طيب ...
أبدا بالشي المحيرني ، حكاية لا تنهى عن خلقٍ دي ..
ماجد تاج بناء على رؤاه الشخصية شوعن مهند ، طيب ياماجد لمن حسين بناء على رؤاه وقرائنه المستقيها من كتاباتك طلعك أمنجي وجداد الكتروني كوز مالك قعدت تولول زي ولايا التُكُل ، وشي بكى وشي نفنيف و واااااي وااااي انا جاسوس وااااااي وااااااااي أنا قالوا لي كوز؟!!!!
ح تكون كارثة لو انت راجيني أجي أولول ولولتك دي ليك واقعد أتشنج وأقول للناس واي واي .. مابعملا لأسباب :
أول حاجة لانو المحاولات الرخيصة لاستعداء الناس ضد مهند الخطيب الانت بتمارس فيها دي أهون عندي من جناح ذبابة ومابتستحق مني ولولة وبكا ، طاقات البكا دي انا أحسن أحتفظ بيها لجكسوية ..
ثاني حاجة انو ماراح أفلح لو عملت كده في اقناعك بخطل وركاكة كلامك لأنو حسب البعرفو العساكر مابغيرو رأيم ، او اتجاه واحد ، ح تفضل مقتنع بيه ومصر زي الشفع الصغار واحتمال وانا بقنع فيك تقول ماااااااااااام وتعضي اصبعك وترجع تولول تاني ...
تالت حاجة الولولة بتتعارض مع فكرة الاعتزاز بالنفس والرجالة الاتربيت عليها ، يعني اتعلمت أقلع حقي بلساني و ضراعي لمن غشتني رياح المدنية والتنوير بقيت بألجأ لجهات الفصل ، لكن أولول؟؟ أبدا ياخ دي ليها ناسا ..
المضمون بتاع البوست ده مالو متخبط شديد كده في سكة انو يصل للمقاصد ياحامي بيضة سودانيات يعني مرة بتتسائل زيك زي اي زول ماعارف:
اقتباس:
السيدة لنا جعفر
ومهند الخطيب
شيوعيين
بكون خالفت اللائحة يا أخوانا ؟
أو ع الاقل بكون نسبت ليهم ما ليس فيهم ؟
يعني هل هما شيوعيين بالفعل ؟
|
وجيت بعدها دون أن يرف لك جفن نسيت تساؤلك الأول واتخبطت في سبيل تثبت شي ماموجود وقلت :
اقتباس:
|
هل سيفضي تبوء مهند الخطيب المنسوب سراً وجهراً للحزب الشيوعي
|
هسي ده شنو غير الهرف والخرف والقفز في الظلام ؟ مالك يازول مزعزع ومرتبك الخطاب للدرجة دي؟ مالقيت ليك معطيات ترتكز عليها فاضطريت تنجر لمن ماجاك مهند الخطيب يجاوب على سؤالك؟! هسي لو مهند ده جا قال ليك اثبت وهات أدلتك على عضويتو في الحزب الشيوعي ح تقبل وين؟ وللا ح تجي ترد علي زي مارديت على بدر وتقول ماجميل تحويل الاسافير لقاعات محاكمة في الوكت الانت بتحاكم اهو وبتسأل وبتتقصى وبتحول فيها لمواخير ادعاء مطلوق ساي!!
نجي لموضوع الشيوعية الحامياك النوم (شمار كاتلني أموووت واعرف الشيوعيين ديل سوو ليك شنو) ... طبعا انا قصدي الشيوعية والمنتدى ما الشيوعية العظيمة البرة ، نشوف الشيوعيين والفرص اللقوها لتحرير سودانيات ، وحياة الله تحرير سودانيات دي عاجباني كيف وتاني طوالي بستخدما (طبعا بدون مااستأذنك)
عارف أول ديمقراطية في سودانيات رئيس مجلسا كان منو؟
طبعا ماعارف لأنك ماكنت موجود كعضو برضو وماقاري تاريخ الحتة الانت عامل فيها حادب عليها وبتذود عنها دي ، لكن انا ح أوريك بس حبا في تقعيدك في السهلة الانت قاعد فيها دي ...
أول رئيس مجلس ادارة في سودانيات كان الجيلي أحمد (عادي ممكن تجي تطلعو بعد ده حزب امة) كونك مخلوق بتصنف الناس حسب آرائك المكونة مسبقاً ، يعني بتكون الرأي بعد داك بتبدأ تتخيل الحقايق ...
سؤال تاني :
مجلس الادارة القبل الفات كان من عضوية منو؟
برضو انت ماعارف ، لانك برضو كنت مافيش وماقاري وانا لأني بحب الناس المابقروا وبخشوا امتحاناتم الخاصة وهم ماقاريين جدعنة مني بوريك ..
كان فيها تلاااااااااااااااااااااتة شيوعيين من اربعة(يعني أكتر من هسي) والرابع زاتو شيوعي سرّاً ياعملات علّامين الغيوب ومفتشين السرائر ...
