شفوت الخليج

[أبوبكر عباس]

يقال انو الناظر محمد صديق طلحة يرحمه الله، ناظر البطاحين أهدى البعير المقصص لأحد شيوخ الإمارات، و تم نقل المقصص بطائرة خاصة من السودان و ركب مع المقصص عشرين بطحاني من غير جوازات و بالطبع بدون تاشيرة...

حقق المقصص أرقام قياسية في السباقات لم يحققها بعير حتى الآن.
كان الشيخ يرسل المقصص بطائرة خاصة عشان يُقيّط* في البطانة و في الشتا يعود المقصص و معه عدد جديد من البطاحين.
ما زال البطاحين و معظم الذين يعملون في مجال الإبل (شكرية و جعليين و لحويين و كواهلة و أهل الرهد...)، ما زال هؤلاء الناس لا يتقيدون بقوانين الهجرة بدول الخليج، يكاد يكونوا الوحيدين البقدروا يتنقلوا بين دول الخليج بدون تأشيرة و في حالات كثيرة بدون جوازات بالرغم من بصمة العين.
قُصرو:
الناس ديل بالرغم من مؤهلاتهم البسيطة، لكنهم ناجحين نجاح شديد و ممكن نقول عليهم: مبدعون

هامش:
يُقيّط = يُصيّف

[أبوبكر عباس]

عبد الله القصير:
جعلي من شرق شندي من العالياب و قبل جعليتو هو أبالي، حافظ القرآن بأكثر من قراءة، عمرو حوالي 22 سنة
قال لي: جيت الأمارات دي و إشتغلت لي مع واحد سعودي و عمل لي إقامة و كان بديني ألف درهم، قبل تلاتة سنوات جيتو في مجلسو و كان ربعو قاعدين معاهو، وقفت ليهو في نص المجلس و قلت ليهو:
هوي يا ريال المعاش بتاعك دا شوية و ماهو مقضيني، زيدو و لا بهج منك...
قال لي ما بزيدك آ الخايص و كدي أقدر هج عشان أسلمك الشرطة
قال لي: بكرة من الصباح هجيت و سويتلو تلفون قلت ليهو يا ريال أنا هجيت خليك انت والشرطة تلمو فوقي.
عبد الله دا ليهو تلاتة سنوات قاعد بدون جواز و مطلوب من الشرطة و بسوي في بزينس جيد في مجالو و أنا مرات بشتغل معاهو.
اليوم الصباح دق لي تلفون قال لي: تعرف أخوك وين؟
أنا يا سيد أبوك قاعد مع مدير جوازات أبوظبي و الله العظيم أول ما دخلت المكتب و قعدت قلت للولد: صب قهوة يا وليد.
المدير شال التعميم و الحرمان و ح يعملو لي إقامة حرة على واحد من ناس مكتبو
أها شنو ليك؟ أخوك خطير و لا ما خطير؟

[حافظ اسماعيل احمد]

المشاركة الأصلية كتبت بواسطة بابكر عباس

هامش:
يُقيّط = يُصيّف

طيب انت السنة دي مقيَط وين ام هي كلمة خاصة بالابل والرعي


بابكر عباس سلامات

[أبوبكر عباس]

المشاركة الأصلية كتبت بواسطة حافظ اسماعيل احمد

طيب انت السنة دي مقيَط وين ام هي كلمة خاصة بالابل والرعي
بابكر عباس سلامات

هي جايا من القيظ الحر الشديد و عكود قال كدا صاح

[عباس الشريف]

بابكر بي طريقتك دي لي قدام بتبقي كاتب وباحث كبير عن الالبل وعالمها ةممكن تعمل ليك برنامج تسميهو عالم الابل

بطريقة جادة والله يا بابكر اول مره تعمل ليك بوست حلو منتظرين حكاويك ولي قدام بندعمك

[عبدالمنعم الطيب حسن]

المشاركة الأصلية كتبت بواسطة بابكر عباس

عبد الله القصير:
جعلي من شرق شندي من العالياب و قبل جعليتو هو أبالي، حافظ القران بأكثر من قراءة ، عمرو حوالي 22 سنةقال لي: جيت الأمارات دي و إشتغلت لي مع واحد سعودي و عمل لي إقامة و كان بديني ألف درهم، قبل تلاتة سنوات جيتو في مجلسو و كان ربعو قاعدين معاهو، وقفت ليهو في نص المجلس و قلت ليهو:
هوي يا ريال المعاش بتاعك دا شوية و ماهو مقضيني، زيدو و لا بهج منك...
قال لي ما بزيدك آ الخايص و كدي أقدر هج عشان أسلمك الشرطة
قال لي: بكرة من الصباح هجيت و سويتلو تلفون قلت ليهو يا ريال أنا هجيت خليك انت والشرطة تلمو فوقي.
عبد الله دا ليهو تلاتة سنوات قاعد بدون جواز و مطلوب من الشرطة و بسوي في بزينس جيد في مجالو و أنا مرات بشتغل معاهو.
اليوم الصباح دق لي تلفون قال لي: تعرف أخوك وين؟
أنا يا سيد أبوك قاعد مع مدير جوازات أبوظبي و الله العظيم أول ما دخلت المكتب و قعدت قلت للولد: صب قهوة يا وليد.
المدير شال التعميم و الحرمان و ح يعملو لي إقامة حرة على واحد من ناس مكتبو
أها شنو ليك؟ أخوك خطير و لا ما خطير؟

