سودانيات ليست علي الإطلاق صدقة جارية

[سارة]

خضر يا زين كيفنك والمعاك وعساك طيب
كلامك دا

كمنبر للوعي كمنبر ساهم فيهو خالد الحاج عليه أفضل الرحمتات

اجمل ما يمكن ان يسمى صدقة جارية يعنى كونه
سودانيات منبر للوعى والمعرفة كما تفضلت سيادتك دا ما بيمنع ان تظل
الاستفادة منها حسنات فى رصيد من انشاها انا بصراحة ما عارفة المزعلك شنو
فى كلمة صدقة جارية؟؟؟؟؟؟

[أمين محمد سليمان]

المشاركة الأصلية كتبت بواسطة خضر حسين خليل

أنا بتعامل مع المكان ده كمنبر للوعي

شنو البمنع يا خضر إنو الوعي ده يكون صدقة جارية ؟!
بعدين إنت بتتكلم كده كانو لازم الواحد يكتب بنية صدقة ولا بنية وعي ... ياخي كلنا نكتب و نجغمس جغمستنا و ربنا يقبلها صدقة يقبلها وعي دي مافي زول عندو فيها يد !!
-------------
بعدين لمن يجي عمك "عوار اللغة و وهن السياقات" و يقول ليكم شيوعيين كفار ما تزعلو !!

[سارة]

المشاركة الأصلية كتبت بواسطة أمين محمد سليمان

شنو البمنع يا خضر إنو الوعي ده يكون صدقة جارية ؟!
بعدين إنت بتتكلم كده كانو لازم الواحد يكتب بنية صدقة ولا بنية وعي ... ياخي كلنا نكتب و نجغمس جغمستنا و ربنا يقبلها صدقة يقبلها وعي دي مافي زول عندو فيها يد !!
-------------
بعدين لمن يجي عمك "عوار اللغة و وهن السياقات" و يقول ليكم شيوعيين كفار ما تزعلو !!

انت والله شرانى زاتها شوية عليك

[خضر حسين خليل]

وبقراكم وقريتكم وبجيكم
وقنبوا طولا وكتروا لينا من الوشوش الخدراء






ـــــــ
ونهر الصبر قدام يافرد

[مسيكين]

العزيز خضر ،،،
يا حبيب الصدقة الجارية لا تحتاج لتعريف حتى نلجأ للإدارة، كلنا
يعلم ما الصدقة الجارية ،،،
فيما كتب الاخوان والأخوات هنا أجوبة لكل تساؤلاتك، الجماعة الحمد لله
ما خلوا شاردة ولا واردة والموضوع أصلا - من وجهة نظري - لم يكن
محتاج أن تفرد أو تخصص له بوست بحاله ، كان يمكنك الرد هناك وكان
من الممكن الرد عليك في ذات المكان و دون أن نفتل البوست ،،،
على العموم يمكنك أن تكتب - وغيرك - في كل ما يفيد و دون قيود
- إلا قيد اللائحة - و إن كان فيما كُتِب أجر فلخالد نصيب منه إن شاء
الله دون أن ينقص من أجر أحد لأنه ممن سن سنة حسنة بجمعه للناس
في هذا المكان "وهذا من المعلوم من الدين بالضرورة" هذا غير أعمال
الخير الكثيرة التي يمكن أن يتبناها المنتدى ،،،

مساك الله بالخير ،،،

[خضر حسين خليل]

إشراقة أخت دمي

قد لا يكون الكلام ده وكتو يا صاحبة (الكلام أعلاه) لكنني تعودت علي ذلك ترباية أسافير والورح واحدة كما تعلمين .
اليوم أكثر من أي وقتٍ مضي إحتجت حضور خالد في حوليتو القاطعنها ناس مسكين وسارة وامين وبقية المساكين من راسهم .


ـــــــ
يا سارة ومسكين وامين ما تتضايقوا من مساكين الوردت اعلاه رجاءاً فكلنا مساكين في هذه اللحظة وما أحوجنا لنكون مساكين دروب علي الاقل

[خضر حسين خليل]

يا أخوانا مسيكين
يعني هسي بقت علي اناده الفاتح بوست بي جاي وكان في امكانه الرد بهناك او كما تتناضمون في الاسافير والله انا آسف خالص خالص

[أمين محمد سليمان]

مسيكين يا حبيبنا ... ياخي أقول ليك خضر ده شيوعي ... تقول ليه "معلوم من الدين بالضرورة" ؟!!

[خضر حسين خليل]

قلت لي يا أمين شنو البمنع الوعي انو يكون صدقة جارية ؟
إجابتي : الوعي يا أمين


ـــــــــ

أها بدروي أسألك عن فتوي لحكاية الوعي كصدقة جارية الوعي وكون انو الواحد يعمل ليهو منبر كصدقة جارية ؟ لو افترضنا انو المنابر دي بتقدم وعي (يعني مافيها راس نيفة وكوارع وجراد يصروهو ليك في شكل صير)

[خضر حسين خليل]

سارة ومسيكين اعدكم بكرة كان الله اراد اجي ارد عليكم فرادي وجماعات (استباحني الليل) يقول عمرو ود جيرانا .


ــــــ
فرادي وجماعات وجوز ما خسار
ما حبيت اكلفت ردودكم وقلت اجيكم باكر بالدرب عديل

[Ishraga Hamid]

المشاركة الأصلية كتبت بواسطة خضر حسين خليل

إشراقة أخت دمي

قد لا يكون الكلام ده وكتو يا صاحبة (الكلام أعلاه) لكنني تعودت علي ذلك ترباية أسافير والورح واحدة كما تعلمين .
اليوم أكثر من أي وقتٍ مضي إحتجت حضور خالد في حوليتو القاطعنها ناس مسكين وسارة وامين وبقية المساكين من راسهم .


