الإسلام هو الحل

[مبر محمود]

المشاركة الأصلية كتبت بواسطة محسن خالد

ما الذي تعنيه بتعتبر مرجع عقدي لكثير من المسلمين، تحذير، تهديد، تخويف؟ هل تعني –بناء على ذلك- وجب على عبد الله عدم نقد أبي هريرة؟ أو تعال واشرح لنا ما تعنيه بذلك؟
وما الذي تعنيه بـ{أن يتحلى بالحساسية اللازمة وهو يخوض في موضوع حسّاس مثل هذا}؟
هل تعني أنّ المواضيع الدينية هي مواضيع ذات حساسية خاصة ويجب على أي ناقد ودارس التعامل معها بناء على ذلك؟ أو تعال واشرح لنا ما تعنيه بذلك؟
ثم أرنا موقع ذلك من العلمانية التي تنادي بها هذه!؟

يا محسن، موقفي من كلام عبد الله هو موقف قانوني صرف، فالقانون المدني يمنع بحزم التعرض لعقائد المؤمنين بالإساءة أو السخرية أو الإستفزاز، أها وين المشكلة لو نبّهتَ -بطريقتي- الأخ عبد الله لذلك؟! خلينا من دا، وين المشكلة لو نجرت لي إجراءات مدنية علمانية من رأسي دا؟ مش أخير من أنجر لي إجراءات دينية لشكل الدولة من رأسي وأقول للناس الإجراءات دي من الله؟!

بعدين ما تنسى إني كمسلم من حقي أدافع عن عقيدتي بالحجة وبالمنطق في حقل المحاورات الدينية، أوع تجي تقول لي مافي علماني عندو دين، لانو ح أقول ليك دي كانت علمانتك إنتَ فرجاءً ما تحاكمني بيها.

[مبر محمود]

المشاركة الأصلية كتبت بواسطة محسن خالد

هنا في هذا البوست، أنت تدبّر لإدارة الديموقراطية بالتحكّم في العملية الديموقراطية بحيث تمنع حق التعبير والتفكير بالنسبة للجماعات السلفية، أها وتاني فضل شنو من هيلمانة العلمانية؟

يا عمي الحاج، مافي أي منع لحق التعبير والتفكير، في منع لقيام حزب سياسي على أساس ديني، وأفتكر النقطة دي حصل فيها شبه إجماع لأنو مشاكلها لا تحصى ولا تعد، وحتى التيارات الدينية مؤخراً أصبحت على إقتناع بها وتتعامل معها بواقعية، فهي في كل برامجها المجتمعية، الدينية والدعوية منها، تعمل من خلال جماعات وطوائف وفرق، ولكنها في حقل العمل السياسي تخلق أجسام جديدة تكون خالية من أي إشارة دينية.

[Magdy]

سلام ياشباب

قديما قالوا الانتحار سيد الادلة

دا توزيع نسبة الانتحار في العالم


ودا توزيع نسبة التدين في العالم



علاقة عكسيه مافي اي شخشخة (ياقول ناس سنترا )

انا غايتو بالنسبة لي شايف القصة زي ناس عندهم شجرة برتقال

فريق شاف انو شجرة البرتقال دي مريضة

الفريق الشايف انو الشجرة بحاجة للعلاج

قال نجيب غصن يانع نطعم بيه الشجرة(عملية تطعيم النبات المعروفة)

واقترحوا يجيبو غصن ليمون (كطعم)

ولانو اسياد الليمون كتبوا عليه صالح لكل الحمضيات

دايرين يقنعونا انو حايطلع برتقال

والتانيين (اتجاوزوا قصة مرض الشجرة) ووبقوا في قصة انها حاتطلع ليمون

والغريبة اسياد الليمون الاصليين اسي بقوا في مابعد الليمون(العقلاء منهم)

ولسه في ناس داير تقنعنا بالتطعيم السحري يعني لازم نخش الجحر ونتاكد بي نفسنا

اسياد الليمون اسي في اخر مراحل اللامعنى متأيرسين(ايروس) ميه الميه

انتهوا من البالغين وقبلوا حتى على الاطفال والبهائم

نيتشه قتل الاله وبعده بقليل فوكوياما اعلن موت الانسان

واسي كايسين للبرتقال مالاقينوا

دا شوفي غايتو وفتكم بي عافية

[أبوبكر عباس]

المشاركة الأصلية كتبت بواسطة محسن خالد

مالك قطعت آخرها وهو جزء مهم منها؟ من شاء فليقبلها ومن شاء فليرفضها! يعني الناس من حقهم يعملوا حزب يتبنى الرؤى البتعجبهم ومنها الدينية، لأنها رؤى غير مبنية على حتمية، أي هي رؤى في إطار الفكر. لو الكلام دا ما عاجبك ما تصوّت ليهم في الانتخابات.

