راكوبة المجادعات.. النمة والدوباي

[منصور المفتاح]

وين فيصل الوارث دقق ناس جدو
وين المتلو دايما فى النجيضه بجدو
ناس عمر الفصيح جبدوهو فوقو وهدو
ويا جبل الكلام القاسى دايما هدو



منصور

[منصور المفتاح]

زمان يوسف نقر قال جايا سبعه عجاف
وقال الخير بقل والحاله تبقى كفاف
علا الناس تقيف من الشغل ما تعاف
وما تخاف الفقر لا زول سمع لا شاف



منصور

[منصور المفتاح]

زمن اللمه داك يا بشرى مركبو عدت
والناس زى وحوش جاريا وعضاها إنهدت
بالغلا والجلا مشهاد جيوبها إنقدت
وقولة هوى سلام مرات كتير ما ردت



منصور

[منصور المفتاح]

جعفر بدرى وين زايد السعال فى شانك
وزايد فينا قدرك يا الرفيع نيشانك
وقت الناس تصر إنت الخريف بيشانك
وزمن الضيق يقع متروسه ناس حيشانك



منصور

[منصور المفتاح]

مرحبتبين يا نوال دايما منجضه درسك
ومرحبتين حبابك ديمه موزون جرسك
الناس يوم تجوبك أنتى مظبوط مرسك
وزرع الناس يبس يا الديمه ناضر غرسك






منصور

[منصور المفتاح]

الفاتن خلهن كج عينك على الواقفات
والجايات كتار من الكريم مرحات
أخوهن ناس نوال جنبا ضرب وعرات
ويا ضيب الخلا اللحاق ندى الجنيات



منصور

[منصور المفتاح]

الناس فى السبارس وإنت قايمو خميسك
وناس شلع الزمان واقف بدور تخميسك
كيس الناس خلا يا الديمه مليان كيسك
ولبن الطير عديل بتجيبو دايما عيسك





منصور

[منصور المفتاح]

شوق الناس مدن وأنا شوقى لى ناس ريفى
ودمى بدفقو لى وعقبان بصونو بسيفى
وكت الناس تهيف ما قالو قط بتهيفى
وضيفك كان غريب فوقو بتهوشى تقيفى

منصور

[منصور المفتاح]

بنقول السلام من جوا أبقو عوافى
ومن قعر البلد دى لينا باقيه منافى
قولكم من دهب مليان معانى وافى
وخيركم لى كتير ممنون وليكم عافى



منصور

[منصور المفتاح]

الزول زى أبو وقولو وفعل شباهو
ونفاق زيو طب بحر الكرم عباهو
مجبد من قديم أهلو البعاد أتباهو
وديدابو المسك شقو القبيل آباهو


ياخ قطعت نفسى يا الشريف دا جبتو من وين



منصور

[منصور المفتاح]

سمح القول رزين ما شال خبر طباهو
وعافاى إن غضب قط مافى زول سباهو
بحر المكرمات من فضلو فاض جباهو
ويات من صاح بدور زى البرق لباهو



منصور

[منصور المفتاح]

جداعة السلام للجنه عنوه بسوقك
وإن بار الدهب دايما بعلق سوقك
زرع المكرمات خابرنو من واسوقك
وكان عدم الشراب زى الحليب بسقوبك




منصور

[منصور المفتاح]

بنتنى السلام بكريهو كان زى دن
وما بندور خلاف الجنه بيهو عدن
بلد الإغتراب حرقت حياتنا سدن
وشالن بيض سنينا وضمه ليها فدن


منصور

[أبو أماني]

اقتباس:
المشاركة الأصلية كتبت بواسطة منصور المفتاح

الزول زى أبو وقولو وفعل شباهو

ونفاق زيو طب بحر الكرم عباهو
مجبد من قديم أهلو البعاد أتباهو
وديدابو المسك شقو القبيل آباهو

ياخ قطعت نفسى يا الشريف دا جبتو من وين

الوافدين جداد ليكم سلااااام مخسوس ..
تنضموا شعر متل التبر .. مرصوص
ريدنا ليكم ظاااااهر حاشا ما مدســـوس
أبدعوا في النم .. أصلو الكلام بفلوس؟

تحية قلبية خالصة للشريف وضيفه الظريف .. حبابك منصور وديمة منصور عليك الله رشهم كلو من زي ده والرهيفة التنقد!

منصور

[أبو أماني]

فخري الزين.. حلااااتك خايلة فيك النمة
رمياتك فرحني .. وقلت المراد .. تمة..
ما أحلى راكوبتنا .. وأحلى أجمل لمـــة
أنا تب جيتك .. بس خللني.. الننجّم..!!!