ما بين ابو صلاح ومسعد حنفي

[رأفت ميلاد]

المشاركة الأصلية كتبت بواسطة ناصر يوسف
عتيق المُعتق ربنا يرحمه يا رأفت ميلاد ياخ
غايتو ذكرتني بحكاية الزول ( الواقِف لَط ) ،،، لما قال :
والله لكِن أزهري ده ما ببااااااااااالغ لكن
صحي الغُربه حاره والله

وينها آسيا ست البوست دي مشت وين ؟؟ ما تجي تسوق موضوعها البقي مجوبق ومفتول ده !!!!
لكن الأغنيتين سمحااااااااااااات
إنشاء الله ود عثمان يجي ينزلهم لينا ياخ

ياخ قصدى أبو قرون الله يرحمنا ويرحمك ما تلفت نظر الناس وتقول ليهم داقس .. يقوم يشككوا فى المصداقية من أصلها ويعرفونى فشنك زى فتحى

غايتو إنشاء آسيا تطلع قريبة أحمد ويطلع زيتنا فى بيتنا ويسورى يطلع هو الفشنك

[رأفت ميلاد]

المشاركة الأصلية كتبت بواسطة فتحي مسعد حنفي
ومالو ياعم ..أهو خلو زيتكم يبقي في بيتكم ومحمد يصاحب بطرس...قبطي مسلم ايد واحدة..بالمناسبة يا أحمد رأفت دا دفعتك..

لا ياخ ده عاجباهو الخمسين يادوبك .. أمكن يكون دفعة آسيا

[فتحي مسعد حنفي]

المشاركة الأصلية كتبت بواسطة رأفت ميلاد

ياخ قصدى أبو قرون الله يرحمنا ويرحمك ما تلفت نظر الناس وتقول ليهم داقس .. يقوم يشككوا فى المصداقية من أصلها ويعرفونى فشنك زى فتحى

غايتو إنشاء آسيا تطلع قريبة أحمد ويطلع زيتنا فى بيتنا ويسورى يطلع هو الفشنك

عالم جبانات بشكل

[ناصر يوسف]

لو عايز تعرف مشت وين اقرا مداخلة أميري..يازول دي شكلها جاية مخصوص عشان تعكنن أولاد مسعد وتزوغ..ما أصلو اليومين ديل قالوا المديدة بتتباع في سوق الديمأوعي تزعلي يا آسيا دا هظار ساكت

ياخ قصدى أبو قرون الله يرحمنا ويرحمك ما تلفت نظر الناس وتقول ليهم داقس .. يقوم يشككوا فى المصداقية من أصلها ويعرفونى فشنك زى فتحى

غايتو إنشاء آسيا تطلع قريبة أحمد ويطلع زيتنا فى بيتنا ويسورى يطلع هو الفشنك

وفي إنتظار صاحبة البوست

[سفيان ابوقصيصة]

المشاركة الأصلية كتبت بواسطة فتحي مسعد حنفي

أها الجلاكين بانوابالمناسبة ياسفيان انت قريب سيف ومحمد أبو قصيصة أولاد القاضي ولا تشابه أسماء ساكت.غايتو كان قرايبك حأحكي ليك بلاوي سيف..

فتحي سلامات ياخي...
الجلكنه دي لسه بعيدين منها...وبعدين المسأله ذات معايير اخرى، يعني انا لو ما شفتا صورتك كنت اقول انت دفعتي..!
المذكورين اقربائي وما تشابه اسماء، ولما الاقي سيف حسألو عنك وح اراعي القابل للنشر ومن عدمه..!
تحياتي..

[سفيان ابوقصيصة]

المشاركة الأصلية كتبت بواسطة رأفت ميلاد

سلامات يا سفيان

ياهو مجدى وشقيقاتم فرجين وسندرينا وإيكا .. ويبدو ما بتعرف جوزيف وإدوارد لأنهم مغتربين فى أوربا منذ زمن ليس بالقصير

المهم فى الموضوع بقينا أهل وأنا كايس معرفتك

يا سلام يا رأفت...وسلام كتير..
اعرف جوزيف ود. ادوارد زوج الالمانيه ووالدهم المرحوم نجيب تادرس، الرجل الفنان وما زلت اذكر جلوسو في فناء منزلهم المحاط سوره بمختلف انواع الزهور، حيث كنا نسكن في المنزل المقابل لهم تماما، و ضربه (عزفه) على العود وتطريب نفسه بأغاني الموسيقار اسماعيل عبدالمعين، جبل لادو، الساكن جبال التاكا و قابلتو في البياح وغير ذلك كثير..
وكذلك اعرف والدتهم المرحومه زكيه بشعرها الابيض الوقور الانيق...
وبناتهم وازواجهم..توداري و وليام..
انت يا رأفت اخو رفعت..؟
وكنتو ساكنين الخرطوم جنوب..ناحية النادي الاهلي..؟

