اقتباس:
اقتباس:
المشاركة الأصلية كتبت بواسطة أحمد طه 
صالح تاجاب سلامات
العزف على وتر النوبة و النوبيين و الحضارة النوبية مسألة ما مريحة ،
يعني خلاص السودان ده بقى كيمان ، الفور و الزغاوه و البجه و الفونج و النوبة و النوبيين ! ، وكل كوم يتحدث عن مصالحو الخاصة .. ياخي النعرات القبلية و الجهوية دي مابتودينا لي قدام ،
والضمان شنو لي قدام النوبيين ذاتم يبقو كيمان ؟ الدناقلة كوم و المحس كوم ..الخ ؟؟
كلامي ده ماليهو علاقة بإنشاء سد كجبار من عدمو ، ده موضوع تاني ما عندي معلومات كفايه عشان أفتي فيهو ، كلامي عن العصبية الجهوية الغير مريحة دي ،
يعني لامن ألقى بيان من (حركة تحرير كوش) ،، ده شنو يعني ؟؟ يحرروها من منو ؟ وليه يحرروا (كوش!) و يخلّو الباقي ؟؟ وهي كوش دي ما جزء من السودان الكبير ده ولاّ كيف ؟؟
على العموم أنا بعتبر إذكاء النعرات الجهوية دي واحدة من أكبر خطايا الإنقاذ ، بدت بدارفور و ما معروفة تنتهي وين
محبتي لك صالح اخوي ، و حاسّي والله بي غبينتكم !
|
حبابك أبو حميد اذا كان الفور والزغاوة وناس الشرق إتكلمو عن مصالحهم دة حق من حقوقهم كمواطنين. نحن كنوبة الحكومة جاية تعمل مصالحها (الخاصة) فى الأراضى النوبية. يا صديقى النوبيين مستشفياتهم ومدارسهم بتتعمل بمجهود خاص من الأهالى وكتر خير المغتربين اللى بيجى منهم الدعم وبعد دة كلو ما طالبنا الحكومة بى شئ مع إنو دة من حقنا لييييييييه تجى الحكومة تقول نعمل سد؟؟ وعشان مصلحة منو؟؟ واذا لى مصلحة المواطن إنت يا حكومة قول لى أنا كمواطن إنت حتستفيد كذا وكذا وكذا وحنسكنك فى الحتة الكذا ونعوضك كذا والسدود دة القصد الأساسى منها تنمية المنطقة الجديدة اللى حتترحل ليها بى دليل كذا وكذا.
إنت عارف يا أحمد طه أنا درست المرحلة الإبتدائبة فى البلد وكنت بمشى مشوار سبعة كيلو الصباح عشان أحصل المدرسة وأرجع نص النهار نفس المشوار, خلى بالك الكلام دة لمدة سبعة سنين حيث إنى درست الصف الرابع ولا الخامس ما عارف فى مدينة دنقلا, فبتذكر كان فى كتاب فى المدرسة كلها الكتاب دة منو تلاتة نسخ فقط. نسخة للأستاذ ونسختين لى باقى الطلبة.... ويجو يقولو ليك عاوزين نعمل ليك تنمية. ياخى نمونا فى بلدنا ولو ما عاوزين برضو كتر خيرك لكن أبعدو من أراضينا وإرثنا اللى إنتو ما بتفهمو فيهو ولاااااا سجم رمادكم. ياخى دى أقدم وأعرق حضارة فى التاريخ دة بيفهمو معنى الكلام دة كانو عملو الأراضى النوبية دى جنة وكان إستفاد المواطن وإستفادت حكومة الهم والغم.
تعرف يا أبو حميد غايتو لا قدر الله السودان دة أظن حيبقى الخرطوم بس.
قبل فترة قريت إنو واحد من المتمردين دارفور ديل قال إنو هو كمان حينفصل بى دارفور ولما سألوهو دارفور حدها وين قال حدود دارفور هى أم درمان. أهو ناس الشرق كمان أديهم صنة حيقومو. والنوبة برضو شايف برنامج سلاح وما سلاح وقطع شك برضو حننفصل علماً بأن حدود الأراضى النوبية فى إتجاه الخرطوم حتى أواسط مناطق الشايقية.
نتمنى دة كلو ما يحصل والحكومة تفوق وفتك بعافية ومشكور على مرورك
مودتى
