اقتباس:
المشاركة الأصلية كتبت بواسطة نبراس السيد الدمرداش
مساء الخير
الحمدلله ربنا سهل ووصلت المنظمه وقابلت المدير فارس النور ابراهيم
بعد الترحيب والتعريف وضحت ليهو الفكره بتاعتنا وهدفنا و امكانياتنا شنو حسب ما موضح من خلال الداعمين بالشير وعددهم ومبلغ الشير طلعت بالاتي:
*اهم حاجتين الالتزام هو سر نجاح المشروع,تانيا لازم حصر الطلاب بالضبط كم لانو في بعض الادارات بيحتالوا بعدد غير حقيقي للطلاب
*افطار طالب واحد طيلة العام الدراسي بيكلف 140ج دا باعتبار الغلاء الفي البلد والبكون اثر على مدخلات الوجبه نفسها
يعني بحسبه بسيطه اذا التزم الجميع بمبلغ الشير 200 شهري دا بخلينا نقدم افطار ل 210 طالب
*وجبة الافطار نفسها ممكن تتنوع ما بين الفول و السلطه و البليله حسب الامكانيات وبكون افضل انها تتنوع
*عدم المجاذفه بجودة الافطار..بمعنى انو لو فكرنا نعمل افطار ونساعد اسره من خلال الزامها بعمل الافطار دا بيأثر على الوجبه فيما بعد..الافضل اما زول من المتطوعين يقوم بتجهيز الافطار والالتزام بتوصيلو او الاتفاق مع البوفيه الفي المدرسه او استقطاب معلمه من المدرسه
*الاتفاق مع ادارة المدرسه على طريقه معينه للاشراف على ضمان وصول الافطار للطلبه المعنيين
*اهم شيء ضمان الاستمراريه يعني الناس ممكن تمر بظروف دا بخلاف المرض و الموت عافاكم الله و طول عمركم فالناس تخت في بالها الحته دي
*مراعاة الحاله النفسية للطلاب ودي ممكن معالجتها بعد حصر الطلاب باعطاء كل طالب كوبون يقدمو لحظة الافطار ويستلم فطورو
*شاهدت ريبورتاج صورتو قناة الجزيره عن مشروع افطار تلميذ وكان شيء مؤثر جدا..بيحكي استاذ سيف انو اثناء التصوير لاحظ مراسل القناه انو في طفله بتاكل وبتدس جزء في طرفها فلما اتكلم معاها قالت ليهو دا لاختي لانو في مدرستهم مافي فطور
نموذج تاني مدرسه في منطقة ودالحوري كانت مغلقه بسبب عدم توفر وجبة الافطار بعد مشروع افطار تلميذ اول سنه رجع للدراسه 85 تلميذ والعام الماضي 152 تقريبا
النماذج دي بتوضح اهمية المشروع دا لمجموعه من الطلاب والاسر الممكن تكون منتظرا اولادها متين يخلصو تعليم ويشيلو حملها
الملفت للنظر انو كل الحالات دي في نطاق ولاية الخرطوم فقط والملفت اكثر انو في مدارس في مناطق زي الرياض والمنشيه و الطائف باعتبارها من الاحياء الراقيه مدارسها الحكوميه بتعاني من تسرب الطلبه بسبب وجبة الافطار لانها ببساطه لا يدرس فيها الا البسطاء
ابدى استاذ سيف الاستعداد للتعاون مع سودانيات مع الاحتفاظ بحقها الادبي
طلب انو في حالة حصل شورت في اي وقت اللجؤ ليهم لانو اصعب شيء انو تنقطع الوجبه اثناء العام
كما سمح بانو نستخدم اي ماده مصوره تابعه للمنظمه نلقاها في كل وسائل الميديا من يوتيوب و فيس بوك وانا استاذنتو في اني انزل تقرير قناة الجزيره في المنتدى
بيشكركم جدا وبتمنى ليكم التوفيق
|
رؤية نجيضة و في كامل الوضوح
1.من ناحية تنظيم و إدارة المشروع.
2.من ناحية تقدير و ضبط ميزانية المشروع.
شكراً نبراس
الله يديكي العافية
