البتول......

[خالد الحاج]

المشاركة الأصلية كتبت بواسطة معتصم الطاهر

الخال
بالله خلينا نناقش المواضيع دى حسب خبرتنا و " انطاعيتنا "
و بطريقة معتصم العادية المكررة

[align=center]أولا الشخوص ..:- [/align]

أكثر الكاتب من الشخوص .. الحقيقية والرمزية ..
التناريخية و العادية ..
منها ما كان كومبارس يمكن التخلي عنه .. و قليل منها طوّر الكاتب شخصيته و الحدث المصاحب له ..



شخوص رئيسة ..
البتول .. بطلة الحدث .. و تطور الحدث مع الشخصية ..
حليم .. كان ملازما للأحداث.. كأنما أشار لنا لنا بأنه طرف .. ولكنه بقى نقطة شك فى القصة .. لصالح الكاتب ..
.. دكتورة سمية ..
حسن + فلانة .. إنسانة كالنسمة
"حنانات
سيف الإسلام الكنزي


شخوص لعبت دورا فى الحدث و طرح بواسطتها ا الكاتب فكرة هامة
علي حران "حارس النادي" زكريا ..
وزيري ..طارق

شخوص .. للذكرى .. ويمكن الاستغناء عنها و طرح الفكرة عن طريق شخصيات أعلاه
عبد الوهاب "الأرنب .. إسماعيل شاهين ..الخال محمد ميرغني .. عبد الغني ..
والمهندس الزراعي إسماعيل "سمعة الضلم
عبد المحمود .. عوض الله

شخوص ... كان يمكن أن تختصر في اسم المنصب ..
علي عثمان محمد طه .. العميد يوسف عبد الفتاح ..


شخوص طرح خلالها مواضيع .. يمكن الاستغناء عن الحدث فى الحكاية :
العجائز( الدفاع الشعبي) .. وحارس الباب فى المستشفى .. ..

سلامات يا باش
رغم أنك ستكمل (وأنا أنتظر ذلك) لكن لا بأس من تناول الشخوص هنا.
هذا مجتمع فريد يا باش مجتمع الخرطوم3 وعندما تأخذ الانطباع السائد عنهم في وسط الخرطوميين والأمدر مانيين مثل "كترينا" و "تلاتة حلاتها" تنخدع عادة فهذا مجتمع متكافل متداخل رائع .
النادي بدوره كان بمثل قمة هذا التكافل إذا أنه يجمع أهالي ثلاثة وما حوله بدءا من حي باريس مرورا بالسكة حديد وحتى حي الزهور والديم والسجانة والخرطوم 2 .
الشخصيات كان الغرض منها إبراز وتجسيد هذا الشتيت العحيب من البشر وإصال إحساس وجود تجمع كبير من البشر في مكان واحد قد يصلوا في رمضان أحيانا إلي أكثر من 250 شخص بين عجوز وطفل وشاب وإمرأة .
مثل هذا المجتمع يا باش لا يمكن ابتساره في أربعة أشخاص.

كل هؤلاء الشخوص الذين مررت عليهم بعضهم بدور كبير وبعضهم حسب تعبيرك كومبارس أستطيع ومن الذاكرة أن أكتب عنهم الكثير...

بالنسبة ل "علي عثمان" و "يوسف عبد الفتاح" بعكس تصويرك كان لا بد من ذكرهم بالاسم فأنا علي قلة حيلتي أعتبر هذا توثيق وقد أجرم هؤلاء حسب منظوري بما لا يقاس ووجب فضحهم فيما يتعلق بهدم ركن أساسي كان ضمن ما تغنوا به فإذا بهم للأسف أول من يهدمه ألا وهو التكافل الاجتماعي .

أنتظرك فلا تطيل الغياب .

