق .. بكل سرور

• عمنا جعفر
ألا فلتشكر الدوش الذي منحنا شرف الكتابة ببذخ


تحياتي للجميع ،،

[فيصل سعد]

له واسع الرحمة و المغفرة ..
و لكم اطيب التحايا ..

" حأسال عن بلد غاطس
لحد الليلة في الوجعة
انط فوق سرجي و اتحزم
اقوم من وقعة لوقعة

اخت ايدي البتوجعني
علي السأم البراجعني
واسال يا وطن يا بيتنا
ليه شوقك مواجهني
ليه حبك مجهجهني
و ليه تاريخ زمن خسران
موكر لسه في شجني؟ "

[زاهر صديق الطيب]

ضلمت

عمر الطيب الدوش

أقول

والشمس فى عز الأمل
تهت ومشيت
أقول يا نحن يا إنتو و
بكيت
يامواعيد
يا صباح من غير وسم
تهت ومشيت
ماضلمت
مابتعرف الزول البجيك
ولا البجيك
بيعرفك
حتى الشبابيك
والزوايا الكان بتجمع
فى حناياه الشكوك
ماضلمت
أغشاك يانفسى الغريبه
من همومى اطلعك
القاك واقفه على الطريق
احزان بتفرح
وتشتبك
افراح بتحزن
وترتبك
لمن رحلت مع الغنا
عز الأمانى و
ضلمت
مديت على الأمل القريب
اشواق كثيره و
قصرت
فى زاويه من ضل الشجون
جابت ظنونا و
قيلت
كلمت أشجار الخريف
عن شوق نما
فى الوحشه والزمن الأسيف
دلتنى افتش
فى المغارب
والمشارق
عن علامات
او رصيف
ترقد الأزهار عليهو
يابنفسج
كحلى غالى
وبرتقالى
امشوا إنتو
انا البقيف
******
شكرآ كثيرآ يا قيس ..
والرحمة والمغفرة ل عمر الطيب الدوش ..

[آخـر المواني]

شكرأ قيس .. فقد قلت فكفيت رغم إنو الدوش الكلام فيه لا ينتهي ..

مقطع من " العمدة جابر"

وصرخْتَ يا طه وصرَخ

ضُل المشاوير..

فى الأصيل.

فى الساحَهْ رفَعَت مُقْنَعهْا

الذِّلَهْ ... والصبر الطويل

رقَصَت مع الكلمات

شُجون..

وجَرَت ورا الأحرف

خُيول :

"!!يا عُمْدهْ هوي"

حامت على الناس القَماري

وزّعَتْ سَعَف النخيل..

" !! يا عُمدهْ هوي"

مَشَت سحابَهْ

وجات ربابَهْ وزفَّهْ قامت

فى الطبول



"!!يا عمدة هوي"

الغافى فارق غَمْدَتُو

والصاحى تَمْتَم..

فى ذُهول



قام ودْ خدوم

"يا عُمْدهْ هوي"

يا عُمْدهْ بالله إخْتَشِى..

للعوْرَهء ما بِنْفَع هُتاف

للسوسَهْ

ما بْفِيدَك حَشِى

علّمْتَنا الجري فوق جروحنا

وقلتَ:أبداً

!!دَه المَشِي

خَتْيتْنَا فى قلب المشاكل

وصِحنا كُلّنا

" مافى شِي..

كلمَهْ واحدَهْ..

جناب سعادتَك

من ضمير ما مُرتَشِى

الحِلَّهْ يا .."

والعُمدَهْ ..أو سلطانو قام:

"الحِلَّهْ أيه..؟

حتَّه مُعلم مُبتدىء..

الحِلَّهْ أيه

مسئول كبير زاير البلد

لا ودْ خَدوم

ولا ألفِ شُوم

أو ألأف بوم

!!حيَعَلِّم الوِّز كيف يعوم"

والعُمدَهْ جابِر..

دَه الصباح

مدَّ إيدو على الدفاتر

وقبلما ما ينْصَر جبينو

كان شطب كلَّ المساخِر

اللِّى حاضِر

من مساخِر

والمُسافِر

ما عدا السجن العُمومي

[قيس شحاتة]

تحياتي لجميع العابرين.. ونحن إزاء عبقريٍّ لا أظنّه من الغابرين


بوست قديم في سودانيات في ذات السيرة العطرة :
http://sudanyat.org/vb/showthread.php?t=11579&page=2

[فيصل سعد]

http://www.youtube.com/watch?v=l9l8l...eature=related