سلام محسن
معليش علي بتر الإقتباس، والعزاء انو رابط المداخلة كان موجود (السهم الأحمر الصغير). مشكلة الأحزاب الدينية ما مشكلة حرية قبول ورفض؟ الاحزاب المبنية على رؤى دينية لا تعترف بالآخر وسوف تقوم بظلمه في حالة فوزها ديمقراطيا.
الرؤى الدينية لإدارة الدولة تتعارض مع الحقوق الاساسية للإنسان التي تم الإتفاق عليها بالإجماع في الميثاق العالمي لحقوق الإنسان والدساتير التي لابد لها من الإعتراف بحرية الأفراد والمساواة بينهم في الحقوق والواجبات.
كدي أقرأ الوثيقة دي، وورينا كيف ح تقدر توفق بين طرحك الديني لإدارة الدولة والحقوق الاساسية، وح أجي أجيب ليك أمثلة ممكن فيها القوانين الدينية تتعتدي فيها على حقوق الناس.

[أمين محمد سليمان]

المشاركة الأصلية كتبت بواسطة بابكر عباس

كدي أقرأ الوثيقة دي، وورينا كيف ح تقدر توفق بين طرحك الديني لإدارة الدولة والحقوق الاساسية، .

و هل يا بكة الوثيقة دي ملزمة لي كمسلم ؟!

[أبوبكر عباس]

المشاركة الأصلية كتبت بواسطة أمين محمد سليمان

و هل يا بكة الوثيقة دي ملزمة لي كمسلم ؟!

مُلزمة يا بروف لأنك عضو بالأمم المتحدة

[أبوبكر عباس]

رايك شنو يا أمين في إمرأة مشت المحكمة الدستورية طعنت في قانون الاحوال الشخصية البديها نصف نصيب اخوها في مال ورثة، بعدم دستوريته لانو القانون دا، بخالف مبدأ المساواة المٌشار إليه في دستور 2005 الإنتقالي (خليك من ميثاق الامم المتحدة)؟

[أمين محمد سليمان]

المشاركة الأصلية كتبت بواسطة بابكر عباس

رايك شنو يا أمين في إمرأة مشت المحكمة الدستورية طعنت في قانون الاحوال الشخصية البديها نصف نصيب اخوها في مال ورثة، بعدم دستوريته لانو القانون دا، بخالف مبدأ المساواة المٌشار إليه في دستور 2005 الإنتقالي (خليك من ميثاق الامم المتحدة)؟

عشان كده يا بكة لينا مية ساعة بنقول إنو العلمانية بتاعتكم دي بتتناقض مع الدين و مثالك ده أقرب دليل علي كده !! يعني يا ناخد بكلام الله الفي القران يا بدستور 2005 الإنتقالي ده ... مافي شئ في النص .... و عليك الله ما تجو تحنكونا بقصة حفاظا علي الدين من أوساخ السياسية دي !!

[أبوبكر عباس]

المشاركة الأصلية كتبت بواسطة أمين محمد سليمان

عشان كده يا بكة لينا مية ساعة بنقول إنو العلمانية بتاعتكم دي بتتناقض مع الدين و مثالك ده أقرب دليل علي كده !! يعني يا ناخد بكلام الله الفي القران يا بدستور 2005 الإنتقالي ده ... مافي شئ في النص .... و عليك الله ما تجو تحنكونا بقصة حفاظا علي الدين من أوساخ السياسية دي !!

ونحن لينا متين ساعة دايرين نقول ليك: القوانين الإنسانية تقدمت على القوانين الدينية التاريخية ولا تستطيع ان تعيش في عالم اليوم في جزيرة معزولة ولا تستطيع نزع الحقوق الجديدة المكتسبة

[أمين محمد سليمان]

المشاركة الأصلية كتبت بواسطة بابكر عباس

ونحن لينا متين ساعة دايرين نقول ليك: القوانين الإنسانية تقدمت على القوانين الدينية التاريخية ولا تستطيع ان تعيش في عالم اليوم في جزيرة معزولة ولا تستطيع نزع الحقوق الجديدة المكتسبة

خلاس يا بكة .. كل ناس بدربهم ... بس بالله ما تقولو من ضمن أسباب إختياركم لدرب العلمانية ده حرصكم علي الدين و عدم الزج به في أوساخ السياسة !!