[خالد الحاج]

المشاركة الأصلية كتبت بواسطة لنا جعفر

خلود
ود وتحايا حارة
القصة أنا لاانكر انها مشوقة لكنني لااستطيع التلبس بروح ناقد وأنا تنقصني ادوات هذه المهنة
لكن بأحساس الذواق العادي استطيع أن اقول انها كانت مشوقة وأن فترات التوقف كانت قاسية بالنسبة لي انا تحديدا وأنت تعرف اني لااقراء القصة بحياد لعدة اسباب
المهم انا ادعي انك تسترسل في الحكي بسلاسة وسهولة في اللغة والحركة داخل النص، لكنك تعنى بالوقائع المرتبطة بالقصة ولاتعطينا احساسا مكثفا بالتفاصيل المحيطة يعني الازياء او وصف النادي والطقس والناس البشربو سجاير مثلا او البياكلو تسالي وكده
طبعا لو اتبعت هذه الطريقة فلن تكتب قصة وانما قطر او رواية
بطلة القصة نجحت في ان تجعلها هي الاخري محايدة تجاه الحدث كله اما نحن فيبدو انا كنا في المريخ اذ لم تأتي على ذكرنا وبعتنا للبتول
لكن الحق يقال اننا كنا عصبة شريرة تجيد الصراخ والشقاوة ولاتجذب اي اهتمام ، كنا لانتأنق وتشغلنا الدروس والبعض كان يتعامل معك كونك استاذ الانجليزي !
المهم شخصيا أنا قصتك صدرت لي كم ماهين من الشخوص والتفاصيل البهية
والله ياخالد ممكن تطور نفسك وممكن تواصل
ده كلو بي احساس زول متلقي وبسيط
بعدين تعال هنا
معتصم ده شغال يختصر في شخوص القصة دي ليه
انتو عايزين تشتغلو مسرح رجل واحد ولاشنو
استمتعت ياخالد بالقصة فشكرا لك وشكرا للبتول فقد اوصلت عدة افكار
ودي وود كل صحاب تلك الفترة اضمنه لك.....
حاشية
بعض السكوت قد يكون اجلالا أو اعجابا

غاليتي لنا
كنت أي شيء يا لنا اللهم إلا "شريرة"
والحق يقال وهذه شهادة مني يا بت عم جعفر كان لك ذهن مميز ودور كبير في تحريك الحياة الإيجابية في النادي.. تشاركين في ثقافياته وتودين الجميع .
أذكر كيف كان يستمع إليك الأستاذ أبوبكر وزيري والأستاذ محمد ذكريا بكل اهتمام حينما تتصدين لأمر ما كما أن الادارة كانت تهتم بوجهات نظركم حين يتعلق الأمر بموضع يهم الآخرين ..
كان لك شلة ولا أروع .. أذكر أبوالروس بصمته العجيب وعقله الذي يلتهم الكتب كفأر المكتبة وعمر سيد أحمد وشاعرياته وعبد الرحيم ومحمد .
لفترة انضميتي لشلتنا كنا نخرج لنأكل الفول المصلح من العم عبد الوهاب الصافي وطبعا كنت بتملحينا في ال "شيرنج " طوالي

وجودك هنا شهادة لي أعتز بها لانك جزء من هذا النسيج العجيب الرائع المسمي مجازا نادي الأسرة ولأنك شقيقتي من زمن طيب معافي بما لا يصدق .

[خالد الحاج]

المشاركة الأصلية كتبت بواسطة mamkouna

حاجة تانية...

كنت أتخيل طوال متابعتي للقصة أن يكون ل حليم دور في إصابتها بالمرض..
لكن بعد معرفة إنو الموضوع كلو عبارة عن تشخيصات وهمية من * حنانات *
بدأت أتساءل عن سبب سلبية حليم..و ظهوره دائماً في الظل!!!

و أتساءل أيضاً عن سبب شك البتول في إصابتها بالمرض دا..
مع علمها التام بأنه مرض جنسي..
هل يعني ذلك عدم براءتها مية في المية ؟؟؟!!!