يبقى اللجنة المركزية للحزب الشيوعي فوتت فرصا التاريخية خلاص لاحتلال سودانيات لأنها ماعملتا لمن كانت أقوى في سودانيات ، الحاجة دي بتمنى انك تضمنا في بوستك الجاي اللي ح يكون موضوعو الحزب الشيوعي ، وكان البوست الجاي عن أم التيمان ...اعفي لي...
بعدين ليه التدليس ياماجد وتغيير صبغة الأشياء بقصد تصفية حسابات؟ لا لا انا ماقاصد كذبك وتدليسك في انك قلت مهند شيوعي ، قاصد تدليسك في قولك انو الان يتم عبور خطوط حمر ماكان متاحاً عبورها في عهود سابقة .... على ماأذكر في عهد سابق قريب انت حاضرو في عضوية جات عبرت أبو الخطوط الحمرا وأمها ، وقالو في دينك (خطك الأحمر الأكبر) مالم يقله منو داك ، مش هشام آدم عمل كده؟؟ طيب ليه ماجيت ياحامي حمى سودانيات وملاكها الحارس وأحرص الناس عليها مافتحت بوست طلعت النور يوسف وطارق كانديك ديل شيوعيين أو ملحدين أو ان شاءالله من صغار المستثمرين
كان تطلعم أي حاجة ياخ وللا الوكت داك ماكان لكزوك لسة ؟؟
عنوانك الفاتح بيهو البوست ده هسي لمن تخش كل يوم وتقراهو مابتحس بخجلة كده ، مابتحس انو الطرح الفيهو فطير وفقاعي ومقصود بيهو بيع اكبر عدد من النسخ بغض النظر عن المضمون ؟
طيب .. مهند الخطيب(الأمين العام) ده شيوعي ،ملحد ،يهودي ،بهائي ،شيعي، حشاش ،صعلوك ، نصارني (بعد الضهر) ، وبتبول لا إرادياً ... اها سووو وات؟ انت عندك معاهو شنو غير اللايحة وتطبيقا ، ولو جا مهند ماحمى اللايحة تعال طلع عينو في الموضوع المعين وما عندك شغلة بشيوعيته ، وللا انت مالقيت ليه حاجة تدخل ليهو منها في الشهرين الفاتو ديل وزهجت من الانتظار فقررت تنجر وتهرف وتبتدع المشكلة مدام هي مافيشة وتمسك ليك في أي حاجة والسلام؟
قلت لي جا محمولا على أكتاف الشيوعيين؟ خلاص ياماجد أوعدك المرة الجاية أجي على أكتاف البيرضيك ، الكيزان ، الأمنجية ، او أي أكتاف بتحددا انت ياحامي حمى سودانيات وحامل صكوك نجاعا..
ومابنكر انو كلامك فيه حاجة صحيحة ، مهند الخطيب العضو يجد في نفسه ميلا للحزب الشيوعي ، وميلا للبعثي وميلا للجبهة الثورية وميلا للكودة وميلا لغناء عقد الجلاد وغنا الحقيبة زاتو ، ميلا لأي زول أو جهة واقفة ضد حكم دولة الظلام والخفافيش والأمنجية والعسكر ،لكن الأمين العام لا يأتيه الميل من بين يديه لأنو ملزم بقانون ولايحة هي البتحركو ولأنو أمين عام للموقع شيوعيين وكيزان وشيعة ونصارى وعساكر بوليس وغيرم ، وأول عقوبة تصدر من الأمانة العامة كانت موجهة لشيوعي ، لكن طبعا أنا مابتوقع منك ولا بتعبك بانك تفهم فكرة الفصل بين العام والخاص دي لأنو صعب استيعابا على أي زول ..
كده انت ياماجد استبيت انا على :
*ماجد يكذب ويدلس حين يصنف مهند الخطيب شيوعياً وليس لديه دليل على ذلك ..
* ماجد يستعدي العضوية على مهند مستخدماً مدخل الدين(ده اسلوب كيزاني بالمناسبة ممكن تاني عادي تقول مهند العميل مهند الخارج) عندما لم يجد مخالفة من الأمين العام أو تقصيرا تجاه اللائحة .
سودانيات محمية بلائحة تعب وسهر عليها أعضاء أفاضل هنا (حادبين حقيقيين) ، مامحروسة بمهند ولا ماجد ولا غيرم ، القوانين هي البتحكم الناس يابوليس ما الظنون والهرف ولا الرمي بالغيب ومعارك التحريش واللكز ، تعال رد علي برد عمودي حمّر فيهو كلمتين تلاتة ، مداخلة فساتينية من مداخلاتك المابكون فيها اي اضافة غير شخصنة وكلام عن شخص الزول مافكرتو وأوصف مداخلتي بالردحي ووصف شطوري انهن كبار وأبقى مارق ..... استرح..
