سيرة انتخابية ذاتية - خلف الدرديري(زول الله) تعالو وشوفو براكم
طبعا اول التبادي بشكر الاخ فتح العليم شكر كبير جدا على الثقة والترشيح
كما اشكر الاخ عيدروس على التثنية التي اتت من قامة لايستهان بها
واحب انوه الى انه سبق مشاورتي للترشح في دورة سابقة من أخ عزيز وغالي علينا كلنا لكن اعتذرت بسبب تنبؤاتي عما سيحدث في العملية الانتخابية السابقة وقد صدقت توقعاتي تماماً والحمدلله.
اها بعد كدا ندخل في الشغلانية دي ونقول ليكم بسم الله الرحمن الرحيم
خلف بن الشيخ الدرديري المكاشفي
(زول الله) ساااي - أو كما قال بكة ذات مساخة
امدرماني المولد والنشأة والهوى والمثوى بإذن الله
الخلفية والمشارب:
أدب المدائح النبوية المهذبة
وحنية حبوباتنا
وسرعة بديهة اهلنا الرباطاب
وحرورية اهلنا المحس وضكورية الكواهلة
اللون السياسي:
غير منتمي
سوداني فقط أولاً وثانياً وعاشراً زاتو
مع احترام حقيقي وتقدير لكل الاطياف وبحياد تام حتى لو كانوا كيزان
ايوا عشان نكون واضحين من هسه
الخبرات:
مراقب عام -سابق- لمدة 3سنوات في منتدى مجاور وخليتهم اثر خلاف مع صاحب المنبر.
عضو ومشرف في عدد من المنابر المتخصصة والعامة
اها تاني شنووو تاني شنوووو
ايوا بالنسبة لمجلس الادارة اعتقد بصلاحية التغيير للافضل و ح اعمل البقدرني عليهو ربنا ولو اخفقت ف عادي لاننا كلنا خطاؤون والعبرة بالنهايات.
بس في حاجة مهمة
انا زول حقاني شديد ووااااااضح زي الشمس الفوق ديك ومابعرف اتفق اتفاقات سرية
يعني عادي ممكن ابوي يزعل مني في كلمة حق قلتها ليهو قدام الناس
ف ارجو انو الناس تكون عاملة حسابا للحاجة دي بالذات الزملاء في المنبر والمجلس
دا بإعتبار ماسيكون واذا كان طبعا
اخر شيء:
ماعندي ليكم طريقة بتاعة حشد او استنفار ومابعرف اكضب
ف البجي داخل هنا مشكوووور سنة وستة شهور
والمابجي برضو مشكوور فقط ستة شهور وماعندي ليهو زيادة
واصواتكم امانة في اعناقكم ادوها لمن تحسبونه القوي الأمين سواء كنت انا او زول غيري
انتخبوا مرشحكم خلف الشيخ الدرديري المكاشفي(زول الله) البخت النقط فوق الحروف
اقول قولي هذا واستغفرالله لي........................
التعديل الأخير تم بواسطة زول الله ; 19-11-2014 الساعة 12:40 PM.
|
