(سوق الزمن).. قصيدة من تأليفي
ســوق الــزمـن
يا ساعي في سوق الزمن
مغصوب تبيع حقك جبُر
كم ياما دودرت الصعب
نشّفت ريق خيل الصبُر
والخوف بدورك ترتهِن
حالف يمين الإ القبُر
رغم الكوارث والمِحن
تبْ من مكانك ما بتَتُر
لا غيّرَتْ فيك الظروف
لا زحزحك زمن الفقُر
يا زول ملفّح بالهجير
ضايق طعم للدنيا مر
ما عاجبو في الناس حالتُن
دا أصلو حالاً ما بسُر
أوعاكا في يوم تنكسر
أصلك يمين من قمت حُر
عارف يقينك بالرزق
دغشيه قايم في الفجُر
ما قلت شِن طعم التعب
دا أصلو بالذات الكُفُر
والدنيا لو ضاقت عليك
بتعدي اياما وتمُر
شان تطفي نيران الحريق
لا بدّ من توطا الجمُر
والناس معادن عايشُم
شيتاً أصيل.. شيتاً كُتر
أحسن إليهم كلّهم
ما ترجا من زولاً شُكُر
تلقا البدورك منشرح
وبتلقا في جواهو دُر
والزول وكت ياباك عديل
تحسن إليهو وليك يضُر
أوفِي حق الريده يوت
فرضاً عليك واجب.. نُذر
لو تلقا زوله تريد عينيك
أبقالا في الظلمه.. البدُر
خليها في بالك دوام
أبنيلا في قلبك قصُر
وما يذلّك الضيق يا رفيق
خليكا زي نخل التمُر
ما يضيع عميرك في الحزن
بتعيشو كم مره العمر؟!
ما تشرب الكاس مرتين
ما يلدغك نفس الجُحُر
****
|