[فتحي مسعد حنفي]

المشاركة الأصلية كتبت بواسطة سفيان ابوقصيصة

فتحي سلامات ياخي...
الجلكنه دي لسه بعيدين منها...وبعدين المسأله ذات معايير اخرى، يعني انا لو ما شفتا صورتك كنت اقول انت دفعتي..!
المذكورين اقربائي وما تشابه اسماء، ولما الاقي سيف حسألو عنك وح اراعي القابل للنشر ومن عدمه..!
تحياتي..

أول حاجة سيف دا دفعتي من الثانوي لما كنا في الكلية القبطية وبعدين اتزاملنا في تشيكوسلوفاكيا وهو كان في براتسلافا وأنا في براغ ومحمد جا بعدنا بي سنين وبرضو درس في براتسلافا..أما سيف دا ياخ عندو قصص تحير.. الزول دا ما بعرف يفكر في حاجتين في وقت واحد وأديك مثال ..مرة كان عندو امتحان ومشي الكلية وهو داخل الكلية قامت وقعت نجفة من السقف في الصالة واتكسرت..سيف وقف يتفرج ونسي الامتحان وبعد ما اللمة فرتقت قام رجع الداخلية الجماعة سألوهو أها ياسيف سويت شنو في الامتحان..قام ضرب قورتو بي كفو وقال ألله أنقرو ما نسيت الامتحان

[فتحي مسعد حنفي]

في مرة كنا قاعدين في الداخلية بنتونس عن تطعيم الشجر يعني ممكن شجرة برتقال تطعما بي ليمون تقوم تديك الاتنين..واحد من أولاد بورتسودان قال عندهم شجرة بتطلع برتقال ويوسف افندي وليمون والناس اتغالطو وسيف قاعد زي أبو الهول ما بينطق ولا بشارك في النقاش..المهم الكلام دا كان حوالي الساعة تمانية وحوالي الساعة اتناشر بتاع بورتسودان قام عشان يمشي أوضتو والناس كانو نسوا النقاش واتكلموا في عدة مواضيع بعدها.الزول وهو في الباب سيف ناداهو وقال ليهو :اسمع شجرتكم دي ما كانت بتطلع سندوتشات..تخيل الأربعة ساعات المضت سيف كان عايش مع الشجرة وبفكر فيها

[رأفت ميلاد]

المشاركة الأصلية كتبت بواسطة سفيان ابوقصيصة
يا سلام يا رأفت...وسلام كتير..
اعرف جوزيف ود. ادوارد زوج الالمانيه ووالدهم المرحوم نجيب تادرس، الرجل الفنان وما زلت اذكر جلوسو في فناء منزلهم المحاط سوره بمختلف انواع الزهور، حيث كنا نسكن في المنزل المقابل لهم تماما، و ضربه (عزفه) على العود وتطريب نفسه بأغاني الموسيقار اسماعيل عبدالمعين، جبل لادو، الساكن جبال التاكا و قابلتو في البياح وغير ذلك كثير..
وكذلك اعرف والدتهم المرحومه زكيه بشعرها الابيض الوقور الانيق...
وبناتهم وازواجهم..توداري و وليام..
انت يا رأفت اخو رفعت..؟
وكنتو ساكنين الخرطوم جنوب..ناحية النادي الاهلي..؟

يا سلام يا سفيان زمن جميل يا حليلو .. جدى نجيب كان حبوب ومغرفش .. الله يرحمو ويغفر ليهو .. أطول مدة عشتها معاهم عندما كنت طالب فى محمد حسين الثانوية
رفعت ده ما عرفتو .. لكن نحن كنا فى مدنى (بركات) رئاسة المشروع .. إدوار عمل الأمتياز بتاعو فى مدنى وكان ساكن معانا فى بركات وزوجتو البولندية لوشا وبنتو مونيكا .. وبالمناسبة هسة فى زمبابوى وعدنو عيادة معروفة مع بنتو البقت طبيبة أيضاً .. جوزيف هو الفى ألمانيا .. وبالمناسبة هو الفنان والنحات ومجدى أتعلم منو