بابكر عندي احساس انو حافظ القران دي وباكثر من قراءة
واسعة شديد مع البل دي والزوغة من الكفيل
اتفق معك ان هؤلاء الناس البسطاء فعلا مبدعون لكن ليس على الاطلاق
احكي ...ولا يهمك
من البل لرعاتها
نحن نحب البل جدا...
ونحبك

[الرشيد اسماعيل محمود]

المشاركة الأصلية كتبت بواسطة بابكر عباس


ما زال البطاحين و معظم الذين يعملون في مجال الإبل (شكرية و جعليين و لحويين و كواهلة و أهل الرهد...)، ما زال هؤلاء الناس لا يتقيدون بقوانين الهجرة بدول الخليج، يكاد يكونوا الوحيدين البقدروا يتنقلوا بين دول الخليج بدون تأشيرة و في حالات كثيرة بدون جوازات بالرغم من بصمة العين.

قُصرو:
الناس ديل بالرغم من مؤهلاتهم البسيطة، لكنهم ناجحين نجاح شديد و ممكن نقول عليهم: مبدعون

بابكر سلامات..
يعني عدم تقيّدهم بقوانين الهجرة بدول الخليج وتنقلهم بدون جوازات
بخليهم مبدعين..!!!
أنا شايف مفردة شفتنة أصحّ من إبداع.

[أبوبكر عباس]

المشاركة الأصلية كتبت بواسطة عباس الشريف

بابكر بي طريقتك دي لي قدام بتبقي كاتب وباحث كبير عن الالبل وعالمها ةممكن تعمل ليك برنامج تسميهو عالم الابل

يا زول الموضوع دا جزء من ممارسة حياتي اليومية و أصبح عندي حاجة، ما عارفها إيجابية و لا سلبية و هي: إختلاط الشغل مع جزء كبير من حياتي الإجتماعية يعني البوش دي صعب تكون هي بس عملك.
انت يا عباس داير تغشني بكاتب و باحث كبير وداير تلحقني أدباء أول يناير أصحاب الزمن

[طارق صديق كانديك]

ياخي شِفت انت والله .. !!

[أبوبكر عباس]

المشاركة الأصلية كتبت بواسطة عبدالمنعم الطيب حسن

بابكر عندي احساس انو حافظ القران دي وباكثر من قراءة
واسعة شديد مع البل دي والزوغة من الكفيل

عبد المنعم سلامات
إتصلت على عبد الله قلت ليهو:
عبد المنعم من السعودية شاكي انك ما حافظ القرآن عشان هجيت من كفيلك و عشان انت راعي إبل؟
قال ليك يا عبد المنعم: شوف آ زول لو الدين بتاعك دا بدي الكفيل يتحكم في حريتي، دا طرفي من الدين كلو خلي حفظ القرآن و بعدين العلاقة شنو؟ موش ممكن غير مسلم يكون حافظ القرآن؟* دا علم

أنا جبت حكاية حفظ القرآن بأكثر من قراءة في إشارة لمعدل الذكاء

* السؤال الأخير دا حقي أنا لكن عبد الله مستعد نختبرو و قال ليك الرد بالسد

[أبوبكر عباس]

المشاركة الأصلية كتبت بواسطة الرشيد اسماعيل محمود

بابكر سلامات..
يعني عدم تقيّدهم بقوانين الهجرة بدول الخليج وتنقلهم بدون جوازات
بخليهم مبدعين..!!!
أنا شايف مفردة شفتنة أصحّ من إبداع.

تم تأخير الرد على الرشيد حول تعريف الإبداع لنهاية البوست

[أبوبكر عباس]

المشاركة الأصلية كتبت بواسطة طارق صديق كانديك

ياخي شِفت انت والله .. !!

سلامات طارق
يا أخي أنا لو شفت كان بقيت أمين عام!
لكن ما في مشكلة السنة الجاية انت تبقى الأمين العام و أنا رئيس المجلس و نترس المنتدى بناس مدني، و نجيب لينا اتنين تلاتة كدا من أم درمان لزوم التغطية

[همس الشوق]

الشفوت ديل زاتم
مش ياهم البرقصوا في حفلات دبي

[ابرا]

المشاركة الأصلية كتبت بواسطة بابكر عباس

سلامات طارق
يا أخي أنا لو شفت كان بقيت أمين عام!
لكن ما في مشكلة السنة الجاية انت تبقى الأمين العام و أنا رئيس المجلس و نترس المنتدى بناس مدني، و نجيب لينا اتنين تلاتة كدا من أم درمان لزوم التغطية

عباس ناس ام در ما بنقادو والعجب لو بقوا مدنيون

[معتصم الطاهر]

عباس
سلامات

شفوت دى جميلة ..
و استمتع بكتابتك ..
ولنا هنا شفوت .. بجيك بيهم ..