شفوت الخليج

[همس الشوق]

المشاركة الأصلية كتبت بواسطة بابكر عباس

سلامات طارق
يا أخي أنا لو شفت كان بقيت أمين عام!
لكن ما في مشكلة السنة الجاية انت تبقى الأمين العام و أنا رئيس المجلس و نترس المنتدى بناس مدني، و نجيب لينا اتنين تلاتة كدا من أم درمان لزوم التغطية

لزوم التغطيه ولا البرستيج
شفته كيف برضو ناس امدرمان ما بتستغنو عنهم

[زول الله]

واحداً لينا من اهلنا الرباطاب جا قبل 8سنين بي إقامة حقت زول تاني وبي إسم مختلف
قال مشى بات في شارع النيل والصباح مشى الداخلية لقى ضابط كبير داخل
مسكو من يدو وقال ليهو انا جايي من البلد امبارح ونايم في البحر دا و راجيك
وبدورلي جواز سفر ولو مااديتوني ليهو من هنا ماماشي ..وقعد ليهو قدامو في الواطا
الضابط قعد يضحك وساقو معاهو جوه وعمل ليهو جواز بدون جنسية ولا اي اوراق
إشتغل في مدينة الخرج 3سنين وعمل مشكلة مع كفيلو دقاهو وشال عربيتو وجا الرياض
شغال في الرياض سنتين بدون إقامة ولا جواز ومشى نهائي بي وثيقة سفر مؤقتة
الناس ديل ببساطة متوكلين وحاجاتهم كلها على الله واليحصل يحصل
و زولك دا من النوع المتوكل على الكريم ومابتجيهو عوجة
بابكر سلامات













اقول قولي هذا واستغفر الله لي ولـ خالد الحاج ..................

[حاتم مرزوق]

الكلام عن الإبل ذاتو إبداع يا بابكر ومن المعروف أن أهل البطانة شعراء وأدباء وأصحاب خيال واسع ذلك لأنهم يعيشون فى منطقة يطلقون فيها البصر ويتأملون السماء ليلاً وينظرون إلى قدرة الخالق فى الحيوانات وقد ذكر الله فى القرآن (وَالْخَيْلَ وَالْبِغَالَ وَالْحَمِيرَ لِتَرْكَبُوهَا وَزِينَةً ۚ وَيَخْلُقُ مَا لَا تَعْلَمُونَ )

وكلمة زينة لوحدها تدل على الإبداع لذلك إكتسب أهل البطانة وغيرهم من الذين يهتمون بتربية الحيوان مكاسب كثيرة لغوية ، شعرية ، حسية ومعنوية كما أنهم يتميزون بفصاحة اللسان والدهاء وما فعل صاحبك إلا من مكتسبات النشأة.

خطرت ببالى بواكير طفولة النبى صلى الله عليه وسلم حيث أرسله عمه إلى ضاحية بنى سعد وهى بيئة شبيهة ببيئة البطانة لتعلم اللغة السليمة والبعد عن الأمراض فمكة كانت مزار للعرب من كل حدب وصوب لذلك تختلط فيها اللغة العربية وتضعف كما أنها مورد للأمراض لنفس السبب. لذلك كان النبى صلى الله عليه وسلم هو الأفصح لساناً والأروع بياناً وزاده الله بأن آتاه جوامع الكلِم.

موضوعك جميل.

[تحفة حوا]

اقتباس:
اقتباس:

الناس ديل ببساطة متوكلين وحاجاتهم كلها على الله واليحصل يحصل
و زولك دا من النوع المتوكل على الكريم ومابتجيهو عوجة


بالضبط كدا الزول دا موكل الله
ومن توكل على الله فهو حسبه

[عثمان]

يا بابكر سلامات
عندي سؤال يا بابكر
مرة في مشاهدة لسباق الهجن عادتاً البيركب في الإبل بيكونو أطفال مش كدة؟
حتى فاكر الملك عبد الله عاهل المملكة سلم على الأحرز المرتبة الأولى وسأله قال ليه "إنت من فين؟ من السودان" وعلى حسب ما سمعت إنو الأطفال ديل بيعانوا شديد هناك ياريت لو تحكي لي حاجة عن الجانب ده.
مشكور يا بابكر وأسف لو خربت ليك رصة البوست

[أبوبكر عباس]

المشاركة الأصلية كتبت بواسطة همس الشوق

الشفوت ديل زاتم
مش ياهم البرقصوا في حفلات دبي

همس الشوق
يا هم يا همس هم نفسهم البزهجوكم في الحفلات ديك
و بيكونوا من بالليل جابوا الفودكا من عجمان و بيجوا يرقصوا في الحفلات العامة و ناس ام درمان يعوجوا في خشومم و يقولوا:
دا شنو التخلف دا؟

[أبوبكر عباس]

زول خرافي
سلامات
هو كمان في شئ في السودان دا ممكن يبقى من غير ناس أم درمان؟!