بالمناسبة ااكبار أتربو وتعلمو وكبروا فى الجنوب .. وبتكلموا عربى جوبا .. جوزيف وإدوارد عشان طلعوا بدرى من السودان لسة عربيهم مكسر

[مجدي مسعد حنفي]

آسيا ازيك
الظاهر والله اعلم انتي زغتي من البوست بعد مالعجايز وعلى راسم فتحي ورافت لقوهو فرصه ينشطوا الذاكره شويه حفظاً من هجوم الزهايمر عشان كدا قلت احاول ارجع بالبوست تاني لمسارو الاول يمكن تجينا راجعه.
امبارح وبالصدفه البحته بقلب في المحطات مريت على قناة السودان وكان شغال اعاده للبرنامج سبب فتح البوست والغريب ودي فعلاً صدفه غريبه اني جبت القناة وبدوي بتكلم عن موضوع وجه القمر سافر وبياكد انو سمع من والدو حكايه طلب مسعد منو يشتري قصيدتين يدعم بيهم ديوانو اللسه حيطبعو فقام باع ليهو الاغنيتين اياهم وقال كمان انو عندو نسختين بخط ابو صلاح للاغنيتين وعرض على الشاشه صورتين ليهم وقال كمان انهم كورثه لابو صلاح مابيبحثوا عن الحق المادي ولكن بيهمهم الحق الادبي طيب يابدوي ابو صلاح حقكم الادبي دا تفتكر ظهورك في الفضائيات وفي الجرايد وكل وسائل الاعلام ممكن يرجعو ليكم ماتمشي ترفع قضيه عديل كدا وتاخد حقك لو اصلا ليك حق وبالمناسبه بدوي دا زول فعلا جاهل وارعن ودا ماكلامي لكن كلام الناس العرفوا اني قابلتو في نادي الفنانين واتكلمت معاهو الناس ديل كلهم ناس اصحاب فكر ومن بينم شعراء كبار ومعروفين المهم الناس ديل كلهم لقيتم وفي نفس واحد ردوا انت يازول مجنون بدوي دا راجل ارعن وجاهل ومابستاهل انك اصلا تتكلم معاهو
نرجع لكلام بدوي في نقطه انو والده هو الحكى ليهو الموضوع زي ماقال طيب يابدوي انت مافكرت ولو للحظه انو ابوك بعد سكت وماقدر يرد على مسعد في اكتر من مناسبه لغاية ما اولاد شمبات سجلوا الاغنيه في الاذاعه باسم مسعد حنفي وهو عارف تماما قبل التسجيل وقرا القصه الحكاها مسعد في مجلة هنا امدرمان الاستشهد بيها بدوي لما ذكر اسم احد الشعراء وقال انو في لقاء معاهو نشر في المجله قال الاغاني كلمات ابو صلاح اعتقد انو الجاغريو ومعذره لو كتبت الاسم غلط .. انو والدك حبّ انو يحفظ ماء وجهه قدامكم انتو اولادو ويحاول على الاقل قدامكم يكذب رواية مسعد حنفي ... مافكرت يابدوي انك بكلامك دا ممكن تكون بتسئ لذكرى ابو صلاح ولاخلاق ابو صلاح غايتو كلامو القالو ان دل على شئ فبيدل على انو فعلا ارعن .
اما النقطه التانيه ودي اشترك فيها بدوي وابو قرون وهي موضوع الديوان والموضوع دا اتكلمنا فيهو كتير لكن المره دي فيهو جديد بس خلينا نبدا من الاول
بدوي وابو قرون مع حفظ الالقاب الاتنين اتفقوا على ان مسعد اشترى القصايد من ابو صلاح لتقوية ديوانو وعشان كمان الناس تقبل على شراءو وفعلا الديوان اتباع بصوره ممتازه حقق ارباح عاليه خلت مسعد يجي ويدي ابو صلاح مبلغ اضافي اعتراف منو ان قصايدو هي السبب في رواج الديوان وطبعاً دا كلو كلام بتاع ناس ماعرفا هي يتقول شنو ومفكره الناس كلها مافاهمه وتصدق اي كلمه يقولوها لكن الناس القرت المذكرات وهم كتار عارفه كويس انو مسعد حنفي ماليهو اي ديوان لا خلال حياتو ولا بعد موتو وموضوع الديوان البتكلموا عنو ماهو إلاّ كتاب امير الاغاني السودانيه وعلاقة مسعد بالكتاب انو هو الاشرف على جمع القصايد من الشعراء ومن بينم ابو صلاح نفسو بعد ماكلفو اصحاب مكتبة ابو الريش بالمهمه للصداقه البينم ولمعرفته بكتابة الشعر الغنائي بصفته شاعر والعندو الكتاب حيلقى مكتوب في الصفحه الاولى جمعه احد الشعراء الهو مسعد حنفي يعني الموضوع ببساطه مسعد حنفي ماليهو دعوه بطبع الكتاب ولا بي بيعه ولا بالمكسب والخساره يعني علاقته انتهت بتسليم البروفات بعد المراجعه لاصحاب المطبعه ..
اما الجديد في الموضوع ودي حاجه غريبه ماعارف كيف فاتت على الشاعر ابو قرون والمفروض انو جاي يشهد بالحق وهي انو اعترف اثناء كلامو ان وجه القمر سافر والناعسات عيونن كانوا معروفين للناس ومشهورين انهم من كلمات ابو صلاح (دا كلام دا يابو قرون) قبل صدور الديوان المزعوم (اقصد الكتاب) وطبعا دا كلام عجيب وقلناهو كتير قبل كدا وهو في زول عاقل يمشي يشتري قصايد من شاعر في قامة ابو صلاح الناس سمعتم وواحده منهم كانت حديث الناس ومازالت حتى الان وبختهم في كتاب ضمن مجموعة قصايدو يعني كان البتكلم مجنون مع الاعتذار لكن لازم المستمع يكون عاقل ومايسمع ويقول آمين وانا فعلا مستغرب انو ابو قرون قال الكلام دا لانه يتنافى جمله وتفصيلا مع الروايه بتاعت بدوي والجاي هو معاهو الحلقه عشان يأكدا ..
طبعا ياجماعة الخير الكلام البسوي فيهو بدوي دا بلف الحبل حولين رقبته لانو بي كدا هو بيديني دليل ادانته يعني الكلام دا لما يقولو وسط اصحابو غير لما يقولو في وسيله اعلاميه يعني بكل بساطه انا ممكن اطلب من التلفزيون نسخه من الحلقه واديها لاي محامي مبندئ ويرفع قضية واتهمه بمحاولة تشويه الحقيقه واتهام الوالد بالكذب واطالب برد شرف واعتراف واعتذار رسمي في جميع وسائل الاعلام ودي قضيه مامحتاجه لاكتر من جلسه واحده .