ممكونة حبابك
حليم كما هو الحال مع البتول كانوا طلبة في مقتبل العمر. وشخوصهم تماثل ما هو متوقع في هذه الفئة العمرية (عشرينات) والأمر ليس سلبية بقدر ما هو حال الطلاب ذاك العهد .
دور حليم كان هو زرع الشك لتحفيز ذهنية القارئي وتجسيد نظرية "المؤامرة " في القصة حتى يتجسد بشدة بشاعة الخفاض الفرعوني وهو من المشاكل التي حاولت معالجتها هنا إضافة للنادي.

الفتيات في عمر معين ونتيجة لفقر الثقافة الجنسية في الحياة السودانية وانعدامها في النظام التعليمي يعتمدن في ما يتعرضن له من مصاعب علي مشورة الأقربين وغالبا أصدقاء ومعارف . وهنا الطامة يا ممكونة إذا أن من يستشار في الغالب بفقر السائل نفسه .
حنانات والتي تمثل الشر هنا تتعامل كشخص قادم من بيئة أخري وتقدم نصح ربما يماثل بيئتها لكنه أبعد ما يكون عن بيئة البتول .

كانت بريئة بحق .. ومن تصويري لبعض ما طرحته من أحاديث حاولت أن أؤكد هذه الحقيقة ، فقد أخذت هي وصف حنانات للأمر "سيلان" كحقيقة لا تقبل الشك وقامت بطرح الأمر علي بكل برائة وهذا ينفي معرفتها تماما بمعني المسطلح "سيلان" .
وجود "حنانات" نفسها والتي تمثل الشر ضرورة حتى لا يبدو النادي ومجتمعه "يوتوبيا" كالمجتمع الفاضل لا يأتيه الشر من يمينه ولا عن يساره فهو مجتمع في النهاية ككل المجتمعات يحتوي الخير والشر لكن الخير فيه كان هو الأعلي يدا وصوتا .


شاكر وجودك بحق.

[خالد الحاج]

المشاركة الأصلية كتبت بواسطة فتحي مسعد حنفي

بدأت أتساءل عن سبب سلبية حليم..و ظهوره دائماً في الظل!!!

و أتساءل أيضاً عن سبب شك البتول في إصابتها بالمرض دا..
مع علمها التام بأنه مرض جنسي..
هل يعني ذلك عدم براءتها مية في المية ؟؟؟!!!


[أقترح تغيير الاسم من ممكونة الي متمكنة...وكمان تجيد قراءة ما بين السطور....يديكي العافية قلتي الما قادرين نقولو وبالذات السطر الأخير وللا شنو يا أخونا....سؤال يا ممكونة انتي محجبة ولا شنو؟كل ما أجي أنزل الرد تظهر لي رسالة بتقول النص قليل مع انو من 3 كلمات ممكن ينزل]

أول حاجة يا فتحي النص ما ممكن ينزل لأنك بتكتبه في الإقتباس فيصير الأمر ل "السستم" وكأنه اقتباس.
لما تعمل أقتباس خلي مسافة كافية بين المقتبس ومداخلتك .

ثانيا إزيك يا خواجة . وبالله ما تظلم البنية يا أخي إنت قايل دي تشكسلوفاكيا ؟ دي الخرطوم وكمان في ثمانينيات القرن الماضي .
حولا ؟؟ القرن الماضي دي أدتني إحساس بأني ديناصور
الشكية لله .

[معتصم الطاهر]

المشاركة الأصلية كتبت بواسطة خالد الحاج

هلا بيك يا باش
هذا ما كنت أنتظره والله
واصل الله لا ساءك

يا خال ..
سلامات ..

مافى داعي نقول شغل سمح .. وجميل ..
دايرين الملاحظات/ سميها .. نقد مفيد / .. للخال و لجميع الكتاب ..

سأواصل كل يوم مداخلتين حتى لا أزحم الناس بكثير من الملاحظات ..

[معتصم الطاهر]

المشاركة الأصلية كتبت بواسطة خالد الحاج

دور حليم كان هو زرع الشك لتحفيز ذهنية القارئي وتجسيد نظرية "المؤامرة " في القصة حتى يتجسد بشدة بشاعة الخفاض الفرعوني وهو من المشاكل التي حاولت معالجتها هنا إضافة للنادي.