[أبوبكر عباس]

معتصم سلامات
تعرف الشفوت ديل أحب مناطق بالنسبة لهم
دبي، أبوظبي و الدوحة
يا أخي لو عندك علاقة مع ناس قناة الجزيرة إقترح عليهم نصور حلقة على شاكلة برنامج مراسلون عن الشفوت في الخليج و ممكن نصوروا في الدوحة و دبي و أبوظبي

[أبوبكر عباس]

المشاركة الأصلية كتبت بواسطة زول الله

و قال ليهو انا جايي من البلد امبارح ونايم في البحر دا و راجيك
وبدورلي جواز سفر ولو مااديتوني ليهو من هنا ماماشي ..وقعد ليهو قدامو في الواطا
الضابط قعد يضحك وساقو معاهو جوه وعمل ليهو جواز بدون جنسية

زول الله سلامات
دا فعلا واحد من أهم الاساليب البستخدموها في قضاء أمورهم
يداهموك و يشدهوك بتصرف غير معتاد

[أبوبكر عباس]

المشاركة الأصلية كتبت بواسطة حاتم مرزوق

موضوعك جميل.

جميل حضورك انت با أنيق

[أبوبكر عباس]

المشاركة الأصلية كتبت بواسطة تحفة حوا

بالضبط كدا الزول دا موكل الله
ومن توكل على الله فهو حسبه

و الله يا تحفة الناس ديل يخطفوها من خشم التمساح
نقول شنو برضو توكل!

[أبوبكر عباس]

المشاركة الأصلية كتبت بواسطة عثمان

يا بابكر سلامات
عندي سؤال يا بابكر
مرة في مشاهدة لسباق الهجن عادتاً البيركب في الإبل بيكونو أطفال مش كدة؟
حتى فاكر الملك عبد الله عاهل المملكة سلم على الأحرز المرتبة الأولى وسأله قال ليه "إنت من فين؟ من السودان" وعلى حسب ما سمعت إنو الأطفال ديل بيعانوا شديد هناك ياريت لو تحكي لي حاجة عن الجانب ده.
مشكور يا بابكر وأسف لو خربت ليك رصة البوست

عثمان كيفنك؟
في الأمارات و قطر بقوا يعملوا ركيب آلي و الكلام دا ليهو يمكن خمس سنوات..

ما متأكد في السعودية لسع بركبوا الشفع و لا لا.
فعلا كانوا بيعانوا شديد

[أبوبكر عباس]

عبد الباقي القلول:
عندو مقدره خرافية على نسج الكدب و دا يا هو الزول المثل لينا المهدي في الفيلم العظيم بتاعنا داك
بكرة بجيب ليكم حكاية:
عبد الباقي ود الصديق ود مُحمد ود عبد الباقي ود الصديق ود حاج عمر حسب تقديم نفسه في المجالس، و الشهير بالقلول

[طارق صديق كانديك]

المشاركة الأصلية كتبت بواسطة بابكر عباس

عبد الباقي القلول:
عندو مقدره خرافية على نسج الكدب و دا يا هو الزول المثل لينا المهدي في الفيلم العظيم بتاعنا داك
بكرة بجيب ليكم حكاية:
عبد الباقي ود الصديق ود مُحمد ود عبد الباقي ود الصديق ود حاج عمر حسب تقديم نفسه في المجالس، و الشهير بالقلول

يا بابكر سلام *

.. بكرة دي ما جات ياخ ... !!

وين الحكاية ... ؟

* سلام راسو عدييل ما بروتوكولي

[طيبان]

المشاركة الأصلية كتبت بواسطة طارق صديق كانديك

يا بابكر سلام *

.. بكرة دي ما جات ياخ ... !!

وين الحكاية ... ؟

* سلام راسو عدييل ما بروتوكولي

*ياطارق بابكر بكون مالامّي في تلفون ( القلول) عشان يشاوروا في مسألة النشر دي ..فشيل الصبر ..

__

سلام يا بابكر ..

* ( ..... )