رجاء:
ارجو من الاستاذ جعفر بدري ان يتكرم ان كان له اي علاقه بالشاعر ابو قرون بطباعة نسخه من الجزء الخاص بموضوع الاغنيتين من مذكرات الوالد ان كان لا يزال يحتفظ به .

[بابكر مخير]

المشاركة الأصلية كتبت بواسطة فتحي مسعد حنفي

ما عندي رأي نستني مالك يجي يفتي براهو..

يعني أغير تسجيلي بي "مالك" واستنى لمن يرضو عليا بي باسورد
عشان أجي أفتي...
لا جيتك متلب ما "حنبلي" لكن هاااااااااااااااااادي...
يابا الراجل ختاها واضحة وبما أننا ناس ديمقراطيين وبنتقبل رآي الأخر،،
فدها رأيهو ومقبول..
الأحباء...
سودانيات محبة يعني القلوب لازم تكون صافية عشان تتعامل بالمحبة
وربنا يوصلنا الهدف بالطريق والدرب الرسمهو لينا "خلودي" الله يرحمهو..




والله يا توحة
طفرت دمعة وكنتا قايلها براها،،
لكنها كانت ذي كشاف الدرب،،
تبعها جيش من الدموع...
آآآآآآآآآآآآآآآآآآآخ حبيبي وآآآآآآآآآآآآ حليلهو..
الحمد لله


من الطرايف: مرة "جق جق" كان برضهو صرف ليا روشتة مماثلة، أخدتا الدواء الموصوف فيا وكان ليا "بلسم" ومنها بقآ "جق جق" أعز صديق، (ما هو طبيب أزال لي جراحي)،
ما معروف برضهو يمكن،،،
وما من محبة إلا بعد عداوة

[فتحي مسعد حنفي]

المشاركة الأصلية كتبت بواسطة ناصر يوسف

وفي إنتظار صاحبة البوست

أنا غايتو آخر خبر بلغني هو ان بتنا آسيا مشت تشوف الجناينية شايفين شغلم ولا عاملنها لعب ساكت..وأصلا النسيم ليهو كم يوم ما ظهر ولا جاب أي طيب..