.

هذه حرفة الكاتب ..
يا خال دا تطور جميل ..

والجماعة دايرين تحريش بس ..

[خالد الحاج]

المشاركة الأصلية كتبت بواسطة معتصم الطاهر

يا خال ..
سلامات ..

مافى داعي نقول شغل سمح .. وجميل ..
دايرين الملاحظات/ سميها .. نقد مفيد / .. للخال و لجميع الكتاب ..

سأواصل كل يوم مداخلتين حتى لا أزحم الناس بكثير من الملاحظات ..

وليه ما تقول شغل سمح يا باش؟ ده لو فعلآ الشغل سمح يعني.
أذكر نقدك لي في أكثر من نص وأزعم أنني استفدت كثيرا منه
خاصة من نواحي "التحرير" ، "اللغة" .
يهمني أن أعرف أن كان هنالك تقدم و "أين" . أيضا إن كان هنالك مسالب و "أين" ..

وتاني حبابك .

[معتصم الطاهر]

[align=center]الزمان والمكان ..[/align]

فى هذه القصة .. بتداخلاتها و شخوصها و تعقداتهم و السياسة و الاجتماعيات ..
و كثرة المواضيع التي طرحتها ..
زمانا .. تدور أحداث ووقائع القصة خلال ثلاث أمسيات ..فقط .
وهذا تطور فى كتابة خالد الحاج .. حصر قضايا فى ثلاث ليال ..


أما المكان فهو ركن ليجب أن ننظر إليه كركن أساسي أكثر من الأحداث ..
المكان الرئيسي الذى تدور حوله القصة هو" نادى الأسرة "
فكأنها قصة مكان .. أكثرر منها قصة شخوص
كأنها أولاد حارتنا ..

و الأماكن تكاد تنحصر فيه لولا خروجه للمقرن - عيادة و أتى على ذكر الداخلية -و المعمل فى شارع الدكاترة .. وهذه اكيد فطنة الكاتب حتى لا نعرف من حقيقة د.سمية ..
فحتى منزل د. سمية هو أقرب الى النادي ..

فهل يا ترى هي قصة مكان ؟

[سارة]

المشاركة الأصلية كتبت بواسطة فتحي مسعد حنفي

ياها دي السلبطة ذاتا الجاب السجانة للخرطوم تلاتة شنو يا سارة وللا الكيزان باعو أرض ميدان عبد المنعم وعملوا النادي المرحوم في السجانة قبل ما يدوهو الضربة القاضية

:mad: انا سلباطة ..خلاص رجع لى رسايلى والصور العندى شيلها

ياخ بيتهم نمرة تلاتة وبتركب بص السجانة الكحلى بالخط الاصفر داك وبتنزل فى محطة اسمها

عشرة دقائق صحى هم محسوبين نمرة تلاتة لكن نحنا بنقول السجانة وبيت جدى على بخيت علم على راسه

نار الله يرحمهم بالجنةويرحم النادى وايام النادى

[فتحي مسعد حنفي]

المشاركة الأصلية كتبت بواسطة سارة

:mad: انا سلباطة ..خلاص رجع لى رسايلى والصور العندى شيلها

ياخ بيتهم نمرة تلاتة وبتركب بص السجانة الكحلى بالخط الاصفر داك وبتنزل فى محطة اسمها

عشرة دقائق صحى هم محسوبين نمرة تلاتة لكن نحنا بنقول السجانة وبيت جدى على بخيت علم على راسه

نار الله يرحمهم بالجنةويرحم النادى وايام النادى

رسايلك ما برجعها ومحتفظ بيها لليوم الأسود وصوري جيبي المبخر أحرقيهم فيهو واتبخري بيهم
وجنب نادي الأسرة مافي غير بخيت واحد وقصدي ناس صلاح بخيت وعبد الحميد بخيت وجنبهم بلقيس ركابي ويوسف حسين(الدب) ولي قدام بيت حسن كريازي ود الداية وحسن فهمي ولو دايرة الجهة الرابعة بجيب ليك الساكنين فيهانتي دخلتي في الحلة الغلط ياسارة وكان دايرة بيت جدك الفي السجانة بجيب ليك جيرانكم منو من الأربعة جهات