ـــــــ
يا سارة ومسكين وامين ما تتضايقوا من مساكين الوردت اعلاه رجاءاً فكلنا مساكين في هذه اللحظة وما أحوجنا لنكون مساكين دروب علي الاقل

خدر يا عزيزى العزيز
الديمقراطية دى محكاتها صعبة شديد
انا بصراحة ماشايفة فى مشكلة انو اخونا مسكين شايف انو الموضوع حسب وجهة نظره صدقة جارية والمحك هو فى فكرة القبول له كما هو.
المنبر ده جمالو جاى من التعدد اللى فيهو واللى مفروض نحافظ عليه طالما حقوق المواطنة هى اللى حاكمانا.
تعرف وانا صغيرة فى سن عشرة سنوات كانوا ناس بيتنا لمن مايلقونى بيكونوا عارفين يا اما انا مشيت ساحة الرقيص فى الرديف فى كوستى
او واقفة على رصيف الجيران اشاهد باعجاب وانسراب برضو فى الرقص المحموم فى النوبة او الحولية.
دى كانت حلتنا يا خدر فيها كل ده وظل الشكل ده عنوان لمحبة هى شعار سودانيات.
خدر تعال نقرأ تانى اصلاح الخطأ بين الجماهير... ياخ ده من اجمل ادبيات الحزب الشيوعى اللى قريتها وبسببها حبيت عبدالخالق زى ماحبيت زيدان ابراهيم.

[مسيكين]

المشاركة الأصلية كتبت بواسطة خضر حسين خليل

يا أخوانا مسيكين
يعني هسي بقت علي اناده الفاتح بوست بي جاي وكان في امكانه الرد بهناك او كما تتناضمون في الاسافير والله انا آسف خالص خالص

الظاهر إنك ما فهمتني يا خضر ، أنا أعني أنك تعلم ماهي
الصدقة الجارية و أعلم أنك تعلم كيف يمكن أن يكون بعض
ما نكتب أو نفعل من خلال هذا المنتدى يصب في ميزان حسنات
الراحل خالد الحاج على الأقل من باب الوفاء يا رجل ،،،،
أيضا لا أستنكر أن تفتح بوست جديد بالخصوص ،،،

[خضر حسين خليل]

كأني هسي يا شرووق كافر بإصلاح الخطأ في العمل وسط الجماهير ـ أنا دفاعي العملتو لي روحي هسي للمكان ده هو ما نتاج لموقف فكري بعينو وأنا واحد من الناس البخش هنا خاتي قوميتي ولغتي ولهجتي وبلبس قبال أخش علي الخال وضيوفو سودانيتي يا شروق .
انت كان حاسبة مداخلاتك الهنا دي كصدقة جارية لي خالد انا شخصياً ما حاسبها كده لأنو لي يوم هسي دي مافي حاجة اسمها فتوي دينية عشان نضمن الأسافير دي بمداخلات الناس الشتراء منها والصالحة في عداد الصدقات .

بعدين انا مستغرب من حكاية الصدقة الجارية الالكترونية دي
باقية لي زي السبح الصينية الاكترونية البشوفها في ابهام الناس في المواصلات
طرقك طرقك طرقك سبحان الله سبحان الله

بلعبوا لعب يا اشراقة ياخ

[مسيكين]

المشاركة الأصلية كتبت بواسطة أمين محمد سليمان

مسيكين يا حبيبنا ... ياخي أقول ليك خضر ده شيوعي ... تقول ليه "معلوم من الدين بالضرورة" ؟!!

يا بروف عندي صاحبي شيوعي لما أشوفو في الشارع أحيانا
بكبِّر منو اللفه لأنو غالبا ح يسألني يقول لي ما صليت معانا
الصبح في الجامع ليه ؟؟؟
أها ده باقيلك مو عارف المعلوم والمامعلوم ؟؟؟

[Ishraga Hamid]

المشاركة الأصلية كتبت بواسطة خضر حسين خليل

كأني هسي يا شرووق كافر بإصلاح الخطأ في العمل وسط الجماهير ـ أنا دفاعي العملتو لي روحي هسي للمكان ده هو ما نتاج لموقف فكري بعينو وأنا واحد من الناس البخش هنا خاتي قوميتي ولغتي ولهجتي وبلبس قبال أخش علي الخال وضيوفو سودانيتي يا شروق .
انت كان حاسبة مداخلاتك الهنا دي كصدقة جارية لي خالد انا شخصياً ما حاسبها كده لأنو لي يوم هسي دي مافي حاجة اسمها فتوي دينية عشان نضمن الأسافير دي بمداخلات الناس الشتراء منها والصالحة في عداد الصدقات .

بعدين انا مستغرب من حكاية الصدقة الجارية الالكترونية دي
باقية لي زي السبح الصينية الاكترونية البشوفها في ابهام الناس في المواصلات
طرقك طرقك طرقك سبحان الله سبحان الله

بلعبوا لعب يا اشراقة ياخ

خدر يا حبيب اختو انا دى

هل فى مداخلاتى كلها يا خدر فى اشارة لموقفى فيما يخص الصدقة االجارية؟
كدى النبى عيدها تانى
لانو موقفى واضح انو اخونا مسكين بيفتكرها كدى ودى قناعاتو
ونحنا بنشوفها غير.... نحنا دى قاصدة بيها ناس مشاريع الاستنارة اللى بتتطلب مننا قراية عميقة لواقع معقد يا عزيزى.