العيون متل الفناجين

[imported_رأفت ميلاد]

الكلام ليك يا المنطط عينيك ..

اليومين ديل شغال (مدير مديرية) زى ما بقول أبوى لامن (يقرق) على زول منفوخ على الفاضى .. شغال جوة تلاجة .. آى ولاى ما بهزر .. (ولاى) دى زى ما بكتبا الحلبى ..

عزاى الوحيد أنى الراجل الوحيد وسط 7 نسوان .. يعنى ما تالتاتن .. تامنتن واحدة تركية إسمها (أجيجة) .. بناديها (خجيجة) .. جات تصلحنى ..قلت ليها (أجيجة دى موش مرت النبى محمد؟) .. فنجلت عيونا وقالت لى (تمام) .. قلت ليها (أنا بناديك بلغتى) .. وافقت بإبتهاج ..

وواحدة شافعة بوسنية .. إسمها (مدينة) أتذكرت بابكر مخير .. ومشغلا على حسابى .. التالتة سويسرية إسمها (أنّا) .. أحتجت لطريقة معاملتى لى مدينة .. قلت ليها (مدينة قدر بتى) .. قالت لى (مدينة عمرها 21 سنة) قلت ليها أنا بتى 23 سنة .. (فغرت فاها) الشئ الذى أطربنى وشعرت لسة فينى رقشة ..

الأربعة البقاقين ألبانيات (شكرية وحميدة وياسمين وتفيدة) .. شكرية قصيرونة ومدغلبة .. رغم حركتا الخفيفة صعب الزول يقلها .. سمحة وعيونا مفنجلات .. أول مرة أعرف (العيون متل الفناجين) وصف دقيق لجمال العيون ..
زرتنى بعاين فى عيونا .. جاتنى ببراءة تسأل كنت داير مساعدة .. قلت ليها (شكراً مافى جاجة .. بس عيونك سمحات) .. ضربت لخمة وقالت لى (شنو .. عيونى أنا .. شكراً)..

زاد إهتماما بى .. يوم أتكلمت معاى ملخومة ألبانى .. ضحكت وضحكت معاى .. قالت لى (أنت لغتك شنو) .. لامن قلت ليها عربى هللت وقالت لى يعنى مسلم .. قررت أن لا أخذلها وجاوبت يالإيجاب .. سألتنى عن أسم مبسط أحب أن تنادينى بيهو
قلت ليها (أنتيمو)