[خالد الحاج]

المشاركة الأصلية كتبت بواسطة فتحي مسعد حنفي

رسايلك ما برجعها ومحتفظ بيها لليوم الأسود وصوري جيبي المبخر أحرقيهم فيهو واتبخري بيهم
وجنب نادي الأسرة مافي غير بخيت واحد وقصدي ناس صلاح بخيت وعبد الحميد بخيت وجنبهم بلقيس ركابي ويوسف حسين(الدب) ولي قدام بيت حسن كريازي ود الداية وحسن فهمي ولو دايرة الجهة الرابعة بجيب ليك الساكنين فيهانتي دخلتي في الحلة الغلط ياسارة وكان دايرة بيت جدك الفي السجانة بجيب ليك جيرانكم منو من الأربعة جهات

يا فتحي مبروك شايفك أخيرا قدرت علي الكوت .

بعدين يا أخي سارة معاها حق . إنت بتوصف في الجهة شمال النادي وهي الأقرب للسكة حديد حي ناس لنا جعفر وناس شناوي وإبراهيم فؤاد الصعيدي وعماد محمد عبد الغني وأل بشير هود وخالد وجمال ومحمد آل حسبو وناس بلقيس ونعناعة الركابي وبابكر بيا ويوسف حسين وجيدة وحتى ناس شناوي وحمدي القوصي .إلخ.. وهي تصف الجهة الجنوبية الغربية من النادي حيث ناس عمك محمد الخليفة وأبوعبيدة محمد والخال علي ميرغني عليه الرحمة..
محطة عشرة دقايق في ثلاثة يا فتحي وبعدين الفرق بين تلاتة والسجانة هو الظلط الذي يقودك من القسم الجنوبي وحتى حديقة القرشي ، يعني لو إنت قاعد في نادي بوهين وده بيعتبر في السجانة ممكن براحة تتونس مع يوسف تخستي و أولقا وهي تجلس في دكانها في الجهة المقابلة يعني في تلاتة .
يا خواجة سيب السلبطة .

[فتحي مسعد حنفي]

المشاركة الأصلية كتبت بواسطة خالد الحاج

يا فتحي مبروك شايفك أخيرا قدرت علي الكوت .

بعدين يا أخي سارة معاها حق . إنت بتوصف في الجهة شمال النادي وهي الأقرب للسكة حديد حي ناس لنا جعفر وناس شناوي وإبراهيم فؤاد الصعيدي وعماد محمد عبد الغني وأل بشير هود وخالد وجمال ومحمد آل حسبو وناس بلقيس ونعناعة الركابي وبابكر بيا ويوسف حسين وجيدة وحتى ناس شناوي وحمدي القوصي .إلخ.. وهي تصف الجهة الجنوبية الغربية من النادي حيث ناس عمك محمد الخليفة وأبوعبيدة محمد والخال علي ميرغني عليه الرحمة..
محطة عشرة دقايق في ثلاثة يا فتحي وبعدين الفرق بين تلاتة والسجانة هو الظلط الذي يقودك من القسم الجنوبي وحتى حديقة القرشي ، يعني لو إنت قاعد في نادي بوهين وده بيعتبر في السجانة ممكن براحة تتونس مع يوسف تخستي و أولقا وهي تجلس في دكانها في الجهة المقابلة يعني في تلاتة .
يا خواجة سيب السلبطة .

