اقتباس:
المشاركة الأصلية كتبت بواسطة سجمان
بعد سمع نمي وغناي قرّاني
قال في شعرو ريدك يا سميري براني
المسّخلي كميع الفي السنن بارّاني
خافس سهمو جوة الجتة مو برّاني
يا تاواقة..
وعارفك لا بتخشي..
ولا بتسوى هواكي صريح
يا دفاقة..
بتهدري دمع الغيم بسهمك..
وترجي هبات الريح..
نضما فاضبو نغم غنواتنا
وليل شلناهو رحيح..
كيف بتقاوي شهاوي اللقيا
وطيفي الزاير
وانا بي بُعدك مرمي نطيح..
كيفن اصبّر قدمي الجاي عليك
يا النبهتي البال بي ريد..
ضهاب في سكة نويح..
ما بليت العين بي شوفتك
يا الشتتي خيالك في السموات الغادي
تقاوي علي النجمات النورا شحيح..
اتجاسر دماسك شمس الله مابية الشرقة
والعين للغميد كايسنلو نسرقو سرقة
كت النوم بجيو ورجولي مابية المرقة
بي صوتك بقت عاداتي ست منخرقة
أفرد مواعيني..
تقيف شهب الحديث..
عنك تواسيني..
مسادير الغنا الناحن..
نم المسافة الطال..
تلولح فوقو ريح الشوق
إلى لمتين..
يضخك فيني لؤم البعد
واشابك فيك أياديني
برّاني ورقد زفر النفس تالاي
مطامن منامو وزاد عليا بلاي
ما دام بصحى من نومو ووجيهو حداي
أنا نومي اليطير لا حولو حتى الجاي
|
لو هفت عليك باكر تخش ديواني
افرح وانبسط نامن تضيقبي معاني
يا باريني يا قالب عليّ كياني
الفحصوني قالوا لقوك في شرياني
ماني بصبر روحي ولا بطراك يوماتي صحبح
شان الريدة ملت وجداني
ومن لقياك تراني بصيح
كل الشافني قرا واستغفر
وقال ما اظنو فؤادي نصيح
درب الريدة الليك مشيتا
وجيت تاتيتا بقلب جريح
انا ما بتبرالي معاك رويح
وأحسن أبقى معاك صريح
أنا كت بتعالى وكت بترفّع
وقولي معاك جدعتو فصيح
حد ما لقيتك شايل الكلمة
بتجدع قلبي في وش الريح
أنا كان باريتك ما بتغشاني بلاك سعادة
بس بيزيدني هواك تجريح
لكن برجاك لو طال الريد
عارفو خلاصي معاك يا مسيح
شايل روحي في يدو ومقبل جاي
ومانع عني طيب وصلو القريب تالاي
أنا كان ضقت وصلك بي كلامك ساي
كيف حيكون لقاك أحذر تكون كاواي
