هندسة الخراب...!
هندسة الخراب..!
شُفتِك..
يغازل في خطواتك
رمل الشارع التحتك..
وكان يوم داك
ضلك برضو معاك
المنو كم حزّرتك
ويوم تضاري منك فيك
بتفضح عنك
شهقة ضِحكِكْ
يامدلوقه في دربي رهاب
خليتك لي الله
وسامحتك
وىنا ماهمشتك
وكان رشحتك تبقي ملاك
ويوم رشحتك تبقي
ملاك...
إنتي اخترتي هواي براك
وتقيفي معاي لو
إحتجتِك
طقطق مِرقِك
اقلعي عِقِك
من الأرض يباب
واصلو زمنا عايز يبني
بينا صِعاب
ونبقي احباب..؟
نبقي احباب ضد الزمن
الهندس بينا خرآب
وضد البينا
إن كان البينا
ضباب...
شمسك شرقت
فلسي سجنك
وادُخلي القَلب من اي وريد
وشُفْتك
يوم عبيتي العيد للأطفال
وفرشتي الريد في السكة
في زمناً فيهو الريدة
نضال
وتتغمصك البت الشايله
شموخا عزت نخلة
ومن الحنضل تفرزي
طعم مذاق النحلة
وفي سري ضِحِكه
وقلت:
معقول الشارع كُلو
عمايا وماشافوك
وكت بتلملمي حُزن الناس التِحِت
الناس التِحِت الماعرفوك
وإنتِ معاي
صمتك بطلع من عينيك
كلام...
إلا صمتك فيهو ملأم
صمت العايزالقول
وضاق إنضام
قايتو احلبي الغيم الناشف
ضرعو
وشّدي لجام الخيل
النافره تمام...
ودُقي ابواب الفُقرا وادُخلي
إتوهطي فيهم
واشهري صوتك
ضد السُلطة
الماسكه السبحة
لجام
واشهري صوتِك...!
التعديل الأخير تم بواسطة الطيب نور الدائم الطيب ; 11-10-2010 الساعة 08:10 AM.
سبب آخر: تنسيق
|