يعني ياخالد بعد وصفي دا كلو برضو أكون بتسلبطانت ياخي مفروض تصفق لي عشان أنا زول من بحري وعارف الناس ديل كلهم.لكن انت العرفك الناس ديل كلهم شنو؟انت ساكن هناك وللا برضو زيي متسلبطوهي مرت صلاح بخيت عملت ليها دكان

[فيصل سعد]

المشاركة الأصلية كتبت بواسطة خالد الحاج

ناس سودانيات أحبطوني المرة دي يا ممكونة ، نشرت التجربة دي في البركل وسودانيات بالتزامن
نجحت بصورة غير عادية في البركل ، أما سودانيات فوحات خوتك بطني طمت ويظهر أني شترتها في حتة ما أو قولي أشوف لي شقلة تانية(

احباط شنو يا ابن العم بوستك مسجل 55 مشاركة و 530 زيارة في اربعة يوم ، و دي في منبرنا دا نسبة ممتازة و بوكسنج يدخلك الجامعة توووش دا غير انه اخوك شغال ليك تبويب و ترقيم و فقرات و فواصل و انت ما حاسي .. اما ذكرياتي مع نادي الاسرة اذكر انني في بواكير الصبا في الابتدائية و المتوسطة كنت اعاون في الاجازات المدرسية عمي "سعد بلنجة" صاحب كشك الجرايد و توتو كورة في الركن الجنوبي الغربي للنادي و الكلام دا 75 - 78 .. و اذكر من اصدقاء تلاتة و الاحياء المجاورة في فريق الشبيبة بالرابطة في ميدان الجيل البعيو اخوان ، فيصل لاسكو ، فيصل عباس فضل، و بطرس و جورج اخوان و احمد حنتوش و نادر عبد الحفيظ .. و الراحل سعد محي الدين و الراحل يوسف دحية رحمهما الله..

[خالد الحاج]

المشاركة الأصلية كتبت بواسطة فيصل سعد

احباط شنو يا ابن العم بوستك مسجل 55 مشاركة و 530 زيارة في اربعة يوم ، و دي في منبرنا دا نسبة ممتازة و بوكسنج يدخلك الجامعة توووش دا غير انه اخوك شغال ليك تبويب و ترقيم و فقرات و فواصل و انت ما حاسي .. اما ذكرياتي مع نادي الاسرة اذكر انني في بواكير الصبا في الابتدائية و المتوسطة كنت اعاون في الاجازات المدرسية عمي "سعد بلنجة" صاحب كشك الجرايد و توتو كورة في الركن الجنوبي الغربي للنادي و الكلام دا 75 - 78 .. و اذكر من اصدقاء تلاتة و الاحياء المجاورة في فريق الشبيبة بالرابطة في ميدان الجيل البعيو اخوان ، فيصل لاسكو ، فيصل عباس فضل، و بطرس و جورج اخوان و احمد حنتوش و نادر عبد الحفيظ .. و الراحل سعد محي الدين و الراحل يوسف دحية رحمهما الله..

ترقيمك لاحظت ليه والله يا فيصل وبرفع فيك شكوي التعديل دون موافقة صاحب البوست

الكشك كان علامة بارزة ومن الأشياء الغريبة كان هنالك كشك جرايد شرق النادي فاتح علي مدرسة الخرطوم الجديدة وواحد شمال النادي فاتح علي بيت ناس جيدة بالإضافة للكشك جنوب النادي وما دمت بتقعد هناك يا فيصل بالله رأيك شنو في آيسكريم وحيد ؟؟ مش حاجة ما تخلص ؟
أما كشك الجرايد القريب من بيت ناس حمد الله في الجزء الجنوبي الغربي من حديقة القرشي جوار الكبانية ومدرسة الخرطوم جنوب 2 المتوسطة فأعمل حسابك سيدو بتاع طين

[فيصل سعد]

بتاع الطين اظنك ردفته و فسحته بالفيسبا في سوق الموردة يا ابن العم ، و هو متمنظر بانك برغله و عفاك من حق التصليح ولا شنو ؟؟ ، بعدين انا اقوليك نادي الاسرة تشبكني حديقة القرشي المجاورة لمنازل اعمامي الرشيد بحيري و مامون بحيري رحمهما الله..