[طارق صديق كانديك]

المشاركة الأصلية كتبت بواسطة بابكر عباس

ونحن لينا متين ساعة دايرين نقول ليك: القوانين الإنسانية تقدمت على القوانين الدينية التاريخية

طبعاً كلمة (تاريخية) اللحقت بيها القوانين الدينية، ده فتح كبير أحييك عليه. على الأقل تدي فرصة لي ناس د. القراي ديل وغيرهم يدخلوا في قصة ابتداع قوانين دينية (عصرية).

[أبوبكر عباس]

المشاركة الأصلية كتبت بواسطة أمين محمد سليمان

خلاس يا بكة .. كل ناس بدربهم ... بس بالله ما تقولو من ضمن أسباب إختياركم لدرب العلمانية ده حرصكم علي الدين و عدم الزج به في أوساخ السياسة !!

المشاركة الأصلية كتبت بواسطة طارق صديق كانديك

طبعاً كلمة (تاريخية) اللحقت بيها القوانين الدينية، ده فتح كبير أحييك عليه. على الأقل تدي فرصة لي ناس د. القراي ديل وغيرهم يدخلوا في قصة ابتداع قوانين دينية (عصرية).

شوف يا بروف المسألة بالنسبة لي بحث عن عدالة...
وتوجد قوانين حاليا متقدمة على القوانين الدينية وما شايف شئ بخليني أختار القديم، لكن لو ناس القراي طلعوا لينا بقوانين دينية عصرية لا تتعدى على حقوق الناس، ما عندي مانع
مثلا:
في هذا الوقت لا أقبل قانون يقوم بقطع يد مُجرم، في زمن الدنيا كلها تنزعج لو في زول فقد أي عضو من جسمو وناس الصناعة والطب يساهروا لإيجاد حل يجعل هذا الإنسان مساو للآخرين

في إنتظار الٌقراي

[أسعد]

المشاركة الأصلية كتبت بواسطة بابكر عباس

رايك شنو يا أمين في إمرأة مشت المحكمة الدستورية طعنت في قانون الاحوال الشخصية البديها نصف نصيب اخوها في مال ورثة، بعدم دستوريته لانو القانون دا، بخالف مبدأ المساواة المٌشار إليه في دستور 2005 الإنتقالي (خليك من ميثاق الامم المتحدة)؟

رأيك شنو يا بابكر في رجل مشى لي رجل تاني عشان يشتري منو هيروين قام ما لقى الرجل التاني لانو شرطة (الاداب العامة) فرع العلمانية قبضت علي الرجل التاني بسبب تجارة المخدرات ؟!
مع العلم ان الرجل الاول خرمان لهيروين خرمة شديدة وعاوز يمارس حريتو الشخصية في شم الهيروين
أها الرجل الأول يعمل شنو في بلد العلمانية ذات الحرية والديموقراطية دي؟!

[أمين محمد سليمان]

المشاركة الأصلية كتبت بواسطة بابكر عباس

شوف يا بروف المسألة بالنسبة لي بحث عن عدالة...
وتوجد قوانين حاليا متقدمة على القوانين الدينية وما شايف شئ بخليني أختار القديم، لكن لو ناس القراي طلعوا لينا بقوانين دينية عصرية لا تتعدى على حقوق الناس، ما عندي مانع
مثلا:
في هذا الوقت لا أقبل قانون يقوم بقطع يد مُجرم، في زمن الدنيا كلها تنزعج لو في زول فقد أي عضو من جسمو وناس الصناعة والطب يساهروا لإيجاد حل يجعل هذا الإنسان مساو للآخرين

في إنتظار الٌقراي

يا بكة ... ما عندي أي مشكلة مع أي وجهة نظر ليك و لا لغيرك ... مداخلاتي في البوست ده ما طلعت من حاجتين :
1- العلمانية البتفصل بيها الدين من الحكم معارضة و مناقضة للاسلام
2- ما في زول يقول لينا فكرة إخراج الدين من الحكم من مقاصدها حفظ الدين من قذارة السياسة

[أبوبكر عباس]

المشاركة الأصلية كتبت بواسطة أسعد

رأيك شنو يا بابكر في رجل مشى لي رجل تاني عشان يشتري منو هيروين قام ما لقى الرجل التاني لانو شرطة (الاداب العامة) فرع العلمانية قبضت علي الرجل التاني بسبب تجارة المخدرات ؟!
مع العلم ان الرجل الاول خرمان لهيروين خرمة شديدة وعاوز يمارس حريتو الشخصية في شم الهيروين
أها الرجل الأول يعمل شنو في بلد العلمانية ذات الحرية والديموقراطية دي؟!

شم الهيروين هو تعدي على حرية نفسك (ضرر) والدولة غير الدينية لا تجيزه
المفصل يا أسعد هو: الضرر
قول بصراحة انت داير تقول شنو؟